1. Na cava eda kalougata kina?

EDA kalougata nida lewe ni ivavakoso i Jiova. Eda marau, eda lomavakacegu tale ga nida qaravi Jiova kei ira na tacida. Na cava gona na nomu itavi ena ivavakoso?

2. Na ivakatautauvata cava e vakayagataka na yapositolo o Paula ena vica nona ivola uqeti vakalou?

² E levu na ka eda na vulica ena ulutaga qo, nida veivosakitaka na vosa vakatautauvata e vola o Paula ena vica nona ivola uqeti vakalou. E vakatauvatana kina o Paula na ivavakoso kei na yagoda. E vakatauvatani keda yadudua tale ga kei na veitikiniyago.—Roma 12:4-8; 1 Kor. 12:12-27; Efeso 4:16.

3. Na cava e tolu na tikina bibi eda na veivosakitaka ena ulutaga qo?

³ Eda na veivosakitaka ena ulutaga qo e tolu na tikina bibi eda vulica ena ivakatautauvata i Paula. Kena imatai, eda na vulica ni tiko na keda yaga * yadudua ena ivavakoso. Kena ikarua, eda na veivosakitaka na ka meda cakava ke da nanuma ni sega na keda yaga. Kena ikatolu, eda na veivosakitaka na vuna meda gumatua tiko ga kina ena noda itavi ena ivavakoso.

4. Na cava eda vulica ena Roma 12:4, 5?

⁴ Na imatai ni ka eda vulica ena ivakatautauvata i Paula, oya ni o keda yadua e tiko na noda itavi bibi ena vuvale i Jiova. E tekivuna o Paula na nona vosa vakatautauvata ni kaya: “Me vaka ga na yagoda, e levu na tikina, ia e duidui na nodra itavi, e vaka kina o keda. Eda le levu, eda dua ga na yago nida duavata kei Karisito, da qai sema vata kece.” (Roma 12:4, 5) Na cava e vakaibalebaletaka o Paula? E duidui na noda itavi yadua ena ivavakoso, ia eda yaga kece.

5. Na “isolisoli” cava e solia o Jiova ena ivavakoso?

⁵ Levu na gauna eda na rairai nanuma ni o ira ga na liutaki keda ena ivavakoso e tiko na nodra itavi. (1 Ces. 5:12; Iper. 13:17) O Jiova e solia na “isolisoli tamata” ina nona ivavakoso ena vuku i Karisito. (Efeso 4:8) Na “isolisoli tamata” qori eratou okati kina na lewe ni iLawalawa Dauvakatulewa, ira na dauveivuke ina iLawalawa Dauvakatulewa, Komiti ni Tabana, ivakatawa ni tabacakacaka, ira na veivakavulici ena koronivuli vakalou, qase kei ira na dauveiqaravi ni ivavakoso. O ira na tacida tagane qo era lesi ena yalo tabu mera karona na sipi mareqeti i Jiova, mera vakayaloqaqataka tale ga na ivavakoso.—1 Pita 5:2, 3.

6. Me vaka e tukuni ena 1 Cesalonaika 2:6-8, na cava era saga mera cakava na tacida tagane era lesi ena yalo tabu?

⁶ Era lesi ena yalo tabu na tacida tagane mera qarava e levu na itavi. Me vaka ga nodra cakacaka vata na veitikiniyago me vaka na liga kei na yava me yaga ina yago taucoko, era cakacaka tale ga vakaukaua na tacida tagane era lesi ena yalo tabu me yaga vei ira na lewe ni ivavakoso taucoko. Era sega ni vinakata mera dokai kina. Ia era saga mera veiuqeti, mera veivakayaloqaqataki ena ivavakoso. (Wilika 1 Cesalonaika 2:6-8.) Eda vakavinavinakataki Jiova ni lesi ira na tacida tagane qori era dau kauaitaki ira na tacidra!

7. Era vakalougatataki vakacava e levu na tacida era veiqaravi vakatabakidua?

⁷ Era na rairai lesi eso na tacida ena ivavakoso mera daukaulotu, painia lavotaki, se painia tudei. Eso mada ga na tacida ena veiyasa i vuravura, e nodra cakacaka tudei mera vunau, mera veivakatisaipelitaki tale ga. Nira cakava qori, era sa vukea kina e levu mera tisaipeli i Karisito Jisu. E levu era qaravi Jiova vakatabakidua e lailai na nodra ilavo kei na iyau, ia e levu na sala e vakalougatataki ira kina o Jiova. (Mari. 10:29, 30) Eda mareqeti ira dina na tacida qo da qai vakavinavinaka nira lewe ni ivavakoso!

8. Na cava e mareqeti ira kece kina na dautukutuku o Jiova?

⁸ Kena ibalebale ya nira mareqeti ga ena ivavakoso na tacida era lesi kei ira na veiqaravi vakatabakidua? Sega! Na Kalou e mareqeti ira tale ga na dautukutuku kece ena ivavakoso. (Roma 10:15; 1 Kor. 3:6-9) Na vuna? Ni dua na inaki bibi ni ivavakoso meda vukea e levu mera tisaipeli i Jisu Karisito. (Maciu 28:19, 20; 1 Tim. 2:4) Era na saga gona na dautukutuku kece, papitaiso kei ira na dautukutuku bera ni papitaiso, mera vakaliuca na cakacaka qo.—Maciu 24:14.

9. Na cava meda mareqeti ira kina na yalewa lotu vaKarisito?

 ⁹ O Jiova e rokovi ira na tacida yalewa ena ivavakoso ni lesia vei ira eso na itavi bibi. E mareqeti ira na yalewa vakawati, tina, yada, kei na goneyalewa era yalodina vua. E cavuti ena iVolatabu e levu na yalewa era vakamarautaka na Kalou. Era ivakaraitaki vinaka ena nodra yalomatua, vakabauta, gumatua, yaloqaqa, lomasavu, kei na caka vinaka. (Luke 8:2, 3; Caka. 16:14, 15; Roma 16:3, 6; Fpai. 4:3; Iper. 11:11, 31, 35) Eda vakavinavinaka gona vei Jiova nira lewe ni ivavakoso na tacida yalewa era vakaraitaka na itovo talei!

10. Na cava eda mareqeti ira kina na itabaqase?

¹⁰ Eda marau tale ga nira lewe ni ivavakoso e levu na tacida itabaqase. Eso era qaravi Jiova tu mai ena yalodina ena nodra bula taucoko. Eso tale era qai vulica wale ga qo na dina. E levu tale ga era tautauvimate ena vuku ni bula vaqase. Ena rairai vakaiyalayala gona na ka era cakava ena ivavakoso kei na cakacaka vakavunau. Ia e rawa nira cakava ga na ka era rawata ena cakacaka vakavunau. Era solia na nodra vinaka taucoko mera veivakayaloqaqataki, mera veivakavulici tale ga. E yaga gona vei keda na ka era kila. Era talei dina vei Jiova, vei keda tale ga.—Vkai. 16:31.

11-12. E uqeti iko vakacava na nodra ivakaraitaki na itabagone ena ivavakoso?

¹¹ Vakasamataki ira tale ga na itabagone. E levu sara na ka dredre era sotava nira bula tiko ena vuravura e lewa tu o Setani na Tevoro, qai takalevu kina na nona ivakavuvuli ca. (1 Joni 5:19) E veivakayaloqaqataki gona nida raici ira na itabagone nira vakamacala ena soqoni, vakaitavi ena cakacaka vakavunau, era doudou tale ga ni vakamacalataka nodra vakabauta. Io, oni mareqeti na itabagone ena ivavakoso i Jiova!—Same 8:2.

¹² Eso tale na tacida, e dredre mera vakabauta ni tiko na kedra yaga ena  ivavakoso. Na cava ena vukei keda yadua meda kila nida mareqeti ena ivavakoso? Meda raica mada.

13-14. Na cava era rairai nanuma kina eso ni sega na kedra yaga ena ivavakoso?

¹³ Qo na ikarua ni ka eda vulica ena vosa vakatautauvata i Paula. E vakabibitaka e dua na ituvaki era sotava e levu nikua, e dredre mera vakabauta nira yaga ena ivavakoso. E vola o Paula: “Ke kaya na yava, ‘Au sega ni tikiniyago niu sega ni liga,’ e sega ni kena ibalebale qo me sega kina ni tikiniyago. Ke kaya na daliga, ‘Au sega ni tikiniyago niu sega ni mata,’ e sega ni kena ibalebale qo me sega kina ni tikiniyago.” (1 Kor. 12:15, 16) Na cava e vakaibalebaletaka o Paula?

¹⁴ Ke o dau vakatauvatani iko kei ira ena ivavakoso, ena dredre mo kila na kemu yaga. De dua eso ena ivavakoso era maqosa ena veivakavulici, tuvatuvanaki, se kenadau ena veivakatawani. O na rairai nanuma ni o sega ni vinaka sara me vakataki ira. Qori e ivakaraitaki ni yalomalumalumu. (Fpai. 2:3) Ia e bibi mo qarauna. Ke o vakatauvatani iko tiko ga kei ira era maqosa ena nodra itavi, o na yalolailai. Me vaka e tukuna o Paula, o na rairai nanuma ni sega na kemu yaga ena ivavakoso. O na valuta vakacava na rai qori?

15. Me vaka e tukuni ena 1 Korinica 12:4-11, na cava meda kila tiko ena isolisoli eda dui rawata?

¹⁵ Vakasamataka mada qo, o Jiova e solia vei ira eso na lotu vaKarisito ena imatai ni senitiuri na isolisoli ni yalo tabu mera cakamana, ia e sega ni soli vei ira na lotu vaKarisito kece. (Wilika 1 Korinica 12:4-11.) E duidui na isolisoli kei na taledi e solia vei ira, ia e mareqeti ira yadua. Sa sega ni soli vei keda nikua na isolisoli ni cakamana, ia se yaga tiko ga na ka eda vulica kina. Ena rairai duidui na noda taledi, ia e mareqeti keda yadua o Jiova.

16. Na ivakasala cava e vola na yapositolo o Paula meda muria?

 ¹⁶ Meda kua ni vakatauvatani keda kei na so tale na lotu vaKarisito, ia meda muria ga na ivakasala ni yapositolo o Paula: “Me dikeva na tamata yadua na nona cakacaka, ena qai marau ga kina vakalevu, ena sega ni vakatauvatani koya kei na dua tale.”—Kala. 6:4.

17. E yaga vakacava nida muria na ivakasala i Paula?

¹⁷ Ke da muria na ivakasala uqeti vakalou i Paula qai dikeva na noda dui cakacaka, eda na rairai liaca ni tiko na noda dui isolisoli kei na taledi. Kena ivakaraitaki, ena rairai sega ni maqosa sara na nona veivakavulici e dua na qase ena buturara, ia e vuavuaivinaka nona veivakatisaipelitaki. Se na rairai sega ni tuvatuvanaki vinaka me vakataki ira eso tale na qase, ia e kilai me ivakatawa dauloloma, era doudou ni torovi koya na dautukutuku nira qara ivakasala vakaivolatabu. Se kilai ena nona dau veikauaitaki. (Iper. 13:2, 16) Nida kila vinaka na noda isolisoli kei na taledi, eda na marautaka na ka eda cakava ena ivavakoso. Eda na sega tale ga ni vuvutaki ira na tacida e duatani na nodra isolisoli.

18. Eda na vakavinakataka vakacava na noda taledi?

¹⁸ Se mani itavi cava eda qarava ena ivavakoso, e vinakati meda vakavinakataka tiko ga noda veiqaravi kei na noda taledi. Me rawati qori, e vakarautaka o Jiova na veivakavulici totoka ena nona isoqosoqo. Kena ivakaraitaki, ena noda soqoni ena lomanimacawa eda dusimaki ena sala meda maqosa kina ena noda cakacaka vakaitalatala. Vakacava sa yaga tiko vei iko na veivakavulici qori?

19. Na cava mo cakava mo lai vuli ena Koronivuli ni iTalatala ni Matanitu?

¹⁹ E dua tale na veivakavulici totoka e vakarautaki, oya na Koronivuli ni iTalatala ni Matanitu. E rawa nira vuli kina na tacida era yabaki 23 ina 65 era veiqaravi vakatabakidua. O na rairai nanuma ni o sega ni rawa ni sauva qori. Mo kua ni vakasamataka na vuna o sega ni rawa ni vuli kina, ia mo vola kece na vuna o vinakata kina mo vuli. Oti vakarautaka sara e dua na ituvatuva mo rawata kina na ka e vinakati. Ena veivuke i Jiova kei na nomu sasaga vakaukaua, o na rawa sara ga ni cakava na ka o nanuma ni dredre.

20. Na cava eda vulica ena Roma 12:6-8?

²⁰ Na ikatolu ni ka eda vulica ena vosa vakatautauvata i Paula e tiko ena Roma 12:6-8. (Wilika.) E vakamacalataka tale o Paula ni tiko na noda isolisoli na lewe ni ivavakoso. Ia e vakabibitaka meda vakayagataka qori me uqeti kina na ivavakoso.

21-22. Na cava eda vulica vei Ropate kei Felice?

²¹ Vakasamataka na ivakaraitaki ni dua na tacida eda na vakatoka me o Ropate. A veiqaravi tiko e vanuatani, e qai lesi me lai veiqaravi e Peceli ena nona vanua. E vakadeitaki vua ni sega ni caka qori baleta ni dua na nona malumalumu, ia e kaya: “E cala tu ga noqu rai me vica vata na vula. Au nanuma niu tawayaga. Eso na gauna au vinakata sara ga me sa cegu noqu veiqaravi e Peceli.” E qai marau tale vakacava? E tukuna vua e dua na qase ni o Jiova e vakarautaki keda ena  itavi eda qarava ena gauna sa oti, me rawa nida qarava vinaka kina noda itavi ena gauna qo. E raica o Ropate ni bibi me kua ni vakasamataka na veika sa oti, me kauaitaka ga na ka e rawa ni cakava ena gauna qo.

²² Qori tale ga na ka e sotava o Brother Felice Episcopo. Erau tuvaitutu vakaveiwatini mai Kiliati ena 1956, rau lai veiqaravi vakaivakatawa ni tabacakacaka e Bolivia. E dua na luvedrau tagane ena 1964. E kaya o Felice: “E dredre sara ga me keirau biuta na neirau ilesilesi. Voleka ni dua na yabaki noqu yalolailai tu. Ia ena veivuke i Jiova au veisautaka na noqu rai meu kauaitaka ga na noqu itavi vakaitubutubu.” Vakacava o vakataki Ropate se o Felice? O yalolailai ni o sa sega ni qarava eso na itavi? O na marau ke o veisautaka nomu rai, qai kauaitaka ga na ka o rawa ni cakava ena gauna qo mo qaravi Jiova kei ira na tacimu. Mo gumatua ni vakayagataka nomu isolisoli kei na taledi mo vukea eso tale. O na marau ni o sa uqeta tiko na ivavakoso.

23. Na cava meda vakasamataka? Cava eda na veivosakitaka ena ulutaga e tarava?

²³ E mareqeti keda yadua o Jiova. E vinakata meda lewe ni nona vuvale. Ke da vakasamataka na ka eda rawa ni cakava meda uqeti ira kina na tacida qai cakava sara, ena dredre meda nanuma ni sega na keda yaga ena ivavakoso! Ia vakacava noda rai me baleti ira eso tale ena ivavakoso? Eda na vakaraitaka vakacava nida mareqeti ira? Eda na veivosakitaka na tikina bibi qori ena ulutaga e tarava.