1. Na cava e cakava e dua ni veivutuni?

 NIDA cala, e bibi meda veivutuni. Ena iVolatabu, na veivutuni e dusia nona veisautaka e dua nona rai me baleta eso nona ivalavala, e cata qai vakadeitaka me kua ni cakava tale.​—Raica iVakamacala ni Vosa ena iVolatabu, “Veivutuni.”

2. Na cava meda vulica kina na ka me baleta na veivutuni? (Niemaia 8:​9-11)

² E bibi meda vulica kece na ka me baleta na veivutuni. Na vuna? Nida dau cala e veisiga. Nida kawa nei Atama kei Ivi, eda sucu kaya mai na ivalavala ca kei na mate. (Roma 3:23; 5:12) Eda sega ni galala kina. O ira mada ga e dei tu nodra vakabauta me vaka na yapositolo Paula, era sasaga mera valuta na ivalavala ca. (Roma 7:​21-24) Vakacava, meda yalolailai ena gauna kece eda cala kina? Sega. E dauyalololoma o Jiova, e vinakata meda marau. Dikeva nodra ivakaraitaki na Jiu ena gauna i Niemaia. (Wilika Niemaia 8:​9-11.) E sega ni vinakata o Jiova mera rarawataka vakasivia nodra cala makawa, ia e vinakata mera marautaka nodra sokaloutaki koya. E kila o Jiova ni vakavu marau na veivutuni. Oya na vuna e vakavulici keda kina. Ke da veivutunitaka noda ivalavala ca, meda nuidei ni na vosoti keda na Tamada dauyalololoma.

3. Na cava eda na vulica ena ulutaga qo?

 ³ Meda vulica mada eso tale na ka me baleta na veivutuni. Eda na vulica ena ulutaga qo e tolu na ka. Dua, na ka e vakavulica o Jiova vei ira na Isireli me baleta na veivutuni. Rua, nona vukei ira na cakacala o Jiova mera veivutuni. Kena ikatolu, na ka era vulica na imuri i Jisu me baleta na veivutuni.

KA E VAKAVULICA O JIOVA VEI IRA NA ISIRELI ME BALETA NA VEIVUTUNI

4. Na cava e vakavulica o Jiova ena matanitu o Isireli me baleta na veivutuni?

⁴ Ni kumuni ira na Isireli o Jiova mera dua na matanitu, e veiyalayalati kei ira. Ke ra muria nona lawa, ena taqomaki ira, ena vakalougatataki ira tale ga. E tukuna me baleta nona lawa: “E sega ni dredre sara na ivakaro qo au vakarota tiko vei iko nikua, se mo sega ni yacova rawa.” (Vkru. 30:​11, 16) Ke ra talaidredre vua, me vaka nodra digia mera qarava eso tale na kalou, ena sega ni vakalougatataki ira, era na rarawa ga kina. Ia se rawa tiko ga ni vakadonui ira tale na Kalou. Ena sala cava? Mera “lesu vei Jiova na [nodra] Kalou, qai vakarorogo ina domona.” (Vkru. 30:​1-3, 17-20) Oya mera veivutuni. Ke ra cakava qori, ena volekati ira o Jiova qai vakalougatataki ira tale.

5. E vakaraitaka vakacava o Jiova ni sega ni biuti ira nona tamata? (2 Tui 17:​13, 14)

⁵ Era talaidredre tiko ga vei Jiova nona tamata digitaki. Era qaravi matakau, era cakava tale ga eso na ka torosobu. Kena itinitini? Era rarawa kina. Ia e sasaga tiko ga o Jiova me vukei ira nona tamata era murilomadra. E talai ira vakavica vata nona parofita me vakamasuti ira mera veivutuni, ra qai lesu vua.​—Wilika 2 Tui 17:​13, 14.

6. E vakayagataki ira vakacava nona parofita o Jiova me vakavulici ira nona tamata ena bibi ni veivutuni? (Raica tale ga na iyaloyalo.)

⁶ E dau vakayagataki ira vakalevu nona parofita o Jiova mera vakasalataki  ira nona tamata, mera vakadodonutaki ira tale ga. Kena ivakaraitaki, e tukuna ena gusu i Jeremaia: “Mo lesu mai Isireli vukitani . . . Au na sega ni raici kemuni sobu yani ena cudru, niu yalodina . . . Au na sega ni cudru tiko me tawamudu. Mo vakatusa ga na nomu cala ni o beci Jiova na nomu Kalou.” (Jere. 3:​12, 13) E tukuna o Jiova ni vakayagataki Joeli: “Ni lesu mai vei au ena lomamuni taucoko.” (Joeli 2:​12, 13) E vakayagataki Aisea me tukuna: “Moni vakasavasavataki kemuni, moni kauta tani e mataqu na nomuni ivakarau ca, moni muduka na nomuni caka ca.” (Aisea 1:​16-19) E vakayagataki Isikeli tale ga me taroga: “Vakacava, au taleitaka me mate na tamata ca? . . . Au vinakata me saumaki mai na nona ivalavala me bula tiko kina. Au sega ni taleitaka me mate e dua, . . . moni saumaki mai moni bula.” (Isik. 18:​23, 32) E marau o Jiova nira veivutuni e levu ni vinakata mera bula tiko ga me tawamudu! E sega gona ni waraka o Jiova mera veisau na tamata ivalavala ca me qai vukei ira. Meda dikeva mada eso na kena ivakaraitaki.

7. Na cava e vakavulica o Jiova vei ira nona tamata ena nona ivakaraitaki na parofita o Osea kei watina?

⁷ Dikeva ni vakavulici ira nona tamata o Jiova ena dua na ivakaraitaki dina, ya o Komera, na wati Osea na parofita. Ni veibutakoci oti, e biuti Osea me lakova eso tale na tagane. Vakacava e dredre me veisau o Komera? O Jiova ga e kila na lomada. E tukuna vei Osea: “Lako tale, mo lomana na yalewa a domoni koya e dua tale qai veibutakoci, me vaka ga na nona lomani ira na Isireli o Jiova nira goleva eso tale na kalou.” (Osea 3:1; Vkai. 16:2) Vakasamataka ni se cakava tiko ga o watina na ivalavala ca bibi, e tukuna o Jiova vei Osea me vosoti koya, me rau veiyaloni se veivakameautaki. a O Jiova tale ga e sega ni biuti ira nona tamata yalokaukaua. Era cakava na ivalavala ca torosobu, ia e lomani ira, e vosoti ira tiko ga, e vukei ira mera veivutuni, mera veisautaka nodra bula. Me vaka ni dau ‘dikeva o Jiova na lomada,’ vakacava kena ibalebale qo ni na vukea e dua e cakava tiko na ivalavala ca bibi me rawa ni veivutuni? (Vkai. 17:3) Meda raica mada.

VUKEI IRA NA CAKACALA O JIOVA MERA VEIVUTUNI

8. E vukei Keni vakacava o Jiova me veivutuni? (Vakatekivu 4:​3-7) (Raica tale ga na iyaloyalo.)

⁸ O Keni e nodrau ulumatua o Atama kei Ivi, e sucu kaya mai na ivalavala ca. E tukuna tale ga na iVolatabu ni “torosobu na nona ivalavala.” (1 Joni 3:12) De dua qori na vuna e tukuni kina ni “a sega ni vakadonui Keni kei na nona isoro” o Jiova. Ia e “qai tuburi Keni na cudru, e matararawa sara ga.” Cava e qai cakava o Jiova? E vosa tale vei Keni. (Wilika Vakatekivu 4:​3-7.) Dikeva ni vosa vakayalovinaka vua o Jiova, e tukuna ni na vakalougatataki koya ke caka vinaka, e vakasalataki koya tale ga ni rawa ni tini ca nona cudru. Ka ni rarawa ni sega ni vakarorogo o Keni. E sega ni vinakata me vukei koya o Jiova me veivutuni. Ena ka e cakava qori o Keni, vakacava sa yala tale ga e keri nona via vukea eso tale o Jiova mera veivutuni? Sega!

9. E vukei Tevita vakacava o Jiova me veivutuni?

 ⁹ E lomani Tui Tevita vakalevu o Jiova. E tukuna mada ga ni “donu e lomaqu o koya.” (Caka. 13:22) Ia e cakava o Tevita eso na ivalavala ca bibi, me vaka na veibutakoci kei na laba. Me vaka e tukuni ena Lawa ni dodonu sara ga me vakamatei. (Vunau 20:10; Tiko 35:31) Ia e vinakata sara ga o Jiova me vukei koya. b E tala nona parofita o Necani me lai raica na tui, ia se bera mada ga ni vakaraitaka o Tevita e dua na ivakatakilakila ni veivutuni. E vakayagataka o Necani e dua na vosa vakatautauvata e lauti Tevita sara ga. E rarawataka na ka e cakava, mani veivutuni. (2 Sam. 12:​1-14) E vola o Tevita e dua na same me vakaraitaka ni vu mai lomana nona veivutuni. (Same 51, ulu ni same) E vakacegui ira e levu era valavala ca na same qori, e uqeti ira mera veivutuni. Eda marau vakalevu ni vukei Tevita ena yalololoma o Jiova me veivutuni.

10. Na cava nomu rai ni o kila ni dauvosovoso o Jiova, e dauveivosoti tale ga?

¹⁰ E cata o Jiova na ivalavala ca, e sega tale ga ni vakadonuya. (Same 5:​4, 5) E kila nida kawa ivalavala ca kece. Ia ni lomani keda, e vinakata me vukei keda meda valuta na ivalavala ca. E sasaga tiko ga me vukei ira era valavala ca bibi mera veivutuni, ra qai toro volekati koya. E veivakacegui sara ga meda kila ni vinakata o Jiova me vosoti keda! Nida vakasamataka na vosovoso kei na veivosoti i Jiova, e uqeti keda meda yalodina tiko ga vua, me totolo tale ga noda veivutuni ke da cakacala. Meda dikeva sara na ka era vulica na tisaipeli i Jisu me baleta na veivutuni.

NA KA ERA VULICA NA IMURI I JISU ME BALETA NA VEIVUTUNI

11-12. Na cava e vakavulica o Jisu ena ivakarau ni veivosoti i Tamana? (Raica ena waqana.)

¹¹ E yaco mai na Mesaia ena imatai ni senitiuri G.V. Me vaka e tukuni ena ulutaga sa oti, o Jiova e vakayagataki Joni na Dauveipapitaisotaki kei Jisu Karisito  me rau vakavulici ira na lewenivanua ena bibi ni veivutuni.​—Maciu 3:​1, 2; 4:17.

¹² Ena cakacaka vakaitalatala i Jisu e vuravura, e vakavulica na ivakarau ni nona veivosoti o Tamana. E talanoataka na italanoa rogovinaka me baleta na gone cidroi. E digia na cauravou qori me biubiu mai vale qai cakava na ka ca me dua na gauna. Ia “ni sa kilai yalona tale” sa qai lesu i vale. Cava e cakava o tamana? E tukuna o Jisu “ni se yawa tu yani [o luvena] sa raici koya mai o tamana, e lomani koya sara ga. E cici yani, mokoti koya, qai reguca.” E vakasamataka tiko o luvena me kerei tamana me cakacaka vakadauveiqaravi ena nona vale, ia e vinakata sara ga o tamana me vosoti koya. E vakatokai koya “na luvequ qo” qai ciqomi koya tale ena nona vuvale. E kaya o tamana: “A yali tu, sa qai kune tale.” (Luke 15:​11-32) Ni se tu mai lomalagi o Jisu, e raica sara ga nona vakaraitaka o Tamana na yalololoma vei ira e levu na tamata ivalavala ca era veivutuni. E veivakacegui sara ga na italanoa qori ni vakaraitaka na Tamada o Jiova na levu ni nona yalololoma!

13-14. Na cava e vulica na yapositolo o Pita me baleta na veivutuni? E vakavulica vakacava qori vei ira eso tale? (Raica tale ga na iyaloyalo.)

¹³ E vuli vakalevu vei Jisu na yapositolo o Pita me baleta na veivutuni kei na veivosoti. E levu na cala e cakava o Pita, e vosoti koya tu ga o Jisu. Kena ivakaraitaki ni cakitaka vakatolu o Pita na nona Turaga, e rarawataka sara ga na ka e cakava. (Maciu 26:​34, 35, 69-75) Ia ni sa vakaturi o Jisu, e rairai vei Pita, de dua ni tiko duadua. (Luke 24:​33, 34; 1 Kor. 15:​3-5) E kila o Jisu ni sa veivutuni o Pita, e via vakadeitaka vua ena gauna qori ni sa vosoti koya.​—Mari. 16:7

¹⁴ Ni vakadinadinataka o Pita na yaga ni veivutuni kei na veivosoti, e rawa kina  ni vakavulica qori vei ira eso tale. Kena ivakaraitaki, ni oti na soqo ni Penitiko, e vunau o Pita vua e dua na ilala Jiu era sega ni vakabauta, e vakamacalataka nira vakamatea na Mesaia. Ia e uqeti ira ena yalololoma: “Ni veivutuni gona, ni veisau me bokoci kina nomuni ivalavala ca, me kauta mai o Jiova na gauna ni veivakabulabulataki.” (Caka. 3:​14, 15, 17, 19) E vakavulica o Pita, ni veivutuni e dua ena uqeti koya me veisau, ya me veisau nona rai kei na itovo me cakava na ka e vakamarautaka na Kalou. E vakavulica tale ga ni o Jiova ena bokoca vakadua na nodra ivalavala ca, se guilecava vakadua. Oti tale e vica na yabaki, e tukuna o Pita vei ira na lotu vaKarisito: “O Jiova . . . e vosoti kemuni ga ni sega ni vinakata me rusa e dua, e vinakata ga moni veivutuni kece.” (2 Pita 3:9) E veivakacegui meda kila ni rawa ni vosoti keda o Jiova ke da valavala ca bibi mada ga!

15-16. (a) E vulica vakacava na yapositolo o Paula na veivosoti? (1 Timoci 1:​12-15) (b) Na cava eda na vulica ena ulutaga e tarava?

¹⁵ Levu sara na ka ca e cakava o Saula na turaga ni Tarisu, ya na vuna e vinakati kina me veivutuni me rawa ni vosoti. E kaukaua nona tusaqati ira na imuri lomani i Jisu. Era rairai nanuma e levu na lotu vaKarisito ni dredre me veivutuni. Ia e uasivi na rai nei Jisu ni vakatauvatani kei na noda rai. Rau raica vakaveitamani na itovo vinaka nei Saula. E kaya o Jisu “niu sa digitaka oti na tagane qo.” (Caka. 9:15) E cakamana mada ga me veivutuni kina o Saula. (Caka. 7:58–8:3; 9:​1-9, 17-20) Ni sa lotu vaKarisito o Saula e kilai tale ga me o Paula, e dau vakavinavinakataka vakalevu na nona lomani. (Wilika 1 Timoci 1:​12-15.) E vakavulica na yapositolo qori “ni yalovinaka tiko vei iko [na Kalou] ena nona vinakata mo veivutuni.”​—Roma 2:4.

¹⁶ Na cava e cakava o Paula ni rogoca na veiyacovi tawadodonu ena ivavakoso e Korinica? Na ka e cakava eda vulica kina nona dau veivakadodonutaki ena loloma o Jiova, e bibi tale ga me vakaraitaka na yalololoma. Eda na veivosakitaka na kena matailalai ena ulutaga e tarava.