1-2. Na cava eda na veivosakitaka ena ulutaga qo?

VAKACAVA ke berabera mai e dua na nomu iyaya o waraka tiko? O na rarawa? De dua o na duavata kei na ka e tukuni ena Vosa Vakaibalebale 13:12: “Ni daro na ka e namaki e tauvimate kina na lomada.” Vakacava ke o kila na vuna e sega ni yaco mai kina ena kena gauna? O na rawa sara ga ni vosovoso qai waraka tiko ga.

² Eda na veivosakitaka ena ulutaga qo eso na ivakavuvuli vakaivolatabu eda vulica kina meda dau ‘wawa tiko ga.’ (Maika 7:7) Eda na veivosakitaka tale ga e rua na ituvaki e vinakati kina meda waraki Jiova. Oti eda na qai veivosakitaka na ka era na vakalougatataki kina o ira na rawa ni waraki Jiova tiko ga.

3. Na ivakavuvuli cava eda vulica ena Vosa Vakaibalebale 13:11?

³ E dua na ivakaraitaki eda vulica kina na vosovoso e tiko ena Vosa Vakaibalebale 13:11. E kaya: “Na iyau e rawati totolo ena lailai, ia o koya e kumuna vakalalai na nona iyau ena tubu.” Na cava eda vulica kina? E ka vakayalomatua meda cakava na ka ena vosovoso, me caka tale ga vakalalai.

4. Na ivakavuvuli cava e vakabibitaki ena Vosa Vakaibalebale 4:18?

⁴ E tukuni ena Vosa Vakaibalebale 4:18 ni “nodra sala na yalododonu e vaka na rarama ni matanisiga e serau cake tiko na kena rarama me yacova na sigalevu.” Na matavosa qori e vakamacalataka vinaka na sala e vakaraitaka  kina vakalalai o Jiova na nona inaki vei ira na nona tamata. E dusia tale ga na veiveisau e cakava na lotu vaKarisito me toro volekati Jiova kina. Me kua ni vakusai na toso vakayalo, e taura na gauna. Ke da gumatua ni vulica qai muria na ivakasala eda rogoca ena Vosa ni Kalou kei na isoqosoqo i Jiova, eda na tekivu vakaraitaka vakalalai na itovo vaKarisito. Ena levu tale ga na ka eda kila me baleta na Kalou. Meda dikeva mada na ka e tukuna o Jisu me baleta na ivakavuvuli qori.

5. Na ivakaraitaki cava e tukuna o Jisu me vakamacalataka na toso vakayalo?

⁵ E cavuta o Jisu e dua na vosa vakatautauvata me vakamacalataka na itukutuku ni Matanitu eda kacivaka, e vaka na itei lailai e kadre se tubu vakamalua e lomadra na yalomalumalumu. E kaya: “Sa kadre na itei qai tubu me levu—e sega ni kila se yaco vakacava. E vakavuna ga na qele me vua na itei. E tubu e liu na drauna, tarava na sena, qai muri sara na vuana.” (Mari. 4:27, 28) Na cava e vakaibalebaletaka o Jisu? E vakamacalataka me vaka ga na kena tubu vakamalua na kau e va tale ga qori o koya e vakabauta na itukutuku ni Matanitu ni Kalou, ena taura na gauna me veisau. Me kena ivakaraitaki, nira toro volekati Jiova na noda gonevuli eda a tekivu raica tale ga e levu na veisau vinaka. (Efeso 4:22-24) Ia meda nanuma tiko ni o Jiova ga e vakatubura na itei lailai qori.—1 Kor. 3:7.

6-7. Na cava eda vulica ena nona bulia na vuravura o Jiova?

⁶ E dau cakava vakamalua o Jiova na ka kece e cakava me rawa ni vakaotia. Na vuna? Me vakalagilagi kina na yacana me yaga tale ga vei ira eso tale. Me kena ivakaraitaki, dikeva mada na veitaravi ni ka e cakava ni vakarautaka na vuravura vei keda na tamata.

⁷ E vakamacalataka na iVolatabu na  nona bulia na vuravura o Jiova, e kaya ni lewa na “kena ivakarau,” e vakasobura na “kena duru,” e biuta vata tale ga na vatu me “kena ivakadei.” (Jope 38:5, 6) E tiko mada ga na gauna me dikeva tale kina na nona cakacaka. (Vkte. 1:10, 12) Vakasamataka mada na ka era vakila na agilosi nira raica na veika vovou e bulia o Jiova. Era sa na marau mada ga! E tukuni nira tekivu “kaila ena vakasausau.” (Jope 38:7) Na cava eda vulica? E vica vata na udolu na yabaki nona bulibuli tiko o Jiova, ia ni raica lesu na veika kece e bulia, e kaya “sa bau totoka dina.”—Vkte. 1:31.

8. Na cava eda na vakarau vulica?

⁸ Eda raica ena vica na ivakaraitaki qori e levu na ivakavuvuli vakaivolatabu eda vulica kina na bibi ni vosovoso. Meda raica sara e rua na ituvaki e vinakati kina meda waraki Jiova tiko ga.

9. Na ituvaki cava e bibi kina meda waraki Jiova?

⁹ Vinakati meda waraki Jiova me rogoca noda masu. Nida kerea na kaukaua meda vosota na veika dredre se valuta na noda malumalumu, eda na rairai nanuma ni berabera nona rogoca o Jiova na noda masu. Na cava e sega ni sauma totolo kina o Jiova na noda masu kece?

10. Na cava e bibi kina na vosovoso me qai saumi noda masu?

¹⁰ E dau rogoca vinaka o Jiova na noda masu. (Same 65:2) E raica qori me ivakaraitaki ni noda vakabauti koya. (Iper. 11:6) E via raica o Jiova na levu ni noda sasaga ni salavata tiko na noda bula kei na ka eda masulaka, meda cakava tale ga na lomana. (1 Joni 3:22) Ena bibi gona meda vakaraitaka na vosovoso da qai sasaga tiko ga meda biuta na noda itovo ca se na noda malumalumu. E tukuna o Jisu ni na sega ni saumi totolo eso na noda masu. E kaya: “Kerekere tiko ga, ena qai soli vei kemudou, vaqaqara tiko ga, dou na qai kunea, tukituki tiko ga, ena qai dolavi vei kemudou, o koya yadua e kerekere ena soli vua, o koya e vaqaqara ena kunea, o koya tale ga e tukituki ena dolavi vua.” (Maciu 7:7, 8) Nida muria na ivakasala qori da qai “gumatua tiko ena masu” eda nuidei ni na rogoca na Tamada vakalomalagi na noda masu, ena sauma tale ga.—Kolo. 4:2.

11. Ena vakacegui keda vakacava na Iperiu 4:16 ni vaka me sega ni saumi totolo noda masu?

¹¹ Ena rairai sega ni saumi totolo na noda masu, ia e yalataka o Jiova ni na sauma “ena gauna eda gadreva kina.” (Wilika Iperiu 4:16.) Oya na vuna meda kua ni beitaki Jiova kina ke sega ni yaco totolo na ka eda nanuma tiko. Me kena ivakaraitaki, e levu e sa dede nodra masulaka tiko mera raica ni vakarusa na Matanitu ni Kalou na ivakarau ca qo. E tukuna mada ga o Jisu meda masulaka qori. (Maciu 6:10) Ia e ka vakalialia me luluqa nona vakabauta na Kalou e dua ni sega ni yaco na icavacava me vaka eda nanuma! (Apak. 2:3; Maciu 24:44) E ka vakayalomatua meda waraki Jiova tiko ga da qai masu vua ena vakabauta. Ena yaco ga na icavacava ena kena gauna donu, ni sa digia oti tu o Jiova “na siga ya kei na kena aua.” Qori ena gauna veiganiti vei keda kece.—Maciu 24:36; 2 Pita 3:15.

12. Na ituvaki cava ena rairai vakatovolei kina na noda vosovoso?

 ¹² Ena rairai vinakati meda vosovoso nida waraka me tau na lewadodonu. Levu e vuravura era dau vakalolomataki ira na tagane, yalewa, duikaikai kei na dui yavusa. Eso tale era vakalolomataki nira lokiloki se ni berabera nodra vakasama. Levu na tacida era vosota na veivakacacani ena vuku ni nodra vakabauta. Nida sotava qori e bibi meda nanuma tiko na vosa i Jisu. E kaya: “O koya e vosota me yacova na icavacava ena vakabulai.” (Maciu 24:13) Ia vakacava ke o kila e dua e cala bibi ena ivavakoso? Ni o sa tukuna oti vei ratou na qase, vakacava o vosovoso qai nuitaka me ratou qarava me vaka e vinakata o Jiova? Na cava ratou na cakava na qase?

13. Na cava e vinakata o Jiova mera cakava na qase ni dua e cala bibi?

¹³ Ni ratou kila na qase ni dua e cala bibi ena ivavakoso, eratou na masulaka qai kerea “na vuku mai cake” me tiko vei ratou na rai i Jiova me baleta na ituvaki qori. (Jeme. 3:17) E nodratou isausau me vukei o koya e cala “me lesu mai” ke rawa. (Jeme. 5:19, 20) Ratou na saga tale ga ena nodratou vinaka me taqomaki na ivavakoso, mera vakacegui tale ga o ira na vakaleqai. (2 Kor. 1:3, 4) Ni qaravi na kisi ni cala bibi, ratou na vaqaqa mada na qase na dina ni itukutuku. Qori ena taura toka na gauna. Oti eratou na masulaka, vakarautaka na ivakasala mai na Vosa ni Kalou, qai vakadodonutaki “vakarauta ga” o koya e cala. (Jere. 30:11) Eratou na sega ni lokuyara na qase, eratou na sega tale ga ni vakatulewa vakatotolo. Ni qaravi vinaka qori era na vakila na lewe ni ivavakoso na kena yaga. Nira sa qarava vinaka mada ga na qase na nodra itavi, e se rawa tiko ga ni rarawa o koya e vakaleqai. Na cava me cakava me kua kina ni rarawa vakalevu?

14. Na ivakaraitaki vakaivolatabu cava e vakacegui iko ke vakararawataki iko e dua na lotu vaKarisito?

¹⁴ Sa bau vakararawataki iko mada e dua, ke tacimu vakayalo mada ga?  O na raica eso na ivakaraitaki vinaka ena Vosa ni Kalou, o na vulica kina mo waraki Jiova ena qai vakadodonutaka. Kena ivakaraitaki, eratou vakalolomataki Josefa na tuakana, ia e sega ni cudruvi ratou tiko ga. E saga na nona vinaka me qaravi Jiova, e qai vakalougatataki nona vosovoso. (Vkte. 39:21) Toso na gauna e vosoti ratou na tuakana o Josefa qai raica na sala e vakalougatataki koya kina o Jiova. (Vkte. 45:5) Me vakataki Josefa, eda vakacegui nida toro volekati Jiova qai waraki koya me vakadodonutaka na veika ca ena nona gauna.—Same 7:17; 73:28.

15. E vosota vakacava e dua na tacida yalewa na ka ca e caka vua?

¹⁵ E macala ni sega ni ca sara na ituvaki kece me vaka e sotava o Josefa, ia se rawa ni mosimosi ga ke dua e caka ca vei keda. Ke dua eda veileqaleqati, wili kina e dua e sega ni qaravi Jiova, ena yaga sara nida muria na ivakavuvuli vakaivolatabu. (Fpai. 2:3, 4) Dikeva mada e dua na ivakaraitaki. E rarawataka vakalevu e dua na tacida yalewa nona tukuna wavoki e dua rau cakacaka vata na itukutuku lasu kei na itukutuku ca me baleti koya. A sega ni cudru totolo na tacida qori, e vakasamataka ga na ivakaraitaki vinaka nei Jisu. Ni vakasewasewani, e sega ni veivakasewasewani lesu. (1 Pita 2:21, 23) Ni vakasamataka tiko qori, e vakatulewataka me guilecava na ka e yaco. Toso na gauna, e qai kila ni a tauvimate bibi tiko o koya rau cakacaka vata, e lomabibi tale ga. E kaya o tacida yalewa ni rairai sega ni nakita o koya rau cakacaka vata na ka e tukuna. Dua na ka nona marau na tacida yalewa qori me vosota na ka ca e caka vua qai lomavakacegu.

16. Na cava ena vakacegui iko ke o sotava tiko na veika rarawa? (1 Pita 3:12)

¹⁶ Ke o vosota tiko na ituvaki dredre ena gauna qo se so tale na ka rarawa, mo nanuma tiko ni voleka o Jiova vei ira “sa ramusu na lomadra.” (Same 34:18) E lomani iko ni o vosovoso, ni o biuta vua na nomu icolacola bibi. (Same 55:22) O  Jiova e Turaganilewa ni vuravura taucoko. E raica na ka kece. (Wilika 1 Pita 3:12.) Ke o sotava tiko eso na ituvaki dredre ena gauna qo o qai sega ni walia rawa, vakacava o rawa ni waraki koya?

17. Me vaka e tukuni ena Aisea 30:18, na cava e yalataka o Jiova?

¹⁷ Sa voleka ni vakalougatataki keda vakalevu na Tamada vakalomalagi ni vakayagataka na nona Matanitu. E kaya na Aisea 30:18: “E wawa tiko ga ena vosota o Jiova me yalovinaka vei kemuni, ena tu vakarau o koya me lomani kemuni. Ni Kalou lewadodonu o Jiova. Era marau o ira kece na waraki koya tiko.” O ira na waraki Jiova tiko era na vakalougatataki vakalevu ena gauna qo vaka kina ena vuravura vou sa voleka.

18. Na veivakalougatataki cava eda vakanamata kina?

¹⁸ Nira butuka yani na vuravura vou na tamata ni Kalou, era na sega tale ni vakila na rarawa kei na leqa era sotava tiko nikua. Sa na oti vakadua na veika ca kei na mosi. (Vkta. 21:4) Eda sa na sega ni lomaleqataka na ka meda bula kina ni sa levu tu ena gauna ya. (Same 72:16; Aisea 54:13) Qori e dua dina na ka totoka!

19. Na cava e cakava tiko o Jiova ena gauna qo?

¹⁹ E vakarautaki keda tiko o Jiova ena gauna qo meda bula ena nona veiliutaki, ni vukei keda meda biuta na itovo ca da qai bucina na itovo e marautaka. Meda kua ni yalolailai se soro. Sa voleka na bula uasivi! Nida vakanamata ena gauna totoka qori, meda marau mada ga qai waraki Jiova me vakaotia na nona itavi!