ENA dredre ni bula eda donuya ena “iotioti ni veisiga” qo, e bibi meda vosovoso tiko ga na dauveiqaravi i Jiova. (2 Tim. 3:1-5) Eda bula ena vuravura era tiko kina e levu era dau lomani ira ga, era sega ni via okati ena dua na veiyalayalati, era sega tale ga ni lewa vinaka na yalodra. O ira qori era sega tu ga ni dau vosovoso. Meda dui taroga gona na lotu vaKarisito: ‘Sa takavi au tiko na rai ni vuravura nira sega ni dau vosota? Na cava mada na ibalebale ni vosovoso dina? Sala cava au na vakaitovotaka kina me tawamudu na itovo talei vaKarisito qo?’

Na kena ibalebale ena iVolatabu, e sega ni okati ga ena nomu vosota na ituvaki dredre. O koya e vosovoso, e vakainaki na nona vosota. Ena sega ni kauaitaka ga na ka e baleti koya, ena kauaitaki koya tale ga e vakavuna na duiyaloyalo. Na vuna? Ni caka vua na ka ca se vakacudrui, ena vakanuinui tiko ga ni na vinaka tale na veiwekani sa mai vakaleqai. Sa rauta me volai sara ga e liu na itovo qo na “vosovoso” ena iVolatabu qai veimuri e vica tale na itovo talei era veisemati kei na loloma. * (1 Kor. 13:4) E okati tale ga ena Vosa ni Kalou na “vua ni yalo tabu” na vosovoso. (Kala. 5:22, 23) Na cava gona e vinakati meda bucina kina na itovo vakalou qo?

Meda bucina na itovo na vosovoso, e vinakati meda kerea na veivuke ni yalo tabu, ni dau solia o Jiova vei ira na nuitaki koya. (Luke 11:13) E kaukaua na yalo tabu, ia e vinakati tale ga meda vakayacora na noda itavi da qai cakava sara na ka eda masulaka. (Same 86:10, 11) Kena ibalebale nida na saga ena noda vinaka kece meda vosovoso e veisiga me rawa ni vakawakana e lomada. Ke da sa vakayacora qori, se vinakati tiko ga na sasaga me noda itovo tudei na vosovoso. Cava tale e rawa ni vukei keda?

Eda bucina na vosovoso nida dikeva da qai vakatotomuria na ivakaraitaki uasivi i Jisu. Me salavata kei na ivakaraitaki qori, e vakamacalataka na yapositolo o Paula ena veiuqeti ni yalo tabu na “itovo vou,” wili kina na “vosovoso” qai uqeti keda me “lewa tale ga na loma[da] na vakacegu i Karisito.” (Kolo. 3:10, 12, 15) Ena rawa ga ni “lewa” na lomada na vakacegu qori, ke da vakatotomuria na dei ni vakabauta i Jisu ni na vakadodonutaka na Kalou na ka kece me baleti keda ena nona gauna lokuci. Nida muria na ivakaraitaki i Jisu, eda na sega ni yalototolo nida vakacudrui se mani cava e yaco wavoliti keda tiko.—Joni 14:27; 16:33.

Nida vakanamata meda raica na vuravura vou e yalataka na Kalou, eda vulica meda vosovoso tiko ga nida vakasamataka vakatitobu nona vosoti keda tiko o Jiova. E vakadeitaka vei keda na iVolatabu: “E sega ni  dau berabera ni vakayacora nona yalayala o Jiova me vaka era nanuma eso ni berabera, ia e vosoti kemuni ga ni sega ni vinakata me rusa e dua, e vinakata ga moni veivutuni kece.” (2 Pita 3:9) Nida vakasamataka vakatitobu na vosovoso i Jiova, vakacava e uqeti keda qori meda dau veivosoti? (Roma 2:4) Na cava eso na ituvaki ena vinakati kina meda vosovoso tiko ga?

E levu na ituvaki ena rawa ni vakatovolei kina na noda vosovoso e veisiga. Kena ivakaraitaki, ke o nanuma mo tukuna e dua na ka bibi, de dua ena vinakati mo vosovoso mo kua kina ni veivakasosani. (Jeme. 1:19) Ena rairai vinakati tale ga mo vosovoso nida veimaliwai kei ira na tacida e dau votivoti na nodra ivakarau. Ia kua ni yalototolo ena ituvaki va qori, ena vukutaki mo vakasamataka nodrau dau vosota noda malumalumu o Jiova kei Jisu. Rau sega ni dau vakalewa na noda malumalumu lalai. Rau dau kauaitaka ga na noda itovo vinaka, rau vosovoso tale ga ni raica na noda sasaga meda vakavinakataka.—1 Tim. 1:16; 1 Pita 3:12.

Dua tale na ituvaki ena rawa ni vakatovolei kina noda vosovoso oya nida beitaki ena dua na ka ca. Levu na gauna eda na rairai cudru se vakadonui keda ga. Ia e duatani na ka e tukuni ena Vosa ni Kalou. E kaya: “E vinaka na vosota, e ca na yaloqaciqacia. Mo kua ni cudru totolo, ni tiko na cudru e lomaseredra na lialia.” (Dauv. 7:8, 9) Ke sega gona ni dina na veibeitaki qori, meda vakasamataka vinaka na ka eda na tukuna. Qori na ka e cakava o Jisu ni sega ni dina na ka e vakadiloi kina.—Maciu 11:19.

E vinakati sara mera vosovoso na itubutubu nira saga mera vakadodonutaka na cala i luvedra, ka e malele kina na lomadra, se ka era via cakava. Rogoca mada na ivakaraitaki i Mattias, sa lewe tiko ni vuvale ena Peceli e Scandinavia. Ni se itabagone, e vosota o Mattias nodra dau vakalialiai koya e koronivuli ena vuku ni nona vakabauta. Rau a sega tiko ni kila na nona itubutubu na ituvaki qori. Ia erau vosota na revurevu ni veitusaqati, ni sa tekivu lomatarotarotaka o luvedrau na ka dina e vakavulici vua. E kaya o Gillis na tamai Mattias: “E vinakati vakalevu na vosovoso ena ituvaki qo.” Ena taroga o Mattias: “O cei na Kalou? Vakacava ke sega ni Vosa ni Kalou na iVolatabu? Eda kila vakacava ni vinakata na Kalou meda cakava qo se ya?” E dau kaya tale ga vei tamana: “Na cava meu lewai kina ke duidui na ka daru vakabauta?”

E kaya o Gillis, “Ena so na gauna, e dau cudru o luvequ ni taro, e sega ni cudruvi au se me cudruvi tinana, e cudruvaka ga na ka dina ni vaka me vakadredretaka nona bula.” Na cava e cakava o Gillis ena ituvaki qo? “Keirau dau dabe vata kei luvequ me keirau veitalanoa me vica vata na aua. Levu na gauna au vakarorogo, so na gauna meu vakatarogi koya meu kila na ka kece e vakasamataka tiko, na ka e tu e lomana kei na nona rai. Ena so na gauna au kaya vua na ka me vakasamataka mada ena dua se vica  na siga oti keirau qai veitalanoa. So tale na siga au dau kaya meu vakasamataka mada ena loma ni vica na siga na nona rai. Neirau dau veivosaki tiko va qori sa qai kila kina vakalalai o Mattias, e vakabauta tale ga na ka e vulica me baleta na ivoli, na veiliutaki cecere i Jiova, kei na nona loloma. E vinakati kina na gauna, sega tale ga ni rawarawa, toso na gauna sa qai lomani Jiova mai vu ni lomana. Keirau marau vakaveiwatini ni yaga neirau sasaga me vukei o luvei keirau ni se itabagone, me uqeti tale ga na lomana.”

Erau nuitaka na veitokoni i Jiova o Gillis kei watina me rau vosovoso ni cakacaka vata kei luvedrau. Ni nanuma lesu o Gillis, e kaya: “Au dau tukuna vei Mattias ni keirau lomani koya vakalevu kei tinana, keirau dau kerei Jiova vagumatua me vukei koya me kila na ka e dredre vua.” Dua na ka na nodrau marau na itubutubu qori ni rau vakaraitaka na itovo bibi qo na vosovoso!

Me ikuri ni nodra veivuke vakayalo na itubutubu lotu vaKarisito dina, e vinakati tale ga mera vakaraitaka na loloma kei na vosovoso nira qarava tiko e dua na lewenivuvale se itokani e tauvimate bibi. Rogoca mada na italanoa kei Ellen, * e tiko tale ga e Scandinavia.

Rauta na walu na yabaki sa oti, e strouk vakarua o wati Ellen, e sega ni cakacaka vinaka kina na nona mona. Sa sega gona ni dau yalololoma, mamarau, se rarawa. E vinakati kina nona gauna o Ellen. E kaya: “E vinakati vakalevu na vosovoso kei na masu.” E kuria: “Noqu tikinivolatabu taleitaki na Filipai 4:13 ni dau vakacegui au, e tukuni kina: ‘Au rawata na ka kece ena vuku i koya e vakaukauataki au.’” Na veivakaukauataki qori e vosota kina o Ellen me nuitaka vakaoti na veitokoni i Jiova.—Same 62:5, 6.

E macala ni o Jiova e ivakaraitaki vakasakiti ni vosovoso meda muria. (2 Pita 3:15) E volatukutukutaki vakalevu ena Vosa ni Kalou e vica na gauna e vakaraitaka kina vakalevu o Jiova na vosovoso. (Niem. 9:30; Aisea 30:18) Kena ivakaraitaki, na cava e cakava o Jiova ni taroga o Eparama na nona vakatulewa me vakarusai Sotoma? A sega mada ga ni vosa o Jiova ena gauna e vosa tiko kina o Eparama. A vosovoso me rogoca vinaka na taro nei Eparama kei na ka e kauaitaka. Oti e qai vakaraitaka o Jiova ni a vakarorogo tiko ni cavuta tale na ka e kauaitaka o Eparama qai vakadeitaka vua ni na sega ni vakarusai Sotoma ke tiko mada ga kina e tini na tamata yalododonu. (Vkte. 18:22-33) Sa dua dina na ivakaraitaki vinaka ni vosovoso ena nona vakarorogo qai sega ni yalototolo!

E bibi vei keda kece na lotu vaKarisito meda vakaitovotaka na itovo ni Kalou na vosovoso ni okati ena itovo vou. Ke da sasagataka meda bucina me tawamudu na itovo talei qo, eda sa rokova tiko na Tamada vakalomalagi dau veikauaitaki, e dau vosovoso tale ga. Eda na wili vata kina kei “ira na taukena na vosa ni yalayala ni Kalou ena vuku ni nodra vakabauta kei na vosovoso.”—Iper. 6:10-12.