ULUTAGA NI VULI 47
Me Kua ni Dua na ka e Tawasei Iko Vei Jiova
“Au nuitaki kemuni, i Jiova.”—SAME 31:14.
SERE 122 Tudei, Tawayavala!
KA ENA VULICI a
1. Eda kila vakacava ni vinakata o Jiova meda toro voleka vua?
E SURETI keda o Jiova meda toro voleka vua. (Jeme. 4:8) E vinakata me noda Kalou, me Tamada, me noda iTokani tale ga. E rogoca noda masu me vukei keda ena gauna dredre. E vakayagataka na nona isoqosoqo me vakavulici keda, me taqomaki keda tale ga. Ia na cava meda cakava meda toro volekati Jiova kina?
2. Eda na toro voleka vakacava vei Jiova?
2 Eda na toro voleka vei Jiova nida masu vua, wilika nona Vosa qai vakasamataka vakatitobu. Nida cakava qori eda na lomani koya, eda na vakavinavinakataki koya. Ena uqeti keda meda talairawarawa vua, meda vakaraitaka tale ga na veivakacaucautaki e dodonu me caka ga vua. (Vkta. 4:11) Na levu ga ni noda kilai Jiova, na levu ni noda nuitaki koya kei na nona isoqosoqo.
3. E saga vakacava na Tevoro me tawasei keda vei Jiova? Na cava meda cakava meda kua ni biuti Jiova kina kei na nona isoqosoqo? (Same 31:13, 14)
3 E saga tiko na Tevoro me tawasei keda vei Jiova vakauasivi nida sotava na veika dredre. E cakava vakacava qori? E saga tiko ga meda kua ni nuitaki Jiova kei na nona isoqosoqo. Ia eda rawa ni vorata na nona sasaga. Oya ni dei na noda vakabauta kei na noda nuitaki Jiova, eda na sega kina ni biuti koya kei na nona isoqosoqo.—Wilika Same 31:13, 14.
4. Na cava eda na veivosakitaka ena ulutaga qo?
4 Eda na veivosakitaka ena ulutaga qo e tolu na ituvaki eda na rairai sotava ena taudaku ni ivavakoso. Ena rawa ni vakaleqa noda nuitaki Jiova kei na nona isoqosoqo. Ena rawa vakacava ni tawasei keda vei Jiova? Eda na vorata vakacava na sasaga nei Setani?
NIDA SOTAVA NA LEQA
5. Ena rawa ni vakaleqa vakacava noda nuitaki Jiova kei na nona isoqosoqo na veika eda sotava?
5 Eso na gauna, eda sotava na leqa me vaka na nodra veitusaqati na lewe ni noda vuvale, se cegu mai na cakacaka. Ena rawa ni vakaleqa vakacava noda nuitaka na isoqosoqo i Jiova na ituvaki qori, se tawasei keda vei koya? Ni dede noda vosota tiko na ituvaki qori, eda rawa ni yalolailai se rarawa. Ena vakayagataka sara ga o Setani na gauna qori meda nanuma kina ni sega ni lomani keda o Jiova. E vinakata meda nanuma ni vakavuna tiko na noda rarawa o Jiova kei na nona isoqosoqo. Qori tale ga na ka era nanuma eso na Isireli mai Ijipita. E liu era vakabauta ni lesi Mosese kei Eroni o Jiova mera sereki mai na nodra vakabobulataki. (Lako 4:29-31) Ia ni vakadredretaka nodra bula o Fero, era mani beitaki Mosese kei Eroni ni vakavuna nodra rarawa. Era kaya: “Drau sa vakavuna me cati keimami o Fero kei ira na nona tamata, drau sa biuta e ligadra na iseleiwau mera vakamatei keimami.” (Lako 5:19-21) Era beitaki rau na dausokaloutaki Jiova qori. E vakaloloma dina! Ke sa dede nomu vosota na veika dredre, o na nuitaki Jiova tiko ga vakacava kei na nona isoqosoqo?
6. Na cava eda vulica vua na parofita o Apakuki? (Apakuki 3:17-19)
6 Talaucaka na lomamu ni o masu vei Jiova, nuitaka nona veitokoni. Levu na ituvaki dredre e sotava na parofita o Apakuki. Dua na gauna, e nanuma ni sega ni lomani koya o Jiova. E mani talaucaka na lomana vei Jiova ena masu. E kaya: “Me vakacava na dede ni noqu kere veivuke vei kemuni Jiova, ia oni sega ni rogoca? . . . Na cava oni vakatara kina na veivakasaurarataki?” (Apak. 1:2, 3) E masu mai vu ni lomana o Apakuki qai rogoca o Jiova. (Apak. 2:2, 3) Ni vakasamataka vakatitobu na nona dau veivakabulai o Jiova, e marau tale. E vakadeitaka ni lomani koya o Jiova, ena vukei koya tale ga me vosota na ituvaki dredre. (Wilika Apakuki 3:17-19.) Na cava eda vulica? Ni o sotava na ituvaki dredre, mo talaucaka na lomamu vei Jiova. Mo nuitaka nona veitokoni. Ni o cakava qori, o na nuidei ni na vakaukauataki iko o Jiova mo vosota. Nomu kila ni tokoni iko, ena vaqaqacotaka nomu vakabauti koya.
7. Na cava e tukuna e dua na wekai Shirley? Cava e sega ni luluqa kina nona vakabauti Jiova o Shirley?
7 Muria tiko ga nomu ituvatuva vakayalo. Qori na ka e cakava e dua na tacida yalewa o Shirley mai Papua Niukini, ni dredre na ituvaki e sotava. b Eratou dravudravua nona vuvale, eso na gauna e lailai na kedratou kakana. E saga e dua na wekana me kua ni nuitaki Jiova. E kaya vua: “O tukuna mada ga ni vukei iko tiko na yalo tabu, ia sa e vei qo na veivuke? Se dravudravua tiko ga nomu vuvale. E vakaoti gauna nomu lai vunau tiko.” E kaya o Shirley: “Au dau taroga: ‘E lomani keitou dina na Kalou?’ Au masu sara vei Jiova, au tukuna vua na ka kece au veinanuyaka tu. E sega ni cegu noqu wilika na iVolatabu kei na noda ivola, noqu lai vunau kei na soqoni.” E raica o Shirley ni vukei ratou tiko o Jiova. Eratou sega ni walokai, ratou marau tiko ga. E kaya: “Au kila sara ga ni rogoca o Jiova noqu masu.” (1 Tim. 6:6-8) Ke o muria tiko ga nomu ituvatuva vakayalo, ena sega ni tawasei iko vei Jiova na veika dredre kei na vakatitiqa.
NIRA TUSAQATI NA TACIDA NUITAKI
8. Na cava ena rawa ni yacovi ira na tacida nuitaki ena isoqosoqo i Jiova?
8 Era dau vakayagataka na meca na tabana ni itukutuku se na Internet me vakatetei kina na itukutuku lasu me baleti ira na tacida era liutaka tiko na cakacaka ena isoqosoqo i Jiova. (Same 31:13) Era vesu eso na tacida ra qai beitaki nira dau basulawa. Era sotava tale ga na ituvaki qori na lotu vaKarisito ena imatai ni senitiuri ena gauna e vesu kina na yapositolo o Paula qai beitaki. Na cava era cakava?
9. Na cava era cakava eso na lotu vaKarisito ni vesu na yapositolo o Paula?
9 Eso na lotu vaKarisito ena imatai ni senitiuri era sega tale ni tokona na yapositolo o Paula ni vesu e Roma. (2 Tim. 1:8, 15) Na vuna? Vakacava era madua nira raici Paula na lewenivanua me dua na dau basulawa? (2 Tim. 2:8, 9) Se ra rere nira na tusaqati tale ga? Se cava na vuna, vakasamataka mada na rai nei Paula. E vosota e levu na veika dredre, e bolemate mada ga ena vukudra. (Caka. 20:18-21; 2 Kor. 1:8) Meda saga gona meda kua ni vakataki ira qori nira vakanadakui Paula ena gauna e vinakati kina me vukei! Na cava meda nanuma tiko nira tusaqati na tacida nuitaki?
10. Na cava meda nanuma tiko nira tusaqati na tacida nuitaki? Na vuna?
10 Nanuma tiko na vuna eda tusaqati kina, o cei e vakavuna. E kaya na 2 Timoci 3:12: “O ira kece era via qarava na Kalou ena vuku i Karisito Jisu era na vakacacani tale ga.” Meda kua gona ni kidroa ni o Setani e tusaqati ira na tacida nuitaki. E nona inaki mera kua ni yalodina, mera rere tale ga.—1 Pita 5:8.
Ni vesu tu o Paula, e yaloqaqa o Onesiforo me tokoni koya. Nikua, era veitokoni na mataveitacini vei ira na tacida era vesu tu, me vaka e dramataki qo (Raica na parakaravu 11-12)
11. Na cava eda vulica vei Onesiforo? (2 Timoci 1:16-18)
11 Meda tokoni ira na tacida, meda kabiti ira tiko ga. (Wilika 2 Timoci 1:16-18.) E dua na lotu vaKarisito ena imatai ni senitiuri o Onesiforo e duatani na ka e cakava ni vesu o Paula. ‘E sega ni maduataka nona vesu tu ena sinucodo o Paula.’ E vaqarai Paula o Onesiforo, ni sa raici koya e vukei koya sara ena ka e vinakata. E bolemate mada ga ni cakava qori. Na cava eda vulica? Me kua ni vakalatilati se tarova noda tokoni ira na tacida era vesu na noda rerevaka na tamata. Ia meda tokoni ira, meda vukei ira tale ga. (Vkai. 17:17) E bibi meda lomani ira, meda vakayaloqaqataki ira.
12. Na cava eda vulica vei ira na tacida mai Rusia?
12 Vakasamataki ira mada na mataveitacini mai Rusia era vukei ira na tacidra era vesu tu. Nira veilewaitaki eso, e levu na tacida era lai tokoni ira ena mataveilewai. Na cava eda vulica? Kua ni rere nira vakaucacataki na tacida nuitaki, era vesu se tusaqati. Masulaki ira, vukea na nodra lewenivuvale, qara eso tale na sala mo veitokoni kina.—Caka. 12:5; 2 Kor. 1:10, 11.
NIDA VAKALIALIAI
13. Ena vakaleqa vakacava nomu nuitaki Jiova kei na nona isoqosoqo na veivakalialiai?
13 Era na rairai vakalialiai keda na wekada era sega ni vakabauta, ira eda cakacaka vata se vuli vata nida cakacaka vakavunau se nida muria na ivakatagedegede savasava i Jiova. (1 Pita 4:4) Era na rawa ni kaya: “Au sega ni cati iko, ia sa rui kaukaua tale nomudou lotu, e sega ni toso vata kei na gauna.” Eso era na rairai vakalewa na ka eda cakava vei ira na vakasivoi, nira kaya: “Qori e sega sara ga ni vakaraitaki ni loloma.” Na vosa va qo e rawa ni vakavuna meda vakatitiqataka na lawa i Jiova. De dua eda na kaya: ‘Sa rui sivia tale na ka e vinakata o Jiova. Sa sivia tale na lawa ni nona isoqosoqo.’ Ke o sotava tiko qori na cava mo cakava mo veivolekati kei Jiova kei na nona isoqosoqo?
E sega ni vakabauta o Jope na nodratou lasu nona itokani ratou vakalialiai koya. Ia e vakadeitaka me yalodina tiko ga vei Jiova (Raica na parakaravu 14)
14. Na cava meda cakava nira vakalialiai keda eso nida muria na ivakatagedegede i Jiova? (Same 119:50-52)
14 Mo muria tiko ga na ivakatagedegede i Jiova. E dau muria o Jope na ivakatagedegede i Jiova ni vakalialiai mada ga. E saga e dua na nona itokani lasu me nanuma ni sega ni kauaitaka na Kalou ke muria tiko nona ivakatagedegede se sega. (Jope 4:17, 18; 22:3) Ia e sega ni via vakabauta o Jope na lasu qori. E kila ni donu tu ga na ivakatagedegede i Jiova me baleta na ka donu kei na ka e cala, e gumatua gona me muria tiko ga. E sega ni vinakata mera tarova eso tale nona yalodina. (Jope 27:5, 6) Na cava eda vulica? Nida vakalialiai meda kua ni vakatitiqataka na ivakatagedegede i Jiova. Vakasamataka na ka o sotava. De dua o na vakadinadinataka ena levu na gauna ni dau yaga tu ga na kena muri na ivakatagedegede i Jiova. Mo vakadeitaka gona ni o na tokona tiko ga na isoqosoqo e muria na ivakatagedegede qori. Ke levu mada ga era vakalialiai keda, eda na qaravi Jiova tiko ga.—Wilika Same 119:50-52.
15. Na cava e vakalialiai kina o Sonia?
15 Dikeva mada nona ivakaraitaki na tacida yalewa mai Idia o Sonia. Ratou vakalialiai koya nona vuvale ena vuku ni nona vakabauta. Ni oti ga nona papitaiso ena 1997, sa sega ni cakacaka o watina. E mani vakatulewataka o watina me ratou sa toki vakaveitamani vei rau nona itubutubu ena dua tale na siti, ya o koya, o Sonia kei ratou na luvena yalewa. Ia e levu tale na ituvaki e sotava o Sonia. Ni sa sega ni cakacaka o watina, sa na cakacaka sara ga o koya me qarava nona vuvale. Kena ikuri, na ivavakoso voleka duadua e 350 na kilomita na kena yawa. Ka ni rarawa ni ratou tusaqati koya na vuvale nei watina ena vuku ni nona vakabauta. Na levu ni veitusaqati eratou mani toki tale. Oti e mani mate vakasauri o watina. Toso na gauna e mate tale ga e dua vei ratou na gone ena kenisa ni se qai yabaki 12. E ca sara ni ratou beitaki Sonia na wekana ena ka sa mai yaco qo. Era kaya ni yacovi ratou na leqa kece qori ni sa mai dua na iVakadinadina i Jiova. Ia e nuitaki Jiova o Sonia, e kabita tiko ga na nona isoqosoqo.
16. E vakalougatataki vakacava o Sonia ni yalodina vei Jiova kei na nona isoqosoqo?
16 Ni yawa na vanua e tiko kina o Sonia, e uqeti koya na ivakatawa ni tabacakacaka me vunau ga ena vanua e tiko kina, me cakava ga na soqoni ni ivavakoso e vale. E nanuma ni dredre qori. Ia e muria na veidusimaki. E vunautaka na itukutuku vinaka, e caka soqoni ga e vale, e dau sokalou tale ga vakavuvale kei ratou na luvena yalewa. Na cava e laurai? E tauyavutaka o Sonia e levu na vuli iVolatabu, e levu tale ga era papitaiso. Ena 2005 e tekivu painia tudei. E vakalougatataki na nona nuitaki Jiova kei na nona yalodina ena nona isoqosoqo. Ratou qaravi Jiova tiko ena yalodina na luvena yalewa. Ena gauna qo sa rua na ivavakoso ena vanua ya! E vakadeitaka o Sonia ni vakaukauataki koya o Jiova ni sotava na ituvaki dredre, me vosota tale ga na nodratou veivakalialiai na wekana.
YALODINA TIKO GA VEI JIOVA KEI NA NONA ISOQOSOQO
17. Na cava meda vakadeitaka meda cakava?
17 E vinakata o Setani meda vakabauta ni na biuti keda o Jiova ena gauna dredre, ena sega tale ga ni rawarawa noda bula ke da tokona tiko nona isoqosoqo. E vinakata tale ga meda rere nira vakaucacataki na tacida nuitaki nira tusaqati se vesu. E vakayagataka na veivakalialiai meda kua kina ni nuitaka na ivakatagedegede i Jiova kei na nona isoqosoqo. Ia eda kila vinaka na nona ilawaki, eda na sega ni vakacalai. (2 Kor. 2:11) Meda vakadeitaka gona meda kua ni vakabauta na lasu i Setani, meda yalodina tiko ga vei Jiova kei na nona isoqosoqo. Nanuma tiko ni o Jiova ena sega ni biuti keda. (Same 28:7) Me kua mada ga ni dua na ka me tawasei keda vei Jiova!—Roma 8:35-39.
18. Na cava eda na veivosakitaka ena ulutaga tarava?
18 Eda veivosakitaka ena ulutaga qo na ituvaki eda na rairai sotava ena taudaku ni ivavakoso. Ia na noda nuitaki Jiova kei na nona isoqosoqo ena rawa tale ga ni vakatovolei ena ituvaki eda sotava ena ivavakoso. Eda na vosota vakacava na ituvaki qori? Eda na veivosakitaka ena ulutaga tarava.
SERE 118 ‘Ni Vakalevutaka Neimami Vakabauta’
a Meda yalodina ena iotioti ni veisiga qo e bibi meda nuitaki Jiova tiko ga kei na nona isoqosoqo. Ena vakayagataka na Tevoro na veivakatovolei meda kua kina ni nuitaki Jiova. Ena veivosakitaki ena ulutaga qo e tolu na ka e cakava na Tevoro, kei na ka meda cakava meda yalodina tiko ga.
b Sa veisau eso na yaca.