1. Na cava era veilecayaki kina e levu nikua?

ERA kaya e levu na lotu nikua nira lotu vaKarisito ra qai sokaloutaka na Kalou ena sala e vakadonuya. Sa rauta mera veilecayaki e levu. Era taroga, “E dua ga na lotu dina, se vakadonuya na Kalou na lotu kece?” Eda vakadeitaka vakacava ni ka eda vakavulica e ka dina, ra qai muria tiko na iVakadinadina i Jiova nikua na ivakarau ni sokalou e vakadonuya o Jiova? Eda rawa ni vakadeitaka na veika qo? Meda raica mada na kena ivakadinadina.

2. Me vaka e tukuni ena 1 Cesalonaika 1:5, na cava e vakabauta dei kina na ka dina na yapositolo o Paula?

² E vakabauta dei na ka dina na yapositolo o Paula. (Wilika 1 Cesalonaika 1:5.) E sega ni yavutaki qori ena ivakarau ni lomana. E gonevuli gugumatua ni Vosa ni Kalou o Paula. E vakabauta ni “vakavuna na Kalou na iVolatabu kece.” (2 Tim. 3:16) Na cava e vulica kina? E vulica ena iVolatabu o Paula na ivakadinadina matata ni Mesaia yalataki o Jisu. Qori na ka era sega ni via vakabauta na iliuliu ni lotu vakaJiu. Era kaya na iliuliu ni lotu veivakaisini qori nira matataka na Kalou, ia era cakitaki koya ena ka era cakava. (Taito 1:16) E sega ni vakataki ira o Paula, e sega ni vakatulewataka na ka me vakabauta mai na Vosa ni Kalou, kei na ka me kua ni vakabauta. E tu vakarau me vakavulica qai muria na “ivakaro [kece] ni Kalou.”—Caka. 20:27.

3. Me dei na noda vakabauta, e bibi meda kila na isau ni taro kece? (Raica na kato “ E ‘Sega ni Tukuni Rawa’ na Cakacaka kei na Nanuma i Jiova.”)

³ Eso era nanuma ni lotu dina e dodonu me sauma na taro kece, na taro mada ga e sega na kena isau matata ena iVolatabu. E donu ya? Vakasamataka mada na ivakaraitaki i Paula, e uqeti ira nona itokani vakabauta mera “vakadeitaka na dina ni ka kece.” Ia e tukuna tale ga ni levu na ka e  se sega ni kila. (1 Ces. 5:21) E vola: “E sega ni taucoko na noda kilaka . . . e vaka eda se titiro ena iloilo kaukamea e buawa.” (1 Kor. 13:9, 12) E se sega ni matata vei Paula na ka kece, vaka kina o keda. Ia e kila o Paula na yavu ni ka dina me baleta na Kalou o Jiova. E kila e levu na ka me vakadeitaka kina ni vakabauta na ka dina!

4. Eda na vakadeitaka vakacava noda vakabauta nida sa kunea na ka dina? Na cava eda na veivosakitaka me baleti ira na lotu vaKarisito dina?

⁴ Dua na sala eda vakadeitaka kina na noda vakabauta nida sa kunea na ka dina, ya noda vakatauvatana na ivakarau ni sokalou e vakayacora o Jisu kei na ka era cakava tiko nikua na iVakadinadina i Jiova. Ena ulutaga qo, eda na raica ni o ira na lotu vaKarisito dina era (1) cata na qaravi matakau, (2) doka na yaca i Jiova, (3) taleitaka na ka dina, (4) veilomani vakalevu.

5. Na cava eda vulica vei Jisu me baleta na sala donu me sokaloutaki kina na Kalou? Eda na muria vakacava na ka e vakavulica?

⁵ E uqeti Jisu na levu ni nona lomana na Kalou me qaravi Jiova duadua ga ni se tiko mai lomalagi vaka kina e vuravura. (Luke 4:8) E vakavulici ira nona tisaipeli mera cakava tale ga qori. E sega ni vakayagataka o Jisu se o ira nona imuri yalodina na ivakatakarakara ena nodra sokalou. Me vaka ni yalo na Kalou, e sega ni rawa ni buli e dua na ka me bau volekata yani na lagilagi i Jiova! (Aisea 46:5) Ia vakacava na buli ni kedra ivakatakarakara o ira na vakatokai tu mera yalosavasava se sanito, kei na noda masu vei ira? Ena ikarua ni lawa ena iVunau e Tini, e kaya o Jiova, “Mo kua ni cakava e dua na nomu ivakatakarakara ceuti se na ivakatakarakara  ni dua na ka e tu ena lomalagi e cake se na vuravura e ra . . . Mo kua ni cuva vei ira.” (Lako 20:4, 5) E matata vakasigalevu na vosa qori vei ira na vinakata mera vakamarautaka na Kalou.

6. Na ivakarau ni sokalou cava eda muria tiko na iVakadinadina i Jiova nikua?

⁶ Era kaya na daunitukutuku makawa ni o ira na lotu vaKarisito taumada era sokaloutaka duadua ga na Kalou. Me kena ivakaraitaki, e kaya na ivola History of the Christian Church (iTukutuku ni Lotu vaKarisito) me baleti ira na lotu vaKarisito taumada, nira na “rairai ririkotaka” ni tukuni me biu ena nodra vanua ni sokalou na ivakatakarakara. Eda muria na iVakadinadina i Jiova nikua na ivakarau era muria na lotu vaKarisito ena imatai ni senitiuri. Eda sega ni masu ina ivakatakarakara ni “sanito” se agilosi, eda sega mada ga ni masu vei Jisu. Eda sega tale ga ni vakarokorokotaka na kuila se cakava e dua na ka e vakaraitaka nida sokaloutaka na Matanitu. Se mani cava era saga eso meda cakava, eda na muria dei ga na vosa i Jisu: “E dodonu mo sokalou vei Jiova na nomu Kalou.”—Maciu 4:10.

7. Eda duidui vakacava na iVakadinadina i Jiova mai na vo ni lotu?

⁷ E levu nikua era taleitaka mera rogoci ira na iliuliu ni lotu rogo. Era qoroi ira vakalevu, e vaka ga mera sokaloutaki ira. Levu era lako ina nodra valenilotu. Era volia nodra ivola, ra qai solia e levu na ilavo vei ira na iliuliu qori se na isoqosoqo era tokona. Eso era vakabauta na ka kece era tukuna. Era marau vakalevu mera raici ira na iliuliu qori, sega ni o Jisu. Na kena veibasai o ira na dausokalou dina i Jiova, era sega ni muri tamata. Eda dokai ira na liutaka na cakacaka, ia eda vakabauta na ivakavuvuli matata i Jisu: “Ni veitacini kece.” (Maciu 23:8-10) Eda sega ni sokaloutaka na tamata kevaka mada ga era iliuliu ni lotu se politiki. Eda sega tale ga ni tokona nodra sasaga. Ia eda tawaveitovaki da qai sega ni vakavuravura. Ena vuku ni tikina qo, eda duatani mai na levu na matalotu era kaya nira lotu vaKarisito.—Joni 18:36.

8. Eda kila vakacava ni vinakata o Jiova me vakalagilagi na yacana qai vakatakilai yani?

⁸ Ena dua na gauna, e masuta o Jisu: “Tamaqu, moni vakalagilagia na yacamuni.” E sauma o Jiova ena domolevu mai lomalagi, e yalataka ni na vakalagilagia na yacana. (Joni 12:28) Ena nona cakacaka vakaitalatala o Jisu, e dau vakalagilagia na yaca i Tamana. (Joni 17:26) E macala gona nira okata na lotu vaKarisito dina me ka dokai nodra vakayagataka na yaca ni Kalou ra qai vakatakila yani.

9. Era vakaraitaka vakacava na lotu vaKarisito ena imatai ni senitiuri nira doka na yaca ni Kalou?

⁹ Ena imatai ni senitiuri G.V., ni bera toka ga ni tauyavu na ivavakoso vaKarisito, o Jiova e ‘golevi ira na veimatanitu me digitaka e dua na ilawalawa me vakatokai ena yacana.’ (Caka. 15:14) O ira na lotu vaKarisito ena imatai ni senitiuri qori era marau mera vakayagataka na yaca ni Kalou ra qai vakatakila yani. Era vakayagataka vakalevu na yaca ni Kalou ena nodra cakacaka vakaitalatala kei na nodra volavola. * Ena sala qori era vakaraitaka ni o ira ga era vakatakila tiko na yaca ni Kalou.—Caka. 2:14, 21.

10. Na ivakadinadina cava e dusia ni o keda ga eda vakatakila tiko na yaca i Jiova?

 ¹⁰ Kena ibalebale ni o ira ga na iVakadinadina i Jiova era vakatakila tiko na yaca ni Kalou? Raica mada na kena ivakadinadina. Nikua e levu na iliuliu ni lotu era saga ena nodra kaukaua mera kua ni vakatakila na yaca ni Kalou. Era kauta laivi mai na nodra vakadewa ni iVolatabu. Ena so na ituvaki era vakatabuya me kua ni vakayagataki na yaca qori ena nodra veiqaravi vakalotu. * E macala ni o keda ga na iVakadinadina i Jiova eda doka na yaca ni Kalou. Eda vakatakila vakalevu na yaca ni Kalou ni vakatauvatani kei na vo tale na matalotu! Ena tikina qo, eda solia noda vinaka meda dina ena yacada nida iVakadinadina i Jiova. (Aisea 43:10-12) Eda vakarautaka e sivia ni 240 na milioni na ilavelave ni iVolatabu ena Vakadewa ni Vuravura Vou, e vola na yaca i Jiova ena vanua era bokoca eso tale na daunivakadewa ni iVolatabu. Eda vakarautaka tale ga na ivola vakaivolatabu ena sivia na 1,000 na vosa e vakayagataka na yaca i Jiova!

11. Era vakaraitaka vakacava na lotu vaKarisito taumada nira taleitaka na ka dina?

¹¹ E taleitaka o Jisu na dina, oya na  ka dina me baleta na Kalou kei na nona inaki. Na nona ivakarau ni bula o Jisu e vakaraitaka ni vakabauta na ka dina. E vakatakila tale ga na ka dina. (Joni 18:37) O ira na imuri dina i Jisu era taleitaka vakalevu na ka dina. (Joni 4:23, 24) E tukuna mada ga na yapositolo o Pita me baleta na lotu vaKarisito ni “sala ni dina.” (2 Pita 2:2) Nira taleitaka vakalevu na ka dina na lotu vaKarisito taumada, era cata kina na ivakavuvuli vakalotu, na itovo vakavanua, kei na rai vakatamata e sega ni salavata kei na ka dina. (Kolo. 2:8) E vaka kina nikua, era gumatua na lotu vaKarisito dina mera “muria tiko ga na ka dina,” nira yavutaka na nodra vakabauta kece kei na ivakarau ni bula ena Vosa i Jiova.—3 Joni 3, 4.

12. Na cava e yaco ni kila na iLawalawa Dauvakatulewa ni vinakati me veisau noda kilaka? Na cava e cakava kina qori?

¹² Eda sega ni tukuna na iVakadinadina i Jiova nida kila vinaka na ka kece ena iVolatabu. Eso na gauna e cala noda vakamacalataka na ivakavuvuli vakaivolatabu se na kena tuvanaki na ivavakoso. Meda kua ni kurabuitaka qori. E vakamatatataka na iVolatabu ni o ira na tamata ni Kalou era na qai kila vinaka na ka dina ni toso na gauna. (Kolo. 1:9, 10) E vakatakila vakalalai o Jiova na ka dina, meda yalovosovoso gona meda kila vinaka na ka dina. (Vkai. 4:18) Ni kila na iLawalawa Dauvakatulewa ni vinakati me veisau na noda kilaka, se na kena vakayacori e dua na ka, ena cakava sara vakatotolo. E levu na matalotu vaKarisito era cakava na veisau me marau kina nodra lewenilotu se mera veivolekati kei na vuravura, ia na veisau e cakava na isoqosoqo i Jiova e kena inaki meda volekata na Kalou meda muria tale ga na ivakarau ni sokalou e tauyavutaka o Jisu. (Jeme. 4:4) Eda sega ni vakayacora na veisau ni sa veisau na nodra rai e vuravura, ia eda vakayacora ni sa matata na noda kila na iVolatabu. Eda taleitaka na ka dina!—1 Ces. 2:3, 4.

13. Na cava na itovo bibi duadua era vakaraitaka na lotu vaKarisito dina? E laurai vakacava qori vei keda na iVakadinadina i Jiova nikua?

¹³ Era kilai na lotu vaKarisito taumada ena levu na itovo vinaka, ia na itovo bibi duadua era kilai kina oya na loloma. E kaya o Jisu: “Na ka qo era na kila kece kina ni dou noqu tisaipeli, ke dou veilomani.” (Joni 13:34, 35) Nikua, eda vakaraitaka na iVakadinadina i Jiova e veiyasa i vuravura na veilomani dina kei na duavata. Eda duidui mai na vo ni matalotu nida vaka ga e dua na vuvale mai na duidui matanitu kei na matatamata. Eda raica na veilomani dina ena noda soqoni, soqo ni tabacakacaka, kei na soqo ni veiwasewase. Qo e vukei keda meda vakadeitaka nida sokaloutaki Jiova ena sala e vakadonuya.

14. Me salavata kei na Kolosa 3:12-14, na cava e dua na sala eda vakaraitaka kina nida veilomani vakalevu?

¹⁴ E uqeti keda na iVolatabu meda “dau veilomani vakalevu.” (1 Pita 4:8) Dua na sala eda vakaraitaka kina qori noda veivosoti kei na yalorawarawa ni vosota nodra malumalumu eso tale. Eda qara tale ga na sala meda lomasavu qai kauaitaki ira kece ena ivavakoso, vei ira mada ga era vakacudrui keda. (Wilika Kolosa 3:12-14.) Nida vakaraitaka na loloma qo eda vakadinadinataka nida lotu vaKarisito dina.

15. Na sala cava tale eda na muria kina na nodra ivakarau ni sokalou na lotu vaKarisito ena imatai ni senitiuri?

¹⁵ Eda muria na nodra ivakarau ni sokalou na lotu vaKarisito ena imatai ni senitiuri ena so tale na sala. Kena ivakaraitaki, na ituvatuva ni noda isoqosoqo e okati kina na ivakatawa ni tabacakacaka, qase, kei na dauveiqaravi ni ivavakoso e vakatotomuria ga na ivakarau era muria na yapositolo ena imatai ni senitiuri. (Fpai. 1:1; Taito 1:5) Na noda rai me baleta na veiyacovi kei na vakawati, noda doka na bibi ni bula, kei na noda vinakata me taqomaki na ivavakoso mai vei ira na sega ni veivutunitaka nodra ivalavala ca, e yavutaki ena ivakarau era muria o ira ena imatai ni senitiuri.—Caka. 15:28, 29; 1 Kor. 5:11-13; 6:9, 10; Iper. 13:4.

16. Na cava eda vulica ena Efeso 4:4-6?

¹⁶ E kaya o Jisu ni levu era na tukuna nira nona tisaipeli, ia era sega dina ni muri koya. (Maciu 7:21-23) E vakasalataka tale ga na iVolatabu ni levu ena “vakarairai ga na nodra qarava na Kalou” ena iotioti ni veisiga. (2 Tim. 3:1, 5) Ia e tukuna vakamatata vei keda na iVolatabu ni Kalou e vakadonuya e “dua [ga] na vakabauta.”—Wilika Efeso 4:4-6.

17. O cei nikua e muri Jisu tiko ra qai vakaraitaka na vakabauta dina?

¹⁷ O cei e vakaraitaka na vakabauta dina nikua? Eda sa raica na ivakadinadina, eda raica na ivakarau ni sokalou e vakavulica o Jisu ra qai muria na lotu vaKarisito ena imatai ni senitiuri. E dua ga na kena isau, ya o ira na iVakadinadina i Jiova. E ka dokai meda dua vei ira na tamata i Jiova, eda kila na ka dina me baleti koya kei na nona inaki! Meda taura matua tiko ga na ka dina.