1-2. Na ituvaki cava era sotava na tacida?

E UQETI Timoci na yapositolo o Paula kei keda kece na lotu vaKarisito, meda vakacavara vinaka na noda cakacaka vakaitalatala. (2 Tim. 4:5) Eda sa muria kece tiko na ivakasala i Paula, ia e sega ni rawarawa ena so na gauna. E vinakati mera yaloqaqa eso na tacida nira lai vunau. (2 Tim. 4:2) Kena ivakaraitaki, vakasamataki ira na tacida ena vanua e vakadredretaki kina na noda cakacaka se vakatabui. Era lai vunau nira kila ni rawa nira vesu!

² E duidui na ituvaki era sotava na tacida e rawa ni vakayalolailaitaki ira. Kena ivakaraitaki, levu era cakacaka vakaukaua mera vakarautaka na ka me bula kina na nodra vuvale. Era via vakalevutaka na nodra cakacaka vakaitalatala, ia era wawale ena muanimacawa. Eso tale sa lailai ga na ka e rawa nira cakava ena vuku ni tauvimate bibi, se bula vaqase, de dua era sa tu ga vakadua e vale. Eso tale era nanuma ni sega na kedra yaga. E kaya e dua na tacida o Mary, * mai na Tokalau e Loma: “Niu yalolailai, e ka ni sasaga meu lewa vinaka na ivakarau ni lomaqu, qori e vakaocai au sara ga. Oti au sa qai rarawa tu ni sega noqu gauna kei na kaukaua meu lai vunau kina.”

3. Na cava eda na veivosakitaka ena ulutaga qo?

³ Ke dredre mada ga na ituvaki, o Jiova ena vakaukauataki keda meda vosota, meda qaravi koya tiko ga ena kena levu eda rawata. Ni bera nida veivosakitaka na sala e vukei keda kina o Jiova, meda dikeva mada na sala e vakayaloqaqataki Paula kina kei Timoci me rau vakayacora vinaka na nodrau cakacaka vakaitalatala ni dredre na ituvaki.

4. Na ka dredre cava e sotava o Paula?

⁴ E levu na veika dredre e sotava o Paula. E vinakata sara ga me vakayaloqaqataki ni mokulaki, vakaviriki ena vatu, e curu tale ga e valeniveivesu. (2 Kor. 11:23-25) E sega ni maduataka o Paula me tukuna ni dau yalolailai ena so na gauna. (Roma 7:18, 19, 24) E vosota tale ga e dua na mataqali mate e vaka tiko na “votonikau,” e vinakata sara ga me kauta tani vakatotolo o Jiova.—2 Kor. 12:7, 8.

5. Na cava e rawa ni cakava o Paula ni dredre na ituvaki?

⁵ E vakaukauataki Paula o Jiova me vunau tiko ga ni dredre na ituvaki. Dikeva mada na ka e rawa ni cakava o Paula. Kena ivakaraitaki, ni vesu tu ena dua na vale mai Roma, e gumatua tiko ga ni vunautaka na itukutuku vinaka vei ira na nodra iliuliu na Jiu, de dua vei ira tale ga na vakailesilesi ni matanitu. (Caka. 28:17; Fpai. 4:21,22) E vunau tale ga vei ira e levu na Sotia ni Roma kei ira na sikovi koya yani. (Caka. 28:30, 31; Fpai. 1:13) Ena gauna tale ga qori, e uqeti vakalou o Paula me vola eso na ivola e yaga vei ira na lotu vaKarisito dina me yacova mai nikua. E vakayaloqaqataki ira tale ga ena ivavakoso e Roma na nona ivakaraitaki, era “yaloqaqa kina ni tukuna na vosa ni Kalou ena doudou.” (Fpai. 1:14) Eso na gauna e vakaiyalayala ga na ka e rawa ni cakava o Paula, ia e cakava ga na ka e rawata, e mani “tete kina na itukutuku vinaka.”—Fpai. 1:12.

6. Me vaka e tukuni ena 2 Korinica 12:9, 10, na cava e vukei Paula me vakayacora vinaka nona cakacaka vakaitalatala?

⁶ E kila o Paula ni ka kece e cakava ena nona qaravi Jiova, e rawati ga ena kaukaua ni Kalou, sega ni nona. E kaya ni “taucoko” na kaukaua ni Kalou ena ‘nona malumalumu.’ (Wilika 2 Korinica 12:9, 10.) E vakayagataka o Jiova na nona yalo tabu me vakaukauataki Paula me vakayacora vinaka na nona cakacaka vakaitalatala ni tusaqati, curu e valeniveivesu, kei na so tale na ituvaki.

7. Na veika dredre cava e vosota o Timoci me vakayacora vinaka kina na nona cakacaka vakaitalatala?

⁷ E nuitaka tale ga na kaukaua ni Kalou na itokani i Paula na cauravou o  Timoci, me vakayacora vinaka nona cakacaka vakaitalatala. E dau tomani Paula o Timoci ena nona ilakolako vakaulotu. E dau talai koya tale ga o Paula me sikova eso na ivavakoso me vakayaloqaqataki ira. (1 Kor. 4:17) De dua e dau beci koya o Timoci. Oya na vuna e rairai tukuna kina vua o Paula: “Me kua sara ni dua e beci iko ni o se cauravou.” (1 Tim. 4:12) Ena gauna tale ga qori, e vakila o Timoci na votonikau, ya na “mate e dau tauvi” koya. (1 Tim. 5:23) Ia e kila o Timoci ni na vakaukauataki koya na igu kaukaua i Jiova, na yalo tabu, me vunautaka na itukutuku vinaka, me qaravi ira tale ga na mataveitacini.—2 Tim. 1:7.

8. E vakayaloqaqataki ira vakacava na nona tamata nikua o Jiova?

⁸ Nikua, o Jiova e solia vei ira na qaravi koya na “kaukaua e uasivia na kaukaua ni tamata” mera qaravi koya tiko ga ena yalodina. (2 Kor. 4:7) Meda veivosakitaka mada e va na isolisoli i Jiova ena vakayaloqaqataki keda meda yalodina tiko ga: na masu, na iVolatabu, na veimaliwai vaKarisito, kei na noda cakacaka vakaitalatala.

9. Ena vukei keda vakacava na masu?

⁹ Eda vakayaloqaqataki nida masu. Me vaka e tukuni ena Efeso 6:18, e uqeti keda o Paula meda masu vua na Kalou ena “ituvaki kece ga.” Ena qai rogoca na Kalou na noda masu ni vukei keda. Qori na ka e vakadinadinataka o Jonnie, mai Bolivia, ni veitaravi na leqa e sotava. E tauvimate bibi o watina, kei rau na nona itubutubu. E sega ni rawarawa me vakarautaka o Jonnie na ka me baleti ratou. E mate o tinana, dua na gauna balavu sa qai bula vinaka mai o watina, kei tamana. E kaya o Jonnie me baleta na gauna dredre qori, “Niu nuiqawaqawa, e vukei au vakalevu na masu, au vakamatatataka sara ga na ka e tu e lomaqu.” E vakaukauataki Jonnie o Jiova me vosota. E rogoca o Ronald, e dua na qase ni ivavakoso mai Bolivia, ni tauvi kenisa o tinana. E takali ni oti e dua na vula. Na cava e vukei koya? E kaya: “Niu masu vei Jiova, au talaucaka vua na ka kece e tu e lomaqu. E kilai au vinaka sara o Jiova, sega tale ni dua.” Eso na gauna, eda na rairai nanuma nida na sega ni vosota rawa, se da sega ni kila na ka meda masulaka. Ia e vinakata o Jiova meda masu vua ke dredre mada ga nida vakamacalataka na noda rai kei na ivakarau ni lomada.—Roma 8:26, 27.

10. Me vaka e tukuni ena Iperiu 4:12, na cava e bibi kina noda wili iVolatabu kei na vakasama vakatitobu?

¹⁰ Eda vakayaloqaqataki ena iVolatabu. O Paula e dau wilika na iVolatabu me vakayaloqaqataki koya, me vakacegui koya. E bibi tale ga meda cakava qori. (Roma 15:4) Nida wilika na Vosa ni Kalou da qai vakasamataka vakatitobu, e rawa ni vakayagataka o Jiova na yalona tabu me vukei keda meda kila vinaka na sala meda muria kina ena keda ituvaki. (Wilika Iperiu 4:12.) E kaya o Ronald, sa cavuti oti mai: “Au marau niu saga meu dau wili iVolatabu ena veibogi. Levu na gauna au dau vakasamataka vakatitobu na itovo i Jiova kei na nona dau kauaitaki ira na nona tamata. Qori e vakayaloqaqataki au sara ga.”

11. Sala cava e vakayaloqaqataka kina e dua na tacida yalewa na iVolatabu?

¹¹ Nida vakasamataka vakatitobu na Vosa ni Kalou, ena uqeti keda me donu noda rai me baleta na noda leqa. Dikeva  mada na yaga ni iVolatabu vua e dua na yada e lolosi tiko. E vakatututaka e dua na qase ni ivavakoso ni rawa ni vulica e levu na ka ni wilika na ivola i Jope. Ni cakava qori na yada, e totolo ga nona vakalewai Jope ni cala nona rai. Ni raitayaloyalotaka tiko, e kaya: “E cala nomu rai, Jope!” Ia e qai liaca ni sa vakataki Jope tiko na nona rai. Qori e uqeti koya me veisautaka nona rai, e vakayaloqaqataki koya tale ga me vosota ni takali o watina.

12. E vakayaloqaqataki keda vakacava o Jiova ni vakayagataki ira na tacida?

¹² Eda vakayaloqaqataki nida veimaliwai kei ira na tacida vaKarisito. Dua tale na sala e vakayaloqaqataki keda kina o Jiova, ya ena vukudra na tacida. E vola o Paula ni diva mera “veivakayaloqaqataki” vakamataveitacini. (Roma 1:11, 12) E tukuna o Mary sa cavuti oti mai, ni dau taleitaka na veimaliwai kei ira na mataveitacini. E kaya: “O Jiova e dau vakayagataki ira sara ga na mataveitacini era sega sara tu ga ni kila na noqu leqa. Era dau veivakayaloqaqataki se volavola mai, qori sara ga na ka au vinakata tu. E yaga tale ga meu veivosaki kei ira na tacida yalewa era sotava na ituvaki qori, au qai vuli ena ka era cakava. Era tukuna na qase nira lomani au na mataveitacini ena ivavakoso.”

13. Eda rawa ni veivakayaloqaqataki vakacava ena soqoni ni ivavakoso?

¹³ Dua tale na vanua vinaka meda veivakayaloqaqataki kina oya na soqoni ni ivavakoso. Ni o tiko ena soqoni, o rawa ni vakaliuliu mo vakayaloqaqataka eso tale ni o vakavinavinakataka na ka era cakava, mo tukuna tale ga ni o lomani ira. Kena ivakaraitaki, ni bera ni tekivu na soqoni e tukuna e dua na qase ni ivavakoso o Peter vua e dua na tacida yalewa e sega ni tiko ena dina na watina: “E veivakayaloqaqataki dina na raici kemudou. O dau vakarautaki ratou vinaka na ono na luvemu kei na nodratou ivakamacala.” E luluvu sara ga na tacida yalewa, e vakavinavinaka qai kaya: “Qori sara ga na ka au via rogoca tu.”

14. E yaga vakacava vei keda na cakacaka vakavunau?

¹⁴ Eda na vakayaloqaqataki ena cakacaka vakavunau. Nida wasea na ka dina ena iVolatabu, eda na vakacegui, eda na vakayaloqaqataki tale ga ke ra vakarorogo se sega. (Vkai. 11:25) Kena ivakaraitaki e vakayaloqaqataki Stacy, e dua na tacida yalewa na cakacaka vakavunau. Ni vakasivoi e dua na lewe ni nona vuvale, dua na ka na nona rarawa. E dau taroga, ‘Au rawa ni cakava eso tale na ka meu veivuke kina?’ E dredre sara ga me guilecava o Stacy na leqa qori. Na cava e vukei koya me vosota na ituvaki dredre qori? Na cakacaka vakaitalatala! Ni lai vunau, e vakasamataki ira ga mera vukei ena yalava. E kaya: “Ena gauna qori, e solia vei au o Jiova e dua na vuli iVolatabu e toso totolo sara. E vakayaloqaqataki au sara ga. Na ka e vukei au vakalevu na cakacaka vakavunau.”

15. Na cava o vulica ena ka e tukuna o Mary?

¹⁵ Era rairai nanuma eso ni sega ni levu na ka era rawata ena cakacaka vakavunau ena vuku ni kedra ituvaki. Ke va qori nomu rai, mo nanuma ni marautaka o Jiova na kena vinaka duadua o rawa ni cakava. Dikeva tale mada na ivakaraitaki i Mary. Ni toki ena yalava e duatani na kena vosa, e nanuma ni lailai ga na ka e rawa ni cakava. E kaya, “Ena loma ni dua na gauna, na ka ga au rawa ni cakava  meu vakamacala ga vakalekaleka, se wilika e dua na tikinivolatabu, se solia e dua na tikidua ena vunau.” E nanuma ni sega ni vinaka sara ni vakatauvatani kei ira na kila vinaka na vosa ya. Ia e qai veisautaka na nona rai. E liaca ni rawa ni vakayagataki koya o Jiova ke sega mada ga ni kila vinaka na vosa ya. E kaya, “E rawarawa sara na ka dina vakaivolatabu, e veivakabulai, qori na ka e veisautaka na nodra bula e levu.”

16. Era na vakayaloqaqataki vakacava o ira na tu ga vakadua e vale?

¹⁶ Ke da tu vakadua mada ga e vale, e kila vinaka o Jiova nida via vakaitavi ena vunau, e marautaka tale ga. E rawa ni uqeti keda meda vunau vei ira na veiqaravi, se vuniwai kei na nasi. Ke da vakatauvatana na ka eda cakava ena gauna qo kei na gauna sa oti, eda rawa ni yalolailai. Ia ke da kila na sala e vukei keda tiko kina o Jiova, eda na vakayaloqaqataki meda vosota na ituvaki dredre da qai marau tiko ga.

17. Me vaka e tukuni ena Dauvunau 11:6, na cava meda vunau tiko ga kina ke ra sega ni tataleitaki eso?

¹⁷ Eda sega ni kila na sore ni ka dina eda tea e rawa ni vakawakana qai tubu. (Wilika Dauvunau 11:6.) Kena ivakaraitaki o Barbara, e dua na tacida e yabaki 80 vakacaca, e dau vunau wasoma ena talevoni, e vola ivola tale ga. Ena dua na nona ivola qori, e biuta kina na Vale ni Vakatawa ni Maji 1, 2014, na kena ulutaga “Na Cava sa Cakava na Kalou ena Vukumu.” E sega ni kila o Barbara ni a vakauta na ivola qori vua e dua na veiwatini erau sa sega tu ni iVakadinadina i Jiova. Erau wilika vakavica vata na mekesini qori. E tukuna o tagane ni vaka sara ga e vosa tiko vua o Jiova. Oti e sivia ni 27 na yabaki, rau sa qai tekivu soqoni tale, toso na gauna rau sa vunau tale. Dua na ka nona vakayaloqaqataki o Barbara ni raica ni yaga dina na ivola qori!

18. Na cava meda cakava me vakaukauataki keda kina na Kalou?

¹⁸ E levu na sala e vakarautaka kina vei keda o Jiova na nona kaukaua levu. Nida vakayagataka na isolisoli qori, me vaka na masu, na iVolatabu, veimaliwai vaKarisito kei na cakacaka vakaitalatala, eda vakaraitaka nida nuitaki koya me vukei keda, e vinakata sara ga me cakava qori. Meda nuitaka tiko ga na Tamada vakalomalagi, e marautaka me “vakaraitaka na nona kaukaua vei ira e taucoko vua na lomadra.”—2 Vei. 16:9.