1. Na inuinui cava e vakarautaka tu vei keda o Jiova?

 E VAKARAUTAKA vei keda o Jiova na inuinui totoka meda bula tawamudu. Eso era nuitaka mera bula tawamudu i lomalagi, ya mera kabula vakayalo tawamate rawa. (1 Kor. 15:50, 53) Ia e levu era nuitaka mera bula tawamudu e vuravura, era na bulabula vinaka, ra mamarau tale ga. (Vkta. 21:3, 4) Ke noda inuinui na bula tawamudu i lomalagi se vuravura, e talei na noda inuinui.

2. E yavutaki ena cava na noda inuinui, na cava eda kaya kina qori?

² Na vosa “inuinui” ena iVolatabu e rawa ni kena ibalebale na noda “namaka tiko na ka vinaka era na yaco.” E vakadeitaki na noda inuinui me baleta na veigauna se bera mai ni vu sara ga mai vei Jiova. (Roma 15:13) Eda kila na ka e yalataka, eda kila tale ga ni daudina na ka e tukuna. (Tiko 23:19) Eda nuidei ni o Jiova e vinakata, e tu tale ga vua na kaukaua me vakayacora na veika kece e tukuna. Na noda inuinui gona e sega ni ka ga ni tadra, se meda diva tu ga, ia e yavutaki sara ga ena ka e vakadinadinataki ni na yaco.

3. Na cava eda na veivosakitaka ena ulutaga qo? (Same 27:14)

³ E lomani keda na Tamada vakalomalagi, e vinakata tale ga meda nuitaki koya. (Wilika Same 27:14.) Ni dei noda nuitaki Jiova, eda na rawa ni vosota na veivakatovolei da qai vakanamata ina veigauna se bera mai nida yaloqaqa salavata kei na noda marau. Meda veivosakitaka mada na sala e taqomaki keda kina na inuinui. Ni bera qori eda na dikeva na sala e vaka kina na ikelekele kei na isala na noda inuinui. Oti eda na veivosakitaka na ka meda cakava me dei tiko ga kina noda inuinui.

4. Na sala cava e vaka kina na ikelekele na noda inuinui? (Iperiu 6:19)

⁴ Ena ivola i Paula vei ira na Iperiu e tukuna ni noda inuinui e vaka na ikelekele. (Wilika Iperiu 6:19.) E dau soko o  Paula ena nona veilakoyaki, e kila kina ni dau vakayagataki na ikelekele me kua ni ciri na waqa. Dua gona na gauna ni vodo waqa tiko, e qai donuya e dua na draki ca levu. E raica nira biuta na kaimua na ikelekele i wai me kua ni kasa na waqa e veivatu, ni vakarerevaki. (Caka. 27:29, 39-41) Me vaka ni vakadeitaka na waqa na ikelekele, na noda inuinui e vakadeitaki keda meda kua ni ciri se biuti Jiova nida sotava na leqa. Ni dei noda inuinui, eda na vosota na veika rarawa nida kila ni na vinaka na ituvaki ena gauna se bera mai. Meda nanuma tale ga ni vakasalataki keda o Jisu nida na vakacacani. (Joni 15:20) Nida dau vakasamataka gona vakatitobu na noda inuinui se bera mai, eda na dei tiko ga ena ivakarau ni bula vaKarisito.

5. E vukei Jisu vakacava na inuinui me dei ni vakarau vakamatei?

⁵ Vakasamataka na sala e uqeti Jisu kina na nona inuinui me yalodina tiko ga, ni kila vinaka tu ni sa vakarau vakamatei vakaloloma. Ena Penitiko 33 G.V., e cavuqaqataka na yapositolo o Pita e dua na parofisai mai na ivola ni Same, e laurai kina na nona lomadei o Jisu: “Au na vakacegui tale ga ena inuinui, ni oni na sega ni biuti au ena iBulubulu, oni na sega tale ga ni vakatara me vuca na yagona na nomuni tamata yalodina. . . . Oni na vakasinaiti au ena marau levu e matamuni.” (Caka. 2:25-28; Same 16:8-11) E kila vinaka tu o Jisu ni na mate, ia e nuidei ni na vakaturi koya na Kalou, ena marau tale ga me lesu vei Tamana i lomalagi.—Iper. 12:2, 3.

6. Na cava e kaya e dua na tacida me baleta na inuinui?

⁶ Era sa vosota rawa na veika ca e levu na tacida ena vuku ni noda inuinui vaKarisito. Vakasamataki Leonard Chinn mada e dua na tacida yalodina e tiko mai Igiladi. E bala e valeniveivesu ena iMatai ni iValu Levu ni sega ni via curu ena mataivalu. E rua na vula nona vesu duadua tu ga ena dua na rumu, dau vakacakacakataki tale ga vakaukaua. E vola: “Au vulica ena ka au sotava na yaga ni inuinui meda vosota kina na veika dredre. Eda vuli ena nona ivakaraitaki o Jisu, ratou na yapositolo, kei ira na parofita vaka kina na yalayala totoka ena iVolatabu. E vukei keda meda nuitaka na veigauna se bera mai, e vakayaloqaqataki keda tale ga meda dau vosota.” E nona ikelekele sara ga o Leonard na nona inuinui, e rawa ni noda tale ga.

7. E dei tiko ga vakacava noda inuinui nida vakatovolei? (Roma 5:3-5; Jemesa 1:12)

⁷ E dei tiko ga na noda inuinui nida vosota na veivakatovolei, eda raica tale ga nona vukei keda o Jiova kei na nona veivakadonui. (Wilika Roma 5:3-5; Jemesa 1:12.) Sa qai dei tiko ga noda inuinui ni vakatauvatani kei na gauna eda vakabauta kina na itukutuku vinaka. E vinakata o Setani me vakayalolailaitaki keda ena veivakatovolei, ia ena veivuke ga i Jiova eda vosota rawa kina.

8. Na sala cava e vaka kina na isala na noda inuinui? (1 Cesalonaika 5:8)

⁸ E tukuna tale ga na iVolatabu ni noda inuinui e vaka na isala. (Wilika 1 Cesalonaika 5:8.) E dau vakaisala na sotia me taqomaka na uluna mera kua ni vakamavoataka na meca. Ena noda vala vakayalo e vinakati meda taqomaka tale ga na noda vakasama ena sasaga nei Setani. E sega ni cegu nona temaki keda kei na nona saga me vakadukadukalitaka noda vakasama ena levu na mataqali rai. Me vaka ga ni taqomaka na uluna na sotia na nona isala, na noda inuinui tale ga e taqomaka na  noda vakasama meda yalodina tiko ga vei Jiova.

9. Na cava e dau yaco ni sega na inuinui?

⁹ Ena yaga na noda inuinui ni bula tawamudu ke laurai na vuku kei na yalomatua ena ka eda cakava. Ia ke sega ni dei noda inuinui nida vakalaiva me lewa noda vakasama na rai vakayago, eda na rawa ni guilecava na noda inuinui ni bula tawamudu. Vakasamataka mada nodra ivakaraitaki eso na lotu vaKarisito e Korinica makawa. Era sega ni vakabauta e dua na ka bibi e yalataka na Kalou, ya na inuinui ni veivakaturi. (1 Kor. 15:12) E vola o Paula ni o ira na sega ni vakabauta na veivakaturi era cakava ga na ka era vinakata. (1 Kor. 15:32) Nikua, nira sega ni nuitaka e levu na vosa ni yalayala ni Kalou, era kauaitaka ga na bula qo, era guta se taleitaka na marau. Ia eda duatani nida nuitaka na vosa ni yalayala ni Kalou me baleta na veigauna se bera mai. Na noda inuinui e vaka na isala e taqomaka tiko na noda vakasama, meda kua ni digia na bula ni nanumi keda ga, ena vakaleqa na noda veiwekani kei Jiova.—1 Kor. 15:33, 34.

10. Ena taqomaki keda vakacava na inuinui mai na rai cala?

¹⁰ Na noda inuinui e taqomaki keda meda kua ni nanuma ni sega ni yaga na noda sasaga meda vakamarautaki Jiova. Me kena ivakaraitaki era na rairai kaya eso: ‘Au sa na sega tu ga ni dua vei ira na bula tawamudu. E sega ni dua na ka au vinaka kina. Au na sega tu ga ni rawata na ivakatagedegede ni Kalou.’ Qori tale ga na mataqali rai a vakayagataka vei Jope na nona itokani lasutaki o Elifasi. E kaya vei Jope: “Na cava na tamata me savasava kina?” E kuria nona kaya me baleta na Kalou: “Raica! E sega ni vakabauti ira na nona yalosavasava, e sega tale ga ni savasava e matana na lomalagi.” (Jope 15:14, 15) Tamani lasu! O Setani sara ga e uqeta tiko mai na lasu qori. E kila ke o vakasamataka tiko ga na rai va qori, ena sega na nomu inuinui. Ia mo qarauna sara ga na rai va qori, o qai vakasamataka tiko ga vakatabakidua na yalayala i Jiova. Kua ni vakatitiqataka ni vinakata mo bula tawamudu, ena vukei iko mo rawata na inuinui qori.—1 Tim. 2:3, 4.

11. Na cava meda waraka tiko kina ena yalovosovoso na vakayacori ni noda inuinui?

¹¹ E sega ni rawarawa meda dei tiko ga ena noda inuinui. Eda na rairai sega ni vosota nida waraka tiko na Kalou. Ni tawavakaiyalayala nona bula o Jiova, e duidui na nona rai me baleta na gauna ni vakatauvatani kei na noda rai. (2 Pita 3:8, 9) Ena vakayacora na nona inaki ena ivakatagedegede vinaka duadua, ia ena rairai sega ni cakava ena gauna eda namaka kina. Na cava ena vukei keda me dei noda inuinui nida waraka tiko na Kalou ena yalovosovoso me vakayacora na ka e yalataka?—Jeme. 5:7, 8.

12. Me vaka e tukuni ena Iperiu 11:1, 6, e veisemati vakacava na noda inuinui kei na noda vakabauta?

¹² Ena dei na noda inuinui ke da volekati Jiova tiko ga, o koya e vakadeitaka na noda inuinui. Na iVolatabu e sema na noda inuinui kei na noda vakabauta ni bula dina tiko o Jiova, o koya e dau “vakaicovitaki ira tale ga era vakasaqarai koya ena yalogu.” (Wilika Iperiu 11:1, 6.) Na levu ga ni noda vakabauta ni bula dina tiko o Jiova, na levu tale ga ni noda nuidei ni na vakayacora na ka kece e yalataka tu. Meda raica mada qo na ka eda rawa ni cakava meda veivolekati kei Jiova, me rawa ni dei tiko ga noda inuinui.

13. Eda na toro volekati Jiova vakacava?

 ¹³ Masu vei Jiova, wilika nona Vosa. Eda sega ni rawa ni raici Jiova, ia eda rawa ga ni toro volekati koya. Eda rawa ni vosa vua ena noda masu, eda nuidei tale ga ni na rogoci keda. (Jere. 29:11, 12) Eda rawa ni rogoca na Kalou nida wilika nona Vosa, da qai vakasamataka vakatitobu. Nida wilika na sala e kauaitaki ira kina na yalodina vua ena veigauna sa oti, ena dei tiko ga kina na noda inuinui. Na ka kece era volai tu ena Vosa ni Kalou e “volai meda vakavulici kina, me noda na inuinui e rawati mai na noda vosota kei na noda vakacegui mai na veika e volai ena iVolatabu.”—Roma 15:4.

14. Na cava mo vakasamataka kina na veika sa vakayacora oti o Jiova vei ira eso?

¹⁴ Vakasamataka vakatitobu na nona dau vakayacora o Jiova na ka e yalataka. Dikeva mada na ka e cakava na Kalou vei Eparama kei Sera. Rau sa sega ni rawa ni vakaluveni ni rau sa qase. Ia e yalataka vei rau na Kalou ni na dua na luvedrau. (Vkte. 18:10) Cava nona rai o Eparama? E kaya na iVolatabu: ‘Ena vuku ni nona vakabauta e kila ni na tamadra na veimatanitu.’ (Roma 4:18) Ena rai vakatamata sa sega tu ga ni rau na vakaluveni rawa, ia e nuidei o Eparama ni na vakayacora o Jiova na nona yalayala. E sega ni vakanuinuikara na turaga yalodina qori. (Roma 4:19-21) Eda vulica ena itukutuku va qori nida rawa ni nuitaki Jiova tiko ga me vakayacora na nona yalayala, se mani dredre vakacava na ituvaki eda sotava.

15. Na cava mo vakasamataka kina na veika sa cakava ena vukumu na Kalou?

¹⁵ Vakasamataka na veika sa cakava ena vukumu o Jiova. Vakasamataka na sala e yaga sara ga kina vei iko na kena vakayacori na yalayala era tu ena Vosa ni  Kalou. Me kena ivakaraitaki, e yalataka o Jisu ni na vakarautaka o Tamana na ka meda bula kina. (Maciu 6:32, 33) E vakadeitaka tale ga o Jisu ni na solia vei keda na yalo tabu o Jiova ke da kerea vua. (Luke 11:13) E dau vakayacora o Jiova na ka e yalataka qori. De o na rairai vakasamataka e dua na vosa ni yalayala qori e vakayacora ena vukumu. Me kena ivakaraitaki, e yalataka me vosoti iko, me vakacegui iko, me vakani iko tale ga vakayalo. (Maciu 6:14; 24:45; 2 Kor. 1:3) Ni o vakasamataka vakatitobu na ka sa cakava na Kalou, ena dei kina na nomu nuitaka na ka ena cakava ena vukumu ena gauna se bera mai.

16. Na cava e iloloma talei kina na inuinui?

¹⁶ Na noda inuinui ni bula tawamudu e iloloma talei i Jiova. Eda rai vakanamata ena gauna totoka se bera mai, eda vakadeitaka ni na yaco dina. E vaka na noda ikelekele ni vakadeitaki keda meda vosota na veivakatovolei, na veivakacacani, kei na mate mada ga. E vaka na noda isala ni taqomaka na noda vakasama meda cata na ka ca da qai cakava tiko ga ka e donu. Na noda inuinui e yavutaki ena iVolatabu, e vakavolekati keda vua na Kalou, e vakavotui tale ga kina na levu ni nona lomani keda. Ena yaga vakalevu ni dei tiko ga ena noda vakasama na noda inuinui.

17. Na cava e vu ni marau kina na noda inuinui?

¹⁷ E uqeti ira e Roma na yapositolo o Paula ni vola: “Ni marau ena vuku ni nomuni inuinui.” (Roma 12:12) Na cava e marau kina o Paula? E vakadeitaka ke yalodina tiko ga ena rawata na bula tawamudu i lomalagi. Eda rawa ni marautaka tale ga na noda inuinui nida vakadeitaka ni daudina o Jiova ena ka e yalataka. Me vaka e vola na daunisame, “e marau na tamata . . . e nona inuinui o Jiova na nona Kalou, . . . e dau yalodina tu ga o koya.”—Same 146:5, 6.