RAU vakamau ena Seviteba 2000 o Daniel kei Miriam, rau vakaitikotiko sara ena koro o Barcelona mai Sipeni. E talanoataka o Daniel: “Keirau marautaka na neirau bula. Na neirau cakacaka saumi e rawa kina ni keirau kana ena valenikana saulevu, gole e vanuatani, rawa tale ga ni keirau volia na isulu totoka. Keirau vakaitavi wasoma ena cakacaka vakaitalatala.” Ia e mani veisau kece qori.

Ena soqo ni veiwasewase ni 2006, e uqeti Daniel e dua na ivunau e tarogi kina: “Vakaevei, eda sa cakava tiko noda vinaka kece meda vukei ira kina na ‘yarataki mera mate’ mera kunea na sala e basika ina bula tawamudu?” (Vkai. 24:11) E vakabibitaki ena ivunau qori me kacivaki na itukutuku ni veivakabulai ena iVolatabu. (Caka. 20:26, 27) E nanuma lesu o Daniel, “E vaka sara ga e vosa tiko vei au o Jiova.” E vakamacalataki tale ga ena ivunau qo ni marautaki vakalevu na noda vakarabailevutaka na noda cakacaka vakaitalatala. E vakabauta o Daniel ni ka dina qori. Sa tekivu painia tiko o Miriam qai marautaka na veivakalougatataki e vakila kina.

E tukuna o Daniel, “Au nanuma ni sa kena gauna meu veisau.” E cakava vaka kina. E vakalailaitaka nona gauna ni cakacaka, e painia qai vakasamataka na marau erau na vakila ke rau veiqaravi ena vanua e vinakati kina na veivuke.

Ena Me 2007, erau kere vakacegu mai na nodrau cakacaka o Daniel kei Miriam me rau gole i Panama, rau a gade kina ena dua na gauna sa oti. E vica toka na kena yanuyanu ena Bocas del Toro, qo ena Wasa na Caribbean, ra qai tawana vakalevu na itaukei, o ira na Ngabe. Rau nanuma o Daniel kei Miriam me rau vakayagataka na nodrau ilavo maroroi me rau vula walu kina e Panama.

Erau vodo waqa kei na basikeli ena veivanua qori, rau nanuma vinaka tu ga na imatai ni nodrau vodo basikeli, rauta ni 32 na kilomita ena veivanua baba qiqo qai katakata tu na siga. E voleka sara ga kina ni rebo o Daniel ena levu ni wawale. Ia dua na ka nodra veikauaitaki na vuvale itaukei ni rau yaco yani, vakabibi ni rau sa vulica eso na vosa rawarawa ni vanua ya. Sega ni dede, sa 23 na nodrau vuli iVolatabu.

E yaco na gauna me sa oti na nodrau ilavo, e vuki nodrau marau me rarawa. E tukuna o Daniel: “E tonawanawa na mata i keirau ni keirau vakasamataka na neirau sa na lesu i Sipeni. Dua na ka neirau rarawa nira sa na biu tu mai na gonevuli.” Ia ni oti ga e dua na vula, e vakasavui vei rau e dua na itukutuku vinaka. E kaya o Miriam: “Keirau sureti me keirau painia lavotaki. Dua na ka na neirau marau ni rawa ni keirau tiko ga ena vanua qori!”

Ena 2015, ena vuku ni veiveisau ena isoqosoqo, rau sa painia tudei o Daniel kei Miriam. Na cava erau na cakava? Erau nuitaka na yalayala ena Same 37:5: “Tataunaka na nomu sala vei Jiova, vakararavi vua, ena qai yavala ena vukumu o koya.” Erau kunea e dua na cakacaka me rawa ni vukei rau ena painia, ena gauna qo rau sa veiqaravi tiko ena dua na ivavakoso ena yasana o Veraguas mai Panama.

E vola o Daniel: “Ni bera ni keirau biuti Sipeni, keirau sega ni kila se rawa ni keirau bula rawarawa ga se sega. Nikua keirau sa rawata, keirau sega tale ga ni lekata na veika bibi.” Na cava erau marautaka vakalevu? Erau kaya, “Na neirau vukei ira na yalomalumalumu mera mai kilai Jiova, qori na marau e sega ni tukuni rawa!”