1-3. A rairai tekivu vakacava na nodrau leqa o Uotia kei Sainitiki, eda na qaqarauni vakacava? (Raica na imatai ni iyaloyalo.)

ERA dau doka vakalevu na Vosa ni Kalou, na iVolatabu o ira na dauveiqaravi i Jiova. Nida sega ni uasivi, eda dau vakasalataki ena iVolatabu ena so na gauna. Eda na ciqoma vakacava? Raica mada na nodrau ivakaraitaki e rua na marama ena imatai ni senitiuri o Uotia kei Sainitiki. A yaco na leqa ena kedrau maliwa na marama lumuti qo. Na cava na leqa? E sega ni vakamacalataka na iVolatabu. Qo e dua ga na ivakaraitaki lailai ni ka a rawa ni yaco.

² Kaya mada ni a sureta o Uotia eso na veitacini mera lai kana e nona vale, mera veimaliwai tale ga. A sega ni sureti o Sainitiki, ia qai rogoca ni dua na ka nodra marau na veitacini era tiko kina. De dua ena tukuna o Sainitiki: ‘Au sega sara ga ni vakabauta ni sega ni sureti au o Uotia! Au nanuma ga ni keirau veitau dredre.’ Ni nanuma o Sainitiki ni liumuritaki, e oti sara ga nona vakabauti Uotia qai kilakasamitaki koya. Lako sara o Sainitiki lai sureti ira na veitacini vata tiko ga ya, ia a sega ni sureti Uotia! A rawa sara ga ni vakaleqa na veimaliwai vinaka ena  ivavakoso taucoko na nodrau leqa. E sega ni vakamacalataka vei keda na iVolatabu na ka a qai yaco, de dua erau ciqoma na veitacini qo na nona ivakasala vakayalololoma o Paula.—Fpai. 4:2, 3.

³ Eso na gauna e dau yaco tale ga na ituvaki va qo ena ivavakoso i Jiova nikua. Ia e rawa ni wali na leqa se rawa nida qaqarauni ke da muria na ivakasala ena Vosa ni Kalou, na iVolatabu. Ke da doka gona vakalevu na nona iVola o Jiova, eda na muria na kena ivakavuvuli.—Same 27:11.

4, 5. Na cava e vakasalataki keda kina na Vosa ni Kalou me baleta noda lewa vinaka na ivakarau ni lomada?

⁴ E sega ni dau rawarawa meda lewa vinaka na lomada ke dua na ka lailai se ka tawadodonu e caka vei keda. Ena ca sara vakalevu ke da raici vakatani ena vuku ni vanua eda cavutu mai kina, na keda roka, se dua tale na ka eda duidui kina. Ena mosi sara vakalevu ke cakava vei keda e dua na tacida lotu vaKarisito! Vakacava e tu na ivakasala ena Vosa ni Kalou ena ka meda cakava ke yaco na ka rarawataki va qo ena vuku ni noda ivalavala ca?

⁵ E kila vinaka o Jiova na ivakarau ni noda bula na kawatamata mai na ivakatekivu. E kila na lomada kei na ka eda cakava. Na vakasamataki ni ka kei na ka sa tu rawa e lomada ena rawa ni vakavuna meda tukuna da qai cakava na ka eda na rairai veivutunitaka e muri. Koya gona e ka vakayalomatua meda muria na ivakasala vakaivolatabu meda tauri keda vakamalua da qai kua ni cudru! (Wilika Vosa Vakaibalebale 16:32; Dauvunau 7:9.) Macala ga ni vinakati vei keda kece meda kua ni dau yalototolo da qai dau veivosoti vakalevu. Erau raica vakabibi o Jiova kei Jisu na veivosoti. (Maciu 6:14, 15) Vakacava ena vinakati mo dau lewa vinaka na lomamu mo qai dau veivosoti?

6. Na cava meda qarauna kina na yaloca?

⁶ O ira na sega ni dau lewa vinaka na lomadra era na dau yaloca. Ni yaco qo ena sega ni dua ena via veimaliwai kei ira. Ena veivakamuai cala tale ga ena ivavakoso. De dua ena vunitaka tu nona yaloca se na nona yalo ni veicati, ia na vakasama cala e kadre toka vakalalai e lomana ena “vakavotui . . . ena ivavakoso.” (Vkai. 26:24-26) Eratou na rairai vukei koya na qase me raica ni so na itovo vaka na yaloca, veicati kei na kena dau katoni na ca e sega nodra tikina ena isoqosoqo i Jiova. E matata vinaka na ka e vakamacalataka na iVola i Jiova. (Vunau 19:17, 18; Roma 3:11-18) E va tale ga qori nomu rai?

7, 8. (a) E liutaka vakacava o Jiova na nona isoqosoqo e vuravura? (b) Na cava soti eda dusimaki kina ena Vosa ni Kalou, cava meda talairawarawa kina?

⁷ O Jiova e liutaka qai vakani ira nona isoqosoqo e vuravura ni vakayagataka “na dauveiqaravi yalodina e vuku” ena nona veidusimaki o Karisito na “ulu ni ivavakoso.” (Maciu 24:45-47; Efeso 5:23) Me vaka ga na ilawalawa dauvakatulewa ena imatai ni senitiuri, na dauveiqaravi qo e ciqoma qai doka vakalevu na itukutuku ena vosa uqeti ni Kalou. (Wilika 1 Cesalonaika 2:13.) Na cava eso na idusidusi ena iVolatabu e yaga vei keda?

⁸ E vakaroti keda na iVolatabu meda soqoni wasoma. (Iper. 10:24, 25) E uqeti keda meda tukuna na duavata ni ivakavuvuli. (1 Kor. 1:10) E tukuna vei keda na Vosa ni Kalou meda vakaliuca na Matanitu ni Kalou. (Maciu 6:33) Na iVolatabu tale ga e vakabibitaka ni  noda itavi meda vunau e veivale, e matanalevu kei na vunau tawalokuci. (Maciu 28:19, 20; Caka. 5:42; 17:17; 20:20) E vakasalataki ira na qase na iVola ni Kalou mera raica ni savasava tiko ga na nona isoqosoqo. (1 Kor. 5:1-5, 13; 1 Tim. 5:19-21) E vakarota tale ga o Jiova vei ira kece ena nona isoqosoqo mera savasava vakayago, vakayalo tale ga.—2 Kor. 7:1.

9. Na ituvatuva cava eda vukei kina meda kila na Vosa ni Kalou?

⁹ De ra nanuma eso nira rawa ni kila ga vakataki ira na iVolatabu. Ia sa lesia o Jisu na “dauveiqaravi yalodina” me sala duadua ga e vakarautaki kina na kakana vakayalo. Tekivu na 1919, sa vakayagataka tiko o Jisu Karisito na dauveiqaravi qori me vukei ira na nona imuri mera kila na iVola ni Kalou, mera muria tale ga na kena veidusimaki. Nida talairawarawa ina veidusimaki ena iVolatabu, eda sa uqeta tiko na savasava, veiyaloni kei na duavata ena ivavakoso. E vinaka meda na dui tarogi keda, ‘Au yalodina ena ituvatuva e vakayagataka tiko o Jisu nikua?’

10. E vakamacalataki vakacava ena ivola i Isikeli na isoqosoqo vakalomalagi i Jiova?

¹⁰ Na vosa volai i Jiova e vakatakila vei keda na nona isoqosoqo vakalomalagi. Me kena ivakaraitaki, e raivotutaka o Isikeli ni matataka tiko na isoqosoqo vakalomalagi ni Kalou e dua na qiqi vakalomalagi. (Isik. 1:4-28) E vodo tiko ena qiqi o Jiova, qai gole ga ena vanua e dusimaki koya kina na yalona tabu. Ena dusimaki ira tale ga na tiko e vuravura na nona isoqosoqo vakalomalagi. Sa toso totolo sara tiko na qiqi! Vakasamataka mada na levu ni veisau e sa cakava tiko na isoqosoqo ena 10 na yabaki sa oti—meda nanuma tiko ga ni vakavuna kece o Jiova. Ni sa voleka ni vakarusa na ituvaki ca qo o Karisito kei ira na agilosi yalosavasava, sa toso totolo sara tiko na nona qiqi o Jiova me vakadinadinataka na dodonu ni nona veiliutaki kei na vakarokorokotaki ni yacana tabu!

11, 12. Na cava sa yaco tiko ena iSoqosoqo i Jiova?

¹¹ Vakasamataka mada na ka sa cakava tiko na isoqosoqo ni Kalou e vuravura ena iotioti ni veisiga qo. Tarataravaki. E vica na drau era ogaoga ena kena taravaki na valenivolavola liu ni iVakadinadina i Jiova e Warwick, Niu Yoka, e Merika. Ena veidusimaki ni Tabana ni Tarataravaki e Veiyasa i Vuravura (Worldwide Design/Construction Department), e vica vata na udolu era soli ira mai na veiyasa i vuravura nira cakacaka vakaukaua ena tara Vale ni Soqoni kei na vakalevutaki ni valenivolavola ni tabana. Eda vakavinavinakataki ira na bole cakacaka qo era gumatua na vakaitavi kina! Nanuma tiko ni sa vakalougatataki ira na dautukutuku e veiyasa i vuravura o Jiova, nira yalodina na solia nodra cau me vakailavotaki kina na cakacaka ni tarataravaki.—Luke 21:1-4.

 ¹² Vuli. Vakasamataka mada na vica na koronivuli vakalou sa dau vakayacori tiko ena gauna qo. (Aisea 2:2, 3) Na Koronivuli ni Cakacaka Vakapainia, na Koronivuli ni Cakacaka Vakaitalatala, Koronivuli e Kiliati, Nodra Vuli na Lewenivuvale e Peceli, na Koronivuli ni iVakatawa ni Tabacakacaka kei na Watidra, nodra Vuli na Qase, na Koronivuli ni Cakacaka Vakaitalatala ni Matanitu kei na Vuli ni Lewe ni Komiti ni Tabana kei na Watidra. Dua na ka nona vinakata o Jiova me vakavulici ira na nona tamata! E rawa ni vulici tale ga na iVolatabu ena noda website na jw.org, e vakarautaki tu kina e levu na ivola ena vica vata na vosa. E tiko ga na ka e vakarautaki me baleti ira na gone kei na vuvale, vaka kina eso na irogo. O sa bau vakayagataka tiko na jw.org ena nomu cakacaka vakaitalatala kei na nomu sokalou vakavuvale?

13. Na cava na noda itavi nida yalodina vei Jiova?

¹³ Dua na ka dokai meda lewena na isoqosoqo i Jiova! Nida kila na ka e vinakata na Kalou kei na nona ivakatagedegede, e noda itavi meda cakava na ka dodonu meda tokona kina nona veiliutaki cecere. Ni sa qai toro sobu ga o vuravura, e dodonu meda “cata na ka ca,” me vakataki Jiova. (Same 97:10) Meda kua ni vakataki ira na tamata ivalavala ca meda tukuna “ni vinaka na ca, e ca na vinaka.” (Aisea 5:20) Nida via vakamarautaka na Kalou eda na saga meda savasava vakayago, vakayalo, vaka kina noda itovo. (1 Kor. 6:9-11) Eda na nuitaki Jiova nida lomani koya; eda na yalodina vua nida muria na ivakatagedegede e vakamatatataki tu ena nona iVola. Eda na tovolea ena noda igu kece meda muria na ivakatagedegede qori ena vanua cava ga eda tiko kina, e vale, ena ivavakoso, ena vanua ni cakacaka, e koronivuli tale ga. (Vkai. 15:3) Dikeva mada eso tale na sala eda na rawa ni yalodina kina vua na Kalou.

14. Era na yalodina vakacava vua na Kalou na itubutubu lotu vaKarisito?

¹⁴ Nodra tuberi na gone. O ira na itubutubu lotu vaKarisito era vakaraitaka nodra yalodina vei Jiova nira susugi luvedra me salavata kei na Vosa i Jiova. Era na sega ni vakamuai ena rai ni nodra vanua ena nodra susugi na gone. Me kua ni laurai na yalo ni vuravura ena vuvale lotu vaKarisito. (Efeso 2:2) Ena sega ni nanuma na tama lotu vaKarisito, ‘O ira ga na tina era dau vakavulici ira na gone ena neimami vanua.’ E matata na ka e tukuna na iVolatabu: “Kemuni na tama, . . . ni tuberi ira tiko ga [na luvemuni] ena ivakavuvuli kei na ivakasala [ivakaro; idusidusi] i Jiova.” (Efeso 6:4; vmr.) O ira na itubutubu era rerevaka na Kalou era na vinakati luvedra mera vakataki Samuela, ni dau tokoni koya o Jiova ni tubu cake tiko.—1 Sam. 3:19.

15. Eda na yalodina vakacava vei Jiova ni vinakati meda vakatulewataka e dua na ka bibi?

¹⁵ Vakatulewa. Ni bera nida vakatulewataka e dua na ka bibi, eda na vakaraitaka noda yalodina vua na Kalou nida qara na veidusimaki ena nona vosa volai kei na nona isoqosoqo. Dua na kena ivakaraitaki na gauna e dau basika kina na ituvaki e kauai kina vakalevu na itubutubu. Dau matau vei ira na toki ena dua tale na vanua mera biuti luvedra vei ira na wekadra mera rawa kina ni cakacaka tiko ga ra qai rawailavo ena vanua era toki kina qori. Qo e nodra vakatulewa, ia meda nanuma tiko nida na saumitaro kece vua na Kalou. (Wilika Roma 14:12.) Vakacava e ka vakayalomatua  meda vakatulewa ga me baleta noda vuvale kei na noda bula nida sega mada ni dikeva e liu na iVolatabu? Sega sara! E dodonu ga me vukei keda na Tamada vakalomalagi nida sega ni lewa na noda ilakolako.—Jere. 10:23.

16. Na cava e cakava e dua na marama ni sa sucu o luvena, na cava e vukei koya me donu kina nona vakatulewa?

¹⁶ A vakasucuma e dua na marama e dua na gonetagane ni tiko e vanuatani, a nanuma ena dua na siga me vakauti luvena vei rau na itubutubu i watina ena nona vanua me rau susuga. A vuli iVolatabu na marama qo kei na dua na iVakadinadina i Jiova ena gauna a vakasucu oti kina. E toso vinaka sara qai vulica tale ga ni nona itavi vakalou me susugi gone me qaravi Jiova. (Same 127:3; Vkai. 22:6) Me vaka ga e uqeti keda kina na iVolatabu, e talaucaka na lomana vei Jiova. (Same 62:7, 8) E cakava tale ga qori vua na nona qasenivuli ni vuli iVolatabu, kei ira ena ivavakoso. Era saga na wekana kei na nona itokani me vakauti gone lesu vei rau na itubutubu i watina, e kila ga o koya ni sega ni dodonu me cakava ya. E drukataka sara ga o watina nodra vukei koya kei na gone o ira ena ivavakoso, e vakadonuya me vulica na iVolatabu, e tomani rau tale ga na veitinani ena soqoni. Vakacava e nanuma na marama qo ni rogoca o Jiova nona masu? Macala ga ni qori na ka e vakila.

17. Na cava eda dusimaki kina me baleti ira na vuli iVolatabu?

¹⁷ Muria na Veidusimaki. Dua na sala eda vakaraitaka kina noda yalodina vua na Kalou oya noda muria na veidusimaki ena nona isoqosoqo. Me kena ivakaraitaki, na ka eda dusimaki kina me baleti ira na noda vuli iVolatabu. E vakatututaki ni gauna ga eda sa tekivu vakavulica kina e dua ena ivola Na Cava Mada e Kaya na iVolatabu? eda na vakayagataka eso na gauna ni oti na vuli meda dusimaki gonevuli ina isoqosoqo. Eda rawa ni vakayagataka na vidio Na Cava e Caka ena Vale ni Soqoni? kei na brochure O Cei Era Cakava Tiko Nikua na Loma i Jiova? Eda uqeti ni gauna e oti kina na ivola Kaya na iVolatabu ni toso tiko o gonevuli, vakavulici ira ena ivola “Tiko ga ena Loloma ni Kalou” ke sa papitaiso sara mada ga o gonevuli. E vakarautaka na isoqosoqo na idusidusi qo mera “tudei ena vakabauta” na tisaipeli vou. (Kolo. 2:7) Vakacava o muria tiko na veidusimaki qo ni isoqosoqo i Jiova?

18, 19. Na cava meda na vakavinavinaka kina vei Jiova?

¹⁸ E levu na vuna meda vakavinavinakataki Jiova kina! Eda dinau tu vua, ke sega o koya eda na sega ni yavala rawa se bula tu nikua. (Caka.17:27, 28) E solia vei keda e dua na iloloma uasivi—oya na nona ivola na iVolatabu. Meda vakavinavinakataka na nona itukutuku, me vaka ga nodra taura ra qai ciqoma na lotu vaKarisito mai Cesalonaika na Vosa ni Kalou.—1 Ces. 2:13.

¹⁹ Ni tu qo vei keda na Vosa ni Kalou, eda sa veivolekati kina kei Jiova. (Jeme. 4:8) E solia vei keda na Tamada vakalomalagi na itavi lagilagi meda lewe ni nona isoqosoqo. Meda vakavinavinakataka mada ga! E totoka na sala e kauta cake mai kina na daunisame na tikina qo ni lagata: “Vakavinavinaka vei Jiova, ni vinaka o koya, e tawamudu na dei ni nona loloma.” (Same 136:1) E cavuti vakaruasagavulukaono ena Same 136 na italetale “e tawamudu na dei ni nona loloma.” Nida yalodina vei Jiova kei na nona isoqosoqo, eda na vakila na dina ni vosa veiuqeti qori nida na bula tawamudu!