1. Na taro cava eda na rairai taroga nida vakasamataka na ka kece e bulia o Jiova?

NIDA vakasamataka vakatitobu na ka kece e bulia o Jiova, eda na rairai duavata kei na daunisame o Tevita ni taroga ena nona masu: “Niu raica na nomuni lomalagi, na cakacaka ni qaqaloniligamuni, na vula kei na veikalokalo oni vakarautaka, na cava na tamata moni dau nanumi koya kina, kei na luve ni tamata moni kauaitaki koya kina?” (Same 8:3, 4) Me vakataki Tevita, eda na rairai vakasamataka nida ka somidi ni vakatauvatani kei na kalokalo e bulia o Jiova, eda qoroya ni bau kauaitaki keda tu. Ia me vaka eda na qai dikeva yani, o Jiova e sega ni kauaitaki rau wale ga na imatai ni veiwatini o Atama kei Ivi, e buli rau sara ga me rau lewe ni nona vuvale.

2. Na cava na inaki i Jiova vei rau na imatai ni luvena e vuravura?

² O Atama kei Ivi na imatai ni luvei Jiova e vuravura, e Tamadrau vakalomalagi dauloloma o Jiova. E vinakata me rau qarava vinaka na nodrau itavi. E kaya vei rau: “Drau vakawa, mera le levu mai, drau vakasinaiti vuravura, drau vakamalumalumutaka.” (Vkte. 1:28) E vinakata o Jiova me rau vakaluveni, me rau qarava vinaka tale ga na nodrau itikotiko. Ke rau talairawarawa tiko ga ena inaki i Jiova, rau na lewenivuvale i Jiova me tawamudu, wili kina na nodrau kawa.

3. Na cava eda kaya kina ni rau lesi ena itavi bibi ena vuvale i Jiova o Atama kei Ivi?

³ Erau lesi ena itavi bibi o Atama kei Ivi ena vuvale i Jiova. Me vaka e volai ena Same 8:5, qo na ka e tukuna o Tevita me baleta nona bulia na tamata o Jiova: “Oni vakarautaki koya me lailai vei ira na agilosi, oni qai vakaisalataki koya ena lagilagi kei na vakarokoroko.” Io, e sega ni soli vei  keda na kaukaua, vuku, kei na ka e rawa nira cakava na agilosi. (Same 103:20) Ia e buli na kawatamata me “lailai” vei ira na kabula kaukaua vakayalo qori. Vakasamataka mada ya! Ena gauna e buli rau kina noda itubutubu o Jiova, e vakarautaka vei rau na bula totoka.

4. Na cava e yaco vei Atama kei Ivi ni rau talaidredre vei Jiova? Cava eda na veivosakitaka ena ulutaga qo?

 ⁴ Ka ni rarawa ni rau sa sega ni lewenivuvale i Jiova o Atama kei Ivi. Qo e vakavuna e levu na leqa vei ira na nodrau kawa, me vaka eda na qai veivosakitaka yani ena ulutaga qo. Ia e sega ni veisau na inaki i Jiova. E vinakata mera luvena me tawamudu na tamata talairawarawa. Meda veivosakitaka mada qo na sala e vakamareqeti keda kina o Jiova. Oti meda veivosakitaka na ka meda cakava ena gauna qo meda vakaraitaka kina nida via lewenivuvale ni Kalou. Eda na veivosakitaka tale ga na ka era na vakalougatataki kina me tawamudu na luvei Jiova e vuravura.

5. Nida buli meda ucuya na Kalou, eda na rokovi koya vakacava?

⁵ E mareqeti keda o Jiova ni buli keda meda ucui koya. (Vkte. 1:26, 27) Nida buli meda ucuya na Kalou, eda rawa ni bucina qai vakaraitaka e levu nona itovo totoka me vaka na loloma, veinanumi, yalodina, kei na yalododonu. (Same 86:15; 145:17) Eda rokovi Jiova nida vakaraitaka na itovo qori, eda vakavinavinakataki koya tale ga. (1 Pita 1:14-16) Eda vakamarautaka na Tamada vakalomalagi ni vinaka na noda itovo, eda na marau tale ga. Ni buli keda o Jiova meda ucui koya, eda rawa kina ni lewe ni nona vuvale.

6. E mareqeti keda vakacava o Jiova ni vakarautaka na vuravura?

⁶ E vakarautaka o Jiova na noda itikotiko totoka. Ni bera sara ni bulia o Jiova na imatai ni tamata, e vakarautaka na vuravura meda bula kina. (Jope 38:4-6; Jere. 10:12) Ni dauveinanumi o Jiova, e lomasavu tale ga, e vakarautaka kina vakayauyau e levu na veika vinaka meda marautaka. (Same 104:14, 15, 24) Eso na gauna e raica lesu na veika e bulia qai raica “ni sa vinaka.” (Vkte. 1:10, 12, 31) E mareqeti keda na tamata ni lesia meda “lewa” na veika totoka kece e bulia e vuravura. (Same 8:6) E inaki ni Kalou vei ira na tamata uasivi mera mareqeta na veika e bulia me tawamudu. O dau vakavinavinakataki Jiova wasoma ena vuku ni nona vosa ni yalayala totoka?

7. E vakaraitaka vakacava na Josua 24:15 ni tiko vei keda na galala ni vakatulewa?

⁷ E solia vei keda o Jiova na galala ni vakatulewa. Eda rawa ni vakatulewataka na ivakarau ni bula meda muria. (Wilika Josua 24:15.) E marau na noda Kalou dauloloma nida digia meda qaravi koya. (Same 84:11; Vkai. 27:11) Eda rawa ni vakayagataka vinaka noda galala ni vakatulewa ena levu tale na sala. Meda dikeva mada na ivakaraitaki i Jisu.

8. Tukuna e dua na ivakaraitaki e vakayagataka kina o Jisu na nona galala ni vakatulewa?

⁸ Nida vakatotomuria na ivakaraitaki i Jisu, eda na vakatulewataka na ka e yaga vei ira eso tale. Dua na gauna ni wawale sara tu ga o Jisu kei ratou na nona yapositolo, eratou gole ina dua na vanua lala me ratou vakacegu kina. Ia ratou sega ni vakacegu rawa. E muri ratou yani e dua na ilala levu, era vinakata sara ga me vakavulici ira o Jisu. Ia e sega ni cudruvi ira o koya, e lomani ira ga. Na cava e  cakava o Jisu? E “mani vakavulici ira ena levu sara na ka.” (Mari. 6:30-34) Nida vakatotomuri Jisu nida solia noda gauna kei na kaukaua meda vukei ira eso tale, eda vakacaucautaka kina na Tamada vakalomalagi. (Maciu 5:14-16) Eda vakaraitaka tale ga vei Jiova nida vinakata meda lewe ni nona vuvale.

9. Na cava mera nanuma tiko na itubutubu?

⁹ E vakavuna o Jiova me rawa nida vakaluveni, meda vakavulici ira na gone mera dauloloma ra qai qaravi koya. Ke o itubutubu, o mareqeta na isolisoli qo? O Jiova e vakalougatataki ira vakalevu na agilosi, ia e sega ni solia vei ira na isolisoli qori. Koya gona ke o itubutubu, mo mareqeta nomu itavi ni veisusu. E lesi vei ira na itubutubu e dua na itavi bibi, ya mera tuberi luvedra ena “ivakavuvuli kei na ivakasala i Jiova.” (Efeso 6:4; Vkru. 6:5-7; Same 127:3) E vakarautaka na isoqosoqo i Jiova e levu na ivukevuke vakaivolatabu mera vukei kina na itubutubu, me vaka na ivola, vidio, sere, kei na ulutaga ena noda website. E macala ni rau mareqeti ira na lalai na Tamada vakalomalagi kei na Luvena. (Luke 18:15-17) Nira nuitaki Jiova na itubutubu ra qai solia nodra vinaka mera karoni ira na luvedra, ena marau kina o Jiova. Era vukei luvedra na itubutubu qo me rawa tale ga nira lewenivuvale i Jiova me tawamudu!

10-11. Na cava e rawati ena isoro e vakarautaka o Jiova?

¹⁰ E solia o Jiova na Luvena mareqeti duadua me rawa nida lewe tale ni nona vuvale. Me vaka e tukuni ena  parakaravu e 4, rau sa sega ni lewenivuvale i Jiova o Atama kei Ivi, vaka kina o ira na luvedrau. (Roma 5:12) Erau nakita o Atama kei Ivi me rau talaidredre vua na Kalou. E veiganiti kina me rau kua ni lewe ni nona vuvale. Ia vakacava na nodrau kawa? E vakarautaka vakayalololoma o Jiova na sala vei ira na talairawarawa mera mai lewe ni nona vuvale. Oya ni vakarautaka na isoro i Luvena duabau o Jisu Karisito. (Joni 3:16; Roma 5:19) Na cava e rawati kina? E digitaka o Jiova e 144,000 era yalodina mera luvena.—Roma 8:15-17; Vkta. 14:1.

¹¹ Era talairawarawa tale ga e vica vata na milioni na dausokalou yalodina nira cakava tiko na loma ni Kalou. E rawa nira lewe ni nona vuvale ena iotioti ni veivakatovolei ni cava na 1,000 na yabaki. (Same 25:14; Roma 8:20, 21) Nira nuitaka qori, e rawa gona nira kacivi Jiova na Dauveibuli me ‘Tamadra’ ena gauna qo. (Maciu 6:9) O ira tale ga na vakaturi era na vulica na ka e vinakata vei ira o Jiova. O ira na muria na nona veidusimaki, era na mai lewe tale ga ni nona vuvale.

12. Na taro cava eda na sauma?

¹² Me vaka eda veivosakitaka mai, e vakaliuliu o Jiova me mareqeti keda ena levu na sala. Sa digitaki ira oti na lumuti mera luvena, e vakarautaka tale ga na inuinui vua na “isoqosoqo levu” mera luvena ena vuravura vou. (Vkta. 7:9) Na cava meda cakava ena gauna qo meda vakaraitaka kina vei Jiova nida vinakata meda lewe ni nona vuvale me tawamudu?

13. Na cava meda cakava meda lewe ni vuvale ni Kalou? (Marika 12:30)

¹³ Vakaraitaka nomu lomani Jiova ni o qaravi koya ena lomamu taucoko. (Wilika Marika 12:30.) E levu na isolisoli totoka e vakarautaka vei keda na Kalou, dua vei ira qori noda rawa ni sokaloutaki  koya. Eda vakaraitaka vei Jiova nida lomani koya nida “muria na nona ivunau.” (1 Joni 5:3) Dua na ivunau e vinakata o Jiova meda muria ya na ivakaro i Jisu meda vakavulici ira eso tale mera tisaipeli, mera papitaiso. (Maciu 28:19) E vakaroti keda tale ga meda dau veilomani. (Joni 13:35) O Jiova ena digitaki ira na talairawarawa mera mai lewe ni nona vuvale.—Same 15:1, 2.

14. Eda na lomani ira vakacava eso tale? (Maciu 9:36-38; Roma 12:10)

¹⁴ Lomani ira eso tale. E kilai tani o Jiova ena nona dauloloma. (1 Joni 4:8) E lomani keda o Jiova ni bera mada ga nida kilai koya. (1 Joni 4:9, 10) Eda vakatotomuri koya nida lomani ira eso tale. (Efeso 5:1) Dua na sala eda vakaraitaka kina nida lomani ira eso tale oya nida vukei ira mera mai kilai Jiova ni se vo tiko na gauna. (Wilika Maciu 9:36-38.) Nida cakava qori, era na vulica kina na ka mera cakava mera mai lewenivuvale ni Kalou. Ni papitaiso oti e dua, e bibi meda lomana qai dokai koya tiko ga. (1 Joni 4:20, 21) Eda na cakava vakacava qo? Kena ivakaraitaki, eda na nuitaki koya. Ke da sega ni kila na vuna e vakayacora kina e dua na ka, me donu tiko ga noda rai me baleti koya. Eda na rokovi koya, eda na okati koya me uasivi keda.—Wilika Roma 12:10; Fpai. 2:3.

15. O cei meda lomana qai caka vinaka vua?

¹⁵ Meda lomani ira na tamata kece, meda caka vinaka tale ga vei ira. Ke da vinakata meda lewenivuvale i Jiova me tawamudu, e bibi meda muria na Vosa ni Kalou ena noda bula. Me kena ivakaraitaki, e vakavulici keda o Jisu meda lomani ira na tamata kece, wili kina o ira na keda meca qai caka vinaka vei ira. (Luke 6:32-36) Ena rairai dredre qori ena so na gauna. Ke vaka kina, e bibi me tiko vei keda na ivakarau ni vakasama i Jisu, meda vakatotomuria tale ga na ka e cakava. Nida saga ena noda vinaka meda talairawarawa vei Jiova da qai vakatotomuri Jisu, eda vakaraitaka nida vinakata meda lewe ni nona vuvale me tawamudu.

16. Eda na sega ni vakarogorogocataka vakacava na vuvale i Jiova?

¹⁶ Kua ni vakarogorogocataka na vuvale i Jiova. Ena loma ni vuvale, e matau vua na gonetagane lailai me vakatotomuri tuakana. Ke muria o tuakana na ivakavuvuli vakaivolatabu, ena ivakaraitaki vinaka vei tacina. Ke cakava tiko na ka ca, ena rawa ni vakatotomuria o tacina. E va tale ga qori ena vuvale i Jiova. Ke vukitani e dua na lotu vaKarisito yalodina se muria na ivakarau ni bula vakasisila, era na rawa ni vakatotomuri koya eso tale. Era na vakarogorogocataka na vuvale i Jiova. (1 Ces. 4:3-8) Meda kua sara ga ni vakatotomuri ira na ivakaraitaki ca, se vakalaiva e dua na ka me vakaleqa noda veiwekani kei na Tamada vakalomalagi.

17. Na rai cava meda qarauna? Na vuna?

¹⁷ Nuitaki Jiova, kua ni nuitaka na veika vakayago. E yalataka o Jiova ni na vakarautaka vei keda na kakana, isulu, kei na vale ke da vakaliuca nona matanitu da qai muria nona ivakatagedegede dodonu. (Same 55:22; Maciu 6:33) Ia na cava meda qarauna? Meda kua ni nanuma ni veika vakayago ena vuravura qo ena taqomaki keda se vakamarautaki keda. Eda kila ni sala duadua ga eda rawata kina na vakacegu ni vakasama oya na noda vakayacora na loma i Jiova. (Fpai. 4:6, 7) Ke da rawa mada ga ni volia e levu na ka, meda vakasamataka ke tiko  na gauna kei na kaukaua meda vakayagataka qai maroroya na ka kece qori. Vakacava eda taleitaka vakalevu na noda iyau? Meda nanuma tiko ni vinakata na Kalou meda vakayacora vinaka na itavi eda lesi kina ena nona vuvale. Kena ibalebale qori meda kua ni vakawelei. Eda sega sara ga ni vinakata meda vakataki koya na cauravou e sega ni via qaravi Jiova, me mai dua tale ga na luvena tagane baleta ga ni taleitaka vakalevu na nona iyau e vica wale!—Mari. 10:17-22.

18. Na cava na itavi bibi duadua era na marautaka na talairawarawa me tawamudu? Era na vakalougatataki vakacava?

¹⁸ Era na marautaka na talairawarawa na itavi bibi duadua, oya mera lomani Jiova ra qai sokaloutaki koya me tawamudu! O ira na nuitaka na bula e vuravura, era na marau tale ga mera maroroya na vuravura totoka qo e bulia vakamaqosa o Jiova me noda itikotiko. Sa voleka ni vakavouya na vuravura kei na bula kece ena veiliutaki ni Matanitu ni Kalou. Ena vakaotia tale ga o Jisu na leqa kece e vu mai na nodrau vakatulewataka o Atama kei Ivi me rau biuta na vuvale ni Kalou. O Jiova ena vakaturi ira e vica vata na milioni qai vakarautaka vei ira na inuinui mera na bula tawamudu, mera na bulabula vinaka tale ga ena vuravura sa veisautaki me parataisi. (Luke 23:42, 43) Nira sa uasivi na lewenivuvale i Jiova e vuravura, era na vakaraitaka yadudua na “lagilagi kei na vakarokoroko” e vola o Tevita.—Same 8:5.

19. Na cava meda nanuma tiko?

¹⁹ Ke o lewe ni “isoqosoqo levu,” e tiko na nomu inuinui totoka. E lomani iko na Kalou, e vinakata mo lewe ni nona vuvale. Saga ena nomu vinaka kece mo vakamarautaki koya. Mo dau vakasamataka e veisiga na vosa ni yalayala ni Kalou me uqeta na nomu vakasama kei na lomamu. Mo mareqeta nomu sokalou vua na Tamada vakalomalagi kei na inuinui mo vakacaucautaki koya me tawamudu!