Eda vulica ena ulutaga qori ni dua ga na ile bibi e vauci keda kece na tamata kei na agilosi: ya na kena vakarokorokotaki na yaca cecere i Jiova. Na ile ni veiliutaki ya ni vinaka duadua ga na ivakarau ni veiliutaki i Jiova, e veisemati kei na vakarokorokotaki ni yacana. E va tale ga qori na ile me baleta na noda yalodina, e sema tiko ena ile bibi qori.

Na cava me vakabibitaki kina ena gauna qo na ile me baleta na yaca i Jiova kei na kena vakarokorokotaki? Meda dikeva mada e tolu na vuna.

Kena imatai, e vakarogorogocataka o Setani na yaca i Jiova ena were o Iteni. Nona tarogi Ivi vaqaseqase o Setani, e vaka me kaya tiko e Kalou buroburogo o Jiova, sa sivia tale na ka e vakatabuya vei ira na nona ibulibuli. Oti e vakalasuya tale ga na ka e tukuna o Jiova, ni kaya ni Kalou lasulasu. E vakarogorogocataka gona na yaca i Jiova. Nona cakava qori e vakatokai kina me “Tevoro,” kena ibalebale “dauvakaucaca.” (Joni 8:44) Ni vakabauta o Ivi na lasu i Setani, e talaidredre kina vua na Kalou, e beca tale ga na nona veiliutaki cecere. (Vkte. 3:1-6) Me yacova mai nikua, e vakaucacataka tiko ga o Setani na yaca ni Kalou, e vakatetea na itukutuku lasu me baleti Jiova. O ira na vakabauta na lasu qori e rawa sara ga nira talaidredre vua. Vei ira na tamata ni Kalou, na kena vakaucacataki na yaca savasava i Jiova e dua na ivalavala torosobu sara. Oya na vuna e levu kina na rarawa kei na veika ca e vuravura.

Kena ikarua, ena vinaka vei ira kece na nona ibulibuli, e vinakata sara ga o Jiova me vakarokorokotaki na yacana, me kua ni vakalewai. Qori e bibi duadua vei Jiova. Ya na vuna e kaya kina: “Au na vakarokorokotaka sara ga na yacaqu.” (Isik. 36:23) E vakamatatataka tale ga o Jisu na ka me vakabibitaki ena noda masu na dauveiqaravi kece i Jiova, ni tukuna: “Me vakarokorokotaki na yacamuni.” (Maciu 6:9) Levu na gauna e vakabibitaka na iVolatabu me vakalagilagi na yaca i Jiova. Dikeva mada qo e vica na kena ivakaraitaki: “Solia vei Jiova na vakarokoroko e ganita na yacana.” (1 Vei. 16:29; Same 96:8) “Ni sere ena vakacaucau ina yacana lagilagi.” (Same 66:2) “Au na qai vakalagilagia na yacamuni me tawamudu.” (Same 86:12) Dua na gauna e vosa mai o Jiova mai lomalagi ena valenisoro e Jerusalemi ni a tiko kina o Jisu, e kaya sara o Jisu: “Tamaqu, moni vakalagilagia na yacamuni.” E qai tukuna mai o Jiova: “Au sa vakalagilagia oti, au na vakalagilagia tale.”—Joni 12:28. a

Kena ikatolu, na inaki i Jiova e veisemati kei na yacana se kena irogorogo. Vakasamataka mada qo: Cava ena yaco tarava ena iotioti ni veivakatovolei ni cava na Duanaudolu na Yabaki ni Veiliutaki i Karisito? Na cava nodra rai na agilosi kei na kawatamata me baleta na ile bibi duadua, na vakarokorokotaki ni yaca i  Jiova? Me saumi qori meda vakasamataka lesu e rua na ile, na noda yalodina na tamata kei na yaca cecere i Jiova. Vakacava ena vakatovolei tiko ga na nodra yalodina na tamata i Jiova era sa yalodina tiko mai? Sega. Era sa uasivi, era vakatovolei tale ga ena kena ivakatagedegede vinaka sara. Era na vakalougatataki mera bula tawamudu. Vakacava, ena veiletitaki tiko ga na ile ni veiliutaki kei na nodra duidui rai na agilosi kei na tamata? Sega. Ena sega ni vinakati tale me vakadinadinataki ni vinaka duadua na veiliutaki i Jiova. Ena gauna qori era sa na duavata mai lomalagi kei vuravura, era muria ga na veiliutaki i Jiova. Ia vakacava ga na yaca i Jiova?

Ena gauna qori sa na qai taucoko na kena vakarokorokotaki na yaca i Jiova, sa na sega tale ni qai vakalewai vakadua. Ia ena bibi tiko ga na yaca i Jiova vei ira na nona dausokalou yalodina e lomalagi kei vuravura. Na vuna? Ena sega ni cegu na nodra raica na ka vakatubuqoroqoro e cakava o Jiova. Vakasamataka mada qo: Ena yalomalumalumu i Jisu ena vakalesuya na veiliutaki kece vei Jiova sa na “ka kece ga na Kalou vei ira na tamata kece.” (1 Kor. 15:28) Oti qori era na marautaka na bula e vuravura “na galala lagilagi era vakila tu na luve ni Kalou.” (Roma 8:21) Sa na qai vakayacora o Jiova na nona inaki mera duavata na nona vuvale mai lomalagi vaka kina e vuravura.—Efeso 1:10.

Ni oti qori na cava na nodra rai na lewenivuvale i Jiova mai lomalagi vaka kina e vuravura? Eda na vinakata tiko ga meda vakacaucautaka na yaca totoka i Jiova. E uqeti vakalou na daunisame o Tevita: “Me vakacaucautaki na Kalou o Jiova . . . Me vakacaucautaki na yacana lagilagi me tawamudu.” (Same 72:18, 19) Ena sega ni cegu na noda qara tiko ga na sala kei na vuna marautaki meda cakava kina qori me tawamudu.

Na yaca i Jiova e okati kina na ka kece me baleti koya. Nida vakasamataka na yacana eda nanuma na nona loloma. (1 Joni 4:8) Eda na sega ni guilecava ni buli keda o Jiova ena nona loloma, ni vakarautaka na isoro ni veivoli ena nona loloma, ni dodonu tu ga nona veiliutaki, e yavutaki tale ga ena loloma. Ia eda na raica tiko ga na loloma i Jiova vei ira na nona ibulibuli. Qori ena uqeti keda meda toro voleka vua na Tamada, eda na sere tale ga ena vakacaucau ena yacana lagilagi me tawamudu.—Same 73:28.