1-2. (a) Na cava nona rai o Jiova ena ivalavala ca nakiti? (b) Cava e nuitaka tu o Jiova mera cakava o ira na cala bibi?

 O JIOVA e sega ni yalorawarawa vakasivia, e cata na ivalavala ca. (Same 5:​4-6) E vinakata meda doka na nona ivakatagedegede dodonu ena iVolatabu. E macala ni sega ni namaka o Jiova meda uasivi. (Same 130:​3, 4) Ia e sega tale ga ni vakatara mera “vakatanitaka na nona loloma soli wale” o ira era sega ni doka na Kalou, “me ulubale ni nodra ivalavala vakasisila.” (Juta 4) Io, e tukuna na iVolatabu nira na “vakarusai . . . o ira na sega ni doka na Kalou” ena ivalu na Amaketoni.​—2 Pita 3:7; Vkta. 16:16.

² Ia e sega ni vinakata o Jiova me rusa e dua. Me vaka eda veivosakitaka ena vica na ulutaga sa oti, e vakamatatataka na iVolatabu ni “vinakata ga [meda] veivutuni kece.” (2 Pita 3:9) Era vakatotomuri Jiova na qase ni ivavakoso nira vosovoso mera vukei ira na valavala ca bibi mera veisautaka nodra ivalavala, mera veivolekati tale kei Jiova. Ia sega ni o ira kece era na veivutuni. (Aisea 6:9) Eso era na cakava tiko ga na ka ca nira saga mada ga vakavica na qase me vukei ira mera  veivutuni. Cava me caka ena ituvaki va qori?

“BIUTA TANI NA DAUCAKA CA”

3. (a) Na cava e tukuna na iVolatabu me caka vei ira na sega ni veivutuni? (b) Cava eda kaya kina ni digia o koya e sega ni veivutuni me biu tani mai na ivavakoso?

³ Ni sega ni veivutuni o koya e valavala ca bibi, era na muria ga na qase na ivakasala ena 1 Korinica 5:13: “Biuta tani na daucaka ca qori mai na kemuni maliwa.” Koya gona, e vaka ga me sa digia tiko o koya e sega ni veivutuni me biu tani mai na ivavakoso, sa tamusuka tiko na ka e kaburaka. (Kala. 6:7) Cava eda kaya kina qori? E sega ni vinakata me veisau nira vukei koya vakavica na qase me veivutuni. (2 Tui 17:​12-15) E vakaraitaka ena ka e cakava ni sega ni via muria na ivakatagedegede i Jiova.​—Vkru. 30:​19, 20.

4. Na cava me kacivaki kina ni sa biu tani mai na ivavakoso o koya e sega ni veivutuni?

⁴ Ni biu tani o koya e sega ni veivutuni, ena kacivaki ena ivavakoso ni sa sega tale ni iVakadinadina i Jiova. a Na vuna? E sega ni kena inaki me madua kina o koya e valavala ca bibi. Ia e kacivaki me rawa nira muria na lewe ni ivavakoso na ivakaro vakaivolatabu “moni kua ni vakailala tiko” kei koya, se “kua mada ga ni kana vata kei” koya. (1 Kor. 5:​9-11) E tiko na vuna vinaka e vakarautaki kina na ivakasala qori. E vola na yapositolo o Paula: “[Na] leveni lailai ena vakatubutaka na ibuli taucoko.” (1 Kor. 5:6) Ke ra sega ni biu tani o ira na valavala ca bibi, ena rawa ni vakadredretaka nodra sasaga o ira na muria tiko na ivakatagedegede i Jiova.​—Vkai. 13:20; 1 Kor. 15:33.

5. Meda raici koya vakacava e sa biu tani mai na ivavakoso? Na vuna?

⁵ Meda raici koya vakacava na tacida e biu tani mai na ivavakoso? Eda sa na sega ni veimaliwai kei koya, meda raici koya me vaka na sipi e yali, ia ena sega ni yali vakadua. Na sipi e biubiu, ena rawa ni lesu tale ina qelenisipi. Meda nanuma tiko ni a yalataki koya vei Jiova na sipi qori. Ka ni rarawa ni sega ni vakamarautaki Jiova na ivakarau ni nona bula, qori ena vakaleqai koya. (Isik. 18:31) Ia ni se yalololoma tiko o Jiova ena gauna qo, eda vakanuinui tiko ni na lesu mai o koya qori. Era na vakaraitaka vakacava na qase nira vakanuinui tiko?

SALA ERA VUKEI KINA NA BIU TANI

6. Na cava era na cakava na qase mera vukei koya e biu tani mai na ivavakoso?

⁶ Ni sa biu tani mai na ivavakoso o koya e sega ni veivutuni, vakacava sa na guilecavi qai sasaga vakataki koya me lesu vei Jiova? Sega! Ni tukuna vua na komiti ni qase ni sa na biu tani mai na ivavakoso, ratou na vakamacalataka vua na ka me cakava me lesu kina ina ivavakoso. Ia sega ni koya ga qori. Levu na gauna, ratou na tukuna vua ni ratou na via veivosaki tale kei koya ni oti e vica na vula, me ratou kila ke sa veisau na lomana. Ke vakadonuya me ratou veivosaki tale, ratou na uqeti koya na qase me veivutuni qai lesu mai. Ke sega mada ga ni veisau na lomana ena gauna qori, ratou na sasaga tiko ga na qase me ratou veivosaki ni toso na gauna.

7. Era na vakatotomuria vakacava na qase na yalololoma i Jiova nira vukei koya e biu tani mai na ivavakoso? (Jeremaia 3:12)

 ⁷ Era na vakatotomuria na qase na yalololoma i Jiova nira vukei koya e biu tani mai na ivavakoso. Kena ivakaraitaki, o Jiova e sega ni waraki ira na Isireli talaidredre mera veivutuni. Ia e vakaliuliu me vukei ira ni bera mada ga nira vakaraitaka na ivakatakilakila ni veivutuni. Me vaka eda vulica ena ikarua ni ulutaga, e vakaraitaka o Jiova nona yalololoma ni tukuna vua na parofita o Osea me vosoti watina ni se cakava tiko na ivalavala ca bibi. (Osea 3:1; Mala. 3:7) Nira vakatotomuri Jiova na qase, era vinakata dina me lesu mai o koya e cala bibi, era na sega tale ga ni vakadredretaka vua.​—Wilika Jeremaia 3:12.

8. Na cava eda vulica me baleta na yalololoma i Jiova ena italanoa ni gone cidroi? (Luke 15:7)

⁸ Vakasamataka mada na italanoa nei Jisu me baleta na gone cidroi eda vulica ena ikarua ni ulutaga. Ni raici luvena ga na tama ni sa lesu tiko yani i vale, e “cici yani, mokoti koya, qai reguca.” (Luke 15:20) Dikeva ni a sega ni waraka o tamana me kere veivosoti o luvena. Ia e vakaliuliu me cici yani, me vaka ga e dua na tama dauloloma. Era na saga tale ga na qase mera vakaraitaka qori vei ira na lako sese. Era vinakata mera ‘lesu mai’ na sipi qori. (Luke 15:​22-24, 32) Era marau vakalevu mai lomalagi ni lesu mai e dua e valavala ca, eda marau tale ga e vuravura!​—Wilika Luke 15:7.

9. Na cava e vinakata o Jiova mera cakava na ivalavala ca?

⁹ E matata ena ka eda vulica mai ni sega ni vakadonuya o Jiova mera lewe tiko ga ni ivavakoso o ira era sega ni veivutuni. Ia e sasaga tiko ga me vukei ira, e vinakata mera lesu mai. E laurai na ivakarau ni rai i Jiova me baleti ira na veivutuni ena Osea 14:4. E kaya: “Au na vakabulai ira mai na nodra sega ni yalodina. Au na lomani ira mai vu ni lomaqu, ni sa oti na noqu cudruvi [ira].” Qori e dodonu me uqeti ira na qase, mera raica eso na ivakatakilakila ni nodra veivutuni. E dodonu me uqeti ira tale ga na biuti Jiova, mera lesu totolo mai.

10-11. Na cava era na cakava na qase mera vukei ira kina na biu tani mai na ivavakoso ena vica vata na yabaki sa oti?

¹⁰ Vakacava o ira na biu tani mai na ivavakoso ena vica vata na yabaki sa oti? De dua era sa muduka na ivalavala ca e vakavuna nodra biu tani. Eso era rairai guilecava na vuna era biu tani kina. Ke sa dede mada ga nodra yali tu, era na saga na qase mera kila na vanua era tiko kina, ra qai sikovi ira. Nira veisiko na qase, era na masu vata kei koya, ra qai vakamasuti koya me lesu mai ina ivavakoso. E macala ke sa dede nona yali mai na ivavakoso e dua, sa na malumu sara ga vakayalo. Ia ke tukuna ni vinakata me lesu ina ivavakoso, rawa ni ratou tuvanaka na qase e dua me vuli iVolatabu kei koya, ni se bera mada ga ni vakalesui mai. O ira ga na qase era na tuvanaka na vuli iVolatabu.

¹¹ Nira vakatotomuria na qase na yalololoma i Jiova, era na vaqarai ira na sipi era yali tu qai vukei ira mera lesu ni se dola tiko na katuba. Ni vakaraitaka o koya e cakacala ni veivutuni qai biuta nona itovo ca, sa rawa ni vakalesui totolo ina ivavakoso.​—2 Kor. 2:​6-8.

12. (a) Na ituvaki cava mera qaqarauni kina na qase? (b) Cava meda kua ni nanuma kina ni dredre vei Jiova me lomani ira era cakava eso na mataqali ivalavala ca? (Raica tale ga na ivakamacala e ra.)

 ¹² Eso na ituvaki e vinakati mera qaqarauni na qase ni bera ni vakalesui mai e dua. Kena ivakaraitaki, ke kilai ni dau vakasagai ira na gone, vukitani se nakita me sereki watina, e bibi me ratou vakadeitaka na qase ni sa veivutuni. (Mala. 2:14; 2 Tim. 3:6) E vinakati me taqomaki na qelenisipi. Ia meda kila tiko ni o Jiova ena vakalesuya mai e dua e valavala ca bibi, ke vakaraitaka na veivutuni dina qai muduka nona itovo ca. Koya gona mera vakadeitaka na  qase ke sa veivutuni dina o koya e veivakaisini, ia mera kua ga ni nanuma ni na sega ni lomani koya tale o Jiova. b​—1 Pita 2:10.

KA MERA CAKAVA NA LEWE NI IVAVAKOSO

13. Na cava eda na cakava ke dua e vunauci, se biu tani mai na ivavakoso?

¹³ Me vaka eda veivosakitaka mai ena ulutaga sa oti, eso na gauna ena kacivaki ena ivavakoso ni vunauci e dua. Ke caka qori, e rawa nida veimaliwai tiko ga kei koya nida kila ni sa veivutuni, sa biuta tale ga nona itovo ca. (1 Tim. 5:20) E se lewe tiko ga ni ivavakoso, e vinakati tale ga mera vakayaloqaqataki koya na mataveitacini era veimaliwai. (Iper. 10:​24, 25) Ia e duatani o koya e biu tani mai na ivavakoso. Meda “kua ni vakailala tiko” kei koya, meda “kua mada ga ni kana vata kei koya.”​—1 Kor. 5:11.

14. Era na muria vakacava na lotu vaKarisito nodra lewaeloma e vakavulici ni biu tani mai na ivavakoso e dua? (Raica tale ga na iyaloyalo.)

¹⁴ Vakacava, kena ibalebale ya nida na sega sara ga ni vosa vua e dua e biu tani mai na ivavakoso? Sega. E macala nida na sega ni veimaliwai kei koya. Ia ena muria na lotu vaKarisito nona lewaeloma e vakavulici ni vakatulewataka me sureti koya e biu tani mai na ivavakoso me tiko ena soqoni, ya ke wekana se rau dau veitokani voleka tu e liu. Vakacava ke lako yani? Ena gauna sa oti, eda na sega ni vakabula vua. Ena ituvaki qo ena muria na lotu vaKarisito yadua nona lewaeloma e vakavulici. Eso ena rawarawa nodra lai kidavaki koya se vakabula vua ena soqoni. Ia eda na sega ni veivosaki vakabalavu se veimaliwai kei koya.

15. Na ivalavala ca cava e tukuni ena 2 Joni 9-11? (Raica tale ga na kato “ Vakacava e Dua ga na Mataqali iValavala ca e Tukuna o Joni kei Paula?”)

¹⁵ Era na rairai taroga eso: ‘Vakacava e sega ni tukuna na iVolatabu ni o koya e vakabula vua sa vakaivotavota ena nona ivalavala ca?’ (Wilika 2 Joni 9-11.) E  vakaraitaka na tikina wavolita, na veidusimaki qori e tukuni ira tiko na vukitani kei ira era uqeta tiko na ivalavala ca. (Vkta. 2:20) Koya gona, ke dua e vakavulica tiko na nodra ivakavuvuli na vukitani se uqeta tiko na ivalavala ca, era na sega ni sikovi koya na qase. Ia e rawa ni kilai yalona mai. Me yacova na gauna qori, eda na sega ni kidavaki koya se sureti koya ena soqoni ni ivavakoso.

VAKATOTOMURIA NA LOLOMA LEVU NI KALOU

16-17. (a) Na cava e vinakata o Jiova mera cakava na ivalavala ca? (Isikeli 18:32) (b) Era na vakaraitaka vakacava na qase nira cakacaka vata kei Jiova?

¹⁶ Na cava eda vulica ena lima na ulutaga qo? E sega ni vinakata o Jiova me rusa e dua! (Wilika Isikeli 18:32.) E vinakata mera mai duavata tale kei koya o ira na ivalavala ca. (2 Kor. 5:20) Qori na vuna e uqeti ira tiko ga nona tamata talaidredre o Jiova mera veivutuni ra qai lesu vua. E ka dokai vei ira na qase ni ivavakoso mera cakacaka vata kei Jiova nira saga mera vukei ira na valavala ca bibi mera veivutuni.​—Roma 2:4; 1 Kor. 3:9.

¹⁷ Vakasamataka mada nodra marau mai lomalagi ni veivutuni e dua! Dua na ka nona marau na Tamada vakalomalagi o Jiova ena gauna kece e veivutuni kina e dua na sipi qai lesu ina ivavakoso. Nida vakasamataka vakatitobu na loloma levu i Jiova, nona yalololoma, kei na loloma soli wale, eda na lomani koya tiko ga vakalevu.​—Luke 1:78.