O IRA na gonevuli ni iVolatabu era vakataki ira na dauvaqara koula. Ena vinakati mera sasaga ra qai vaqara tiko ga ena iVolatabu na vuku e sega ni voli rawa. Nida gonevuli ni iVolatabu, na cava eda na vulica ena tolu na sala e dau kunei kina na koula?

Kaya mada ke o taubale tiko ena dua na bati ni uciwai, o raica sara e dua na tiki ni vatu e taliva ni cilava na siga. O tomika qai marau ni o kunea na tiki ni koula. E ka levu na mata ni masese ni vakatauvatani kei na tiki ni koula qori, ia e kunekunei dredre ni laurai vata kei na daimani saulevu. Macala ga ni o na veiraiyaki mo vaqara ke so tale na tiki ni koula era tu e kea.

E va sara ga qori na siga guiguilecavi dredre nodra tukituki yani na iVakadinadina i Jiova mera vakamacalataka na itukutuku veivakacegui mai na iVolatabu. De dua o na vakasamataka lesu na imatai ni gauna o kunea kina na nomu tiki ni koula. A rairai yaco qori ni o raica ena imatai ni gauna na yaca i Jiova ena iVolatabu. (Same 83:18) Se o rairai vulica ni o rawa ni itokani i Jiova. (Jeme. 2:23) O sega ni qai vakatitiqataka ni o sa kunea e dua na ka e vinaka cake mai na koula! De dua e gu sara na lomamu mo vaqara eso tale na koula vakayalo.

Ena so na gauna, e dau kumukumuni tu na tikitiki ni koula ena drekeniwai kei na uciwai. E dau vakatokai na mataqali koula qori me alluvial. Donuya na gauna ni keli koula, o ira na gugumatua ni dauvaqara koula era na kunea ena vanua qori e vica na kilokaramu na koula, na kena isau e rawa ni vica vata sara na udolu na dola.

Ni o sa vulica na iVolatabu kei na dua na iVakadinadina i Jiova, de dua o na vaka na dauvaqara koula e wasea tiko na koula. Noda vakasamataka vakatitobu e dua na tikinivolatabu, e vakalevutaka noda kilaka, e vukei keda vakayalo. Ni gu na lomamu mo vulica na ka dina, o sa vulica kina mo toro voleka vei Jiova, mo tiko tale ga ena nona loloma me tawamudu.—Jeme. 4:8; Juta 20, 21.

Era dau sasaga na dauvaqara koula mera kunea na tikitiki ni koula, de dua o sa gugumatua sara  tiko ni vaqara na ka dina vakayalo. Ni o sa vulica na yavu ni ka dina, de dua e gu na lomamu mo cavuikalawa mo yalayala qai papitaiso.—Maciu 28:19, 20.

O koya e vaqara koula, ena rairai kunea na tikitiki ni koula ena loma ni vatu. Ke levu na tikitiki ni koula e kabi se waki vata kei na vatu, e rawa ni vakawaicalataki me rawati kina na koula. Ni o se qai raica vakadua na vatu qori, de dua o na sega ni raica na tikitiki ni koula era waki se kabi tu kina. Cava e va kina ya? Ni 10 wale ga na karamu na koula e rawati mai na dua taucoko na tani vatu! Dina ni ka lailai, ena raica o koya e dauvaqara koula ni sega ni matewale na nona sasaga.

E vinakati tale ga na sasaga nida sa vulica oti na “itekitekivu ni ivakavuvuli me baleti Karisito.” (Iper. 6:1, 2) Ena vinakati na sasaga meda kumuna na ka vou kei na lesoni yaga mai na noda vuli iVolatabu. Na cava o na cakava me vuavuaivinaka nomu vuli iVolatabu, ke sa vakayabaki mada ga nomu cakava tiko?

Me vu mai lomamu nomu via vuli. Vakasamataka vinaka na itukutuku matailalai. Mo sasaga tiko ga mo kunea na vuku kei na veidusimaki vakalou e vaka na koula. (Roma 11:33) Mo rawa ni kila vinaka na iVolatabu, vakayagataka vinaka na iyaya ni vakekeli ena nomu vosa. Mo vosovoso ni qara na veidusimaki kei na isau ni nomu taro vakaivolatabu. Tarogi ira na so tale ke tiko na tikinivolatabu se ulutaga era raica ni yaga qai veiuqeti. Wasea tale ga eso na tikina o vulica ena Vosa ni Kalou.

Ia me kua ni noda isausau me levu wale ga na ka eda kila. E veivakasalataki kina na yapositolo o Paula ni “kilaka e vakavuna na dokadoka.” (1 Kor. 8:1) Koya gona, meda saga meda yalomalumalumu tiko ga, me kaukaua tale ga noda vakabauta. Ni wasoma na noda sokalou vakavuvale kei na vuli vakataki keda, ena salavata kina noda bula kei na ivakatagedegede i Jiova, ena uqeti keda tale ga meda dauveivukei. Koya e bibi sara, eda na marau nida sa kunea e dua na ka e vinaka cake mai na koula.—Vkai. 3:13, 14.