VAKACAVA e ka ni sasaga me wasoma nomu vulica vakataki iko na iVolatabu, me marautaki tale ga? Eda va kece qori ena so na gauna. Ia vakasamataka eso tale na ka eda dau cakava wasoma, me vaka na sisili. E taura na gauna kei na sasaga, ia eda bulabula nida sili oti! Na vuli iVolatabu tale ga e vaka na sisili “ena wai ni vosa ni Kalou.” (Efeso 5:26) Dikeva mada eso na vakatutu ena yaga vei keda:

• Me dua nomu ituvatuva. Noda vulica vakataki keda na iVolatabu e okati ena “veika era bibi sara” meda kua ni vakawalena na lotu vaKarisito. (Fpai. 1:10) Mo rawa ni muria nomu ituvatuva, vakabira ena dua na vanua e laurai levu, ena papa ni itukutuku se fridge. Se o rawa ni porokaramutaka ena nomu talevoni.

• Digia na gauna kei na ka e ganiti iko. Vakacava e vinaka me balavu nomu vuli se lekaleka? O kila vinaka na kemu ituvaki. Tuvanaka nomu vuli ni o nanuma tiko qori. Ke o vucesa ni sa gauna ni nomu vuli, vakacava me tini mada ga na miniti? Ni lekaleka mada ga, ena levu sara na ka o rawata mai na nomu sega ni vuli. Ni o sa tekivu rawa, o na via vuli tiko ga.​—Fpai. 2:13.

• Digia rawa na ka o via vulica. Ke o vakasamataka ena gauna ni vuli na ka mo vulica, o na rairai sega tiko ni “vakayagataka vakavinaka na [nomu] gauna.” (Efeso 5:16) Vola eso na ulutaga o via vulica. Kena ivakaraitaki, ke o vakasamataka eso na taro, vola sara. Ni cava nomu vuli, o sa na rairai vola eso tale na ka o na via vulica.

• Mo yalorawarawa. Rawa ni veisautaka nomu ituvatuva, me vaka na balavu ni gauna o vuli kina se ulutaga o vulica. E sega ni bibi na gauna, kena balavu, se ka o vulica, e bibi ga me wasoma.

Ena yaga dina ke wasoma noda vuli. Eda na veivolekati kei Jiova, eda na vulica meda vakatulewa vinaka, eda na vakayaloqaqataki tale ga.​—Josua 1:8.