1. Na cava meda qaravi Jiova duadua ga kina?

E DODONU meda qaravi Jiova duadua ga ni Dauveibuli, e Vunibula tale ga. (Vkta. 4:11) Ia e vinakati meda qaqarauni. Eda lomani Jiova, eda rokovi koya tale ga. Ia e rawa nida vakawelei ena so na ka meda kua kina ni qaravi koya duadua ga. E vinakati gona meda kila qori. Meda veivosakitaka mada na ibalebale ni noda qaravi Jiova duadua ga.

2. Me vaka e tukuni ena Lako Yani 34:14, na cava eda na cakava meda qaravi Jiova duadua ga kina?

² Ena iVolatabu, na noda qaravi Jiova duadua ga e dusia nida lomani koya vakalevu. Kena ibalebale eda na qaravi koya vakatabakidua. Eda na qarauna me kua tale ni dua na ka e vagolea tani na lomada.—Wilika Lako Yani 34:14.

3. Na cava eda qaravi Jiova kina?

³ E tiko na vuna vinaka eda qaravi Jiova kina. Eda kila vakacava? Ni yavutaki ena ka dina eda vulica me baleti koya. Eda taleitaka na nona itovo talei. Eda kila na ka e vinakata kei na ka e cata. E matata na nona inaki me baleti keda, eda tokona tale ga. E ka dokai vei keda ni vakadonuya meda nona itokani. (Same 25:14) Na ka kece eda vulica me baleta na Dauveibuli e vakavolekati keda vua.—Jeme. 4:8.

4. (a) Na cava e vakayagataka na Tevoro meda kua kina ni lomani Jiova vakalevu? (b) Cava eda na veivosakitaka ena ulutaga qo?

 ⁴ E lewa tiko na Tevoro na vuravura qo, e vakayagataka qori meda vakaliuca kina na ka eda vinakata kei na noda gagadre. (Efeso 2:1-3; 1 Joni 5:19) E nona inaki meda taleitaka eso tale na ka, meda kua ni lomani Jiova vakalevu. Meda veivosakitaka mada e rua na sala e cakava kina qori na Tevoro. Dua, e temaki keda meda lomana na ilavo, kei na kena ikarua, e saga meda digia na ka ni veivakamarautaki e ca.

5. Na cava meda kua kina ni lomana na ilavo?

⁵ Eda vinakata kece me tiko na keda, noda isulu, kei na vanua veiganiti meda tiko kina. Ia meda qarauna meda kua ni lomana na ilavo. E levu nikua era “lomana na ilavo” kei na ka e rawati kina. (2 Tim. 3:2) E kila o Jisu ni rawa nira temaki na nona imuri mera lomana na ilavo. E kaya: “E sega ni dua e rawa ni qarava e rua na turaga, ni na cata e dua qai lomana e dua, ena doka e dua qai beca e dua. Dou sega ni rawa ni qarava na Kalou kei na iYau.” (Maciu 6:24) O koya e qaravi Jiova qai vakayagataka tale ga vakalevu na nona gauna kei na igu me vutuniyau, e saga tiko me qarava e rua na turaga. Ena sega ni qaravi Jiova duadua ga.

6. Na cava eda vulica ena ka e tukuna o Jisu ina ivavakoso o Leotisea?

⁶ Ni sa vakarau cava na imatai ni senitiuri G.V., era sakitaka na lewe ni ivavakoso ena koro o Leotisea: “Au vutuniyau qai taukena e levu na iyau, au sega sara ga ni gadreva e dua na ka.” Ia ena mata i Jiova kei Jisu, era ‘macawa, vakaloloma, dravudravua, mataboko,  era luvawale tale ga.’ Na cava e vakasalataki ira kina o Jisu? E sega ni vakasalataki ira nira vutuniyau, e kaya ga ni sa vakaleqa na nodra veiwekani kei Jiova na nodra lomana na iyau. (Vkta. 3:14-17) Ke da kidava ni sa kadre tiko e lomada na gagadre ni via vutuniyau, meda yavala totolo meda veisautaka na noda rai. (1 Tim. 6:7, 8) Ke sega ena waserua na lomada, ena sega tale ga ni vakadonuya o Jiova na noda sokalou. E “vinakata me qaravi duadua ga.” (Vkru. 4:24) Ena rawa vakacava nida vakabibitaka na ilavo?

7-9. Na cava o vulica ena ivakaraitaki ni qase ni ivavakoso o David?

⁷ Dikeva mada na ivakaraitaki nei David, e dua na qase ni ivavakoso mai Merika. E kaya ni dau gugumatua ena cakacaka. E toso cake na nona itutu ena kabani, e kilai levu tale ga ni kenadau ena nona cakacaka. E kaya o David: “Au nanuma ena gauna ya ni qori e veivakalougatataki i Jiova.” Vakacava e dina?

⁸ Toso na gauna e raica o David eso na ivakatakilakila ni sa vakaleqa tiko na nona veiwekani kei Jiova na nona cakacaka. E kaya: “Ena soqoni ni ivavakoso kei na cakacaka mada ga vakaitalatala, au dau vakasamataka tu ga na leqa e vanua ni cakacaka. E levu na ilavo au rawata, ia au nuiqawaqawa vakalevu, e leqa tale ga noqu bula vakawati.”

⁹ E liaca o David ni vinakati me dikeva tale na ka e vakaliuca. E kaya: “Au vakatulewataka meu vakavinakataka na kequ ituvaki.” E vinakata me veisautaka na ituvatuva ni nona cakacaka qai vakaraitaka na ka e lalawataka vua na nona boso. Na cava e yaco? E sake o David  mai na nona cakacaka! Na cava e cakava? E kaya: “Ena siga e tarava, au vakalewena na fomu meu painia veivuke tiko ga.” Erau dau sasamaki o David kei watina me tokoni rau vakailavo. Toso na gauna, e painia tudei sara, oti sa qai painia tale ga o watina. Erau digia na veiwatini qo na cakacaka era beca e levu, ia erau sega ni leqataka qori. E sega ni levu sara na ilavo erau rawata me vaka e liu, ia erau sauma rawa na ka e dodonu me saumi e veivula. Na ka ga erau vinakata oya me rau vakaliuci Jiova, erau vakadinadinataka tale ga ni dau kauaitaki ira na vakaliuca na nona Matanitu.—Maciu 6:31-33.

10. Eda na qarauna vakacava na lomada?

¹⁰ E vinakati meda qarauna na lomada ke levu se lailai na ka e tu vei keda. Eda na cakava vakacava? Meda kua ni lomana na ilavo. Meda kua ni vakabibitaka na noda cakacaka me qai muri na noda qaravi Jiova. O na kila vakacava ke sa yacovi iko tiko qori? Qo e vica na taro o rawa ni taroga: ‘Au dau vakasamataka tiko ga noqu cakacaka niu tiko ena soqoni se cakacaka vakavunau? Au dau leqataka noqu bula vakailavo ena gauna se bera mai? Keirau dau veibataka vakaveiwatini na ilavo kei na iyau? Au rawa ni cakava na cakacaka era beca eso me levu kina noqu gauna vei Jiova?’ (1 Tim. 6:9-12) Nida vakasamataka na taro qo, meda nanuma tiko ni lomani keda o Jiova, e yalataka vei ira na lomani koya: “Au na sega sara ni laivi iko, au na sega tale ga ni biuti iko.” Sa rauta me vola na yapositolo o Paula: “Me kua ni laurai ena nomuni bula ni oni lomana na ilavo.”—Iper. 13:5, 6.

11. Na cava ena yaco ke da digia na ka ni veivakamarautaki e ca?

¹¹ E vinakata o Jiova meda marautaka na bula, e yaga kina na ka ni veivakamarautaki. E kaya na Vosa ni Kalou ni “sega ni dua tale na ka e vinaka vua na tamata, me kana ga, me gunu, me marautaka na nona cakacaka vakaukaua.” (Dauv. 2:24) Ia e levu na ka ni veivakamarautaki ni vuravura e veivakaleqai. E uqeta na itovo ca, era muria se taleitaka kina e levu na veika e vakatabuya na Vosa ni Kalou.

12. Me vaka e tukuni ena 1 Korinica 10:21, 22, na cava meda digia vinaka kina na ka ni veivakamarautaki?

 ¹² Eda vinakata meda qaravi Jiova duadua ga. Ia eda sega ni rawa ni kana ena “teveli nei Jiova” kei na nodra “teveli na timoni.” (Wilika 1 Korinica 10:21, 22.) Ni rau kana vata e le rua e dusia na veitokani. Ke da digia na ka ni veivakamarautaki e vakaraitaki kina na itovo voravora, vakatevoro, itovo dukadukali, se so tale na itovo kei na gagadre ca, eda sa kania tiko na kakana era vakarautaka na meca ni Kalou. Na kena itinitini? Ena vakaleqai keda, ena vakaleqa tale ga noda veiwekani kei Jiova.

13-14. Me vaka e tukuni ena Jemesa 1:14, 15, na cava meda qarauna kina na ka ni veivakamarautaki eda digia? Vakatauvatana.

¹³ Dikeva mada e vica na sala e vaka kina na kakana na ka ni veivakamarautaki. Nida kana, eda na lewa na ka meda biuta e gusuda. Ia nida sa tiloma, eda sega ni lewa rawa na ka ena yaco e yagoda. Nida kania na kakana bulabula eda na bulabula kina, ia e ca vei keda na kakana e sega ni bulabula. De dua ena sega ni laurai totolo na veisau, ena qai laurai ni toso na gauna.

¹⁴ E va tale ga qori na ka ni veivakamarautaki. Eda lewa na kena meda digia, ia eda sega ni lewa na kena revurevu. Ena qai laurai qori ena ivakarau ni noda rai kei na lomada. Na ka ni veivakamarautaki e vinaka e yaga vei keda, na kena e ca e veivakaleqai. (Wilika Jemesa 1:14, 15.) De dua ena sega ni laurai totolo na kena revurevu, ia ena qai laurai. Sa rauta me vakasalataki keda na iVolatabu: “Kua ni nanuma cala: Na Kalou ena sega ni vakalialiai. Na ka kece e kaburaka e dua ena tamusuka tale ga, ni o koya e kakaburaki ena inaki vakayago ena tamusuka na rusa ena yago.” (Kala. 6:7, 8) E bibi gona meda cata na ka ni veivakamarautaki kece e laurai kina na ka e cata o Jiova!—Same 97:10.

15. Na iloloma cava e vakarautaka vei keda o Jiova?

¹⁵ E levu na tacida era taleitaka na sara JW Broadcasting^®, na noda siteseni ni tivi ena Internet. E kaya e dua na tacida yalewa o Marilyn: “E yaga vei au na JW Broadcasting me donu tiko ga na noqu rai, e sega ni dua na ka ca e laurai kina. Niu galili se yalolailai, au na sarava e dua na ivunau veiuqeti se porokaramu ena Dikevi ni Tikinivolatabu e Veimataka. Au volekati Jiova kina kei na nona isoqosoqo. Na JW Broadcasting e veisautaka vakadua na noqu bula.” Vakacava e yaga tiko vei iko na iloloma qo nei Jiova? Me ikuri ni porokaramu vovou ni Broadcasting e veivula, e vakarautaki tale ga na katokatoni, na vidio, kei na sere veiuqeti.

16-17. Na cava e bibi kina meda lewa vinaka na gauna eda vakayagataka ena ka ni veivakamarautaki? Eda na cakava vakacava?

¹⁶ E bibi meda lewa vinaka na mataqali ka ni veivakamarautaki eda digia kei na levu ni gauna eda vakayagataka kina. Ke sega, ena rawa ni levu na gauna eda vakayagataka ena ka ni veivakamarautaki, sa na lailai noda gauna vei Jiova. Levu e dredre mera lewa na gauna era vakayagataka ena ka ni veivakamarautaki. E kaya o Abigail, e dua na tacida yalewa yabaki 18: “Niu lesu mai ena dua na siga osooso ni cakacaka, au dau sara tivi meu vakacegu vinaka kina. Ia keu sega ni  lewa vinaka, au na sarasara tu me vica vata na aua.” E kaya o Samuel, e dua na tacida tagane cauravou yabaki 21: “Eso na gauna au na sarava e levu na vidio leleka ena Internet. Au tekivu sarava ga e dua, au sega ni liaca niu sa vakayagataka tiko e tolu se va na aua.”

¹⁷ O na lewa vakacava na levu ni gauna o vakayagataka ena ka ni veivakamarautaki? Mo kila mada na levu ni gauna o dau vakayagataka kina. Vakacava mo vola na gauna o dau vakayagataka ena dua na macawa! Vola ena ivolanivula e vica na aua o dau sara tivi kina, vakayagataka na Internet, kei na nomu dau qito ena nomu talevoni. Ke o kila ni o sa vakayagataka kina e levu na gauna, saga me dua na nomu ituvatuva. Lalawataka na gauna mo vakaliuca kina na ka e bibi sara, me tiko tale ga na gauna ni ka ni veivakamarautaki. Mo qai kerei Jiova me vukei iko mo dei ena nomu ituvatuva. Ni o cakava qori, ena tiko na gauna kei na kaukaua mo vulica kina vakataki iko na iVolatabu, sokalou vakavuvale, soqoni, vunau kei na veivakavulici. Ni o vakaliuca na veika me baleti Jiova, o na marautaka na gauna o vakayagataka ena ka ni veivakamarautaki.

18-19. Eda na vakaraitaka vakacava nida qaravi Jiova duadua ga?

¹⁸ Ni vola oti na yapositolo o Pita na veika me baleta na icavacava ni vuravura i Setani, ni sa voleka tale ga vuravura vou, e kaya: “Kemuni na wekaqu lomani, ni oni waraka tiko na ka kece qo, ni cakava nomuni vinaka taucoko moni kua ni tauvi duka, moni kua ni vakamelei rawa, moni bula veiyaloni tale ga.” (2 Pita 3:14) Nida muria na ivakasala qori da qai saga ena noda vinaka me savasava tiko ga na noda itovo kei na noda sokalou, eda vakaraitaka nida qaravi Jiova duadua ga.

¹⁹ Ena sega ni cegu o Setani kei na nona vuravura me temaki keda meda vakaliuca eso tale na ka, meda kua kina ni vakaliuci Jiova. (Luke 4:13) Ia me kua sara ni dua na ka e vakaleqa na noda qaravi Jiova mai vu ni lomada. Meda vakadeitaka gona meda qaravi Jiova duadua ga!