“NOQU lewa.” Qori na vosa e dau cavuta o Jisu vei ira na yalewa. Kena ivakaraitaki, ni vakabula e dua na lokiloki e vakalairoro voli me 18 na yabaki, e kaya: “Noqu lewa, o sa vakabulai mai na nomu malumalumu.” (Luke 13:10-13) Qo tale ga na ivakarau vakavanua e muria o Jisu ni vosa vei tinana, e dau raici tu ena gauna vakaivolatabu me veidokai. (Joni 19:26; 20:13) Ia e tiko e dua tale na vosa e dau vakayagataka o Jisu e sega ni baleta wale ga na veidokai.

Na iVolatabu e dau vakayagataka na vosa ni veidokai qai veikauaitaki vei ira eso na yalewa. A cavuta sara ga o Jisu ni vosa vua na marama e lako tu ga vua na dra me 12 na yabaki. E sega ni muria vinaka sara na marama qo na ka e tukuni ena Lawa, nira okati mera tawasavasava o ira qori. De dua a sega ni dodonu me maliwai ira na lewenivanua ni a tauvimate. (Vunau 15:19-27) Dua na ka nona via bula. E “vosota e levu na veiqaravi vakavuniwai, e vakayagataka kece kina na nona iyau, ia e sega ni vakaotia na kena mate, sa qai ca ga.”—Mari. 5:25, 26.

E curu lo yani ena kedra maliwa na oso tu e kea, e gole mai ena daku i Jisu qai tara nona belenisulu. Sega ni bera ni sa cegu na dra e lako mai vua! A nanuma ni na sega ni kilai na ka e cakava, ia e qai taroga o Jisu: “O cei e tarai au?” (Luke 8:45-47) E rere qai sautaninini na yalewa ni tekiduru e mata i Jisu “qai tukuna vua na ka dina kece.”—Mari. 5:33.

E yalovinaka o Jisu qai vakacegui koya ni kaya: “Luvequ, kua ni lomaleqa!” (Maciu 9:22) Era kaya na vuku ni iVolatabu ni vosa vakaIperiu kei na vosa vaKirisi ni “luvequ” e rawa ni vakaibalebaletaka na “loloma kei na veinanumi.” E tomana nona veivakacegui o Jisu ni kaya: “Sa vakabulai iko na nomu vakabauta. Lako ena vakacegu, mo bula mai na kemu mate bibi.”—Mari. 5:34.

“Luvequ.” Qori tale ga na icavuti e kacivi Ruci kina na yalewa ni Moapi o Poasa na turaga vutuniyau ni Isireli. E tiko na vuna me lomaleqa kina o Ruci ni tomitomi tiko ena nona were e dua na turaga erau sega ni veikilai. “Mo rogoci au mada, luvequ,” e kaya o Poasa. E mani uqeti Ruci me tomitomi tiko ga ena nona were. E tekicuva o Ruci vei Poasa me taroga se cava e lomani koya kina ni vulagi. E vakacegui koya o Poasa ni kaya: “Sa tukuni taucoko vei au na ka kece o cakava vua na vugomu [na yada o Neomai] . . . Me vakaicovitaki iko mada ga o Jiova ena ka kece o cakava.”—Ruci 2:8-12.

Erau ivakaraitaki vinaka dina o Jisu kei Poasa vei ira na qase lotu vaKarisito! Ena so na gauna, e rua na qase rau na veivosaki kei na dua na yalewa lotu vaKarisito e vinakata na ivakasala vakaivolatabu kei na veivakayaloqaqataki. Erau na kerea na veidusimaki i Jiova, rau na rogoci koya vinaka na tacida yalewa, oti erau na vakacegui koya ena Vosa ni Kalou.—Roma 15:4.