“Na Tamata Yalovinaka ena Vakalougatataki”

SARAVA/ROGOCA

E BIBI na isoro ena sokalou dina. Era dau cabora na Isireli na isoro manumanu, eda kilai tani tale ga na lotu vaKarisito ena noda “isoro ni veivakacaucautaki.” Ia eso tale na isoro e taleitaka vakalevu na Kalou. (Iper. 13:15, 16) E vu ni marau kei na veivakalougatataki na isoro qori nida wilika ena vica na ivakaraitaki qo.

E dua na dausokalou yalodina o Ana, e vinakata me dua na luvena tagane, kena leqa ni sega ni vakaluveni rawa. E yalataka vei Jiova ena masu, ke dua na luvena tagane, ena “soli koya vei Jiova ena gauna kece ni nona bula.” (1 Sam. 1:10, 11) Toso na gauna e kunekune o Ana, mani vakasucuma e dua na gonetagane, o Samuela. Ni sa kali o Samuela, e kauti koya sara o tinana ina valeniveitavaki me vaka e yalataka. O Jiova e vakalougatataki Ana ena yalo ni nona vakuai koya. E lima tale na luvena, ia o Samuela e parofita, e vakaitavi tale ga ena vola iVolatabu.—1 Sam. 2:21.

O keda na lotu vaKarisito nikua eda vakataki Ana kei Samuela nida vakayagataka noda bula meda qarava na itavi eda yalataka vua na Dauveibuli. E yalataka o Jisu nida na vakalougatataki ke da vakuai keda meda sokaloutaki Jiova.—Mari. 10:28-30.

E dua na yalewa lotu vaKarisito ena imatai ni senitiuri, o Tokasa. E kilai levu ni “dau cakacaka qai dau soli iloloma”—me veivuke kina. Ka ni rarawa ni “tauvimate mani mate sara,” e mositi ira vakalevu na lewe ni ivavakoso. Nira rogoca na tisaipeli ni tiko ena yasayasa ya o Pita, era vakamasuti koya me lako yani vakatotolo. Vakasamataka mada na levu ni nodra marau ni yaco yani o Pita qai vakabulai Tokasa. Qori na imatai ni veivakaturi me vakayacora! (Caka. 9:36-41) E sega ni guilecava na Kalou na nona vakuai koya o Tokasa. (Iper. 6:10) E maroroi ena Vosa ni Kalou na itukutuku ni nona yalovinaka meda vuli kina.

E ivakaraitaki vinaka tale ga na yapositolo o Paula ni dau solia nona gauna qai veikauaitaki. Ni volavola vei ira na tacina lotu vaKarisito e Korinica, e kaya: “O yau, au na marautaka vakalevu meu vakayagataka vei kemuni na ka kece e tu vei au.” (2 Kor. 12:15) E vakadinadinataka ni vakavumarau me dau vakuai koya ena vukudra eso tale, ia koya e bibi sara ni na vakalougatataki koya kina o Jiova, ena vakadonui koya tale ga.—Caka. 20:24, 35.

E macala ga ni marautaka o Jiova nida vakayagataka noda gauna kei na igu meda tokona na cakacaka ni nona Matanitu da qai vukei ira na tacida. Vakacava e tiko tale eso na sala eda na tokona kina na cakacaka vakavunau? Io! Me ikuri ni noda veiqaravi ena loloma, eda na rokova na Kalou ena noda cau. Qori e vakayagataki ena cakacaka vakavunau e vuravura raraba, nira tokoni kina na daukaulotu kei ira na veiqaravi lavotaki vakatabakidua. E tokona tale ga na kena vakarautaki se vakadewataki na ivola kei na vidio, veivuke ena leqa tubukoso, kei na tara Vale ni Soqoni vovou. Eda nuidei ni na “vakalougatataki” na “tamata yalovinaka.” Eda rokovi Jiova tale ga ena noda iyau.—Vkai. 3:9; 22:9.

Nodra Tuvanaka Eso Mera Cau Ena Cakacaka E Vuravura Raraba

Me vaka ena gauna i Paula, levu nikua era ‘biuta vakatikitiki eso na ka,’ se ra maroroya na ilavo me biu ena kato ni cau ena ivavakoso e volai kina na “Cakacaka e Vuravura Raraba.” (1 Kor. 16:2) Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra vanua. O rawa tale ga ni vakauta vakadodonu na nomu cau ina isoqosoqo e vakadonui vakalawa meda vakayagataka na iVakadinadina i Jiova. Ke o via kila na isoqosoqo vakalawa e vakayagataki ena nomu vanua, veitaratara ina valenivolavola ni tabana. E rawa ni laurai ena www.pr418.com. Qo na cau o rawa ni vakauta sara ga vakadodonu:

CAU E SOLI VAKAILOLOMA

E rawa ni vakau na cau ena sala qo: elec-tronic bank transfer, debit card, se credit card. E rawa tale ga ni cakava qori eso na valenivolavola ni tabana ni vakayagataki na jw.org se dua tale na website veiganiti.
Cautaki na ilavo, iukuuku vatutalei kei na so tale na ka vakamareqeti. Me dua na ivola me vakau vata kei na cau qori, me vakamacalataka ni ka e cautaki ya e soli vakailoloma.

CAU E TIKO NA KENA VEIDINADINATI

Cautaki na ilavo qai tiko na veidinadinati ni na rawa ni suka tale vei koya e cau ke mani vinakata.
Me dua na ivola me vakau vata kei na cau qori, me vakamacalataka ni tiko na kena veidinadinati.

SOLI KA E LALAWATAKI

Me ikuri ni kena cautaki na ilavo kei na ka vakamareqeti tale eso, e tiko eso tale na cau me yaga ena cakacaka ni Matanitu ni Kalou e vuravura. Qori ena qai vakamacalataki ena vica na parakaravu tarava. Se mani sala cava o via cau kina, yalovinaka veitaratara e liu kei na valenivolavola ni tabana ena nomu vanua mo rawa ni kila na sala e rawa ni cau kina e dua ena nomu vanua. E duidui na ka vakalawa kei na lawa ni saumi ivakacavacava, e bibi gona mo veivosaki kei na dua na daunivakasala ni ivakacavacava kei na ka vakalawa ni bera ni o digia na sala vinaka duadua mo cau kina.

Inisua kei na Peniseni: E rawa ni volai ina dua na isoqosoqo vakalawa e vakayagataka na iVakadinadina i Jiova na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe e rawa ni soli me taukena e dua na isoqosoqo vakalawa e vakayagataka na iVakadinadina i Jiova ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina dua na isoqosoqo vakalawa e vakayagataka na iVakadinadina i Jiova me dua ga na cau e soli vakailoloma se me dua na veidinadinati vakaivola me qai soli me taukena ni sa mate e dua.

Qele kei na Vale: E rawa ni soli vakadua na qele se na vale ina dua na isoqosoqo vakalawa e vakayagataka na iVakadinadina i Jiova, e rawa tale ga ni caka e dua na veidinadinati se me tawana tiko mada na qele se vale o koya e solia me yacova nona mate.

Wili kei na Trust: E rawa ni soli na iyau se na ilavo ina dua na isoqosoqo vakalawa e vakayagataka na iVakadinadina i Jiova, ena tabaki e dua na wili se rawa ni vakayacori e dua na veidinadinati, me maroroya toka na isoqosoqo vakalawa qori na nona ilavo se iyau e dua me yacova na nona mate, sa rawa ni qai taukena na isoqosoqo. Qori ena rawa ni vakalailaitaka na saumi ni ivakacavacava.

Na cau va qori e vakatokai me “soli ka e lalawataki,” kena ibalebale ena vinakati me lalawa sara ga vakavinaka o koya e via soli ka. Sa vakarautaki e dua na brochure vakavalagi kei na kena vakaSipeni e vakatokai na Char-itable Planning to Benefit Kingdom Ser-vice Worldwide me dusimaki ira na via soli ka ina cakacaka ni iVakadinadina i Jiova e vuravura raraba. A volai na brochure qori me kilai kina na sala ni soli ka vakailoloma e rawa ni caka ena gauna qo se dua na gauna se bera mai, me vaka na gauna sa mate kina e dua. Na ivakamacala ena brochure qori ena rairai sega ni ganita sara na kemu ituvaki ena vuku ni ivakacavacava se so tale na lawa ena nomu vanua. Ni vakayagataki e vica na sala sa cavuti oti mai, e levu era sa tokona na noda cakacaka kei na noda cakacaka ni veivuke e vuravura raraba, qai vakalailaitaki kina na ivakacavacava e dau lavaki. Ke tiko ena nomu vanua na brochure qori, o rawa ni kerea vua na vunivola ni ivavakoso.

Me ikuri ni ivakamacala, gole ena ulutaga e toka e ra “Cau ina Cakacaka e Vuravura Raraba” se veitaratara ena valenivolavola ni tabana.

Rawa ni o Wilika Tale ga

iDusidusi ni Cau ena Internet

Raica na iwalewale mo cau kina ena Internet.

NA VALE NI VAKATAWA (ITABATABA E VULICI)