1, 2. (a) E duidui vakacava na veika eda nuitaka na lotu vaKarisito kei ira na bula tu ena vuravura i Setani? (b) Na taro cava eda na veivosakitaka?

QO E dua na inuinui totoka e noda na lotu vaKarisito! Se da lumuti se ‘so tale na sipi,’ eda vakanamata kece ena kena vakayacori na inaki taumada ni Kalou kei na vakarokorokotaki ni yacana. (Joni 10:16; Maciu 6:9, 10) E inuinui dokai dina meda vakamareqeta. Eda vakanamata tale ga ena veivakalougatataki ni bula tawamudu ena “lomalagi vou” se “vuravura vou” ni Kalou. (2 Pita 3:13) Ia gauna mada ga qo eda nuitaka na tamata ni Kalou nida na vakalougatataki tiko ga vakalevu.

² O ira tale ga na to ena vuravura i Setani e tiko na ka era nuitaka, era vakatitiqataka ga na kena vakavotukana. Kena ivakaraitaki, era nuitaka e vica vata na milioni na dauveimauilavo nira na rawata e dua na ilavo, kena leqa ga nira sega ni vakadeitaka sara. Ia na vakabauta dina, e yavutaki ena noda “vakadeitaka e lomada” na noda inuinui vaKarisito. (Iper. 11:1) De dua o na vakasamataka se rawa ni vakadeitaki vakacava na noda inuinui. E yaga vakacava na dei ni noda vakabauta na ka eda nuitaka?

3. E yavutaki ena cava na vakabauta vaKarisito dina?

³ Nida ivalavala ca eda sega ni sucu kaya mai na vakabauta. Ia ke da yalomalumalumu ena cakacaka na yalo tabu ni Kalou e lomada  meda rawata kina na vakabauta vaKarisito. (Kala. 5:22) E sega ni tukuni ena iVolatabu ni tiko na yavu me vakabauta kina o Jiova se vinakati me tiko vua na vakabauta. Ni kaukaua duadua, e vuku tale ga, ena sega ni dua na ka me vakalatilati ena kena vakayacori na lomana. Sa vakadeitaka tu na Tamada vakalomalagi na vakayacori ni nona vosa ni yalayala me vaka sara ga sa yaco oti. E kaya: “Sa vakayacori!” (Wilika Vakatakila 21:3-6.) E yavutaki na vakabauta vaKarisito ena nona dau ‘yalodina na Kalou’ o Jiova, o koya e dau dina ena nona vosa ni yalayala.—Vkru. 7:9.

4. Na cava era nuitaka tu na tagane kei na yalewa yalodina era bula ni se bera na gauna vaKarisito?

⁴ E volaitukutukutaki ena wase 11 ni Iperiu na yacadra e 16 na tagane kei na yalewa vakabauta. E uqeti vakalou o koya e vola na kedra itukutuku, e kaya ni o ira qo kei na levu tale ‘a vakadinadinataki vei ira na ka ena vuku ni nodra vakabauta.’ (Iper. 11:39) Era “vakadeitaka” kece ‘e lomadra’ ni na vakatubura e dua na “kawa” yalataki na Kalou me qaqi Setani me vakaotia nona talaidredre, me qai vakayacora na inaki taumada i Jiova. (Vkte. 3:15) Ia era mate na tagane kei na yalewa yalodina qo ni bera nona sevutaka na bula e lomalagi na “kawa” yalataki o Jisu Karisito. (Kala. 3:16) Eda vakavinavinaka ga ena vuku ni nona yalayala nuitaki o Jiova, ni na vakaturi ira mera bula uasivi ena parataisi e vuravura.—Same 37:11; Aisea 26:19; Osea 13:14.

5, 6. Cava e vukei Eparama kei ratou nona vuvale me matata tiko ga kina nodratou inuinui? Eratou dei vakacava ena nodratou vakabauta? (Raica na imatai ni iyaloyalo.)

⁵ E vakamacalataki ena Iperiu 11:13 ni so era bula ni se bera na gauna vaKarisito: “Ena vakabauta, era yalodina o ira kece qo me yacova na mate, e dina ni se sega ni vakayacori vei ira na vosa ni yalayala, ia era raica vakayawa tu ga, era marautaka.” Dua vei ira o Eparama. Vakacava e matata tiko ga vua na inuinui me marautaka na bula ena rawati ena vuku ni “kawa” yalataki? E matata nona sauma o Jisu na taro qori ena ka e kaya vei ira na tusaqati koya tiko: “Dua na ka nona vakanuinui tu na tamamuni o Eparama me raica noqu gauna, a raica dina qai marautaka vakalevu.” (Joni 8:56) Qori tale ga nodratou rai o Sera, Aisake, Jekope, kei na levu tale, nira nuitaka vakatabakidua na Matanitu e se bera mai, “e tauyavutaka qai tara na Kalou.”—Iper. 11:8-11.

⁶ E dei tiko ga vakacava na nona vakabauta o Eparama kei ratou nona vuvale? Ratou a rairai vulica na veika me baleta na Kalou ni ratou vakarorogo vei ira na itabaqase yalodina, se nona vakavotuya sara ga na Kalou vei ratou eso na ka, se nodratou dau wilika ga na ivola makawa era nuitaki. Koya e bibi sara, nodratou nanuma dei tiko ga na ka eratou vulica, ratou mareqeta na vosa ni yalayala ni Kalou kei na ka e vinakata, vaka kina nodratou dau vakananuma vakatitobu. Ni ratou dei vinaka ena nodratou inuinui, eratou tu vakarau ni vosota na veika dredre kece me ratou yalodina tiko ga vua na Kalou.

7. Na cava e vakarautaka vakayalololoma o Jiova me dei tiko ga kina noda vakabauta? Cava meda cakava?

⁷ Meda dei tiko ga ena noda vakabauta, e vakarautaka vakayalololoma o Jiova na nona Vosa taucoko ena iVolatabu. Me rawa gona nida “marau” da “vuavuaivinaka” tale ga, e dodonu meda dau wilika wasoma na Vosa ni Kalou ke rawa. (Same 1:1-3; wilika Cakacaka 17:11.) Me vakataki ira tale ga na dauveiqaravi i Jiova era bula ni se bera na gauna vaKarisito, e bibi meda dau vakananuma vakatitobu na yalayala ni Kalou, da qai talairawarawa. E vakalougatataki keda tale ga o Jiova ena levu ni kakana vakayalo e dau vakarautaka ni vakayagataka na “dauveiqaravi yalodina e vuku.” (Maciu  24:45) Nida mareqeta gona noda vulica na veika vakayalo e vakarautaka o Jiova, eda na vakatotomuria na nodra ivakaraitaki ni vakabauta na bula ena gauna makawa nira ‘vakadeitaka e lomadra’ na inuinui ni Matanitu ni Kalou.

8. Sala cava e vakadeitaka kina na vakabauta na masu?

⁸ E bibi tale ga na masu vei ira na dauveiqaravi ni Kalou era bula ni se bera na gauna vaKarisito, mera dei tiko ga kina ena nodra vakabauta. E qaqaco nodra vakabauta nira vakila ni rogoca nodra masu na Kalou. (Niem. 1:4, 11; Same 34:4, 15, 17; Tani. 9:19-21) Eda rawa tale ga ni talaucaka na lomada vei Jiova, nida kila ni na rogoca na noda masu me vakayaloqaqataki keda meda vosota ena marau. Ni rogoci noda masu, sa na qai qaqaco vinaka ga noda vakabauta. (Wilika 1 Joni 5:14, 15.) Ni dua na itovo e umani ena vua ni yalo tabu ni Kalou na vakabauta, e dodonu gona meda ‘kerea tiko ga’ vua na Kalou, me vaka ga e veiuqeti kina o Jisu.—Luke 11:9, 13.

9. Nida masulaka tiko na veika me baleti keda, o cei tale me nanumi kina?

⁹ Me kua ni yalani ga na noda masu ena noda kerea nona veivuke na Kalou. Eda rawa ni vakavinavinakataki Jiova, da vakacaucautaki koya tale ga e veisiga ena vuku ni nona “cakacaka veivakurabuitaki” e “sega ni tukuni rawa!” (Same 40:5) Nida masu meda nanumi ira “na tu e valeniveivesu me vaka sara ga [eda] vesu tu kei ira.” Meda masulaka ira tale ga na tacida e vuravura raraba, vakauasivi o ‘ira na liutaki keda tiko.’ E dau uqeta sara ga na lomada na noda raica na sala e rogoca kina o Jiova na noda masu ena duavata!—Iper. 13:3, 7.

10. Vakamacalataka eso na dauveiqaravi ni Kalou era sega ni cakitaka nodra vakabauta ra qai vakaukauataki vakacava?

¹⁰ E vakamacalataka na yapositolo o Paula ena Iperiu wase 11, eso na dauveiqaravi ni Kalou e sega ni cavuti na yacadra era vosota na veivakatovolei. Kena ivakaraitaki, e vakamacalataki ira na yalewa vakabauta e mate na luvedra, ra qai vakaturi tale. E tukuni ira tale ga eso era “sega ni ciqoma mera sereki ena ivoli, me nodra kina na veivakaturi e vinaka cake.” (Iper. 11:35) Eda sega ni vakadeitaka se tukuni cei tiko o Paula, ia eso me vakataki Nepoci kei Sakaraia erau a vakaviriki ena vatu ni rau cakava na loma ni Kalou. (1 Tui 21:3, 15; 2 Vei. 24:20, 21) A rawa sara ga ni “sereki” o Taniela kei ratou nona itokani ena nodratou cakitaka nodratou vakabauta. Ia na nodratou vakabauta na kaukaua ni Kalou eratou ‘sogota kina na gusudra na laione’ ratou qai “tarova na kaukaua ni bukawaqa.”—Iper. 11:33, 34; Tani. 3:16-18, 20, 28; 6:13, 16, 21-23.

11. Na ituvaki cava era vosota eso na parofita ena nodra vakabauta?

¹¹ Ena vuku ni nodrau vakabauta na parofita o Maikaia kei Jeremaia erau “vakatovolei ena [nodrau] vakalialiai . . . [erau] bala [tale ga] i valeniveivesu.” Eso tale me vakataki Ilaija “era veilakoyaki voli ena veivanua dravuisiga, ena veidelana, ena veiqaravatu, kei na veivanua kilo e vuravura.” Era vosota kece na ituvaki qori nira ‘vakadeitaka e lomadra ni na yaco dina na ka era nuitaka.’—Iper. 11:1, 36-38; 1 Tui 18:13; 22:24-27; Jere. 20:1, 2; 28:10, 11; 32:2.

12. O cei na ivakaraitaki uasivi ni vosota? Na cava e uqeti koya me vosota tiko ga?

¹² Ni tukuni ira na tagane kei na yalewa vakabauta o Paula, e vakamacalataka sara e dua na ivakaraitaki uasivi—na noda Turaga o Jisu Karisito. E tukuni ena Iperiu 12:2: “Ena vuku ni marau e tu e matana e vosota kina na kaunirarawa qai sega ni dua na ka vua me vakamaduataki, e sa dabe tale ga ena ligaimatau ni itikotiko vakaturaga ni Kalou.” Meda ‘vakasamataka vakabibi’ na ivakaraitaki ni vakabauta i Jisu ni sotava na veivakatovolei mosimosi. (Wilika Iperiu 12:3.) Era vakatotomuri Jisu eso na lotu  vaKarisito era mate ena vuku ni nodra vakabauta me vakataki Anitipasa, nira yalodina. (Vkta. 2:13) E nodra na icovi ni bula e lomalagi—qo e uasivia na “veivakaturi e vinaka cake” era vakanamata kina na tagane vakabauta era bula ena gauna makawa. (Iper. 11:35) Ni tauyavutaki oti na Matanitu ni Kalou ena 1914, o ira kece na lumuti yalodina era sa mate, era vakaturi ina bula vakayalo i lomalagi mera veiliutaki kei Jisu.—Vkta. 20:4.

13, 14. Na cava e sotava o Rudolf Graichen? Na cava e vukei koya me vosota?

¹³ E vica vata na milioni na dauveiqaravi ni Kalou nikua era vakatotomuria na ivakaraitaki i Jisu ni matata tiko ga vei ira na nodra inuinui, ra qai sega ni vakatara na veivakatovolei me luluqa kina nodra vakabauta. Kena ivakaraitaki o Rudolf Graichen, e sucu mai Jamani ena 1925. E nanuma lesu eso na droini vakaivolatabu era dau lili tu ena loma ni nodratou vale. E vola: “Ena dua na droini qori era tu kina na wolifa, na lami, na luvenime kei na lepate, na luvenibulumakau kei na laione—ra qai bula veiyaloni, ni liutaki ira tiko e dua na gonetagane lailai. . . . Au sega ni guilecava rawa na droini qori.” (Aisea 11:6-9) E vica vata na yabaki nona vakararawataki mosimosi tu o Rudolf, taumada vei ira na ovisa vakalecaleca ni Nazi, era kilai me Gestapo, vaka kina o ira  na dau veiliutaki vakasaurara na Communist Stasi ena Tokalau kei Jamani, ia e dei tu ga vua na inuinui ni bula ena parataisi e vuravura.

¹⁴ So tale na ka ni veivakatovolei e sotava o Rudolf oya nona mate o tinana ena vuku ni matetaka ena keba ni veivakararawataki e Ravensbrück, e raica tale ga nona malumu vakayalo o tamana ena nona saini me cakitaka ni iVakadinadina i Jiova. Ni sereki ga mai valeniveivesu e veiqaravi sara o Rudolf me ivakatawa dauveilakoyaki, e sureti tale ga ena vuli e Kiliati. E lesi sara me daukaulotu e Chile, lai veiqaravi tale ga kina vakaivakatawa dauveilakoyaki. Ia e sega ni yaco ga e keri na veika dredre e vakatovolei kina. Ni oti e dua na yabaki nona vakamautaki Patsy e dua na daukaulotu, e mate na luvedrau yalewa. Oti qori e mate tale ga o watina ni se qai yabaki 43 ga. E vosota na veivakatovolei kece qori o Rudolf ni sa qase qai tautauvimate, ia a painia tudei tiko, e qase tale ga ni ivavakoso ena gauna e tabaki kina na kena italanoa ena Vale ni Vakatawa ni 1 Okosita, 1997, tabana e 20-25. ^[1]

15. Vakamacalataka na nodra ivakaraitaki na iVakadinadina i Jiova nikua era marau nira vosota na veivakararawataki.

¹⁵ E sega ni cegu nodra vakacacani na iVakadinadina i Jiova, ia era marautaka tiko ga na nodra inuinui. Kena ivakaraitaki, levu na mataveitacini era bala e valeniveivesu e Eritrea, Singapore, vaka kina e Sauca Korea, nira sega ni dau vakayagataka na iseleiwau. (Maciu 26:52) Tolu vei ira qori o Isaac, Negede, kei Paulos. E 20 na yabaki nodratou curu tu ena valeniveivesu e Eritrea! Dua na ka nodratou vakalolomataki, ia ratou yalodina tiko ga ni sega mada ni vakatarai me ratou lai qarava nodratou itubutubu se me ratou vakawati. Nida raica nodratou mata mamarau ena noda website na jw.org, e ivakadinadina ni dei nodratou vakabauta. Era bau dokai ratou mada ga na yadra tiko e valeniveivesu.

16. Ena taqomaki keda vakacava na vakabauta e dei?

¹⁶ E levu na dauveiqaravi i Jiova era sega ni sotava na veivakatovolei mosimosi. Duidui na sala era vakatovolei kina. Levu era bula dravudravua se ra tiko ena vanua e vakayacori tu kina na veivaluvaluti vakalewenivanua se leqa tubukoso. Eso tale me vakataki Mosese kei ira na peteriaki, era vakuai ira mai na rogo se mera kilai e vuravura. Era gumatua mera kua ni rawai ena domodomoiyau, se mera kauaitaki ira ga vakasivia. Na cava e vukei ira mera cakava qori? Na nodra lomani Jiova kei na dei ni nodra vakabauta na nona vosa ni yalayala ni na vakadodonutaka na cakacaka vakatawadodonu kece, qai vakaicovitaki ira na nona dauveiqaravi yalodina mera bula tawamudu ena vuravura ni yalododonu.—Wilika Same 37:5, 7, 9, 29.

17. Na cava o vakadeitaka mo cakava? Cava ena veivosakitaki ena ulutaga tarava?

¹⁷ Eda vulica ena ulutaga qo na sala e vaqaqacotaka kina noda vakabauta na noda dau masu kei na noda vakananuma vakatitobu na yalayala ni Kalou. Noda cakava qori eda na vosota kina na veivakatovolei, da qai vakanamata ina ka eda “vakadeitaka e lomada” oya na noda inuinui vaKarisito. Ia e levu na ka e okati ena noda vakabauta me vaka e vakamacalataki ena iVolatabu, ena veivosakitaki qori ena ulutaga e tarava.