E RAICA e dua na ka o daunidraki ena misini. E raica na cagilaba kaukaua ni sa toso tiko mai ena dua na vanua e levu kina na lewenivanua. Ni kauaitaka vakalevu na nodra bula, e sega ni cegu nona vakasalataki ira mera kua ni vuki bera.

E vakasalataki ira tale ga na lewenivanua nikua o Jiova ni sa toso tiko mai e dua na “cagi kaukaua” e rerevaki sara. Ena sega ni tautauvata kei na dua tale na cagi e rairai kaburaki ena itukutuku ni draki. E veivakasalataki vakacava? Eda vakadeitaka vakacava ni dau veivakasalataki o Jiova ni se vo levu tu na gauna? Meda kila na kena isau, meda raica mada nona dau veivakasalataki o Jiova ena gauna sa oti.

Ena gauna vakaivolatabu, e dau tukuna rawa o Jiova na nona vakataulewa se na “cagi kaukaua” vei ira na nakita mera beca na nona ivakaro. (Vkai. 10:25; Jere. 30:23) Ena ituvaki ruarua qori, e dau vakasalataki ira rawa na tamata talaidredre o Jiova ni se vo levu tu na gauna, e tukuna tale ga vei ira na ka mera cakava mera talairawarawa kina vua. (2 Tui 17:12-15; Niem. 9:29, 30) Mera veisau, e dau talai ira vakalevu na nona tamata yalodina e vuravura mera kacivaka na nona veilewai, e tukuna tale ga vei ira na vuna mera vukitotolo kina.—Emosi 3:7.

E dua vei ira na yalodina qori o Noa. Vica vata na yabaki nona vunautaka tiko ena doudou vei ira na tamata ca kei ira na kaukaua nodra itovo, ni sa voleka na Waluvu levu. (Vkte. 6:9-13, 17) E tukuna tale ga vei ira na ka mera cakava mera bula. Sa rauta me tukuni me baleti Noa ni “dauvunautaka na ka dodonu.”—2 Pita 2:5.

Dua na ka nona sasaga o Noa, ia era sega ni bau kauaitaka ena gauna ya na nona itukutuku uqeti vakalou. Era vakaraitaka ni sega vei ira na vakabauta. Cava e mani yaco? Era mate kece “ni tekivu na waluvu qai kuitaki ira.” (Maciu 24:39; Iper. 11:7) Ni sa voleka mai na Waluvu, era sega ni rawa ni tukuna ni sega ni vakasalataki ira na Kalou.

Ena so tale na gauna, e dau veivakasalataki o Jiova ena dua na gauna lekaleka ni bera ni yaco e dua na “cagi kaukaua” ni nona vakataulewa. Ke lekaleka mada ga na gauna e veivakasalataki kina, e raica o Jiova me veirauti na gauna e soli vei ira. Kena ivakaraitaki, e vakasalataki ira rawa e Ijipita ni bera ni tauca na Tini na Kuita. Oya na vuna e talai Mosese kina kei Eroni me rau vakasalataki Fero kei ira na nona tamata me baleta na ikavitu ni kuita, na ucaqereqere rerevaki. E vakatauca o Jiova na ucaqereqere ena siga e tarava, ia vakacava e solia vei ira na gauna mera vaqara na vanua mera vakaruru kina, mera bula? E kaya na iVolatabu: “O koya ga vei ira na dauveiqaravi i Fero e rerevaka na vosa i Jiova e kusa yani me kauti ira mai na nona tamata kei na nona manumanu i vale, ia o koya e sega ni kauai na lomana ena vosa i Jiova, e laivi ira tu ga na nona tamata kei na nona manumanu ena were.” (Lako 9:18-21) Kena ibalebale, e veirauti na gauna e solia o Jiova mera bula kina na muria totolo na nona ivakasala.

Ni vakarau tauca na ikatini ni kuita o Jiova vei Fero kei ira na nona tamata, e vakasalataki ira rawa. Ia era sega ni via muria ena levu ni nodra lialia. (Lako 4:22, 23) Na cava e yacovi ira? E vakamatei kece na nodra ulumatua tagane. Sa vakaloloma dina! (Lako 11:4-10; 12:29) Vakacava e veirauti na gauna e soli mera muria kina na ivakasala? Io! E vakasalataki ira totolo na Isireli o Mosese me baleta  na tini na kuita, e tukuna tale ga vei ira na sala me bula kina nodra vuvale. (Lako 12:21-28) Era le vica era muria na ka e tukuna o Mosese? Era kaya eso ni tolu na milioni se sivia era bula, wili kina o ira na Isireli kei na “dua na ilawalawa levu era duikaikai” era sega ni Isireli, okati kina o ira na kai Ijipita.—Lako 12:38; vmr.

Na cava eda dikeva ena ivakaraitaki qori? E raica o Jiova me veirauti na gauna mera vakasalataki kina na lewenivanua. (Vkru. 32:4) Na cava e cakava kina qori na Kalou? E vakamacalataka na yapositolo o Pita ni o Jiova e “sega ni vinakata me rusa e dua, e vinakata ga [mera] veivutuni kece.” (2 Pita 3:9) Io, e kauaitaki ira dina na tamata o Jiova. E vinakata mera veivutuni, mera muria tale ga na nona ivakasala ni bera ni vakatauca na nona lewa.—Aisea 48:17, 18; Roma 2:4.

E dua tale ga na itukutuku bibi e kacivaki tiko nikua e veiyasa i vuravura, e vinakati mera rogoca na lewenivanua. Ni se bula e vuravura o Jisu, e tukuna ni na vakarusai na ituvaki ca ni vuravura qo ena “veivakararawataki levu.” (Maciu 24:21) Me baleta na vakataulewa se bera mai, e tukuna o Jisu na parofisai matailalai mera namaka na nona imuri. E vakamacalataka gona o Jisu eso na ka lelevu sa yaco tiko nikua e vuravura.—Maciu 24:3-12; Luke 21:10-13.

Me salavata kei na parofisai qori, e vakamasuti ira na lewenivanua o Jiova mera qaravi koya, mera talairawarawa vua. E vinakata mera marau ena gauna qo o ira na talairawarawa, mera marautaka tale ga na veivakalougatataki ena gauna se bera mai ena vuravura vou mera bula kina na yalododonu. (2 Pita 3:13) Mera vakabauta na nona vosa ni yalayala na lewenivanua, e vakarautaka o Jiova na itukutuku ni veivakabulai. Qori ‘na itukutuku vinaka ni Matanitu ni Kalou’ e parofisaitaka o Jisu ni na ‘vunautaki ena veiyasa i vuravura me ivakadinadina ina veimatanitu kece.’ (Maciu 24:14) E tuvanaka o Jiova mera “ivakadinadina” na nona dauveiqaravi se vunautaka na itukutuku qori ena rauta ni 240 na vanua. E vinakata o Jiova mera rogoca na ivakasala e levu tale, mera bula tale ga ena “cagi kaukaua” ni nona vakataulewa sa voleka mai.—Sefa. 1:14, 15; 2:2, 3.

Vakacava, e dau solia na gauna o Jiova ni bera ni vakataulewa? Io, me vaka eda sa raica mai. Ia qo na taro bibi: Vakacava era na rogoca na lewenivanua na nona ivakasala ni se vo na gauna? Nida italai ni Kalou, meda vukei ira tiko ga e levu mera vakabulai ena icavacava ni ituvaki ca qo.