1. Na isausau cava era sasagataka e levu ena nodra veiqaravi?

 E LEVU na cakacaka eda na qarava ni sa voleka ni cava na ituvaki qo. (Maciu 24:14; Luke 10:2; 1 Pita 5:2) Eda vinakata kece meda qaravi Jiova ena noda vinaka. Levu era vakarabailevutaka nodra veiqaravi, eso era vinakata mera painia, eso tale era via veiqaravi e Peceli, se mera tara eso tale na vale e taukena na isoqosoqo. E levu tale ga na mataveitacini tagane era saga mera sauva mera dauveiqaravi se qase ni ivavakoso. (1 Tim. 3:1, 8) Sa na marau mada ga o Jiova me raica nodra yalorawarawa na nona tamata!—Same 110:3; Aisea 6:8.

2. Na cava eda na rairai vakila nida sega ni sauva eso noda isausau vakayalo?

² Eda rawa ni yalolailai ke toso na gauna eda sega ni rawata eso na noda isausau vakayalo. Se da yalolailai nida sega ni rawa ni qarava eso na itavi ena isoqosoqo i Jiova ena vuku ni yabaki ni noda bula se so tale na ituvaki. (Vkai. 13:12) Qori na ka e sotava o Matelita. * E diva tu me veiqaravi e Peceli se me tiko ena Koronivuli ni iTalatala ni Matanitu. Ia e kaya: “Au sa qase. Sa ka ni tatadra ga na isausau qori. Eso na gauna au dau yalolailai.”

3. Na cava ena rairai vinakati mera cakava eso mera qarava kina eso na itavi?

³ Eso era gone qai bulabula, ena rairai vinakati mera  yalomatua mera vakaraitaka eso na itovo ni bera nira qarava eso tale na itavi. Era na rairai vuku, totolo nodra vakatulewa ra qai tu vakarau na veivuke. Ia ena rairai vinakati mera vulica mera yalovosovoso, qarava vinaka na nodra cakacaka, se mera veidokai. Ke o sasaga mo vakaraitaka na itovo qori, ena rairai lesi vei iko e dua na itavi o sega sara ga ni namaka. Vakasamataka na ivakaraitaki i Niko. Ni se yabaki 20, e rarawataka vakalevu ni sega ni lesi me dauveiqaravi ni ivavakoso. E kaya, “Au nanuma ni leqa tiko vei au e dua na ka.” Ia e sega ni soro o Niko, e cakacaka vakaukaua ena ivavakoso kei na cakacaka vakaitalatala. Nikua sa lewe tiko ni Komiti ni Tabana.

4. Na cava eda na veivosakitaka ena ulutaga qo?

⁴ O yalolailai ni o se sega ni rawata e dua na isausau vakayalo? Ke vaka kina, talaucaka na lomamu vei Jiova. (Same 37:5-7) Kena ikuri, kere ivakasala vei ira na tacida matua ena sala mo vakavinakataka kina nomu qaravi Kalou, oti mo muria sara nodra ivakasala. O na rairai qarava na itavi qori se rawata na nomu isausau. Ia me vakataki Matelita, sa cavuti oti mai, o na sega ni rawata na isausau qori ena gauna qo. Na cava o na cakava? Cava mo cakava mo marau tiko ga? Me saumi na taro qori, ena veivosakitaki ena ulutaga qo na (1) ka ena vakavu marau vei iko, (2) na sala mo marau kina vakalevu, kei na (3) isausau mo rawa ni marau kina vakalevu.

5. Meda marau na cava meda kauaitaka? (Dauvunau 6:9)

⁵ Na Dauvunau 6:9 e vakamacalataka na ka meda cakava meda marau kina. (Wilika.) O koya e marautaka na ka e ‘raica e matana’ e lomavakacegu ena kena ituvaki ena gauna qo. Ia o koya e veinanuyaka na ka e vinakata, e diva tiko e dua na ka ena sega sara ga ni rawata. Na cava eda vulica kina? Meda marau, e bibi meda kauaitaka na ka sa tu rawa kei na isausau eda rawa ni sauva.

6. Na vosa vakatautauvata cava eda na veivosakitaka qo? Cava eda na vulica kina?

⁶ O rawa ni lomavakacegu ena ka sa tu rawa vei iko? Io e rawa. Ni toso na gauna e dau matau meda cakava eso na ka vovou. Eda rawa ni marautaka dina na ka e tu vei keda, se na ka “eda raica e matada.” Eda na cakava vakacava qori? Meda kila na kena isau, eda na veivosakitaka na vosa vakatautauvata i Jisu me baleta na taledi e volai ena Maciu 25:14-30. Eda na vulica na sala meda marau tiko ga kina, qai marautaka vakalevu na ka sa tiko rawa.

7. Vakamacalataka vakalekaleka na vosa vakatautauvata i Jisu me baleta na taledi.

⁷ Ena vosa vakatautauvata, e vakarau gole e dua na turaga i vanuatani. Ni bera ni biubiu e kacivi ratou nona dauveiqaravi, qai solia vei ratou yadua na taledi me ratou cakacakataka. * Ni vakasamataka na ka eratou rawa ni cakava, e solia na turaga e lima na taledi vua e dua na dauveiqaravi, e rua vua e dua tale, e dua na taledi vua na ikatolu ni dauveiqaravi. Na imatai ni rua na dauveiqaravi erau cakacaka vakaukaua me so tale na ka e rawa. Ia na kena ikatolu e sega ni  cakava e dua na ka ena ilavo e soli vua, mani vakasakei koya nona turaga.

8. Na cava e rairai marau kina na imatai ni dauveiqaravi?

⁸ E rairai marau vakalevu na imatai ni dauveiqaravi ni solia vua nona turaga e lima na taledi. Dua na ilavo levu qori, e vakaraitaka ni nuitaki koya nona turaga! Ia vakacava na ikarua ni dauveiqaravi? A rawa ni yalolailai ni sega ni soli vua e lima na taledi me vaka na imatai ni dauveiqaravi. Na cava e qai cakava?

9. Na cava e sega ni tukuna o Jisu me baleta na ikarua ni dauveiqaravi? (Maciu 25:22, 23)

⁹ Wilika Maciu 25:22, 23. E sega ni tukuna o Jisu ni a rarawa se cudru na ikarua ni dauveiqaravi ni soli ga vua e rua na taledi. Sega ni tukuna o Jisu ni a vosakudrukudru na dauveiqaravi: ‘Qo ga na ka e soli vei au? Au dau cakacaka tale ga vakaukaua me vakataki koya na imatai ni dauveiqaravi! Ke sega ni taleitaki au na noqu turaga, sa vinaka ga meu buluta na taledi qo meu cakava ga na ka au vinakata.’

10. Na cava e cakava na ikarua ni dauveiqaravi ena taledi e soli vua?

¹⁰ Me vakataki koya na imatai ni dauveiqaravi, e raica vakabibi na ikarua ni dauveiqaravi na itavi e soli vua qai cakacaka vakaukaua me qarava nona turaga. E mani vakaruataka na taledi ni nona turaga. E vakalougatataki na dauveiqaravi qo ena nona gugumatua kei na nona maqosa. E marautaka na nona turaga na ka e cakava mani lesia vua  na dauveiqaravi qo eso tale na itavi!

11. Ena rawa vakacava mo marau vakalevu?

¹¹ Ena sala vata qori eda na marau vakalevu nida gumatua ena itavi cava ga e lesi vei keda ena noda qaravi Jiova. Meda “ogaoga” vakalevu ena cakacaka vakavunau qai cakacaka vakaukaua ena ivavakoso. (Caka. 18:5; Iper. 10:24, 25) Mo vakavakarau vinaka ena soqoni, me veiuqeti kina na nomu ivakamacala. Raica vakabibi na itavi e lesi vei iko ena soqoni ena lomanimacawa. Ke o kerei mo qarava e dua na itavi ena ivavakoso mo yaco totolo yani, mo nuitaki tale ga. Kua ni nanuma ni sega ni yaga na gauna o vakayagataka kina. Saga mo kenadau ena nomu cakacaka. (Vkai. 22:29) Na levu ga ni nomu gumatua ena itavi vakayalo kei na nomu ilesilesi, na totolo ni nomu toso kei na levu ni nomu marau. (Kala. 6:4) O na rawa tale ga ni marau kei ira era lesi ena itavi o dau vinakata tu.—Roma 12:15; Kala. 5:26.

12. Na cava erau cakava na tacida me rau marau kina vakalevu?

¹² O se nanumi Matelita, na tacida a via veiqaravi e Peceli, se tiko ena Koronivuli ni iTalatala ni Matanitu? E sega ni rawa ni cakava ruarua qori, e kaya: “Au saga meu ogaoga tiko ga ena cakacaka vakapainia, meu vakaitavi tale ga ena iwalewale kece ni vunau. Qori na ka au marautaka vakalevu.” Vakacava o Niko, ni a sega ni lesi me dauveiqaravi ni ivavakoso? E kaya: “Au saga meu gumatua ena itavi au qarava tiko ena gauna qo, ya na cakacaka vakaitalatala, me veiuqeti tale ga noqu ivakamacala ena soqoni. Kena ikuri, au a vakalewe fomu e Peceli, au mani sureti sara meu veiqaravi kina ena yabaki tarava.”

13. Na cava ena yaco ke o gumatua ena itavi o qarava tiko ena gauna qo? (Dauvunau 2:24)

¹³ Ke o gumatua ena itavi o qarava tiko ena gauna qo, kena ibalebale ya o na rawa ni lesi ena so tale na itavi ena gauna se bera mai? Io ena rawa me vakataki Niko ga. Ia ke sega, o se rawa tiko ga ni marau vakalevu me vakataki Matelita. O na lomavakacegu tale ga ena ka o cakava ena vuku i Jiova. (Wilika Dauvunau 2:24.) Kena ikuri, o na marau vakalevu ni o kila ni marautaka na noda Turaga o Jisu Karisito na nomu sasaga.

14. Na cava meda nanuma tiko nida vakasamataka noda isausau?

¹⁴ Nida gumatua ena itavi eda qarava tiko ena gauna qo, kena ibalebale ya meda kua ni vakarabailevutaka noda qaravi Jiova? Sega! Meda sauva na isausau vakayalo ena vuavuaivinaka kina noda cakacaka vakaitalatala, meda vukei ira tale ga na mataveitacini. Eda na rawata na isausau qori ke da vuku da qai yalomalumalumu ni qaravi ira eso tale, sega ni kauaitaki keda ga.—Vkai. 11:2; Caka. 20:35.

15. Na cava eso na isausau o na marau kina vakalevu?

¹⁵ Na isausau cava o rawa ni sasagataka? Kerei Jiova me vukei iko mo kila na isausau o rawa ni sauva. (Vkai. 16:3; Jeme. 1:5) O rawa ni sasagataka na isausau e tukuni ena  imatai ni parakaravu, ya mo painia veivuke se painia tudei, veiqaravi e Peceli se vakaitavi ena tarataravaki? Se ganita na kemu ituvaki mo vulica e dua tale na vosa mo rawa ni vunautaka kina na itukutuku vinaka se vunau ena dua tale na yalava. O na vulica  eso tale na ka me baleta na isausau qori, ni o wilika na wase 10 ni ivola iSoqosoqo e Cakava na Loma i Jiova kei na nomu veivosaki kei ira na qase ni ivavakoso ena nomu ivavakoso. * Ni o saga tiko na isausau qori, era na raica eso tale na nomu toso, o na marau tale ga vakalevu.

16. Na cava o na cakava ke o sega ni rawata e dua na isausau ena gauna qo?

¹⁶ Vakacava ke o sega ni sauva rawa ena gauna qo na isausau sa vakamacalataki oti mai? Na kena iwali ga me dua tale na nomu isausau, na kena o rawa ni sauva. Vakasamataka mada eso na isausau qo.

17. Me vaka e tukuni ena 1 Timoci 4:13, 15, na cava ena cakava e dua na tacida tagane me qasenivuli vinaka?

¹⁷ Wilika 1 Timoci 4:13, 15. Ke o dua na tagane papitaiso, saga mo vakavinakataka na ivakarau ni nomu vosa kei na veivakavulici. Na vuna? Ke o saga me vinaka nomu wilivola, vosa kei na veivakavulici, o na vukei ira na rogoci iko. Me nomu isausau mo vulica qai muria na lesoni yadua ena ivola Mo Gumatua ena Wilivola kei na Veivakavulici. Vulica na lesoni yadua, vakatovotovotaka sara e vale, saga mo muria na lesoni qori ena itavi o lesi kina. Kere ivakasala vua na ivukevuke ni daunivakasala se so tale na qase era ‘gumatua ena ka era tukuna kei na nodra vakavulica na vosa ni Kalou.’ * (1 Tim. 5:17) Kua ni kauaitaka ga na lesoni o vulica tiko, saga mo vukei ira na vakarorogo me dei na nodra vakabauta se mo uqeti ira  mera muria na ka era vulica. Ni o cakava qo era na marau kina, o na marau tale ga.

18. Na cava ena vukei keda meda rawata noda isausau ena cakacaka vakaitalatala?

¹⁸ Eda lesi kece meda vunau qai veivakatisaipelitaki. (Maciu 28:19, 20; Roma 10:14) O via maqosa ena cakacaka bibi qo? Me tiko nomu isausau ni o vulica qai muria na ka o vulica ena brochure Veivakavulici. Rawa ni muria eso tale na vakatutu mai na iVola ni Soqoni ni Noda Bula Vakarisito kei na Cakacaka Vakaitalatala kei na vakatutu e vakaraitaki ena vidio ena soqoni ena lomanimacawa. Tovolea na iwalewale kece qo mo kila na kena e laulau. Ni o muria na vakatutu qori o na marau vakalevu ni o dua na italatala maqosa ni itukutuku vinaka.—2 Tim. 4:5.

19. O na vakaraitaka vakacava na itovo vaKarisito?

¹⁹ Ni o vakasamataka tiko eso na isausau, kua ni guilecava na tikina bibi qo, ya mo vakaraitaka na itovo vaKarisito. (Kala. 5:22, 23; Kolo. 3:12; 2 Pita 1:5-8) O na cakava vakacava? Me kena ivakaraitaki, o na rairai vinakata me dei tiko ga nomu vakabauta. O rawa ni wilika na ulutaga ena noda ivola e vakatututaka na sala me dei kina nomu vakabauta. Ena yaga sara vakalevu na nomu sarava na kedra italanoa na tacida ena JW Broadcasting^® e vakasakiti nodra vakabauta nira sotava na ituvaki dredre. Oti vakasamataka na sala o rawa ni vakatotomuria kina na nodra vakabauta.

20. Sala cava eda na marau kina vakalevu?

²⁰ Eda diva kece meda cakava e levu na ka vei Jiova ena gauna qo. Ena vuravura vou ni Kalou eda rawa ni qaravi koya ena kena levu eda rawata. Ia ena gauna qo, ke da solia na noda vinaka ena ka eda rawa ni cakava eda na marau vakalevu qai sega so ni yalolailai. Koya e bibi sara eda na dokai Jiova qai vakacaucautaka na “Kalou mamarau.” (1 Tim. 1:11) Meda marautaka gona na itavi eda qarava tiko ena gauna qo!