1. Na cava e kerei Tamana kina o Jisu me taqomaki ratou na nona imuri?

 ENA bogi ni bera ni mate o Jisu, e dua na ka e kerea vakabibi vei Tamana. E kerei Jiova me taqomaki ratou na nona imuri. (Joni 17:15, 20) E macala ga ni dau vakaraici ira na nona tamata o Jiova, ya ni kauaitaki ira, e taqomaki ira tale ga. Ia e kila o Jisu ni o Setani ena tusaqati ratou vakaukaua na nona imuri. E kila tale ga ni ratou na vinakata na veivuke i Jiova me ratou vosota kina nona veitusaqati na Tevoro.

2. Me vaka e tukuni ena Same 33:18-20, na cava meda kua ni rerevaka kina e dua na ka?

² E vakavuna na vuravura i Setani e levu na leqa vei keda na lotu vaKarisito dina nikua. Eda sotava na ituvaki dredre e rawa ni vakayalolailaitaki keda, e vakatovolei mada ga kina noda yalodina vei Jiova. Ia eda na raica ena ulutaga qo ni sega ni dodonu meda rerevaka e dua na ka. O Jiova e vakaraici keda tiko, e kila noda leqa, e tu vakarau tale ga me vukei keda meda vosota. Meda dikeva sara qo e rua na ivakaraitaki vakaivolatabu e vakamacalataki kina ni o Jiova e dau “vakaraici ira na rerevaki koya.”—Wilika Same 33:18-20.

3. Na cava eda rairai nanuma kina ni sega tale ni dua e rawa ni vukei keda?

³ Eda lewe ni dua na vuvale levu eda sokaloutaki Jiova, ia eso na gauna eda dau nanuma nida sokalou duadua tiko. Kena ivakaraitaki, e rawa nira nanuma qori na luveda nira saga mera vakamacalataka na nodra vakabauta vei ira nodra lewe ni kalasi, se nira toki ina dua na ivavakoso vou. Eso era rarawa se lomabibi nira nanuma ni na sega ni dua tale e vukei ira. Eda rawa ni tu suka meda tukuna vei ira eso tale na  lomada nida leqataka nira na rairai sega ni kila na veika eda sotava tiko. So tale na gauna eda na rairai nanuma ni sega tale ni dua e kauai. Se mani cava e vakavuna me va qori na noda rai, e rawa ni vakamalumalumutaki keda sara ga, se da lomaleqa kina. O Jiova e sega ni vinakata me va qori na noda rai. Na vuna?

4. Na cava e tukuna kina na parofita o Ilaija: “Au sa qai vo ga o yau”?

⁴ Vakasamataka mada na turaga yalodina o Ilaija. E bubului o Jesepeli me vakamatei koya, e mani dro me sivia ni 40 na siga. (1 Tui 19:1-9) Yaco sara ena nona tagicaka vei Jiova ni tiko ena dua na loma ni qara: “Au sa qai vo ga o yau.” (1 Tui 19:10) Era a tiko tale ga ena vanua qori eso tale na parofita. E vunitaki ira e le 100 na parofita o Opetaia me kua ni vakamatei ira o Jesepeli. (1 Tui 18:7, 13) Ia na cava e nanuma kina o Ilaija ni sa vo duadua ga o koya? Vakacava e nanuma nira sa mate kece na parofita a vunitaki ira o Opetaia? E nanuma ni sega tale ni dua me tokoni koya ena sokalou ni oti nona vakaraitaka o Jiova e Ulu i Kameli ni Kalou dina duadua ga, sega ni o Peali? Se nanuma ni sega tale ni dua e kila na ituvaki leqataki e tiko kina, se sega sara ga ni dua e kauai? E sega ni vakamacalataka qori na iVolatabu. Ia e matata ga ni kila vinaka o Jiova na vuna e kaya kina o Ilaija ni sa vo duadua ga. E kila tale ga o Jiova na sala me vukei koya kina.

5. E vakadeitaki Ilaija vakacava o Jiova?

⁵ E vukei Ilaija o Jiova ena vica na sala. E uqeti koya me vosa. E tarogi Ilaija vakarua: “Na cava o cakava tiko eke?” (1 Tui 19:9, 13) Ena gauna ruarua qori e vakarogoci Ilaija vinaka o Jiova ni talaucaka tiko na lomana. Oti e vakaraitaka sara vua o Jiova ni tiko kei koya, vaka kina na nona kaukaua. E vakadeitaka tale ga vei Ilaija nira se vo tiko e levu na dau sokalou vua. (1 Tui 19:11, 12, 18) Sa rauta me lomavakacegu o Ilaija ni talaucaka oti vei Jiova na lomana kei na ka e vakadeitaka vua o Jiova. E lesi Ilaija ena vica na ilesilesi bibi. E tukuna vua me lumuti Eseli me Tui Siria, o Jeu me tui Isireli, kei Ilaisa me parofita. (1 Tui 19:15, 16) Na nona  lesi Ilaija o Jiova ena itavi bibi qori e uqeti koya me vakasamataka na veika vinaka. E vakarautaka tale ga vua na Kalou e dua na itokani vinaka, o Ilaisa. Ena vukei keda vakacava o Jiova ke da nanuma ni sega ni dua tale e rawa ni vukei keda?

6. Na cava mo masulaka ke o nanuma ni sega tale ni dua e rawa ni vukei iko? (Same 62:8)

⁶ E uqeti keda o Jiova meda dau masu vua. E raica na veika o sotava tiko, e vakadeitaka tale ga ni na rogoca nomu masu ena gauna cava ga. (1 Ces. 5:17) E dau taleitaka o Jiova me rogoca nodra masu na nona dauveiqaravi. (Vkai. 15:8) Na cava o rawa ni masulaka ni o nanuma ni sega ni dua e rawa ni vukei iko? Mo talaucaka sara ga na lomamu vei Jiova me vakataki Ilaija. (Wilika Same 62:8.) Tukuna vua na veika o kauai kina kei na lomamu. Kerei koya me vukei iko mo kila na ka mo cakava. Kena ivakaraitaki, ke o nanuma ni sega ni dua ena vukei iko, se o rere ni vunau e koronivuli, kerei Jiova me vakayaloqaqataki iko mo rawa ni vakamacala vakavinaka. O rawa sara ga ni kerea na vuku mo vakamacalataka vakavinaka na nomu vakabauta. (Luke 21:14, 15) Ke o lomabibi tiko, kerei Jiova me vukei iko mo drau veivosaki kei na dua na lotu vaKarisito matua. O rawa ni kerei Jiova tale ga me vakarorogo vinaka na tacida o talaucaka kina na lomamu, me rawa ni kila na kemu ituvaki. Ni o talaucaka vei Jiova na lomamu, o raica na sala e sauma kina nomu masu kei na nodra vukei iko eso tale, o na kila kina nira tiko eso e rawa nira vukei iko.

7. Na cava o vulica vei Marika?

⁷ E lesi keda o Jiova ena dua na cakacaka yaga. Mo nuidei ni raica na itavi kece o qarava ena ivavakoso kei na nomu cakacaka vakaitalatala, e marautaka tale ga. (Same 110:3) Ena vukei iko vakacava nomu qarava tiko na itavi qori mo kua kina ni nanuma ni sega ni dua ena vukei iko? Vakasamataka mada e dua na tacida tagane o Marika. b Ni oti toka ga nona papitaiso, sa tekivu malumu vakayalo e dua nona itokani voleka. E kaya: “Niu raica ni sa biuti Jiova, au sega sara ga ni nuidei. Au vakasamataka keu na rawa ni vakayacora vinaka na ka au yalataki au kina qai dei ena vuvale i Jiova se sega. Au nanuma ni sega ni dua e rawa ni vukei au se kila na lomaqu.” Na cava e cakava o Marika? E kaya: “Au vakaitavi vakalevu ena cakacaka vakaitalatala. Au sega ni vakasamataki au tiko ga, se na noqu lomabibi. Au marau niu vakaitavi kei ira eso tale ena cakacaka vakavunau, e oti kina na vakanananu va qori.” Kevaka mada ga eda sega ni tiko sara ga kei ira na tacida nida cakacaka tiko vakavunau, eda rawa ni vakayaloqaqataki nida vola ivola kei ira, se qiri. Cava tale e vukei  Marika? E kaya: “Au dau cakava e levu na ka ena ivavakoso. Au dau vakavakarau vinaka, au cakava tale ga na itavi au lesi kina ena koronivuli. Na ilesilesi qori au kila kina ni marautaka o Jiova, kei ira eso tale.”

8. Na cava e dau yaco nida sotava na ituvaki dredre?

⁸ Meda namaka nida na vakatovolei ena iotioti ni veisiga. (2 Tim. 3:1) De dua eda na sega ni namaka eso na veivakatovolei se na gauna e yaco kina. E rawa ni vakasauri ga na noda leqa vakailavo, tauvimate bibi, se takali e dua na wekada voleka. Ena so na gauna eda na lomabibi se rarawa vakalevu, vakauasivi ke veitaravi na veika dredre se nida vakatovolei ena vica vata na ka ena dua ga na gauna. Kua ni guilecava ni o Jiova e kila vinaka tu na keda ituvaki, ena vukei keda meda vosota na veivakavotolei kece.

9. Vakamacalataka na leqa e sotava o Jope.

⁹ Vakasamataka mada nona vukea o Jiova na turaga yalodina o Jope. Dua ga na gauna lekaleka e sotava kina o Jope na veivakatovolei e vakavuna nona rarawa. Ena loma ga ni dua na siga e tukuni vua na itukutuku vakadomobula ni nodra mate vakaloloma na nona manumanu, ira na nona dauveiqaravi, kei ratou na luvena. (Jope 1:13-19) Ni se lolosi tiko ga, e tauvi koya e dua na mate mosimosi e duatani sara ga kina na kena irairai. (Jope 2:7) Na vakaloloma ni kena ituvaki e kaya kina o Jope: “Au sa cata noqu bula, au sega ni via bula tiko.”—Jope 7:16.

10. E vukei Jope vakacava o Jiova me vosota? (Raica na iyaloyalo ena waqana.)

¹⁰ E vakaraici Jope vinaka tiko o Jiova. Ni lomani Jope, e vukei koya me rawa ni vosota na veika e vakatovolei kina. E vosa vei Jope, me nanuma tiko na nona vuku kei na nona dau kauaitaki ira vakayalololoma na nona ibulibuli. E tukuna e levu na manumanu vakatubuqoroqoro. (Jope 38:1, 2; 39:9, 13, 19, 27; 40:15; 41:1, 2) O Jiova e vakayagataka na cauravou yalodina o Ilaiu me vakayaloqaqataki Jope, me vakacegui koya tale ga. E vakadeitaka sara vua ni o Jiova e dau vakalougatataka nodra vosota na nona dauveiqaravi. E uqeti Ilaiu tale ga o Jiova me vakadodonutaki Jope vakayalololoma. E mani vukei Jope me kua ni kauaitaki koya tiko ga vakasivia, me nanuma nida ka somidi ni vakatauvatani kei na Dauveibuli. (Jope 37:14) E tukuna tale ga o Jiova vei Jope me masulaki ratou na nona itokani eratou valavala ca. (Jope 42:8-10) E tokoni keda vakacava nikua o Jiova nida sotava na ituvaki dredre?

11. E veivakacegui vakacava na iVolatabu nida vakatovolei?

¹¹ E sega ni vosa vakadodonu vei keda o Jiova me vaka e cakava vei Jope, ia e vakayagataka na nona Vosa na iVolatabu. (Roma 15:4) E vakacegui keda ena inuinui me baleta na gauna se bera mai. Dikeva mada e vica na vakasama qo mai na iVolatabu ena vakacegui keda nida vakatovolei. E vakadeitaka o Jiova ena iVolatabu ni sega ni dua na ka, okati kina noda vakatovolei “me tawasei keda mai na [nona] loloma.” (Roma 8:38, 39) E vakadeitaka tale ga ni “voleka . . . vei ira kece na kacivi koya” ena masu. (Same 145:18) E kaya o Jiova ke da nuitaki koya, eda na rawa ni vosota na veivakatovolei kece qai marau tiko ena gauna va qori. (1 Kor. 10:13; Jeme. 1:2, 12) E tukuni ena Vosa ni Kalou ni lekaleka ga na noda vakatovolei ni vakatauvatani kei na veivakalougatataki tawamudu e vakarautaka  o koya. (2 Kor. 4:16-18) E yalataka o Jiova ni na vakarusai koya vakadua e vakavuna tiko na noda vakatovolei, ya o Setani na Tevoro kei ira na vakatotomuria tiko na nona ivakarau ca. (Same 37:10) O sa bau saga mo nanuma vinaka eso na tikinivolatabu me vukei iko mo vosota na veivakatovolei e se bera mai?

12. Na cava e vinakata o Jiova meda cakava me yaga vei keda nona Vosa?

¹² E vinakata o Jiova meda vakatikitikitaka na gauna meda vulica wasoma kina na iVolatabu, meda vakasamataka tale ga vakatitobu na ka eda wilika. Nida muria na ka eda vulica, ena dei na noda vakabauta, eda na veivolekati tale ga kei na Tamada vakalomalagi. Eda na vakayaloqaqataki sara ga meda vosota na veivakatovolei. E vakarautaka tale ga na yalona tabu o Jiova me vukei ira na nuitaka na nona Vosa. Eda na vakila na “kaukaua e uasivia na kaukaua ni tamata” ena vuku ni yalo tabu qori, meda vosota kina na veika dredre.—2 Kor. 4:7-10.

13. E yaga vakacava na kakana vakayalo meda vosota kina na ituvaki dredre?

¹³ Ena veitokoni i Jiova e vakarautaka na “dauveiqaravi yalodina e vuku” e levu na ulutaga, vidio, sere kei na ivakatagi me dei kina na noda vakabauta, meda yadra tale tiko ga vakayalo. (Maciu 24:45) Meda vakayagataka vinaka mada ga na isolisoli e vakarautaki mai qori ena kena gauna donu. Wale tiko ga qo, e vakavinavinakataka mai e dua na tacida yalewa e Merika na kakana vakayalo kece qori. E kaya: “Ena 40 na yabaki noqu qaravi Jiova tu, e vakatovolei vakalevu na noqu vakabauta.” Levu sara na ka dredre e sotava na tacida qori, e mate nona tutu ni coqai koya e dua na draiva a mateni tu, rau takali nona itubutubu ni rau tauvimate, rua tale ga na gauna e laurai kina vua na kenisa. E vosota rawa vakacava? E vakamacalataka: “E kauaitaki au tu ga o Jiova. Na kakana vakayalo e vakarautaka mai ni vakayagataka na dauveiqaravi yalodina e vuku e vukei au meu vosota. Au rawa kina ni vakataki Jope ni kaya: ‘Me yacova niu mate, au na sega ni soro ena noqu yalodina!’”—Jope 27:5.

14. E vakayagataki ira vakacava na tacida o Jiova mera vukei keda nida sotava na ituvaki dredre? (1 Cesalonaika 4:9)

¹⁴ E vakavulici ira nona tamata o Jiova mera dau veilomani, ra veivakacegui tale ga ena gauna ni rarawa. (2 Kor. 1:3, 4; wilika  1 Cesalonaika 4:9.) Nira vakatotomuri Ilaiu na tacida vakayalo, era gumatua mera vukei keda meda yalodina tiko ga ni dredre na ituvaki. (Caka. 14:22) Kena ivakaraitaki, vakasamataka mada nodra uqeti Taina na lewe ni nona ivavakoso me dei tiko ga vakayalo ni tauvimate levu o watina. E kaya: “Sa bau dredre dina. Ia keirau raica na liga kaukaua i Jiova kei na nona loloma ena vica na vula dredre qori. Era vukei keirau sara ga na lewe ni ivavakoso. Era mai veisiko, qiri mai, ra mokoti keirau tale ga me keirau kua ni soro. Niu sega ni kila na draiva, era veivuke na mataveitacini mera kauti au ina soqoni, vaka kina ena cakacaka vakavunau keu rawa ni lako.” Io, eda marau vakalevu nida lewena e dua na vuvale vakayalo dauloloma!

15. Na cava eda nuidei kina nida na vosota na ituvaki dredre?

¹⁵ Eda dau sotava kece eso na ituvaki dredre. Ia me vaka eda sa vulica mai, eda sega ni vosota duadua tiko. Me vaka na tama dau loloma, e dau vakaraici keda tiko ga o Jiova. E dau tokoni keda, e tu vakarau me rogoca noda kerekere qai vukei keda. (Aisea 43:2) Eda nuidei nida na vosota na ituvaki dredre ni vakarautaka mai vakayauyau na ka kece e vinakati meda vosota rawa kina. E vakarautaka na isolisoli ni masu, na iVolatabu, e levu sara na kakana vakayalo, kei ira na tacida dauloloma mera vukei keda nida sotava na ituvaki dredre.

16. Ena rawa vakacava ni kauaitaki keda tiko ga vakayaloloma o Jiova?

¹⁶ Eda marau vakalevu ni dau vakaraici keda tiko na Tamada vakalomalagi! “E marautaki koya vakalevu na lomada.” (Same 33:21) Eda na vakavinavinakataka nona veikauaitaki vakayalololoma o Jiova nida vakayagataka vinaka na isolisoli kece e vakarautaka. E bibi tale ga meda cakava na noda itavi me lomani keda tiko ga kina na Kalou. Ke da gumatua meda talairawarawa tiko ga vei Jiova qai cakava na ka e donu e matana, ena dau vakaraici keda tiko ga me tawamudu!—1 Pita 3:12.