1. Na cava ena cakava o Jiova me vakayacora na nona inaki?

O JIOVA ena cakava ga na ka e vinakata me vakayacora kina na nona inaki. Qo e vica na kena ivakaraitaki, e Qasenivuli, e Dauveivakacegui, e dau vakasavuya tale ga na itukutuku vinaka. (Aisea 48:17; 2 Kor. 7:6; Kala. 3:8) Ia se vakayagataki keda tiko ga me vakayacora kina na nona inaki. (Maciu 24:14; 28:19, 20; 2 Kor. 1:3, 4) Ena solia tale ga vei keda o Jiova na vuku kei na kaukaua meda vakayacora kina na lomana. Qori sara ga na ibalebale ni yacana, me vaka era kaya e levu na dauvakadidike ena iVolatabu.

2. (a) Na cava eda na rairai vakatitiqataka kina ena so na gauna ni vakayagataki keda tiko o Jiova? (b) Cava eda na veivosakitaka ena ulutaga qo?

² Eda vinakata kece me vakayagataki keda o Jiova ena vakayacori ni nona inaki, ia eso era na rairai vakatitiqa. Na vuna? Era nanuma ni sega ni rawa nira qarava e levu na itavi ena vuku ni nodra yabaki, na kedra ituvaki, se vakaiyalayala na ka era rawata. Ia eso tale era na rairai lomavakacegu ena ka era sa qarava tiko, era nanuma ni sega ni vinakati mera vakalevutaka na nodra veiqaravi. Eda na vulica ena ulutaga qo na sala ena vukei keda kina o Jiova meda vakayacora na nona inaki. Eda na veivosakitaka tale ga na sala e tokoni ira kina na nona dauveiqaravi ena gauna vakaivolatabu mera kua wale ga ni vinakata mera cakava na nona inaki, ia mera cakava sara ga. Oti, eda na qai veivosakitaka na sala meda yalorawarawa kina me vakayagataki keda o Jiova.

3. Me vaka e tukuni ena Filipai 2:13, ena rawa ni uqeti keda vakacava o Jiova meda vinakata meda veivuke?

³ Wilika Filipai 2:13. * O Jiova ena uqeti keda meda vinakata meda cakava na nona inaki. Ena sala cava? De dua eda rogoca ni dua ena noda ivavakoso e vinakata na veivuke. Se wilika e dua na qase ni ivavakoso na ivola mai na valenivolavola ni tabana ni vinakati na veivuke ena dua na yalava. De dua eda na taroga, ‘Au na veivuke vakacava?’ Se da kerei meda qarava e dua na ilesilesi dredre, ia eda vaqaqa, ‘Au na qarava rawa se sega?’ Se nida wilika oti e vica na tikinivolatabu, eda na rairai taroga, ‘Au na muria vakacava na tikinivolatabu qo meu veivuke kina?’ Ena sega ni vakasaurarataki keda o Jiova. Ia ena uqeti keda meda cakava na nona inaki ke raica nida via veivuke.

4. Ena rawa ni tokoni keda vakacava o Jiova meda cakava sara na nona inaki?

⁴ Ena tokoni keda tale ga o Jiova meda cakava sara na nona inaki. (Aisea 40:29) Ena sala cava? Ena vukei keda na nona yalo tabu meda vakayagataka vinaka na noda taledi. (Lako 35:30-35) Ena rawa ni dusimaki keda tale ga o Jiova ena nona isoqosoqo ena sala meda qarava kina eso na itavi. Ke o sega ni kila na sala me qaravi kina e dua na itavi, dau kerea na veivuke. Mo kerea tale ga vua na Tamada vakalomalagi dau lomasavu na “kaukaua e uasivia na kaukaua ni tamata.” (2 Kor. 4:7; Luke 11:13) E tu ena iVolatabu na nodra ivakaraitaki na tagane kei na yalewa e tokoni ira o Jiova mera kua ni vinakata wale ga ni cakava na nona inaki, ia mera cakava sara. Nida dikeva na ivakaraitaki qori, vakasamataka na sala ena vakayagataki iko kina o Jiova me vakataki ira.

5. Na cava eda vulica vei Jiova ena gauna e vakayagataki Mosese kina?

⁵ E vakayagataki Mosese o Jiova me vakabulai ira na Isireli. Ena gauna cava? Vakacava, ena gauna e nanuma kina o Mosese ni sa ‘vakavulici vinaka ena nodra vuku kece na kai Ijipita’? (Caka. 7:22-25) Sega. E vakayagataki Mosese o Jiova ni tuli koya oti me yalomalumalumu, me yalomalua tale ga. (Caka. 7:30, 34-36) E vukei Mosese o Jiova me yaloqaqa me duri ena mata i Fero na iliuliu qaqa kei Ijipita. (Lako 9:13-19) Na cava eda vulica vei Jiova ena gauna e vakayagataki Mosese kina? O Jiova e vakayagataki ira na vakaraitaka na itovo vakalou kei ira na nuitaka na nona kaukaua.—Fpai. 4:13.

6. Na cava eda vulica ena nona vakayagataki Pasilai o Jiova me vukei Tui Tevita?

⁶ Oti tale e vica na drau na yabaki, e vakayagataki Pasilai o Jiova me vukei Tui Tevita. Ni drovaki Apisalome tiko o Tevita kei ira na nona tamata, era ‘walokai, wawale, era karamaca’ tale ga. Sa qase sara o Pasilai, ia e bolemate kei na vica tale me ratou vakarautaka na ka me yaga vei Tevita kei ira na nona tamata. E kila o Pasilai ni se rawa ni vakayagataki koya tiko ga o Jiova ni sa itabaqase. E lomasavu gona ni vakayagataka na ka e taukena me vukea kina na dauveiqaravi ni Kalou. (2 Sam. 17:27-29) Na cava eda vulica kina? Ke da qase mada ga, e rawa ni vakayagataki keda o Jiova meda tokoni ira na tacida ena noda vanua se vanuatani. (Vkai. 3:27, 28; 19:17) Ke da sega mada ga ni rawa ni lai veivuke, eda rawa ni cau ena vuravura raraba mera tokoni kina vakailavo na vakaleqai  ena leqa tubukoso.—2 Kor. 8:14, 15; 9:11.

7. E vakayagataki Simione vakacava o Jiova? E uqeti keda vakacava na nona ivakaraitaki?

⁷ E dua na kenaturaga e Jerusalemi o Simione, e turaga yalodina. E yalataka vua o Jiova ni na raica na Mesaia ni bera ni mate. Ena uqeti koya sara ga na vosa ni yalayala qori ni vica vata na yabaki nona waraka tiko na Mesaia. E qai vakalougatataki koya o Jiova ena nona vakabauta kei na vosota. Dua na siga, e gole ena valenisoro o Simione “ena veiuqeti ni yalo tabu.” E raica i keri na gonelailai o Jisu, e qai vakayagataki Simione o Jiova me parofisaitaka na veika me baleta na gonelailai qori ena qai yaco me Karisito. (Luke 2:25-35) Kena irairai ni sega ni raica o Simione na cakacaka vakaitalatala i Jisu e vuravura, ia e marautaka vakalevu na itavi dokai e lesi koya kina o Jiova. E vakanamata tale ga ena levu na ka vinaka ena gauna se bera mai! Ena vuravura vou, ena raica na turaga yalodina qori na nodra vakalougatataki na vuvale kece e vuravura ena veiliutaki nei Jisu. (Vkte. 22:18) Eda na marautaka tale ga nikua meda qarava na itavi cava ga e lesia vei keda o Jiova.

8. Ena rawa ni vakayagataki keda vakacava o Jiova me vakataki Panapasa?

⁸ Ena imatai ni senitiuri G.V., a yalorawarawa tale ga e dua na turaga lomasavu me vakayagataki koya o Jiova. Na yacana o Josefa. (Caka. 4:36, 37) Kena irairai ni kilai o Josefa me dau veivakacegui. Eratou vakatokai koya na yapositolo me o Panapasa, e kena ibalebale “Luve ni Vakacegu.” Dua na gauna ni sa mai lotu vaKarisito o Saula, levu na mataveitacini era rerevaki koya ni dau vakacacani ira na lewe ni ivavakoso. Ia o cei e qai vakacegui Saula, e vukei koya tale ga? O Panapasa, ni turaga dau veinanumi qai veikauaitaki. Ena vakavinavinakataka vakalevu o Saula na nona yalovinaka o Panapasa. (Caka. 9:21, 26-28) Dua tale na gauna, era raica na qase ni ivavakoso e Jerusalemi ni vinakati mera vakayaloqaqataki na mataveitacini era tiko sara vakayawa mai Anitioki e Siria. O cei eratou tala? O Panapasa! Dua na vakatulewa vinaka qori. E tukuni ena iVolatabu me baleti Panapasa ni “uqeti ira kece mera yalodina tiko ga vua na Turaga mai vu ni lomadra.” (Caka. 11:22-24) Vakacava nikua? Ena vukei keda tale ga o Jiova meda “luve ni vakacegu” vei ira na tacida lotu vaKarisito. Kena ivakaraitaki, e rawa ni vakayagataki keda meda vakacegui ira na tacida e takali na wekadra lomani. Se uqeti keda meda qiri se gade vua e dua na tacida e tauvimate se yalolailai meda vakayaloqaqataki koya. Me vakataki Panapasa, vakacava o na yalorawarawa tale ga me vakayagataki iko o Jiova?—1 Ces. 5:14.

9. Na cava eda vulica ena nona tokoni Vasily o Jiova me dua na ivakatawa vinaka?

⁹ E tokona vakacava e dua na tacida tagane o Jiova me dua na ivakatawa vinaka? E lesi o Vasily me qase ni ivavakoso ni yabaki 26. Dua na ka nona rere, e nanuma ni se sega ni ganiti koya me vakayaloqaqataki ira na mataveitacini ena ivavakoso, vakabibi o ira na sotava na ituvaki dredre. Ia era vakavulici koya eso na qase ni ivavakoso matua, e vuli tale ga ena Koronivuli ni Cakacaka Vakaitalatala. E sasaga o Vasily me matua vakayalo. Kena ivakaraitaki, e vola eso na nona isausau lalai. Ni sauva e dua, sa qai doudou ga vakalevu. E kaya: “Na ka au dau leqataka ena gauna ya, au sa marautaka ena gauna qo. Dua na ka noqu marau kei na lomavakacegu, ni vukei au o Jiova meu raica na tikinivolatabu veiganiti me vakacegui kina e dua na tacida ena ivavakoso.” E  uqeti kemuni vakacava na tacida tagane na nona ivakaraitaki o Vasily? Ke o yalorawarawa me vakayagataki iko o Jiova, ena tokoni iko mo qarava e levu tale na itavi ena ivavakoso.

10. Na cava e cakava o Apikali? E yaga vakacava vei iko na nona ivakaraitaki?

¹⁰ E cicimuri Tevita tiko kei ira na nona tamata o Tui Saula, era vinakata sara tu ga na veivuke. Era mani kerei Nepali sara e dua na turaga vutuniyau e Isireli me vakarautaka eso na kedra, na ka ga e tu vua. Era doudou na tamata nei Tevita mera kerei Nepali nira vakatawa tiko na nona qelenisipi e veikau. E sega ni solia o Nepali ni dau nanumi koya ga. E katakata sara ga o Tevita, e vinakata me vakamatei Nepali kei ira na tagane kece ena nona vuvale. (1 Sam. 25:3-13, 22) Ia e marama yalomatua qai matavinaka na wati Nepali o Apikali. Na cava e qai cakava? E yaloqaqa vakalevu me lai tekicuva ena mata i Tevita qai vakamasuti koya me kua ni sauma na ca. Me kua ni vakadavedra. E tukuna vakayalovinaka vei Tevita me nuitaki Jiova ena ituvaki qori. E vakaraitaka o Apikali na yalomalumalumu ena ka e tukuna, e yalomatua tale ga na ka e cakava. Sa rauta me uqeti Tevita dina, e kaya tale ga ni o Jiova ga e talai Apikali yani. (1 Sam. 25:23-28, 32-34) E vakayagataki Apikali o Jiova ni vakaraitaka na itovo vinaka. E yaga vakacava na nona ivakaraitaki vei ira na tacida yalewa lotu vaKarisito? Ena vakayagataki kemuni tale ga o Jiova moni vakayaloqaqataka na nomuni vuvale kei na ivavakoso ke matau na nomuni vosa, oni vakaraitaka tale ga na yalomatua.—Vkai. 24:3; Taito 2:3-5.

11. Na cava eratou cakava na luvei Salumi? O cei nikua era vakatotomuri ratou?

¹¹ Oti tale e vica na drau na yabaki, o Jiova e vakayagataki ratou na luvena yalewa o Salumi me ratou veivuke ena vakavinakataki ni bai e Jerusalemi. (Niem. 2:20; 3:12) E turaga o tamadratou, ia eratou yalorawarawa na luvena yalewa me ratou qarava na itavi dredre, e rerevaki tale ga. (Niem. 4:15-18) E duidui sara na ka eratou cakava kei na ka era cakava na nodra turaga e Tikoa, era ‘sega ni vakamalumalumu mera vakaitavi’ ena cakacaka! (Niem. 3:5) Vakasamataka mada na nodratou marau na yalewa qori ni vakaoti na bai ena 52 ga na siga! (Niem. 6:15) O cei nikua era vakatotomuria na nodratou ivakaraitaki? O ira na tacida yalewa era yalorawarawa ni vakaitavi ena dua na taba ni veiqaravi tabu. Era lewena na timi ni tarataravaki kei na vakavinakataki ni vale e vakatabui vei Jiova. E vakacavari na cakacaka ena nodra gumatua, yalodina, kei na nodra taledi.

12. E rawa ni vakayagataki keda vakacava o Jiova me vakataki Tavaita?

¹² E dua na yalewa lotu vaKarisito o Tavaita, e “dau cakacaka qai dau soli iloloma” vei ira na yada. Qori na sala e vakayagataki koya kina o Jiova. (Caka. 9:36) Ni dau lomasavu qai yalovinaka, e levu era tagicaka na nona mate. Ia dua na ka nodra marau ni vakaturi koya o Pita. (Caka. 9:39-41) Na cava eda vulica vei Tavaita? Ke da gone se qase, yalewa se tagane, eda rawa kece ni cakava eso na ka mera vukei kina na tacida.—Iper. 13:16.

13. E vakayagataki Ruth vakacava o Jiova ni dau mamadua? Na cava e vakadeitaka?

¹³ E dua na tacida yalewa o Ruth e via daukaulotu, ia e mamadua. Ni se gone, e dau totolo ga nona veisoliyaka na tikidua e veivale. E kaya: “Au dau taleitaka na cakacaka qo.” Ia e dredre vua me vosa e katuba, me wasea tale ga na itukutuku  vinaka ni Matanitu ni Kalou. E dau mamadua, ia e painia tudei ni yabaki 18. Ena 1946, e lai vuli ena Koronivuli e Kiliati, oti e lai veiqaravi sara e Hawaii kei Japani. E vakayagataki koya o Jiova me vunau vakalevu ena vanua qori. Ni oti e 80 na yabaki nona cakacaka vakaitalatala, e kaya: “O Jiova ga e dau vakayaloqaqataki au. E vukei au meu valuta na mamadua. Au vakadeitaka ni o Jiova ena vakayagataki ira na nuitaki koya.”

14. Me vaka e tukuni ena Kolosa 1:29, na cava meda cakava me vakayagataki keda kina o Jiova?

¹⁴ Ena veigauna sa oti, o Jiova e vakayagataki ira na nona dauveiqaravi ena levu sara na sala. Ena vakayagataki iko vakacava? Ena vakatau vakalevu ena nomu yalorawarawa mo sasaga. (Wilika Kolosa 1:29.) Ke o yalorawarawa, ena vakayagataki iko o Jiova mo dua na daukaulotu gugumatua, qasenivuli maqosa, dau veivakacegui, kenadau ena cakacaka, itokani dina, se sala cava ga me vakayacori kina na nona inaki.

15. Me vaka e cavuti ena 1 Timoci 4:12, 15, na cava mera kerea vei Jiova na tacida tagane gone?

¹⁵ Vakacava o kemuni na tacida tagane gone oni sa cauravou mai? Era vinakati vakalevu na tagane e tu vei ira na kaukaua mera dauveiqaravi ni ivavakoso. Ena levu na ivavakoso, e laurai ni levu na kedra iwiliwili na qase vei ira na dauveiqaravi. Vei kemuni gona na tacida tagane gone, oni rawa ni vakaitavi vakalevu ena ivavakoso? Eso na gauna, era kaya eso na tacida tagane, “Sa rauti au tu ga meu dautukutuku.” Ke dau va qori na nomu rai, kerei Jiova me vukei iko mo dua na dauveiqaravi ni ivavakoso, me solia tale ga vei iko na kaukaua mo qaravi koya tiko ga ena yalodina. (Dauv. 12:1) Keimami vinakata na nomuni veivuke!—Wilika 1 Timoci 4:12, 15.

16. Na cava meda kerea vei Jiova? Na vuna?

¹⁶ O Jiova ena rawa ni vakayagataki iko me vakayacori kina na nona inaki. Kerei Jiova me vukei iko mo kua ni vinakata wale ga, ia mo cakava sara na nona inaki. Ke o gone se qase, mo vakayagataka nomu gauna, kaukaua kei na iyau mo rokovi Jiova ena gauna qo. (Dauv. 9:10) Ke o lesi ena dua na itavi dokai mo veiqaravi kina vakalevu vei Jiova, kua ni rere se nanuma ni sega ni ganiti iko. E dua dina na ka dokai nida solia noda vinaka me vakalagilagi kina na Tamada dauloloma!