1. Na cava e vinakata o Jiova vei keda kece?

 NI BULI keda o Jiova, e solia vei keda na galala ni vakatulewa. O dau vakayagataka na isolisoli qori ni o vakatulewa. Na vakatulewa bibi duadua e rawa ni cakava e dua, ya me yalataki koya vei Jiova me lewe ni nona vuvale qai sokaloutaki koya. E vinakata o Jiova meda cakava kece qori. Na vuna? Ni lomani keda, e vinakata tale ga meda marautaka noda bula. E vinakata meda veitokani kei koya, meda rawata tale ga na bula tawamudu.​—Vkru. 30:​19, 20; Kala. 6:​7, 8.

2. Na cava na rai nei Jiova me baleti ira na ivalavala ca bibi? (1 Joni 2:1)

² O Jiova e sega ni vakasaurarataka e dua me qaravi koya. Ia e vinakata me noda yadua na vakatulewa. Vakacava ke dua e papitaiso e beca na lawa ni Kalou ni valavala ca bibi? Ke sega ni veivutuni, me biu tani mai na ivavakoso. (1 Kor. 5:13) Ia ena gauna mada ga qori, e vinakata tiko ga o Jiova me veivutuni qai lesu vua. Qori e dua na vuna bibi e vakarautaka kina na ivoli me rawa ni  vosoti ira na veivutunitaka nodra ivalavala ca. (Wilika 1 Joni 2:1.) Ni Kalou dauloloma o Jiova, e vakamasuti ira era valavala ca bibi mera veivutuni.​—Saka. 1:3; Roma 2:4; Jeme. 4:8.

3. Na cava eda na veivosakitaka ena ulutaga qo?

³ E vinakata o Jiova me tiko vei keda nona rai me baleta na ivalavala ca, kei ira era valavala ca bibi. Eda na veivosakitaka ena ulutaga qo na sala meda cakava kina qori. Ni o wilika tiko raica (1) na sala e qaravi kina e dua na kisi ni cala bibi ena ivavakoso e Korinica ena imatai ni senitiuri, (2) na ivakasala e tukuna na yapositolo o Paula ni veivutuni o koya e valavala ca bibi, kei na (3) na ka eda vulica ena rai nei Jiova me baleti ira na lotu vaKarisito era valavala ca bibi.

QARAVI NA CALA BIBI ENA IMATAI NI SENITIURI

4. Na cava e yaco ena ivavakoso e Korinica? (1 Korinica 5:​1, 2)

⁴ Wilika 1 Korinica 5:​1, 2. Ena ikatolu ni nona ilakolako vakaulotu o Paula, e rogoca e dua na itukutuku rarawataki me baleta na ivavakoso vou e Korinica. E dua na tacida tagane ena ivavakoso qori e veiyacovi tawadodonu tiko kei tinana vakacabecabe. E kidroataki qori nira “sega mada ga ni cakava na veimatanitu”! De dua e vakatara na ivavakoso me cakava tiko ga na itovo qori nira nanuma ni sega ni dua na kena ca. Era nanuma eso nira vakaraitaka tiko na yalololoma me vakataki Jiova ena vukudra na ivalavala ca. Ia e sega ni vakadonuya o Jiova mera cakava tiko ga nona tamata na ivalavala ca bibi. Ni sega ni maduataka na tagane qori nona ivalavala ca, e rogorogo ca kina na ivavakoso. Kena ikuri, e rawa ni vakacalai ira eso tale na lotu vaKarisito era dau veimaliwai. Na cava gona e tukuna o Paula me cakava na ivavakoso?

5. Na cava e tukuna o Paula mera cakava na lewe ni ivavakoso? Cava e vakaibalebaletaka? (1 Korinica 5:13) (Raica tale ga na iyaloyalo.)

⁵ Wilika 1 Korinica 5:13. E uqeti vakalou o Paula me vola e dua na ivola qai vakamacalataka me biu tani mai na ivavakoso o koya e sega ni veivutuni. Na cava mera cakava na lotu vaKarisito yalodina vua na tagane qori? E tukuna vei ira o Paula mera “kua ni vakailala tiko” kei koya. Cava na kena ibalebale ya? E vakamacalataka ni ivakaro qori e okati kina nodra “kua mada ga ni kana vata kei koya.” (1 Kor. 5:11) Nida kana  vata kei na dua, eda na rawa ni veimaliwai kina vakalevu kei koya. E macala ni vakaibalebaletaka o Paula mera kua ni veimaliwai kei na tagane qori. Qo ena taqomaka na ivavakoso mera kua ni vakacalai. (1 Kor. 5:​5-7) Nodra sega tale ga ni veimaliwai kei na tagane qori ena rairai liaca kina na levu ni nona vakararawataki Jiova, ena rawa ni madua qai uqeti koya me veivutuni.

6. E yaga vakacava na ivola nei Paula ena ivavakoso, vei koya tale ga e valavala ca bibi?

⁶ Ni vakau oti na ivola i Paula vei ira na lotu vaKarisito e Korinica, e via kila sara ga na ka era na cakava. E mai tukuna vei Paula o Taito e dua na itukutuku marautaki. Oya nira rogoca na lewe ni ivavakoso na ivakasala nei Paula. (2 Kor. 7:​6, 7) Era muria sara na ivakasala, nira biuta tani na daucaka ca. Ni oti  tale e vica na vula nona vakauta o Paula na ivola, sa veivutuni o koya e valavala ca bibi! E veisautaka nona itovo kei na nona rai qai muria na ivakatagedegede dodonu i Jiova. (2 Kor. 7:​8-11) Na cava ena tukuna tarava o Paula mera cakava na lewe ni ivavakoso?

KA MERA CAKAVA NA LEWE NI IVAVAKOSO VEI KOYA E VEIVUTUNI

7. Na cava na inaki ni nona biu tani mai na ivavakoso o koya e valavala ca bibi? (2 Korinica 2:​5-8)

⁷ Wilika 2 Korinica 2:​5-8. E kaya o Paula ni “nodra vunauci koya e levu e sa rauti koya vinaka.” Kena ibalebale, e vakayacori kina na inaki ni nona vakadodonutaki. Cava ya? Me rawa ni veivutuni kina.​—Iper. 12:11.

8. Na cava tale e tukuna o Paula mera cakava na lewe ni ivavakoso?

⁸ E vakasalataki ira na lewe ni ivavakoso o Paula: “Moni tu vakarau ni vosoti koya, ni vakacegui koya” qai “vakadeitaka vua ni oni lomani koya.” E vinakata o Paula mera kua wale ga ni ciqomi koya. E vinakata tale ga mera vakaraitaka ena ka era tukuna, nodra ivakarau, kei na ka era cakava nira vosoti koya dina ra qai lomani koya. Me kila sara ga na tagane qori nira marautaka dina nona lesu yani.

9. Na cava e sega ni rawarawa kina vei ira eso mera ciqomi koya e veivutuni?

⁹ Vakacava e sega ni rawarawa vei ira eso ena ivavakoso mera ciqomi koya e veivutuni? E sega ni tukuna na iVolatabu, ia e rairai dina. Na ka e cakava na tagane qori e vakavuleqa ena ivavakoso, era rairai madua kina eso. De dua era nanuma ni sega ni dodonu mera ciqomi koya tale me tacidra, nira saga tiko mada ga me savasava nodra itovo. (Vakatauvatana Luke 15:​28-30.) Ia na cava e bibi kina mera vakaraitaka na lewe ni ivavakoso nira lomani koya dina?

10-11. Na cava e rawa ni yaco ke ra sega ni via vosoti koya e veivutuni na qase ni ivavakoso?

¹⁰ Vakasamataka mada na ka e rawa ni yaco ke ra sega ni ciqomi koya e veivutuni na qase ni ivavakoso. Se ra sega ni via vakaraitaka na lewe ni ivavakoso nira lomani koya. E rawa sara ga ni luvuci “ena levu ni rarawa.” Ena nanuma ni na sega ni rawa ni qaravi Jiova tale. Ena rairai soro koso ena nona sasaga me vinaka tale nona veiwekani kei Jiova.

¹¹ Koya e ca sara, ke ra sega ni via vosoti koya e veivutuni na vo ni mataveitacini, ena rawa ni vakaleqa nodra veiwekani kei Jiova. Na vuna? Era na sega ni vakatotomuri Jiova ni dau vosoti ira na veivutuni, ia era vakatotomuria tiko ga nona yalo ca o Setani kei na nona sega ni dauloloma. E rawa sara ga ni vakayagataki ira na Tevoro mera tarova na tagane qori me kua ni qaravi Jiova.​—2 Kor. 2:​10, 11; Efeso 4:27.

12. Era na vakatotomuri Jiova vakacava na lewe ni ivavakoso?

¹² Era na vakatotomuri Jiova vakacava na lewe ni ivavakoso e Korinica, sega ni o Setani? Nira muria na ka e cakava o Jiova vei ira na veivutuni. Rogoca mada na ka era vola eso na dauvola iVolatabu me baleti Jiova. E kaya o Tevita: “Kemuni Jiova, oni vinaka qai tu vakarau moni veivosoti.” (Same 86:5) E vola o Maika: “O cei na Kalou me vakataki kemuni, oni dau vosota na cala, oni guilecava na . . . ivalavala ca?” (Maika 7:18) E tukuna tale ga o Aisea: “Me biuta mada na nona itovo na tamata ca, kei na nona  vakanananu na tamata ivakarau ca, me lesu vei Jiova ni na lomani koya, vua na noda Kalou, ni na veivosoti vakalevu o koya.”​—Aisea 55:7.

13. Na cava e veiganiti kina me vakalesui ina ivavakoso o koya e veivutuni? (Raica na kato “ Gauna Cava e Vakalesui Kina na Tagane Qori?”)

¹³ E vinakati mera vakatotomuri Jiova na lewe ni ivavakoso e Korinica, nira vosoti koya e veivutuni ra qai vakaraitaka nira lomani koya. Nira muria na ivakasala nei Paula mera ciqomi koya, era vakaraitaka nira “talairawarawa tiko ena ka kece.” (2 Kor. 2:9) E vica ga na vula nona biu tani mai na ivavakoso na tagane qori, ia nona vakadodonutaki e veivutuni kina. E veiganiti gona me vakalesui totolo ina ivavakoso.

VAKATOTOMURIA NA LEWADODONU KEI NA YALOLOLOMA I JIOVA

14-15. Na cava eda vulica ena kena qaravi na kisi ni cala bibi e Korinica? (2 Pita 3:9) (Raica tale ga na iyaloyalo.)

¹⁴ Na itukutuku ni kena qaravi na kisi ni cala bibi e Korinica e volai ena iVolatabu “meda vakavulici kina.” (Roma 15:4) Eda vulica ni sega ni vakatara o Jiova mera lewe tiko ga ni ivavakoso o ira na valavala ca bibi. Era nanuma eso ni Kalou “yalololoma” o Jiova ena vakadonuya me veimaliwai tiko ga o koya e sega ni veivutuni kei ira na yalodina  ena ivavakoso. Ni yalololoma o Jiova, e sega ni vakatara na itovo ca, e sega tale ga ni veisau nona ivakatagedegede. (Juta 4) Io, e sega ni ivakaraitaki ni yalololoma ke vakatara na itovo ca ena ivavakoso ni na vakaleqai ira na kena vo.​—Vkai. 13:20; 1 Kor. 15:33.

¹⁵ Eda kila tiko ni sega ni vinakata o Jiova me rusa e dua. E vinakata mera bula na tamata kece. E vakaraitaka na yalololoma vei ira era veisautaka na lomadra ra qai vinakata mera veitokani tale kei koya. (Isik. 33:11; wilika 2 Pita 3:9.) Ni sa veivutuni gona na tagane e Korinica qai biuta nona itovo ca, e vakayagataki Paula o Jiova me vakamacalataka ena ivavakoso ni dodonu me vosoti qai vakalesui mai.

16. Na cava o vulica ena kena qaravi na kisi ni cala bibi e Korinica?

¹⁶ Nida dikeva na kena qaravi na kisi ni cala bibi e Korinica eda vulica kina na loloma levu i Jiova, nona ivalavala dodonu, kei na nona lewadodonu. (Same 33:5) Noda kila qori eda vinakata sara ga meda vakacaucautaki koya vakalevu. Eda marau ni dau yalololoma o Jiova, eda vinakata me vosoti keda nida kawa ivalavala ca. Eda marau tale ga ni vakarautaka na ivoli me rawa ni vosoti keda. E veivakacegui sara ga meda kila ni lomani ira dina nona tamata o Jiova, e vinakata tale ga mera marautaka nodra bula!

17. Na cava ena veivosakitaki ena ulutaga e tarava?

¹⁷ Vakacava na kena qaravi na kisi ni cala bibi ena gauna qo? Ke valavala ca bibi e dua, era na vakatotomuria vakacava na qase na loloma i Jiova mera vukei koya me veivutuni? Me vakacava nodra rai na lewe ni ivavakoso nira vakatulewataka na qase me biu tani se vakalesui mai? Ena veivosakitaki na taro qori ena ulutaga e tarava.