E veisautaka sara ga na noqu bula na ka vakadomobula a yaco qori, tekivu kina noqu via kila na Dauveibuli. Ni bera niu talanoataka na ka e yaco ena bogi buto qori, meu talanoataka mada na ka e yaco niu se gone e uqeta na noqu vakasama, qai vakarautaka na lomaqu meu qara na Kalou.

Au sucu ena 1937 e Guesnain, dua na tauni ni keli koala ena vualiku kei Varanise. Au vulica vei tamaqu, e dau keli koala, na yaga ni cakacaka vakaukaua. E vakavulici au tale ga meu dau cata na veika tawadodonu, qo e uqeti koya me vukei ira na dau keli koala nira vosota voli na ituvaki dredre ena nodra vanua ni cakacaka. E vinakata o Ta me vakavinakataka na kedra ituvaki, e mani lewena na isoqosoqo e valataka na nodra dodonu na tamata cakacaka, e vakaitavi tale ga ena nodra vakabesebese. Kena ikuri, e sega ni taleitaka na nodra veivakaisini na bete. E levu tu vei ira na ka, ia ra kere kakana kei na ilavo vei ira na keli koala dravudravua. E cata o Ta na nodra ivalavala na bete, sega kina ni vakavulici au ena dua na ka ni lotu. Keirau sega  mada ni bau veivosakitaka na ka me baleta na Kalou.

Niu tubu cake tiko, au sega ni dau taleitaka na veika tawadodonu. Qo e okati kina na nodra vakaduiduitaki na vulagi era vakaitikotiko e Varanise. Au dau qito soka kei ira na luvedra na vulagi, au taleitaka na veimaliwai kei ira. Kena ikuri, e sega ni marama ni Varanise o tinaqu, e marama ni Poladi. Au vinakata sara ga mera bula veiyaloni na veimatatamata, mera kua ni vakaduiduitaki.

Au curu ena mataivalu ena 1957, ya na vuna au lai tu kina ena veiulunivanua e Algeria ena bogi buto sa vakamacalataki oti mai. Ni oti noqu kailavaka, “Kemuni na Kalou! Ni vukei au!” keirau sota mamaca kei na dua na asa kila, sega ni dua na meca! E lutu sara ga na noqu icegu! Ia na ka e yaco qori vaka kina na ivalu, e vakavuna meu vakasamataka vakabibi na bula. Eda mai bula tu vakacava eke? E kauaitaki keda na Kalou? Ena rawati na bula vakacegu?

Dua na gauna niu gade vei rau na noqu itubutubu, au sotava e dua na iVakadinadina i Jiova. E solia vei au na La Sainte Bible, qo na iVolatabu ni Katolika ena vosa vakaVaranise, au tekivu wilika sara niu lesu i Algeria. Dua na tikinivolatabu e uqeti au sara ga na Vakatakila 21:3, 4. E kaya: “E sa tiko vei ira na tamata na vale ni Kalou. . . . Ena qusia tani tale ga na wainimata kece mai na matadra, sa sega tale na mate, na lolosi, na tagiyaso, kei na mosi.” * Au kurabuitaka sara ga na vosa qo. Au vaqaqa ‘Ena yaco dina?’ Ena gauna qori au sega sara tu ga ni kila e dua na ka me baleta na Kalou kei na iVolatabu.

Niu biubiu mai na mataivalu ena 1959, au sotava e dua na iVakadinadina i Jiova na yacana o François, e vakavulici au ena levu na ka dina vakaivolatabu. Kena ivakaraitaki, e vakaraitaka vei au na yaca ni Kalou, ya o Jiova. (Same 83:18) E vakamacalataka tale ga o François ni na vakaotia o Jiova na veika tawadodonu e vuravura, ena vukica na vuravura me parataisi, qai vakayacora na ka e tukuni ena Vakatakila 21:3, 4.

E vakaibalebale sara ga na ivakavuvuli qori, e uqeti au. Ia au rarawataki ira na bete, au vinakata meu vosataki ira nira vakavulica na ka e sega ni tu ena iVolatabu! Kena irairai ni uqeti au na rai nei tamaqu, au qai yalototolo. Au vinakata sara ga meu cakava totolo e dua na ka!

E vukei au o François kei ira na noqu itokani vou era iVakadinadina i Jiova meu lewai au vinaka. Era vakamacalataka ni sega ni noda itavi na lotu vaKarisito meda vakataulewa, ia meda wasea na inuinui nida vunautaka na itukutuku vinaka ni Matanitu ni Kalou. Qori na cakacaka e cakava o Jisu, e lesia tale ga vei ira na nona imuri mera cakava. (Maciu 24:14; Luke 4:43) Au vulica meu dau vosa ena yalovinaka kei na veidokai ke duidui mada ga na nodra vakabauta na lewenivanua. E kaya na iVolatabu: “E sega ni dodonu me veivala na bobula ni Turaga, me yalomalua ga vei ira kece.”—2 Tim. 2:24.

 Au vakayacora na veiveisau qai papitaiso meu iVakadinadina i Jiova ena 1959 ena dua na soqo ni tabacakacaka. Au sotava e keri e dua na goneyalewa o Angèle, au taleitaki koya. Au lai soqoni ena so na gauna ena ivavakoso e lewena, keirau mani vakamau ena 1960. E goneyalewa vinaka qai totoka, e isolisoli talei mai vei Jiova.—Vkai. 19:14.

Ena veiyabaki sa sivi, au vulica e levu na ka bibi vei ira na tagane matua. Dua, meda qarava vinaka e dua na itavi dredre ena vinakati meda yalomalumalumu da qai muria na ivakasala e laurai ena Vosa Vakaibalebale 15:22, e kaya: “E vakavatukana na sasaga ni levu na daunivakasala.”

Ena 1964 au vakadinadinataka na dina ni vosa uqeti qori. Au tekivu veiqaravi vakaivakatawa ni tabacakacaka ena yabaki qori, meu sikovi ira na ivavakoso, meu vakayaloqaqataki ira qai vukei ira mera toro voleka vei Jiova. Ia au se yabaki 27 ena gauna qori qai sega ni levu na ka au kila. E levu noqu cala, ia au saga meu vuli kina. Koya e bibi sara, au vulica e levu na ka bibi vei ira na “daunivakasala” matua.

Au vakasamataka e dua na kena ivakaraitaki. Ni oti noqu sikova e dua na ivavakoso e Parisi, e gole mai e dua na tacida matua qai tukuna ni via vosa vei au. Au kaya: “Sa donu.”

E taroga, “Louis, ni gole mai vale e dua na vuniwai ena lai raici cei?”

Au kaya: “O koya e tauvimate.”

E kaya: “Donu. Ia au raica ni levu na gauna o vakayagataka tiko vei ira na toso vinaka vakayalo, me vakataki koya na ivakatawa ni ivavakoso. E levu ena neitou ivavakoso era dau yalolailai, era ka vou se ra mamadua. Era na marautaka sara ke o veimaliwai vakalevu kei ira, de dua mo gole i nodra vale mo lai kana vata kei ira.”

E donu vinaka na nona ivakasala na tacida qo, e yaga tale ga. E uqeti au sara ga na nona lomani ira na sipi i Jiova. E sega ni rawarawa meu ciqoma niu a cala, ia au muria totolo na ka e tukuna. Au vakavinavinakataki Jiova ni tiko o ira na tacida va qo.

Ena yabaki 1969 kei na 1973, au lesi meu raica na Tabana ni Kakana ena rua na soqo ni  veimatanitu e Colombes, Parisi. Ena soqo ni 1973 e rauta ni le 60,000 e vinakati mera vakani ena loma ga ni lima na siga! Au sega sara ga ni kila na ka meu cakava. Ia e rawati ga ena ivakasala ena Vosa Vakaibalebale 15:22, meu kere ivakasala vei ira na vuku. Au mani kere ivakasala vei ira na tagane matua vakayalo era dau cakacaka ena tabana ni kakana. Era okati kina o ira na dau volitaki lewenimanumanu, ira na dau tei kakana draudrau, ira na dau vakasaqa kei ira na dau volivoli. Keimami cakacaka vata me keimami qarava na itavi levu qo.

Ena 1973, keirau sureti vakaveiwatini me keirau veiqaravi e Peceli e Varanise. E sega sara ga ni rawarawa na imatai ni noqu ilesilesi. E vinakati me vakau na ivola vei ira na mataveitacini e Cameroon mai Aferika, e vakatabui tu kina na noda cakacaka mai na 1970 ina 1993. Au sega ni kila keu rawa ni cakava, de dua e kidava qo na tacida e liutaka tiko na cakacaka e Varanise, mani uqeti au, ‘O ira na tacida mai Cameroon era vinakata sara tu ga na kakana vakayalo, meda vakani ira.’ Qori sara ga na ka keimami qai cakava.

Au lako vakavica vata ina veivanua volekati Cameroon meu sotavi ira na qase ni ivavakoso ena vanua qori. Era tagane yalomatua, era yaloqaqa tale ga. Era vukei au ena kena tuvanaka me vakau vakawasoma na kakana vakayalo i Cameroon. E vakalougatataka na neimami sasaga o Jiova. Me rauta ni 20 na yabaki era sega ni calata na mataveitacini ena vanua qori e dua na ilavelave ni Vale ni Vakatawa kei na ivola e dau tabaki e veivula e vakatokai na Our Kingdom Service (Na Noda iTavi ina Matanitu).

Ni tekivu neirau veivosaki, au raica na nona itovo vakayalo o Angèle. E laurai vakalevu na itovo qori ena neirau bula vakawati.  Ena yakavi ni siga ni neirau vakamau e kerei au meu masulaka na neirau vinakata vakaveiwatini me keirau qaravi Jiova ena kena levu. E rogoca o Jiova na masu qori.

E vukei au tale ga o Angèle meu nuitaki Jiova vakalevu. Kena ivakaraitaki: Ena 1973 ni keirau sureti me keirau veiqaravi e Peceli, au lomalomarua niu taleitaka vakalevu na veisiko ena ivavakoso. Ia e tukuna vei au o Angèle nida yalataka noda bula vei Jiova, meda cakava ga na ka e kerea vei keda na nona isoqosoqo. (Iper. 13:17) Au duavata sara ga kei na vakasama ya! Keirau gole sara i Peceli. Ena neirau bula vata mai e vakaraitaka tiko ga o watiqu na vuku, yalomatua kei na lewamatau. Qo e vakadeitaka sara ga neirau bula vakawati, e vukei keirau me keirau dau vakatulewa vakayalomatua.

Ni keirau sa qase mai, e veitokoni tiko ga o Angèle. Me kena ivakaraitaki, me keirau tiko ena koronivuli e vakarautaka na isoqosoqo e dau vakayacori ena vosa vakavalagi, keirau sasaga sara kei Angèle me taladrodro neirau vosa vakavalagi. Keirau mani lewena e dua na ivavakoso e vosataka na vosa vakavalagi ni keirau sa yabaki 70 vakacaca ena gauna qori. Ni levu noqu itavi niu lewena na Komiti ni Tabana e Varanise, e dredre toka meu vulica e dua tale na vosa. Ia keirau veivuketaka kei Angèle. Keirau sa yabaki 80 vakacaca ena gauna qo, keirau vakavakarau ena soqoni ni ivavakoso ena vosa vakavalagi kei na vosa vakaVaranise. Keirau saga tale ga me wasoma na neirau soqoni, keirau vakaitavi tale ga ena cakacaka vakaitalatala kei na ivavakoso. E vakalougatataka o Jiova na neirau sasaga me keirau vulica na vosa vakavalagi.

Dua na veivakalougatataki levu e yaco ena 2017. Keirau sureti kei Angèle me keirau tiko ena vuli ni Lewe ni Komiti ni Tabana kei na Watidra. E vakayacori ena Watchtower Educational Center e Patterson, mai Niu Yoka.

Io, o Jiova na Dauniveivakavulici Levu. (Aisea 30:20) Sega ni kurabuitaki gona nira vakavulici vinaka na nona tamata, ya o ira na qase kei na itabagone! (Vkru. 4:5-8) Au raica nira toso vinaka vakayalo na itabagone era vakarorogo vei Jiova kei ira na mataveitacini matua, era yalodina tale ga. E tukuna na Vosa Vakaibalebale 9:9: “Mo tubera na tamata vuku, ni na vuku vakalevu. Mo vakavulica na yalododonu, ni na levu kina na ka e kila.”

Eso na gauna au dau vakasamataka na bogi buto rerevaki ya ena veiulunivanua e Algeria rauta ni 60 na yabaki sa oti. Au sega sara ga ni kila na bula marautaki au na sotava. Au vuli vakalevu vei ira eso tale! E vakarautaka vei au o Jiova, vaka kina vei Angèle na bula vinaka duadua e vakainaki. Keirau nakita dei me keirau vuli tiko ga vua na Tamada vakalomalagi vaka kina vei ira na mataveitacini matua era lomani koya.