“Au dau mamadua,” e kaya o Sera, * “au dau beci au tu ga. Au sega ni rawata na veimaliwai kei ira era dau yalototolo. Ia au lomavakacegu niu veimaliwai kei na dua e yalomalua, e yalomalumalumu. Au rawa ni tukuna vua na noqu rai kei na noqu leqa. Qori na ka era kilai kina na noqu itokani.”

Na ka e tukuna o Sera e dusia nira na taleitaki keda e levu nida yalomalua. Na itovo qori e taleitaka o Jiova. E vakamasuti keda na nona Vosa: “Moni vakaisulu ena . . . yalomalua.” (Kolo. 3:12) Na cava na yalomalua? Sala cava e vakaraitaka kina o Jisu na yalomalua? E vakamarautaki keda vakacava na itovo qo?

Eda rawa ni yalomalua ke da dau veiyaloni. O koya e yalomalua ena dau yalovinaka vei ira eso tale, ena vakaraitaka tale ga na yalomalua kei na lewa vinaka ni dredre na ituvaki.

Na yalomalua e ivakaraitaki ni yaloqaqa. Na vosa vaKirisi ni “yalomalua” e dusia na kena vakamanoataki e dua na ose kila. E se tiko ga na kaukaua ni ose, ia e vakavulici tiko ga me lewa vinaka. E va tale ga qori noda vakaraitaka na yalomalua. Eda qarauna na itovo ca da qai veiyaloni tiko ga.

De dua eda na kaya, ‘Au sega ni dau yalomalua.’ Eda bula ena vuravura e levu kina na veivala kei na yalototolo. E ka ni sasaga toka meda vakaraitaka na yalomalua. (Roma 7:19) E vinakati gona na sasaga meda bucina na itovo qori. Ia ena vukei keda na yalo tabu i Jiova. (Kala. 5:22, 23) Na cava meda saga kina meda vakaraitaka na yalomalua?

Era dau taleitaki na yalomalua. Me vakataki Sera sa cavuti oti, eda vinakata meda veimaliwai kei ira na yalomalua. E ivakaraitaki vinaka sara o Jisu ni dau yalomalua, e yalovinaka tale ga. (2 Kor. 10:1) Eso mada ga na gone era sega sara ga ni kilai Jisu, ia era vinakata mera toro volekati koya.—Mari. 10:13-16.

E yaga vei keda kei ira eda dau veimaliwai na yalomalua. Ke da yalomalua, eda na sega ni cudru totolo se yalototolo. (Vkai. 16:32) Eda na sega ni vakararawataka e dua, vakabibi e dua eda lomana. Ena sega ni ora na  lomada. E yaga tale ga vei ira eda veimaliwai nida lewa vinaka na lomada kei na noda itovo, eda sega kina ni vakararawataki ira.

E levu na itavi bibi e qarava o Jisu, e osooso tale ga, ia e dau yalomalua vei ira e levu. Levu ena gauna ya era oca, era bikai tu ena icolacola bibi ra qai vinakata mera vakacegui. Ena vakacegui ira mada ga na ka e tukuna vei ira o Jisu: “Ni lako mai vei au . . . niu yalomalumalumu, au yalomalua tale ga”!—Maciu 11:28, 29.

Eda na vakaraitaka vakacava na yalomalua me vakataki Jisu? Meda vulica ena Vosa ni Kalou nona dau veimaliwai o Jisu kei na ka e cakava ni dredre na ituvaki. Nida donuya na ituvaki e vakatovolei kina na noda yalomalua, eda saga meda muria na ivakaraitaki i Jisu. (1 Pita 2:21) Dikeva mada e tolu na ka e uqeti Jisu me yalomalua.

E yalomalumalumu o Jisu. E tukuna o Jisu ni “yalomalumalumu, [e] yalomalua tale ga.” (Maciu 11:29) Na iVolatabu e cavuti rau vata na itovo qo ni veisemati vinaka na yalomalua kei na yalomalumalumu. (Efeso 4:1-3) Na cava eda kaya kina qori?

Nida yalomalumalumu, eda na sega ni cudruvaka totolo na ka era tukuna eso me baleti keda. Na cava e cakava o Jisu nira vakalewai koya eso ni “daukana” qai “daugunu waini”? E vakaraitaka ena ka e cakava ni sega ni dina qori, e tukuna tale ga ni “kilai na vuku ena ka e cakava.”—Maciu 11:19.

Vakacava ke dua e vakalewa na nomu isususu, nomu vanua, ke o yalewa se tagane. O na vosa ena yalomalua? E kaya o Peter, e dua na qase ni ivavakoso e Sauca Aferika: “Ni votivoti vei au na ka e tukuna e dua, au dau taroga, ‘Na cava ena cakava o Jisu?’” E kuria: “Au vulica meu kua ni yalototolo.”

E kila o Jisu na noda malumalumu. E dau vinaka na nodratou inaki na tisaipeli i Jisu. Ia ni tiko na nodratou malumalumu, eso na gauna eratou sega ni cakava na ka e dodonu. Kena ivakaraitaki, ena bogi ni bera ni mate o Jisu, eratou sega ni yadra vata tiko kei Jisu o Pita, Jemesa, kei Joni me vaka e kerea. E kila o Jisu na vuna eratou moce kina, ni kaya “e gu na yalo, ia sa malumalumu ga na yago.” (Maciu 26:40, 41) Ni kila o Jisu na nodratou malumalumu, sa rauta me sega ni cudruvi ratou na nona yapositolo.

O Mandy, e dua na tacida yalewa dau vakalelewa. Ia qo e saga me vakatotomuria na yalomalua i Jisu. E kaya, “Au saga meu nanuma tiko nida sega ni uasivi, ia meu kauaitaka ga na nodra itovo vinaka me vaka e dau cakava o Jiova.” Vakacava ena uqeti iko na ivakaraitaki i Jisu mo yalomalua tiko ga vei ira eso tale?

E nuitaki Jiova o Jisu. E vosota o Jisu na veika tawadodonu ni tiko e vuravura. Levu e cala na ka era nanuma me baleti koya, e beci, e vakararawataki tale ga. Ia e yalomalua tiko ga ni “vakanuinui . . . vei koya e dau lewa vakadodonu.” (1 Pita 2:23) E kila o Jisu ni na vukei koya na Tamana vakalomalagi me vosota, ena totogitaki ira tale ga era vakararawataki koya ena kena gauna donu.

Ke da cudruvaka ni caka vei keda na ka tawadodonu, ena rawa ni tini ca. Oya na vuna e tukuna kina na Vosa ni Kalou: “Ni sega ni kauta mai na yalododonu ni Kalou na cudru ni tamata.” (Jeme. 1:20) Ke tiko na vuna vinaka eda cudru kina, ena rawa ni vakacalai keda tale na noda malumalumu.

E dau nanuma tu o Cathy, e dua na tacida yalewa mai Jamani, ‘Ke o sega ni cakava e dua na ka, ena sega ni dua e kauai kina.’ Ia e veisau na nona rai ni vulica me nuitaki Jiova. E kaya: “E sega tale ni vinakati meu cakava e dua na ka. Au sa rawa ni yalomalua, niu kila ni na qai vakadodonutaka o Jiova na ka kece e vuravura.” Ke caka vei iko na ka tawadodonu, ena uqeti iko tale ga nona nuitaki Jiova o Jisu mo yalomalua tiko ga.

E vakamacalataka o Jisu ke da via marau, e bibi meda yalomalua. E kaya: “Era marau na yalomalua.” (Maciu 5:5) Dikeva na sala e yaga kina na yalomalua ena ituvaki qo.

Ena vinaka kina na vakawati. E kaya o Robert, e dua na tacida mai Ositerelia: “E levu na vosa mosimosi au dau cavuta vei watiqu, ia au sega ni nakita. Niu vosavosataki koya ena cudru, au na tini veivutunitaka ga. E ca sara ga vei au niu vakararawataki koya.”

“Eda dau tarabe kece” ena ka eda tukuna, na vosa mosimosi gona ena vakaleqai rau na veiwatini. (Jeme. 3:2) Ena gauna va qori, nida yalomalua eda na sega ni cudru totolo kina, eda na lewa vinaka tale ga na ka eda tukuna.—Vkai. 17:27.

E sasaga o Robert me vakaraitaka na yalomalua kei na lewai koya vinaka. Na cava e yaco? E kaya: “Nikua, ni keirau duiyaloyalo, au dau saga meu vakarorogo vinaka, vosa vakamalua, au sega ni vinakata meu cudru. Sa vinaka sara na neirau veimaliwai vakaveiwatini.”

Eda na veimaliwai vinaka kina. O ira na yalototolo ena sega ni levu na nodra itokani. Ia na yalomalua ena uqeti keda meda “maroroya” na ivau ni “veiyaloni.” (Efeso 4:2, 3) E kaya o Cathy, sa cavuti oti mai, “E sega ni dau rawarawa meda veimaliwai vinaka kei na so tale. Ia niu yalomalua, au na marautaka noqu veimaliwai.”

Eda na lomavakacegu kina. Na iVolatabu e sema na “vuku mai cake,” na yalomalua, kei na vakacegu. (Jeme. 3:13, 17) O koya e yalomalua e dau “yalovinaka.” (Vkai. 14:30) E sasaga o Martin me vakaraitaka na yalomalua. E kaya, “Nikua, au sa yalorawarawa vakalevu, au sega ni usuraka ga na noqu rai, dua na ka na noqu marau kei na lomavakacegu.”

De dua ena sega ni rawarawa meda vakaraitaka na yalomalua. E kaya e dua na tacida tagane: “Meu tukuna na ka dina, me yacova mai nikua, au dau yalokatakata ena so na gauna.” Ia o Jiova e uqeti keda meda vakaraitaka tiko ga na yalomalua. O koya ga ena vukei keda ena noda sasaga. (Aisea 41:10; 1 Tim. 6:11) Ena ‘vakacavara nona vakarautaki keda’; ena ‘vakaukauataki keda’ tale ga. (1 Pita 5:10) Me vaka na yapositolo o Paula, toso na gauna eda na vakatotomuria na “yalovinaka kei na yalololoma i Karisito.”—2 Kor. 10:1.