1-2. Na cava ena bibi kina eso na tikinivolatabu ni veisau na keda ituvaki?

 ENA nodrau siga ni vakamau o tagane vou kei yalewa vou rau na vakarogoca vinaka sara na ivunau yavutaki vakaivolatabu me baleta na vakawati. E sega ni vou vei rau na ivakavuvuli e veivosakitaki ena ivunau. Ia ena bibi vei rau na tikinivolatabu ya me tekivu mai na siga qori. Na vuna? Ni rau na muria tiko ena nodrau bula vakawati.

² E tautauvata tale ga qori ni rau sa itubutubu na veiwatini lotu vaKarisito. De dua sa vakayabaki nodrau rogoca e levu na ivunau me baleta na susu gone. Ia ena bibi na ivakasala qori ni sa veisau na kedrau ituvaki. Sa tiko na luvedrau me rau na susuga. Sa dua dina na itavi levu! Io, ni veisau na ituvaki ena bibi vei keda eso na tikinivolatabu. Qori na vuna era uqeti kina na dausokaloutaki Jiova mera wilika na iVolatabu, me vaka ga e tukuni vei ira na tui ni Isireli mera vakasamataka vakabibi ena ‘veisiga kece ni nodra bula.’—Vkru. 17:19.

3. Na cava eda na veivosakitaka ena ulutaga qo?

³ Ra itubutubu oni lesi ena dua na itavi marautaki e rawa ni qarava e dua na lotu vaKarisito, ya mo vakavulici luvemu me baleti Jiova. Ia e levu tale na ka mo cakava mo vakavulici luvemu me baleta na Kalou. O na vukei koya me lomani Jiova vakalevu. Na cava mo cakava me lomani Jiova kina na luvemu? Ena veivosakitaki ena ulutaga qo e va na ivakavuvuli ena yaga vei kemuni na itubutubu.  (2 Tim. 3:16) Eda na raica tale ga na kena yaga nira muria eso na itubutubu lotu vaKarisito na ivakasala vakaivolatabu.

4. Na cava e dua na ivakavuvuli mera muria na itubutubu? (Jemesa 1:5)

⁴ iVakavuvuli 1: Qara na veivuke i Jiova. Kerei Jiova me solia vei iko na vuku mo rawa ni tuberi luvemu me lomani Jiova. (Wilika Jemesa 1:5.) E Daunivakasala vinaka duadua. E tiko e vica na vuna. Vakasamataka mada e rua. Kena imatai e levu sara na ka e kila o Jiova me baleta na itavi ni itubutubu. (Same 36:9) Kena ikarua, na ivakasala e vakarautaka ena dau tini vinaka tu ga.—Aisea 48:17.

5. (a) Na cava e vakarautaka na isoqosoqo i Jiova me vukei ira na itubutubu? (b) Me vaka e laurai ena vidio, na cava o vulica ena nodrau veisusu o Brother kei Sister Amorim?

⁵ E vakarautaka o Jiova ena nona Vosa kei na nona isoqosoqo e levu na kakana vakayalo e yavutaki vakaivolatabu me vukei kemuni moni tuberi ira na luvemuni mera lomani Jiova. (Maciu 24:45) Kena ivakaraitaki, oni na raica e levu na ivakasala ena ulutaga “iVakasala ina Vuvale” e tabaki me vica vata na yabaki ena mekesini na Yadra!, ena gauna qo sa tabaki ena noda website. E levu tale ga na vidio e tiko ena jw.org me baleta na veitarotarogi kei na drama ena vukei kemuni na itubutubu moni muria na ivakasala i Jiova ena nomuni veisusu. *—Vkai. 2:4-6.

6. Na cava nona rai e dua na tama me baleta na veidusimaki e vakarautaka na isoqosoqo i Jiova?

⁶ E levu na itubutubu era vakavinavinakataka na veivuke i Jiova ena nona isoqosoqo. E kaya e dua na tama o Joe: “E sega ni rawarawa na tubera na tolu na luvei keirau ena ka dina. Keirau dau masulaka vakaveiwatini me vukei keirau o Jiova. Keirau dau raica ni yaco donu mai e dua na ulutaga se vidio me vukei keirau ena ituvaki keirau sotava tiko. Keirau dau nuitaka na  nona ivakasala o Jiova.” Rau vakadinadinataka vakaveiwatini ni yaga vakalevu vei ratou na luvedrau na isolisoli qo me ratou toro voleka vei Jiova.

7. Na cava e bibi kina vei ira na itubutubu mera kauaitaka nodra ivakaraitaki? (Roma 2:21)

⁷ iVakavuvuli 2: Mo ivakaraitaki vinaka. Era raici nodra itubutubu vakavoleka na luvedra ra qai vakatotomuria na ka era raica. Macala ga nira sega ni uasivi na itubutubu. (Roma 3:23) Ia era na saga na itubutubu yalomatua mera ivakaraitaki vinaka vei luvedra. (Wilika Roma 2:21.) E kaya e dua na tama me baleti ira na gone: “O ira na gone era vaka na madrai e domica na wai. Era na tukuna vei keda ke sega ni salavata na ka eda vakavulica kei na noda ivakaraitaki.” Ke da vinakata gona mera lomani Jiova na luveda, e bibi meda lomani Jiova vakalevu, meda vakaraitaka tale ga.

8-9. Na cava o vulica ena ka rau tukuna o Andrew kei Emma?

⁸ E levu na sala e rawa nira vakavulici luvedra kina na itubutubu mera lomani Jiova. Dikeva na ka e tukuna o Andrew e dua na tacida e yabaki 17: “Rau dau tukuna noqu itubutubu na bibi ni masu. E veibogi ena masu vata kei au o tamaqu, kevaka mada au sa masu oti. Rau na tukuna tiko ga vei keirau na noqu itubutubu: ‘E rawa ni drau masu wasoma vei Jiova.’ Na nodrau vakabibitaka na masu e uqeti au vakalevu. Ena gauna qo e dau rawarawa meu masu vei Jiova, meu okati koya me Tamaqu dauloloma.” Ra itubutubu, kua ni guilecava ni rawa nira vakatotomuria na luvemuni na nomuni lomani Jiova.

⁹ Dikeva tale ga na ivakaraitaki nei Emma. Ni biuti ratou o tamadratou e levu tu nona dinau, ena vinakati me sauma lesu o tinana. E kaya o Emma: “E levu na gauna e lailai nona ilavo o Na. Ia e dau tukuna tiko ga ni dau karoni ira nona dauveiqaravi o Jiova. Au raica ena ivakarau ni nona bula ni vakabauta sara ga qori. E bulataka na ka e vakavulica.” Cava eda vulica kina? E rawa nira ivakaraitaki vinaka na itubutubu ena gauna mada ga e dredre kina na ituvaki.—Kala. 6:9.

10. Na gauna cava ena rawa nira veivosaki kina na itubutubu e Isireli kei na luvedra? (Vakarua 6:6, 7)

¹⁰ iVakavuvuli 3: Veivosaki wasoma kei na luvemu. E dusimaki ira na Isireli makawa o Jiova, mera vakavulici luvedra wasoma me baleti koya. (Wilika Vakarua 6:6, 7.) E levu na gauna e rawa nira vakayagataka na itubutubu ena dua na siga mera veivosaki kina kei na luvedra me uqeti ira mera lomani Jiova mai vu ni lomadra. Me kena ivakaraitaki, e dua na gonetagane ni Isireli ena vica vata na aua nona vukei tamana ena iteitei se tatamusuki. Na ganena ena rairai vukei tinana ena culacula, talitali kei na so na cakacaka ni vale. Nira cakacaka vata na itubutubu kei na luvedra e rawa nira veivosakitaka e levu na ka bibi. Kena ivakaraitaki, era na veivosakitaka na vinaka i Jiova kei na sala e vukea tiko kina na vuvale.

11. Na gauna cava e rawa nira veivosaki kina na itubutubu lotu vaKarisito kei na luvedra?

¹¹ Sa veisau na gauna. Ena levu na vanua era sega ni veimaliwai na itubutubu kei na luvedra ena siga taucoko. Era na rairai cakacaka na itubutubu qai tiko e koronivuli na gone. Oya na vuna era na qara kina na itubutubu na gauna  mera veivosaki kina kei luvedra. (Efeso 5:15, 16; Fpai. 1:10) E dua na gauna vinaka ya na sokalou vakavuvale. E kaya e dua na tacida cauravou o Alexander: “E dau tuvanaka o tamaqu me caka na sokalou vakavuvale. E sega ni vakatara e dua na ka me vakataotaka na ituvatuva qo. Ni oti na vuli, keitou dau veivosaki.”

12. Na cava me nanuma tiko na ulunivuvale ena gauna ni sokalou vakavuvale?

¹² Ke o ulunivuvale, na cava mo cakava mera marautaka kina na luvemu na sokalou vakavuvale? O rawa ni vulica vata kei ira na noda ivola vou Marau me Tawamudu! Na ivola qori e vakarawarawataka na veivosaki. O na vinakata mera tukuna na nodra nanuma na luvemu kei na ka era leqataka. Mo kua gona ni vakayagataka na gauna qori mo veivakalewai se cudruvi ira. Kua ni cudru totolo ke tukuna o luvemu e dua na ka e sega ni salavata kei na ivakavuvuli vakaivolatabu. Mo vakavinavinaka ga nira tukuna mai na lomadra, uqeti ira mera dau cakava qori. O na rawa ga ni vukei ira vakavinaka na luvemu ke o kila na lomadra.

13. Na gauna cava tale e rawa nira vukei luvedra kina na itubutubu mera volekati Jiova?

¹³ Ra itubutubu, ni vaqara na gauna veiganiti ena loma ni dua na siga moni uqeti ira na luvemuni mera toro voleka vei Jiova. Ni kua ni waraka sara na gauna ni vuli iVolatabu mo vakavulici ira kina me baleta na Kalou dauloloma. Dikeva na ka e tukuna o Lisa e dua na tina: “Keirau vakavulici ratou na gone me ratou vulici Jiova ena veika buli e tu wavoliti keda. Me kena ivakaraitaki, ratou dau dredrevaka na gone na nona ivukivuki na neitou koli. Keirau vakayagataka qori me vakavulica kina ni dau mamarau na Dauveibuli e taleitaka na bula, e vinakata meda taleitaka tale ga.”

14. Na cava mera vukei luvedra kina na itubutubu mera digia vinaka nodra itokani? (Vosa Vakaibalebale 13:20)

¹⁴ iVakavuvuli 4: Vukei luvemu me digia na itokani vinaka. E vakamatatataka na Vosa ni Kalou ni rawa  nira uqeti keda na itokani vinaka, era vakaleqai keda na itokani ca. (Wilika Vosa Vakaibalebale 13:20.) Ra itubutubu, oni kila nodra itokani na luvemu? O sa sotavi ira? O veivosaki kei ira? Na cava mo cakava mo vukei luvemu me digia na itokani era lomani Jiova? (1 Kor. 15:33) Rawa ni vukei ira mera vakatulewa vakayalomatua ni o sureta eso era toso vinaka vakayalo, mo dou mai cakava vata eso na ka.—Same 119:63.

15. Na cava e rawa nira cakava na itubutubu me tiko nodra itokani vinaka na luvedra?

¹⁵ Dikeva mada nona ivakaraitaki e dua na tama o Tony. E vakamacalataka na ka e cakava kei watina me vukei ratou kina na luvena me tiko nodratou itokani vinaka: “Ena veiyabaki sa sivi keirau dau sureti ira na mataveitacini e duidui na yabaki ni nodra bula kei na nodra isususu mera mai vakaicili e vale. Keimami kana vata, sokalou vata tale ga. Qo e dua na sala vinaka me keitou kilai ira kina na lomani Jiova ra qai qaravi koya ena marau. Keitou kalougata nira mai tiko e vale na ivakatawa ni tabacakacaka, daukaulotu, kei na so tale. Na veika era sotava, nodra gumatua, kei na nodra vakuai ira e uqeti ratou vakalevu na gone, ratou toro voleka tale ga vei Jiova.” Ra itubutubu, ni gumatua ni vukei ira na luvemuni me tiko nodra itokani vinaka.

16. Na cava o na cakava ke tukuna e dua na luvemu ni sega ni via qaravi Jiova?

¹⁶ O solia nomu vinaka mo tuberi ratou na luvemu. Vakacava ke tukuna e dua na luvemu ni sega ni via qaravi Jiova? Kua ni nanuma ni matewale na nomu sasaga. O Jiova e solia vei keda kece okati kina na luvemu na galala ni vakatulewa, ya me digia me qarava na Kalou se sega. Ke vakatulewataka o luvemu me biuti Jiova, vakanuinui tiko ni dua na siga ena lesu mai. Nanuma na italanoa ni gone cidroi. (Luke 15:11-19, 22-24) E cakava e levu na ka ca na cauravou qori. Ia na kena itinitini e qai mai. Eso era na kaya, “Qori na italanoa ga. Ena rawa  ni lesu mai o luvequ?” Io e rawa. Qori sara ga na ka e sotava e dua na cauravou na yacana o Elie.

17. E uqeti iko vakacava na ka e sotava o Elie?

¹⁷ E tukuna o Elie me baleti rau nona itubutubu: “Rau solia nodrau vinaka kece me rau vakavulici au meu lomani Jiova kei na nona Vosa, na iVolatabu. Au dau be niu se itabagone.” E rua na ivakarau ni nona bula, e sega ni kauaitaka na nodrau sasaga me rau vukei koya vakayalo. Ni biubiu mai vale, e levu na ka ca e cakava. Ia ena so na gauna ena veivosakitaka eso na ulutaga vakaivolatabu kei na dua nona itokani. E kaya o Elie: “Na levu ga ni noqu tukuni Jiova vua na noqu itokani, na levu tale ga ni noqu nanumi Jiova. Sa mate tu na ka dina ena iVolatabu erau a saga na noqu itubutubu me rau bucina e lomaqu, ia e kadre tale na sore ni ka dina qori ni toso na gauna.” E mani lesu mai ina dina o Elie. * Vakasamataka mada nodrau marau nona itubutubu nodrau saga me vakavulici koya ni se gone me lomani Jiova!—2 Tim. 3:14, 15.

18. Na cava na nomuni rai me baleti ira na itubutubu era gumatua ni vakavulici luvedra mera lomani Jiova?

¹⁸ Ra itubutubu, e solia vei kemuni o Jiova e dua na isolisoli talei, ya moni susuga e dua na itabatamata vou mera qaravi Jiova. (Same 78:4-6) E sega ni itavi rawarawa qori, keimami vakavinavinakataka vakalevu na nomuni gumatua ni vukei luvemuni! Ke oni vukei ira tiko ga na luvemuni mera lomani Jiova, mera tuberi ena ivakavuvuli kei na ivakasala i Jiova, ena marautaka sara ga na Tamada vakalomalagi dauloloma na nomuni sasaga.—Efeso 6:4.