1. Era vakuai ira vakacava e levu na tacida? Cava era vakatulewataka kina qori?

NIKUA e milioni na dauveiqaravi ni Kalou era vakuai ira. Levu na tacida era vakatulewataka mera kua ni vakawati. So na veiwatini era digia mera kua tu mada ni vakaluveni. Era bula rawarawa tale ga na vuvale. Na cava era vakatulewataka kina qori? Na vuna levu ga nira via qaravi Jiova ena nodra vinaka kece. Era marau ra qai nuitaka ni na vakarautaka o Jiova na ka era gadreva dina. Vakacava era na veivutunitaka na vakatulewa qori? Sega! Eda kila vakacava? Dua na vuna ni o Jiova e vakalougatataki Eparama, na “tamadra kece na vakabauta.”—Roma 4:11.

2. (a) Me vaka e tukuni ena Iperiu 11:8-10, 16, na cava e tu vakarau kina o Eparama me biuti Uri? (b) Cava eda na veivosakitaka ena ulutaga qo?

² E tu vakarau o Eparama me biuta na ivakarau ni bula vinaka ena koro o Uri. Na vuna? Ni waraka tiko “na koro e dei na kena yavu.” (Wilika Iperiu 11:8-10, 16.) Na cava na “koro” qori? Na ituvaki dredre cava e sotava o Eparama ni waraka tiko na kena tara? Eda na vakatotomuri Eparama vakacava, kei ira na tacida era muria nona ivakaraitaki ena gauna qo?

3. Na koro cava e waraka tiko o Eparama?

³ Na koro cava e waraka tiko o Eparama? Qori na Matanitu ni Kalou. E veiliutaki kina o Jisu Karisito kei ira na 144,000 na lotu vaKarisito lumuti. E vakatoka o Paula na Matanitu qori me “koro ni Kalou bula, o Jerusalemi vakalomalagi.” (Iper. 12:22; Vkta. 5:8-10; 14:1) E vakavulici ratou tale ga  nona tisaipeli o Jisu me ratou masulaka me yaco mai na Matanitu qori me vakayacori na loma ni Kalou e vuravura me vaka sa caka tiko mai lomalagi.—Maciu 6:10.

4. Me vaka e tukuni ena Vakatekivu 17:1, 2, 6, e vakacava na levu ni ka e kila o Eparama me baleta na koro, se Matanitu e yalataka na Kalou?

⁴ Vakacava e kila o Eparama na itukutuku matailalai me baleta na kena tuvanaki na Matanitu ni Kalou? Sega. A okati tu na itukutuku qori me “ka vuni tabu” ena loma ni vica vata na senitiuri. (Efeso 1:8-10; Kolo. 1:26, 27) Ia e kila tiko o Eparama nira na veiliutaki vakatui ena Matanitu qori eso nona kawa. Qori sara ga na ka e yalataka vua o Jiova. (Wilika Vakatekivu 17:1, 2, 6.) E vakabauta dei o Eparama na vosa ni yalayala ni Kalou, e vaka ga sa raici koya tu na Lumuti se Mesaia ena veiliutaki vakatui ena Matanitu ni Kalou. Sa rauta me tukuna o Jisu vei ira na Jiu ena nona gauna: “Dua na ka nona vakanuinui tu na tamamuni o Eparama me raica noqu gauna, a raica dina qai marautaka vakalevu.” (Joni 8:56) E kila gona o Eparama nira na veiliutaki na nona kawa ena Matanitu e tauyavutaka o Jiova, e vakadeitaka tale ga me waraka na kena vakayacori na vosa ni yalayala i Jiova.

5. Eda kila vakacava ni a waraka tiko o Eparama na koro e tara na Kalou?

⁵ E vakaraitaka vakacava o Eparama ni waraka tiko na koro se Matanitu e tara na Kalou? Kena imatai, e sega ni vinakata o Eparama me lewenivanua ni dua na matanitu e vuravura. E veitokiyaki tu ga, e sega ni dei ena dua na vanua, se tokona e dua na tui. E sega tale ga ni saga me dua ga nona matanitu. Ia e talairawarawa tiko ga vei Jiova qai waraka me vakayacora nona vosa ni yalayala. Qori e vakaraitaka na levu ni nona vakabauti Jiova. Meda veivosakitaka mada eso na ituvaki dredre e sotava, kei na ka eda vulica vua.

6. E koro vakacava o Uri?

⁶ E vakatulewataka o Eparama me biuti Uri, na koro e taqomaki vinaka tu qai rawarawa kina na bula. E tiko na kena bai lelevu kei na tolu na ikeliwai me taqomaka na koro. Era kenadau na lewenivanua e Uri  ena volavola kei na fika. E vanua tale ga ni bisinisi. Era kunea na daukelikeli e levu na ka vakaivola ni bisinisi ena irusarusa ni koro qori. E tara ena biriki na kena veivale, e palasita vinaka na kena lalaga qai boro vulavula. Eso na vale qori e 13 se 14 na kena rumu qai caka ena vatu na kena lomanibai.

7. Na cava e vinakati kina vei Eparama me nuitaki Jiova me taqomaki koya kei na nona vuvale?

⁷ E vinakati vei Eparama me nuitaki Jiova ni na taqomaki koya kei na nona vuvale. Na vuna? Sa biuta tu yani o Eparama kei Sera na vale vinaka e Uri, me lai tiko ena valelaca ena vanua o Kenani. Sa sega ni tiko e dua na bai vavaku se ikeliwai me taqomaki koya kei na nona vuvale. E rawarawa gona vei ira na meca mera vakaleqai ratou.

8. Na cava e yacovi Eparama ena dua na gauna?

⁸ E cakava o Eparama na loma ni Kalou, ia dua na gauna eratou sotava vakavuvale na leqa ni kakana. E dausiga vakalevu na vanua e talai koya kina o Jiova. E vakatulewataka gona o Eparama me kauta nona vuvale me ratou lai tiko vakalekaleka i Ijipita. Ia ni tiko e kea, e tauri Sera o Fero ni vinakata me watina. Vakasamataka mada nona nuiqawaqawa o Eparama. E qai oti ga qori ni vakavuna o Jiova me soli Sera lesu tale o Fero vei Eparama.—Vkte. 12:10-19.

9. Na ituvaki dredre cava e sotava o Eparama ena nona vuvale?

⁹ E sotava o Eparama eso na ituvaki dredre ena nona vuvale. E sega ni vakaluveni rawa o Sera na watina lomani. Qori e dua na ka erau rarawataka vakalevu me vicasagavulu na yabaki. E mani vakatulewataka o Sera me soli Eka nona yalewa dauveiqaravi vei Eparama, me rawa ni vakaluveni kina. Ia na gauna e buketetaki Isimeli kina o Eka, e tekivu me beci Sera, e qai ca sara na ituvaki mani vakatalai Eka o Sera.—Vkte. 16:1-6.

10. E vakatovolei vakacava nona nuitaki Jiova o Eparama ena ka e yacovi rau na luvena tagane?

¹⁰ Toso na gauna sa qai bukete o Sera, e dua kina na luvedrau kei Eparama. E qai vakayacani koya o Eparama me o Aisake. O Eparama e lomani rau na luvena tagane, o Isimeli kei Aisake. Ia e dau vakalialiai Aisake o Isimeli, e mani vakatalai koya kei Eka o Eparama. (Vkte. 21:9-14) Dua na gauna e muri, e kerei Eparama o Jiova me cabori Aisake. (Vkte. 22:1, 2; Iper. 11:17-19) E vinakati sara ga me nuitaki Jiova o Eparama ni na vakayacora nona vosa ni yalayala me baleti rau na luvena tagane.

11. Na cava e vinakati kina me waraki Jiova ena vosota o Eparama?

¹¹ Ena gauna kece qori, e vinakati me waraki Jiova ena vosota o Eparama. Sa rairai yabaki 70 vakacaca tiko ni biuti Uri kei na nona vuvale. (Vkte. 11:31–12:4) E tiko voli ga ena valelaca me rauta ni 100 na yabaki, ni veitokiyaki voli e Kenani. E qai mate o Eparama ni sa yabaki 175. (Vkte. 25:7) Ia e sega ni raica nona vakayacora o Jiova nona vosa ni yalayala me solia na vanua o Kenani vei ira nona kawa. E sega tale ga ni bula tiko me raica ni tauyavutaki na koro e waraka voli, na Matanitu ni Kalou. Ia e tukuni ena iVolatabu ni mate o Eparama ni sa “qase sara, e marautaka na nona bula.” (Vkte. 25:8) E levu na ka dredre e sotava o Eparama, ia e dei tu ga nona vakabauta qai marau me waraki Jiova. E vosota rawa vakacava? Ni taqomaki koya o Jiova ena nona bula taucoko, e okati koya me nona itokani.—Vkte. 15:1; Aisea 41:8; Jeme. 2:22, 23.

12. Na cava eda waraka tiko? Cava eda na veivosakitaka?

¹² Me vakataki Eparama, eda waraka na koro e dei na kena yavu. Eda sega ni waraka tiko me tara, ni sa tauyavu oti na Matanitu qori ena 1914, sa liutaka tiko na lomalagi  ena gauna qo. (Vkta. 12:7-10) Eda waraka tiko ga me liutaka na vuravura taucoko. Ena vinakati gona meda vosota eso na ituvaki dredre me vakataki Eparama kei Sera. Vakacava era vakatotomuri Eparama tale ga na dauveiqaravi i Jiova nikua? Na italanoa e tabaki ena Vale ni Vakatawa e vakadeitaka ni levu tale ga na tacida era vakatotomuri Eparama kei Sera ena nodra vakabauta kei na vosovoso. Meda veivosakitaka mada e vica na italanoa qori kei na ka eda vulica kina.

13. Na cava o vulica vei Brother Walden?

¹³ Tu vakarau mo vakuai iko. Ke da vinakata meda vakaliuca na koro e dei na kena yavu, ya na Matanitu ni Kalou, e dodonu meda vakatotomuri Eparama ena nona vakuai koya me vakamarautaka na Kalou. (Maciu 6:33; Mari. 10:28-30) Dikeva mada nona ivakaraitaki e dua na tacida o Bill Walden. * E tekivu vulica na iVolatabu kei ira na iVakadinadina i Jiova ena 1942, ni vakarau tuvaitutu ena dua na Univesiti e Merika me rawata nona koroi ni idinia ni taravale. Sa veivosakitaka tu nona parofesa me dua nona cakacaka ni oti ga na tuvaitutu, ia e sega ni vakadonuya o Bill. E vakamacalataka ni sega ni vinakata me sasagataka e dua na cakacaka saulevu, me rawa ni qarava na Kalou ena nona vinaka taucoko. Oti vakalailai, e vakarota na matanitu me curu o Bill ena mataivalu, e vakamacalataka ena veidokai ni na sega ni cakava qori. E mani totogitaki vakailavo me sauma e $10,000 qai vesu me lima na yabaki. E sere o Bill ni oti e tolu na yabaki. Oti e sureti sara me lai vuli e Kiliati qai lesi me daukaulotu e Aferika. E vakamautaki Eva rau qai veiqaravi vata e Aferika. E levu na ka me rau vakuai rau kina. Oti e vica vata na yabaki rau sa qai lesu tale i Merika me rau qaravi tinai Bill. Ni vakamacalataka nona bula o Bill, e kaya: “Au luluvu niu vakasamataka nona vakayagataki au o Jiova ena 70 na yabaki ni noqu veiqaravi. Au dau vakavinavinakataki koya tu ga nona vukei au meu vakayagataka noqu bula meu qaravi koya.” Vakacava o  rawa ni vakayagataka nomu bula mo veiqaravi vakatabakidua?

14-15. Na cava o vulica vei rau o Brother kei Sister Apostolidis?

¹⁴ Kua ni nanuma ni na maravu tu ga na nomu bula. Eda vulica ena ivakaraitaki nei Eparama ni o ira mada ga na qaravi Jiova vakatabakidua era sotava tale ga na veika dredre. (Jeme. 1:2; 1 Pita 5:9) Qori sara ga na ka e sotava e dua na tacida tagane o Aristotelis Apostolidis. * E papitaiso ena 1946 e Kirisi. Ena 1952, erau veimusumusuki kei Sister Eleni, e tautauvata nodrau isausau. Ia e qai tauvimate o Eleni e laurai ni tubu tiko e dua na bo ena nona mona. E mani sele me kau tani na bo qori. Ia ni oti ga e vica na yabaki nodrau vakamau, e tubu tale mai. E mani qaravi tale vakavuniwai, na veisele qori e vakavuna me paralasi, e vakaleqa tale ga nona vosa. Na nona tauvimate kei na vakatatabu ni matanitu ena gauna ya e sega ni tarova nona gumatua ena cakacaka vakaitalatala.

¹⁵ E qaravi watina tu o Brother Aristotelis me 30 na yabaki. A veiqaravi tiko vaqase ena loma ni gauna qori, e lewe ni komiti ni soqo, e veivuke tale ga ena tara ni Vale ni Soqoni Lelevu. Ia ena 1987, e mavoa o Eleni ni cakacaka vakavunau tiko e qai takali ni oti e tolu na yabaki nona sega ni vakilai koya tu. Ni vakamacalataka o Aristotelis na veika e sotava, e kaya: “Ena veiyabaki sa sivi, au sotava na ituvaki dredre kei na veika tawanamaki, e vinakati sara ga meu vosota meu kua ni soro. Ia e solia vei au o Jiova na kaukaua meu dei tiko ga.” (Same 94:18, 19) O Jiova e lomani ira dina na qaravi koya tiko ga ena nodra vinaka taucoko nira sotava na veika dredre!

16. Na ivakasala yaga cava e tukuna o Brother Knorr vei watina?

¹⁶ Vakasamataka na veika se bera mai. E vakasamataka o Eparama na ka ena vakalougatataki koya kina o Jiova ena gauna se bera mai, qori e vakaukauataki koya me vosota na veika dredre. Qori na ka e cakava o Sister Audrey Hyde. E mate na imatai ni watina o Nathan H. Knorr ni tauvi koya na  kenisa. E mani vakawati tale kei Brother Glenn Hyde, ia e qai tauvi Brother Hyde na mate ni guiguileca na Alzheimer. * Ni sotava na ituvaki qori o Sister Audrey Hyde e saga me dau vakasamataka tiko nona inuinui ena gauna se bera mai. E kaya ni uqeti koya na ka e tukuna o Brother Knorr ni vo e vica na macawa nona mate. E kaya: “E dau tukuna vei au o Nathan: ‘Nida mate ena dei tu noda inuinui, eda na sega tale ni rarawa.’ E vakauqeti au: ‘Meu vakanamata ena icovi sa tu mai liu.’ . . . Sa qai kaya: ‘Mo vakaogai iko tiko ga—mo vakayagataka nomu bula mo vukea kina eso tale. O na marau kina.’” Qori e dua dina na ivakasala yaga vei keda, meda ogaoga tiko ga ena noda caka vinaka da qai “marau ena vuku ni noda inuinui”!—Roma 12:12.

17. (a) Na cava e bibi kina meda vakasamataka tiko ga na veika se bera mai? (b) Ena yaga vakacava nida muria na ivakaraitaki ena Maika 7:7 meda vakalougatataki kina ena gauna se bera mai?

¹⁷ Nikua sa qai bibi sara meda vakasamataka tiko ga na veika se bera mai. Na vuna? Na veika sa yaco tu e vuravura e vakadeitaka ga nida sa bula tu ena icavacava ni iotioti ni veisiga ni vuravura ca qo. Sa voleka sara na gauna me liutaka kina na vuravura taucoko na koro e dei na kena yavu. Levu na ka eda na vakalougatataki kina, dua ya nida sotavi ira tale na wekada voleka era sa mate. Ena vakalougatataki Eparama ena gauna qori o Jiova ena nona vakabauta kei na vosovoso. Ena sala cava? Ni vakaturi koya kei ratou nona vuvale me ratou bula tale e vuravura. Vakacava o na tiko ena gauna ya mo sotavi ratou? Ena rawa ke o vakatotomuri Eparama ena nomu tu vakarau mo vakuai iko ena vuku ni Matanitu ni Kalou, ni dei nomu vakabauta ni o sotava na veika dredre qai waraki Jiova tiko ga ena vosota.—Wilika Maika 7:7.