ULUTAGA NI VULI 31
“Eda Sega ni Soro”!
“O koya gona eda sega ni soro.”—2 KOR. 4:16.
SERE 128 Vosota me Yacova na iCavacava
KA ENA VULICI *
1. Eda na vakacavara vakacava na lotu vaKarisito na veitaucici ni bula?
EDA vakaitavi tiko na lotu vaKarisito ena veitaucici ni bula. Ke se qai tekivu ga noda vakaitavi se sa vakayabaki, e bibi meda cici tiko ga meda vakacavara sara. Na ivakasala i Paula vei ira na lotu vaKarisito e Filipai ena vakayaloqaqataki keda meda vakacavara na veitaucici. Eso ena ivavakoso qori e sa vakayabaki na nodra veiqaravi, era yalodina tale ga vei Jiova. Ia e vakadreti ira o Paula ni bibi mera cici tiko ga ena vosota. E vinakata mera vakatotomuria nona “saga tiko na isausau.”—Fpai. 3:14.
2. E yaga vakacava na ivakasala i Paula ina ivavakoso e Filipai?
2 E yaga dina na ivakasala i Paula vei ira na lotu vaKarisito e Filipai. E tusaqati vakalevu na ivavakoso ena gauna e tauyavu kina. E tekivu qori ni rau yaco yani i Filipai o Paula kei Sailasa rauta na 50 G.V., ni rau muria na veidusimaki me rau ‘lako i Masitonia.’ (Caka. 16:9) Rau sotava e Filipai e dua na marama o Litia, “e vakarorogo tiko” ni rau vakamacala, e qai “dolava na lomana o Jiova me rogoca” na itukutuku vinaka. (Caka. 16:14) E papitaiso sara kei na nona vuvale. Ia e sasaga na Tevoro me vakavu ca. Era yarataki Paula kei Sailasa na lewenikoro vei ratou na vakailesilesi ni mataveilewai mera beitaki rau ni rau vakavuleqa. Rau mani kuitataki, bala e valeniveivesu qai kerei me rau biuta na koro. (Caka. 16:16-40) Vakacava erau soro? Sega vakadua! Vakacava o ira na mataveitacini ena ivavakoso tauyavu vou? Era ivakaraitaki vinaka tale ga nira vosota! E macala ga ni vakayaloqaqataki ira na nodrau ivakaraitaki vinaka o Paula kei Sailasa.
3. Na cava e kila o Paula? Na taro cava eda na veivosakitaka?
3 E vakadeitaka o Paula me kua vakadua ni soro. (2 Kor. 4:16) Ia e kila ni bibi me vakasamataka tiko ga na nona isausau me vakacavara kina na veitaucici. Ena yaga vakacava vei keda na ivakaraitaki i Paula? Eda kila vakacava ena nodra ivakaraitaki na tacida yalodina nikua nida rawa ni vosota na veika dredre? Ena vakayaloqaqataki keda vakacava na noda inuinui meda kua vakadua ni soro?
YAGA VEI KEDA NA IVAKARAITAKI I PAULA
4. E gumatua tiko ga vakacava o Paula ni vesu tu?
4 Vakasamataka mada na veika e vosota voli o Paula ni volavola ina ivavakoso e Filipai. A vesu tu ena dua na vale e Roma, e sega ni rawa gona ni lai vunau ena veivanua. Ia e vunau tiko ga vei ira na veisiko yani, e volavola tale ga vei ira na ivavakoso tu yawa. Levu tale ga na lotu vaKarisito nikua era sega ni rawa ni biuta nodra vale ena vuku ni kedra ituvaki, ia era gumatua ni wasea na itukutuku vinaka vei ira na gole yani. E dau veiuqeti tale ga na nodra ivola vei ira na itaukeinivale e dredre mera sota ena cakacaka vakavunau.
5. Me vaka e vola o Paula ena Filipai 3:12-14, e dei tiko ga vakacava ena nona isausau?
5 E sega ni vakawelei o Paula ena veika e rawata ena veigauna sa oti kei na nona cala makawa. E kaya ni bibi me “guilecava na ka sa sivi” me “tadolova na ka e tu mai liu,” oya me vakacavara vinaka na veitaucici. (Wilika Filipai 3:12-14.) Na cava eso na ka e rawa ni vakawelei Paula? Kena imatai, a rawaka vakalevu o Paula ena lotu vakaJiu ni bera ni mai lotu vaKarisito. Ia e okata kece qori me “tawayaga.” (Fpai. 3:3-8) Kena ikarua, e sega ni rarawataka tiko ga na veika e dau cakava e liu, oya nona dau vakacacani ira na lotu vaKarisito. Kena ikatolu, e sega ni nanuma ni sa qarava oti e dua na itavi levu vei Jiova me sa kua kina ni gumatua. E vuavuaivinaka nona cakacaka vakaitalatala ena gauna mada ga e curu kina e valeniveivesu, mokulaki, vakaviriki, ni voca ena waqa, ni sega na kena, lailai tale ga na nona isulu. (2 Kor. 11:23-27) E levu na ka e rawata, e vosota tale ga e levu na veika dredre, ia e kila ni bibi me saga tiko ga nona isausau. Meda vakatotomuri koya tale ga.
6. Na cava eso “na ka sa sivi” e rairai vinakati meda guilecava?
6 Eda na ‘guilecava vakacava na ka sa sivi’ me vakataki Paula? Eso ena rairai vinakati mera kua ni rarawataka vakasivia nodra cala makawa. Ke da vakila qori, vakacava meda vulica vakataki keda eso na ulutaga me baleta na isoro ni veivoli i Karisito? Nida vulica, da vakasamataka vakatitobu qai masulaka, ena rawa ni seavu yani noda rarawa ni sega ga ni yaga. De dua ena oti kina noda rarawataka tiko na cala sa vosota o Jiova. Dikeva e dua tale na ka eda vulica vei Paula. Eso tale era rairai biuta nodra cakacaka saulevu mera vakarabailevutaka nodra veiqaravi vei Jiova. Ke o cakava qori, o na guilecava na ka sa sivi ni o sega tale ni diva tiko na veika o vakuai iko kina. (Tiko 11:4-6; Dauv. 7:10) E rawa ni okati tale ga ena “ka sa sivi” na veika eda rawata ena noda qaravi Jiova kei na veika dredre eda vosota rawa. E macala ni dau vaqaqacotaki noda veiwekani kei Jiova nida vakasamataka nona veivakalougatataki kei na veitokoni ena veiyabaki sa sivi. Ia meda kua ni nanuma ni dua na itavi levu eda sa qarava vei Jiova meda sega kina ni gumatua.—1 Kor. 15:58.
Nida vakaitavi tiko ena veitaucici ni bula, meda qarauna na ka e veivakawelei qai dei tiko ga ena noda isausau (Raica na parakaravu 7)
7. Me vaka e tukuna o Paula ena 1 Korinica 9:24-27, na cava meda cakava meda qaqa ena veitaucici ni bula? Vakatauvatana.
7 E matata vinaka vei Paula na ibalebale ni ka e tukuna o Jisu: “Ni saga ena nomuni igu kece.” (Luke 13:23, 24) E kila o Paula ni dodonu me sasaga ena nona igu me vakataki Karisito ena nona bula taucoko. E vakatauvatana gona na noda bula na lotu vaKarisito kei na veitaucici. (Wilika 1 Korinica 9:24-27.) O koya e vakaitavi kina ena saga me vakacavara sara, ena sega tale ga ni vakawelei. Kena ivakaraitaki, ena rairai caka na veitaucici nikua ena loma ni tauni e levu kina na sitoa kei na ka e rawa ni veivakawelei. Vakacava ena lai cegu ena sitoa e dua vei ira na daucici me raica na ka e volitaki? Ena sega ni cakava qori ke vinakata me qaqa! Meda qarauna tale ga na ka e veivakawelei ena veitaucici ni bula. Ke da dei tiko ga ena noda isausau nida saga ena noda igu kece me vakataki Paula, eda na rawata na icovi!
VOSOTA NA VEIKA DREDRE
8. Na ituvaki dredre cava eda na veivosakitaka?
8 Meda veivosakitaka mada e tolu na ituvaki dredre e rawa ni vakayalolailaitaki keda. Qori na kena daro na ka eda namaka, malumalumu ni yagoda, kei na noda vakatovolei me vica vata na yabaki. Ena yaga vei keda na ka era cakava eso mera vosota.—Fpai. 3:17.
9. Na cava e yaco ni daro na ka e namaki?
9 Daro na ka eda namaka. E macala ga nida nanamaki tu ena veika vinaka e yalataka o Jiova. Ena gauna mada ga e vakaraitaka kina na parofita o Apakuki nona vinakata me vakaotia o Jiova na veika torosobu e Juta, e kaya vua o Jiova me “waraka tiko ga.” (Apak. 2:3) Ni sega ni yaco na ka eda rairai namaka ena gauna qo, eda na rawa ni yalolailai, eda sega tale ga ni gumatua me vaka e liu. (Vkai. 13:12) A yaco qori ena itekitekivu ni ika20 ni senitiuri. Era nanamaki tu e levu na lotu vaKarisito lumuti mera rawata nodra icovi ni bula i lomalagi ena 1914. Ia ni sega ni yaco qori, era dei tiko ga vakacava o ira na yalodina?
Erau sega ni lai bula i lomalagi o Royal kei Pearl Spatz ena 1914 me vaka rau namaka, ia rau yalodina tiko ga me vicasagavulu tale na yabaki (Raica na parakaravu 10)
10. Erau yalodina vakacava e dua na veiwatini ni daro na ka erau namaka?
10 Dikeva mada nodrau ivakaraitaki e rua na tacida yalodina erau sotava qori. O Brother Royal Spatz e papitaiso ena 1908 ni yabaki 20. E nuidei ni sa vakarau rawata nona icovi ni bula i lomalagi. Ena gauna mada ga e vosaki Pearl kina me watina ena 1911, e kaya vua: “O kila vinaka na ka ena yaco ena 1914. Ke daru nanuma gona me daru vakamau, daru cakava totolo!” Ia vakacava ni rau sega ni rawata na nodrau ni icovi ni bula i lomalagi ena 1914, erau soro ena veitaucici ni bula? Sega. E bibi ga vei rau nodrau yalodina ni cakava na loma ni Kalou, sega ni kena rawati nodrau icovi. Rau vakadeitaka me rau cici tiko ga ena vosota. Erau yalodina tiko ga o Royal kei Pearl, rau gumatua tale ga me vicasagavulu tale na yabaki me yacova ni rau vakacavara nodrau bula e vuravura. E macala ni o vinakata me vakarokorokotaki na yaca i Jiova, me vakadinadinataki na dodonu ni nona veiliutaki, me vakayacori tale ga na nona yalayala kece. Mo nuidei ni na yaco qori ena nona gauna lokuci. Mo gumatua tiko ga ni qaravi Jiova me yacova na siga qori, kua tale ga ni yalolailai ke daro na ka o namaka.
E vakadeitaka o Arthur Secord me qaravi Jiova tiko ga ena nona vinaka taucoko ni sa qase. (Raica na parakaravu 11)
11-12. Na cava se rawa nida qaravi Jiova tiko ga kina nida malumalumu vakayago? Tukuna e dua na ivakaraitaki.
11 Malumalumu ni yagoda. E sega ni tukuni meda kaukaua me vakataki ira na daucici me qai kaukaua kina noda vakabauta, meda gumatua tale ga ena noda qaravi Jiova. Levu mada ga era malumalumu vakayago era vakadeitaka mera solia tiko ga nodra vinaka taucoko vei Jiova. (2 Kor. 4:16) Kena ivakaraitaki o Brother Arthur Secord. * Ena gauna e yabaki 88 kina, sa 55 na yabaki nona veiqaravi e Peceli. E sa malumalumu qai tautauvimate. Dua na siga e gole yani e dua na nasi me qaravi koya, e nanumi koya vakalevu mani tukuna: “Brother Secord, sa bau vakayagataki vinaka sara ga na yago malumalumu qo ena veiqaravi vei Jiova.” Ia e sega ni vakasamataka vakalevu o Arthur na veika e rawata ena gauna sa oti. E raica na mata i nasi, e matadredredre qai tukuna: “Io e dina qori. Ia e sega ni bibi na veika eda sa cakava mai, e bibi ga meda yalodina tiko ga vei Jiova ena gauna qo.”
12 De dua sa vakayabaki nomu qaravi Jiova voli mai, sa sega ni levu tale ga na ka o cakava rawa ena nomu veiqaravi me vaka e liu ena vuku ni tautauvimate. Kua ni yalolailai. Mo nuidei ni mareqeta o Jiova nomu veiqaravi ena yalodina ena veigauna sa oti. (Iper. 6:10) Ia e dua na ka mo nanuma tiko ena gauna qo, na noda veiqaravi mai vu ni lomada e sega ni vakatau ena levu ni ka eda cakava vei Jiova. Eda vakaraitaka noda lomani koya ni donu tiko ga noda rai da qai cakava na ka eda rawata. (Kolo. 3:23) E kila vinaka o Jiova na keda ituvaki, e sega gona ni namaka vakasivia na ka vei keda.—Mari. 12:43, 44.
Erau yalodina tiko ga o Anatoly kei Lidiya Melnik ni levu na veivakatovolei (Raica na parakaravu 13)
13. E uqeti keda vakacava na nodrau vosota o Anatoly kei Lidiya meda yalodina tiko ga ke levu na veivakatovolei?
13 Vakatovolei me vica vata na yabaki. Eso na dauveiqaravi i Jiova era vosota na ituvaki dredre kei na veivakacacani me vicasagavulu na yabaki. Kena ivakaraitaki o Anatoly Melnik, * ni se qai yabaki 12 sa vesu o tamana qai kau i Siberia, qori e sivia ni 7,000 na kilomita mai Moldova eratou tiko kina nona vuvale. Oti ga e dua na yabaki, eratou kau vakavesu tale ga i Siberia o Anatoly, o tinana, kei rau na itubutubu nei tinana. Dua na gauna e muri, eratou gole rawa ina dua na koro me ratou tiko ena soqoni. Ia eratou taubale me 30 na kilomita ena ucacevata qai dua na ka na levu ni batabata. Dua tale na gauna e vesu o Anatoly me tolu na yabaki, rau mai tu yani na nona veitinani o Lidiya na watina kei na luvena yalewa yabaki dua. Eratou sotava na ituvaki dredre o Anatoly kei na nona vuvale me vica vata na yabaki, ia eratou qaravi Jiova tiko ga ena yalodina. Nikua sa yabaki 82 o Anatoly, e lewe ni Komiti ni Tabana e Esia e Loma. Me vakataki rau o Anatoly kei Lidiya, meda qaravi Jiova tiko ga ena noda vinaka taucoko, meda vosota tiko ga me vaka ena veigauna sa oti.—Kala. 6:9.
VAKAYALOQAQATAKI ENA NODA INUINUI
14. Na cava e kila o Paula ni vinakati me cakava me rawata nona isausau?
14 E nuidei o Paula me vakacavara na veitaucici qai rawata na nona isausau. Ni lotu vaKarisito lumuti, e vakanamata tu me rawata “na icovi ni veikacivi ni Kalou i lomalagi.” Ia e kila ni vinakati me “saga tiko” ga. (Fpai. 3:14) E vakamacalataka o Paula vei ira e Filipai e dua na vosa vakatautauvata veiuqeti mera dei tiko ga ena nodra isausau.
15. E vakayagataka vakacava o Paula na ivakatautauvata ni lewenivanua me uqeti ira e Filipai mera “saga tiko” ga nodra isausau?
15 E vakadreti ira na lotu vaKarisito e Filipai o Paula nira lewenivanua mai lomalagi. (Fpai. 3:20) Na cava e bibi kina mera nanuma tiko qori? Levu ena gauna ya era vinakata mera lewenivanua e Roma nira kila na kena yaga. * Ia era lewena na lotu vaKarisito lumuti e dua na matanitu e vinaka cake qai uasivi na kena yaga. Na matanitu vakalomalagi e uasivia sara na matanitu o Roma! E tukuna kina vei ira e Filipai o Paula mera “vakaitovotaki [ira] ga ena itovo e salavata kei na itukutuku vinaka i Karisito.” (Fpai. 1:27) Na vosa “vakaitovotaki” e kena ibalebale na “itovo ni lewenivanua” se “bula me vaka na lewenivanua” ni matanitu vakalomalagi. Era ivakaraitaki vinaka na lotu vaKarisito lumuti nikua nira saga tiko ga nodra isausau ni bula i lomalagi.
16. Ke noda inuinui na bula i lomalagi se vuravura, na cava meda cakava tiko ga me vaka e tukuni ena Filipai 4:6, 7?
16 Ke noda inuinui na bula i lomalagi se vuravura, e dodonu meda saga tiko ga meda rawata na isausau qori. Se mani vakacava na ituvaki, meda guilecava na ka sa sivi, me kua tale ga ni dua na ka e tarova noda qaravi Jiova. (Fpai. 3:16) De dua ena vaka me berabera na ka eda namaka, se sa malumalumu mai na yagoda. Eda rairai vosota tale ga na veika dredre kei na veivakacacani me vica vata na yabaki. Se mani vakacava na keda ituvaki, meda “kua ni lomaocaocataka e dua na ka.” Ia meda vakaraitaka qori vua na Kalou ena vakamamasu kei na kerekere, ena vakacegui keda ena sala eda sega ni bau vakasamataka.—Wilika Filipai 4:6, 7.
17. Na cava eda na vulica ena ulutaga tarava?
17 Me vaka na daucici e sasaga vagumatua ni volekata yani na icavacava ni veitaucici, meda dei tiko ga ena noda isausau meda vakacavara na veitaucici ni bula. Meda sasaga vagumatua me salavata kei na ka eda rawata kei na keda ituvaki, da qai cakava tiko ga qori meda rawata na veika totoka ena gauna se bera mai. Na cava meda cakava me mua donu tiko ga kina noda sasaga da qai dei tiko ga? Ena uqeti keda na ulutaga tarava ena ka meda vakaliuca, meda ‘vakadeitaka tale ga na veika era bibi sara.’—Fpai. 1:9, 10.
SERE 79 Vakavulici Ira Mera Tudei
^ para. 5 Ke sa dede mada ga na noda qaravi Jiova, eda vinakata meda matua vakayalo da qai vakavinakataka tiko ga noda veiqaravi. E uqeti ira na tacina vaKarisito na yapositolo o Paula mera kua ni soro ni cakava qori! Nida wilika na nona ivola vei ira e Filipai, ena vakayaloqaqataki keda meda vosota na veitaucici ni bula. Eda na vulica ena ulutaga qo na sala meda muria kina na ka e vakamacalataka o Paula.
^ para. 11 Raica na italanoa ni nona bula o Brother Secord ena ulutaga, “My Part in Advancing Right Worship,” ena Vale ni Vakatawa vakavalagi ni June 15, 1965.
^ para. 13 Raica na italanoa ni nona bula o Brother Melnik ena ulutaga, “Taught From Childhood to Love God,” ena Yadra! vakavalagi ni Okotova 22, 2004.
^ para. 15 Ni qali i Roma o Filipai, era marautaka gona na lewena eso na dodonu vakalewenivanua ni matanitu o Roma. E matata gona vei ira na lotu vaKarisito e Filipai na ivakamacala nei Paula.
