1-2. (a) Eda vosota vakacava e veisiga? Vakamacalataka. (b) Na cava eda na veivosakitaka ena ulutaga qo?

“NIU vakasamataka na veika dredre au sotava mai, au kila niu sega ni vosota rawa ena noqu kaukaua ga.” O tukuna tale ga qori ena dua na gauna? Levu vei keda eda vakadinadinataka. De dua eda tukuna qori nida vakasamataka noda vosota rawa na tauvimate bibi se nona mate e dua na wekada lomani. O kila ni o vosota rawa e veisiga ni solia vei iko na yalo tabu i Jiova “na kaukaua e uasivia na kaukaua ni tamata.”—2 Kor. 4:7-9.

² Eda nuitaka tale ga na veivuke ni yalo tabu meda vorata na yalo ni vuravura ca qo. (1 Joni 5:19) Eda sasaga tale ga meda vorati ira “na yalo ca tawarairai.” (Efeso 6:12) Eda na veivosakitaka gona e rua na sala ena tokoni keda kina na yalo tabu meda vosota na veika dredre qori. Eda na vulica tale ga na sala me tokoni keda kina vakalevu na yalo tabu.

3. Na cava e dua na sala e vukei keda kina o Jiova meda vosota?

³ E tokoni keda na yalo tabu i Jiova ni solia na kaukaua se igu, meda qarava kina noda itavi se mani dredre na ituvaki. E rawa vakacava me qaravi Jiova tiko ga na yapositolo o Paula ni sotava na veika dredre? E vakabauta ni rawa ga qori ni nuitaka “na kaukaua i Karisito.” (2 Kor. 12:9) Ena ikarua ni ilakolako vakaulotu i Paula, e gumatua ena vunau, e cakacaka tale ga me tokoni koya vakailavo. E lai tiko e Korinica ena vale nei Akuila kei Pirisila. Erau daucula valelaca, e kenadau tale ga kina o Paula. Eratou cakacaka vata gona ena so na gauna. (Caka. 18:1-4) Io, e tokoni Paula na yalo tabu me qaravi koya ga, me vakacavara vinaka tale ga nona cakacaka vakaitalatala.

4. Me vaka e tukuni ena 2 Korinica 12:7b-9, na ituvaki dredre cava e sotava o Paula?

 ⁴ Wilika 2 Korinica 12:7b-9. Ni cavuta o Paula na “votonikau” e votoki koya tiko, na cava e vakaibalebaletaka? Ke votoki iko e dua na votonikau, ena mosi sara ga. E tukuna gona o Paula ni sotava tiko e dua na ituvaki mosimosi, e vakatoka me “agilosi i Setani” e “vakararawataki” koya tiko. Sega ni kena ibalebale ya ni vakararawataki koya tiko o Setani kei ira nona timoni nira culai koya ena dua na votonikau. Ia nira raica na “votonikau” qori, de dua era via culai koya vakaukaua me mosi vakalevu vei Paula. Na cava gona ena cakava?

5. E sauma vakacava o Jiova na masu nei Paula?

⁵ E vinakata o Paula me kauta tani na “votonikau.” E kaya: “E vakatolu noqu kerea na Turaga [o Jiova] me kauta laivi na votonikau qo.” E masu vakatolu o Paula ia e sega ni kau tani na votonikau qori. Kena ibalebale ya ni sega ni rogoci koya o Jiova? Sega, e sauma nona masu. Ena sala cava? E sega ni kauta tani na ituvaki dredre e sotava o Paula, e vakaukauataki koya ga me vosota. E kaya vua o Jiova: “Ni na qai taucoko na noqu kaukaua ena nomu malumalumu.” (2 Kor. 12:8, 9) Io, e marau tiko ga o Paula, e vakila tale ga na vakacegu ena veitokoni i Jiova!—Fpai. 4:4-7.

6. (a) Ena rairai sauma vakacava o Jiova noda masu? (b) E vakayaloqaqataki iko vakacava na veivakadeitaki ena veitikinivolatabu ena parakaravu?

⁶ Me vakataki Paula, o masuti Jiova ena dua na gauna me tarova na ituvaki dredre o sotava? Ni o masuti koya vakavica, e sega ni oti na leqa, de dua sa qai ca ga. Vakacava o nanuma ni sa sega ni vakadonui iko o Jiova? Kua ni yalolailai, mo nanuma na ivakaraitaki i Paula. Ena sauma nomu masu me vaka ga e cakava vei Paula! Ena rairai sega ni tarova na leqa o Jiova. Ia ena vakaukauataki iko na nona yalo tabu mo vosota na veika dredre. (Same 61:3, 4) De dua o na “vakabalei,” ia ena sega ni biuti iko o Jiova.—2 Kor. 4:8, 9; Fpai. 4:13.

7-8. (a) Sala cava e vaka kina na cagi na yalo tabu? (b) E vakamacalataka vakacava o Pita na cakacaka ni yalo tabu?

⁷ Na cava e dua tale na sala e tokoni keda kina na yalo tabu? Me vaka na cagidonu ena wasawasa voravora, na yalo tabu ena tosoi keda tiko ga i liu meda yaco bula ina vuravura vou e yalataka na Kalou.

⁸ Ni gonedau na yapositolo o Pita, e kila vinaka na soko. De dua qori na vuna e vakayagataka kina e dua na vosa e veisemati kei na soko ni vakamacalataka na cakacaka ni yalo tabu. E kaya: “Ni sega ni bau dua na parofisai e vu ena lewa ni tamata, e tukuna ga na tamata na ka e vinakata na Kalou ena veiuqeti ni yalo tabu.” Na vosa vaKirisi e vakadewataki me “veiuqeti,” e kena ibalebale “tosoi; toso vata.”—2 Pita 1:21.

9. Na iyaloyalo cava e via tukuna tiko o Pita ena vosa “tosoi”?

⁹ Na iyaloyalo cava e via tukuna tiko o Pita ena vosa “tosoi”? E vakayagataka tale ga o Luke ena ivola na Cakacaka na vosa vaKirisi qori ni vakamacalataka na waqa e ‘savu tu yani’ ena liwa ni cagi. (Caka. 27:15) Na cava gona e via tukuna tiko o Pita ena vosa “tosoi” ni tukuni ira na vola iVolatabu? E kaya e dua na dauvakadidike ni iVolatabu ni vakayagataka o Pita “e dua na vosa vakatautauvata vinaka ni soko.” E tukuna o Pita ni yalo tabu e tokoni ira na parofita kei ira na vola iVolatabu mera qarava rawa nodra itavi, me vaka ga na cagi e tosoya na waqa. E kaya na dauvakadidike qori: “Era vakarewataka na parofita na nodra laca.” E cakava o Jiova na nona itavi ni vakarautaka “na cagi,”  oya nona yalo tabu. Era qarava vinaka na vola iVolatabu na nodra itavi nira muria na kena veidusimaki.

10-11. Na cava e rua na ka meda cakava me dusimaki keda kina na yalo tabu? Vakatauvatana.

¹⁰ E macala ni sa oti na gauna ni vola iVolatabu. Ia o Jiova e vakayagataka tiko ga na nona yalo tabu me vakaukauataki ira nona dauveiqaravi. O Jiova se cakava tiko na nona itavi. Ia na cava meda cakava me tokoni keda kina na yalo tabu? E vinakati meda cakava noda itavi. Ena sala cava?

¹¹ Vakasamataka na ivakatautauvata qo. Ke vinakata na dausoko me tosoya nona waqa na cagi, e bibi me cakava e rua na ka. Kena imatai, me vagolea nona waqa ena vanua e liwa mai kina na cagi. E macala ni na sega ni toso na waqa ke tu ga ena toba me yawa mai na vanua e liwa kina na cagi. Kena ikarua, e vinakati me vakarewataka vinaka na nona laca. Ke liwa tiko na cagi, ena qai toso ga na waqa ni liwava na laca. E va tale ga qori noda qaravi Jiova, eda na vosota rawa ga ni tokoni keda na yalo tabu. E vinakati gona meda cakava e rua na ka me dusimaki keda kina na yalo tabu. Kena imatai, meda gole ina vanua ena veitokoni kina na yalo tabu, oya nida vakaitavi ena cakacaka e veidusimaki kina. Kena ikarua, meda ‘vakarewataka sara vakavinaka noda laca,’ oya nida vakaitavi vakalevu ena cakacaka qori ena noda vinaka taucoko. (Same 119:32) Nida cakava qo, ena tokoni keda na yalo tabu meda toso tiko ga i liu ni robai keda na ua ni veitusaqati kei na veivakatovolei, eda na yalodina tiko ga me yacova na vuravura vou e yalataka na Kalou.

12. Na cava eda na veivosakitaka qo?

¹² Eda sa veivosakitaka mai e rua na sala e tokoni keda kina na yalo tabu. Na yalo tabu e solia vei keda na kaukaua, e tokoni keda tale ga meda yalodina ena ituvaki dredre. Na yalo tabu e tosoi keda tale ga i liu, e  tokoni keda meda dei tiko ga ena sala ni bula tawamudu. Eda na veivosakitaka qo e va na ka meda cakava me dusimaki keda kina vakalevu na yalo tabu.

13. Me vaka e tukuni ena 2 Timoci 3:16, 17, ena uqeti keda vakacava na Vosa ni Kalou? Na cava meda cakava?

¹³ Kena imatai, vulica na Vosa ni Kalou. (Wilika 2 Timoci 3:16, 17.) Na vosa vaKirisi e vakadewataki me “vakavuna na Kalou,” e kena ibalebale “ceguva na Kalou.” Na Kalou e vakayagataka nona yalo tabu me “ceguva” nona rai ina nodra vakasama na vola iVolatabu. Nida wilika gona na iVolatabu qai vakasamataka vakatitobu, ena uqeta noda vakasama kei na lomada na veidusimaki ni Kalou. Ena uqeti keda meda cakava na veiveisau meda vakamarautaki koya. (Iper. 4:12) Ia me dusimaki keda vakalevu na yalo tabu, e vinakati meda lokuca na gauna meda vulica wasoma na iVolatabu qai vakasamataka vakatitobu. Ena qai dusimaki keda na Vosa ni Kalou ena ka meda tukuna se cakava.

14. (a) Na cava eda kaya kina ni veidusimaki tiko na yalo tabu ena soqoni? (b) Eda na “vakarewataka vinaka” vakacava noda laca ena soqoni?

¹⁴ Kena ikarua, sokalou vata. (Same 22:22) Na noda soqoni e vaka na “vanua e liwa mai kina na cagi.” Na yalo tabu i Jiova e veidusimaki ena soqoni. (Vkta. 2:29) Eda kila vakacava? Eda dau kerea na yalo tabu nida sokalou vata kei ira na tacida, eda lagata na sere yavutaki vakaivolatabu, eda rogoca tale ga nodra ivunau na tacida tagane era lesi ena yalo tabu. Na yalo tabu vata ga qori e tokoni ira na tacida yalewa mera vakarautaka qai qarava na itavi era lesi kina. Ia me dusimaki keda vakalevu na yalo tabu, e bibi meda vakavakarau vinaka, meda saumi taro tale ga ena soqoni. Nida cakava qori, ena vaka ga e “vakarewataki vinaka tu noda laca” ena soqoni.

15. Ena veidusimaki vakacava na yalo tabu ena cakacaka vakavunau?

¹⁵ Kena ikatolu, meda cakacaka vakavunau. Nida vakayagataka na iVolatabu ena cakacaka vakavunau kei na veivakavulici, ena dusimaki keda na yalo tabu ena noda cakacaka vakaitalatala. (Roma 15:18, 19) Me tokoni keda gona vakalevu na yalo tabu, e dodonu meda vunau wasoma, meda vakayagataka tale ga vakalevu na iVolatabu. Dua na sala me laulau kina noda cakacaka vakaitalatala, oya nida muria na vakatutu ni veivosaki ena iVola ni Soqoni ni Noda Bula vaKarisito kei na Cakacaka Vakaitalatala.

16. Na cava na sala totolo duadua me tokoni keda kina na yalo tabu?

¹⁶ Kena ikava, masu vei Jiova. (Maciu 7:7-11; Luke 11:13) Na sala totolo duadua me tokoni keda kina na yalo tabu oya nida kerei Jiova ena masu. Ena sega ni dua na ka me vakalatilati vei Jiova me rogoca noda masu se me solia vei keda nona iloloma vinaka na yalo tabu, sega ni valeniveivesu, se o Setani. (Jeme. 1:17) Ia me vakacava na ivakarau ni noda masu me qai tokoni keda kina vakalevu na yalo tabu? Me saumi qori, meda veivosakitaka mada na ulutaga me baleta na masu ena dua na vakatautauvata e volai ga ena Kosipeli i Luke. *

17. Na cava eda vulica me baleta na masu ena vakatautauvata i Jisu ena Luke 11:5-9, 13?

¹⁷ Wilika Luke 11:5-9, 13. Eda vulica ena vosa vakatautauvata i Jisu na sala meda dau kerea kina na yalo tabu. E tukuni  kina na turaga e rawata na ka e vinakata “ena nona cikecike.” E sega ni rere me kere veivuke vua nona itokani ni sa bogilevu mada ga. * E vakatauvatana vakacava qori o Jisu kei na masu? E kaya: “Dou kerekere tiko ga, ena qai soli vei kemudou, dou vaqaqara tiko ga, dou na qai kunea, dou tukituki tiko ga, ena qai dolavi vei kemudou.” Na cava gona eda vulica? Me dusimaki keda na yalo tabu, e vinakati meda masu ena cikecike.

18. Me vaka e tukuni ena vakatautauvata i Jisu, na cava meda nuidei kina ni na solia vei keda o Jiova nona yalo tabu?

¹⁸ Eda vulica tale ga ena vakatautauvata qori na vuna ena solia kina vei keda o Jiova na yalo tabu. E vinakata na turaga ena vakatautauvata me qarava vinaka nona vulagi e yaco yani ena bogi levu. E kila ni nona itavi me vakarautaka na kena ia e sega vua na kakana. E kaya o Jisu ni a veivuke ga o nona itokani ena levu ni nona cike na turaga qori me solia vua na madrai. Na cava e vakabibitaka tiko o Jisu? Ke sa rawa vua na tamata ivalavala ca me vukea nona itokani dau cikecike, sa na qai vacava sara na Tamada vakalomalagi dauloloma ni na solia na yalo tabu vei ira na kerea ena cikecike! Meda nuidei gona ni na rogoca o Jiova noda masu nida kerea nona yalo tabu.—Same 10:17; 66:19.

19. Na cava meda nuidei kina nida na qaqa?

¹⁹ Ke mani vakatovolei keda tiko ga o Setani, eda nuidei nida na qaqa. Na vuna? Ni dau tokoni keda na yalo tabu ena rua na sala. Kena imatai, e solia vei keda na kaukaua meda vosota na veika dredre. Kena ikarua, qori sara ga na igu kaukaua e “liwava na noda laca,” oya ni tokoni keda meda qaravi Jiova tiko ga me yacova na vuravura vou e yalataki. Meda vakadeitaka me tokoni keda mada ga vakalevu na yalo tabu!