NI OTI e vica na siga na tau ni uca kei na liwa ni cagi, e qai lai vinaka na draki ena siga Moniti, na imatai ni Seviteba, 1919. Ena kena yakavi, a tekivu na soqo ni tikina e Cedar Point, Ohio, e Merika. E 2,500 na idabedabe ena vanua ni sarasara e kea, ia era gole ga yani e voleka ni 1,000. Ni sa lai yakavi sara, era qai gole yani e sivia e 2,000 era soko ena waqa, vodo yani ena motoka kei na sitimanivanua. Na levu ni tamata era gole yani ena Tusiti, sa lai caka kina ena veikau lelevu e tautuba na vo ni porokaramu ni soqo ni tikina.

E cila basikata na draunikau na siga, e lai vaka kina na irairai ni sulu talitali na nodra kote na turaga. Na mudre ni cagi mai na drano na Lake Erie e yavalata toka na vutinimanumanu e toka ena nodra isala na marama. E nanuma lesu kina e dua na tacida tagane: “E totoka dina na vanua keimami mai tu kina, yawa mai na kosakosa ni vuravura, e parataisi dina.”

E sega ni totoka sara na vanua qo ni vakatauvatani ena nodra mata mamarau na vakarorogo. E tabaki ena dua na niusiveva e kea: “E vaka mera guta kece na lotu, ia era sa bau mamarau dina.” Dua na ka nodra marautaka na Gonevuli ni iVolatabu na nodra mai soqo vata va qo, vakabibi ni kaukaua toka na veivakatovolei ena vica na yabaki sa oti: veitusaqati ena gauna ni ivalu; duidui vakalevu na rai ena ivavakoso; na sogo ni Peceli mai Brooklyn; nodra bala i valeniveivesu e levu ena vuku ni Matanitu ni Kalou, era wili kina e walu na tacida tagane era cicivaka tiko na isoqosoqo, e via 20 na yabaki na balavu ni nodra vesu. *

Era sega ni via vunau eso na Gonevuli ni iVolatabu nira veilecayaki qai vakayalolailaitaki ira na gauna dredre qori. Ia e levu era solia nodra vinaka mera vosota na vakatatabu vakamatanitu. Kena ivakaraitaki, e dua na dauveivaqaqai e sa vakasalataka vakaukaua eso na Gonevuli ni iVolatabu, ia era vakadeitaka nira na “vunautaka tiko ga na vosa ni Kalou me yacova na icavacava.”

Ena gauna dredre qori, era “raica tiko ga” na Gonevuli ni iVolatabu yalodina na nona “veiliutaki na Turaga” ra qai “masuta e veigauna nona veidusimaki na Tamada.” Ia qo era marautaka vata nodra soqo ni tikina e Cedar Point. E kaya kina e dua na tacida na ka era nanuma eso tale, oya se ra na vakalevutaka vakacava nodra cakacaka kei na vunau ena ituvatuva veiganiti. Era sega tale ni via wawa.

Ena loma ni macawa ya, era lomatarotarotaka na gole yani ena soqo ni tikina na matanivola e tabaki tiko ena porokaramu ni soqo, na ivola ni veikidavaki, kei na vakatakilakila e biu wavoki ena vanua ni soqo, oya na matanivola “GA.” Ia ena siga Vakaraubuka, e vakatokai me “Co-Laborers’ Day,” e qai mai tukuna kina o Joseph F. Rutherford vei ira na le 6,000 na vakarorogo tiko na ibalebale ni matanivola, oya e dusia na Golden Age—mekesini vou me vakayagataki ena cakacaka vakaitalatala. *

E vakamacalataki ira nona itokani lumuti o Brother Rutherford ena nona kaya: “E tu vei ira na vakabauta ena gauna dredre, era raica na iTabagauna Uasivi (Golden Age) ni nona veiliutaki lagilagi na Mesaia. . . . Era raica me ka dokai, e nodra itavi bibi tale ga mera vunautaka e veiyasa i vuravura na kena sa voleka mai na iTabagauna Uasivi. E okati tiko ena nodra ilesilesi soli vakalou.”

Qo e tabaki tu ena waqa ni mekesini The Golden Age, “Mekesini ni Dina, iNuinui, kei na Vakabauta (Journal of Fact, Hope, and Conviction).” E dau vakayagataki na mekesini qo me tekivu kina e dua na iwalewale vou ni kena vunautaki na ka dina—me soli kina na ikere ni mekesini qo ena veivalevale. Ni tarogi se vica era na vinakata mera vakaitavi ena cakacaka qori, era duri kece ena marau na vakarorogo. E laurai vei ira na “marau kei na yalogu e kilai ga vei ira na muria na weniyava i Karisito” ra qai lagata: “Kemuni na Turaga, ni vakacilava mai na rarama kei na dina.” Na kena rogo levu e nanuma lesu kina o J. M. Norris “Au nanuma vinaka tu ga ni vaka me kurei vakalailai na vunikau.”

Ni oti qori, era laini tu me vica na aua na gole yani ena soqo ni tikina mera taura na imatai ni nodra ikere ni mekesini qo. E levu era duavata kina kei Mabel Philbrick ena nona kaya: “Keimami marautaka dina ni sa tu tale na cakacaka me qaravi!”

Era vakavakarau sara e rauta ni le 7,000 na Gonevuli ni iVolatabu. E vakamacalataka vakamatailalai na itavi na tikidua na Organization Method kei na ivola lailai To Whom the Work Is Entrusted: Sa na veidusimaki ena itavi me qaravi na Tabana e Qarava na Cakacaka. Ena dua na Komiti ni Cakacaka ena ivavakoso, ena lesi tale ga e dua na dairekita me vakasavuya na ka e vinakati me caka. Me wasewasei na yalava mai na 150 na vale ina 200. Ena caka ena yakavi ni Lotulevu na Soqoni ni Cakacaka mera tukuna kina na mataveitacini eso na irogo, mera solia tale ga kina nodra ripote ni cakacaka.

E tukuna o Herman Philbrick: “Ni keimami lesu i vale, keimami ogaoga sara ena soli ni ikere.” Era vakarorogo kece o ira era sotava. E kaya o Beulah Covey: “Ni oti na ivalu kei na levu ni rarawa e vakilai, vaka mera duavata na tamata ena vakasama me baleta e dua na itabagauna uasivi.” E vola o Arthur Claus: “Era kidroa sara ga na ivavakoso kece ena iwiliwili levu ni ikere.” E voleka ni veimama na milioni na sabolo ni imatai ni itabataba ni Golden Age e veisoliyaki ena loma ga ni rua na vula, era vinakata tale ga e le 50,000 na ikere ni mekesini qo.

E tukuna o A. H. Macmillan me baleta na ulutaga “Gospel of the Kingdom” (Kosipeli ni Matanitu), ena Vale ni Vakatawa ni 1 Julai, 1920 ni qo na imatai ni gauna e uqeti ira kina na mataveitacini kece e veiyasa i vuravura na isoqosoqo mera vunautaka na Matanitu ni Kalou. E uqeti ira kece na lotu vaKarisito lumuti na ulutaga qori “mera vakadinadinataka e veiyasa i vuravura ni sa voleka na matanitu vakalomalagi.” Nikua, “e tataunaki na cakacaka” vei ira na taci Karisito, ia nira waraka tiko na itabagauna uasivi ni Mesaia, era tomani ira e vica vata na milioni na dau guta mera vunautaka na vosa ni Kalou.