1. Na cava e tukuna tiko na agilosi? Cava na kena ibalebale vei keda?

 KE VOSA vei iko e dua na agilosi, o na rogoca na ka e tukuna? Nikua, e vosa tiko e dua na agilosi “vei ira na veimatanitu, na veiyavusa, na duivosavosa, kei na tamata kece.” Na cava e tukuna tiko? “Moni rerevaka na Kalou . . . moni qaravi koya . . . e bulia na lomalagi, [kei] na vuravura.” (Vkta. 14:6, 7) O Jiova na Kalou dina duadua ga e dodonu meda sokaloutaki koya kece. Eda vakavinavinaka kina ena nona veisureti totoka qo meda sokaloutaki koya ena nona valenisoro levu vakayalo!

2. Na cava na valenisoro vakayalo? (Raica tale ga na kato “ Cava e Sega ni Kena iBalebale.”)

² Na cava sara mada na valenisoro vakayalo, eda na raica tale ga e vei na kena ivakamacala? Na valenisoro vakayalo e sega ni vakaibalebaletaki ena dua na vale. Qo na ituvatuva ni sokalou e vakadonuya o Jiova e yavutaki ena isoro ni veivoli i Jisu. E vakamacalataka na yapositolo o Paula na ituvatuva qo ena nona ivola vei ira na lotu vaKarisito Iperiu era tiko e Jutia. b

3-4. Na cava e kauaitaka o Paula me baleti ira na Iperiu lotu vaKarisito? E vukei ira vakacava?

³ Na cava e volavola kina o Paula vei ira na Iperiu lotu vaKarisito e Jutia? Kena irairai ni rua tiko na vuna. Kena imatai, me vakayaloqaqataki ira. Levu era susu ena lotu vakaJiu. Era rairai vakalialiai vei ira na iliuliu ni nodra lotu makawa nira sa mai lotu vaKarisito. Na vuna? Ni sega tu  na nodra valenisoro mera sokalou kina, e sega na nodra icabocabonisoro mera vakacaboisoro kina vua na Kalou, e sega tale ga na bete me veiqaravi ena vukudra. Qori e vakayalolailaitaki ira sara ga na tisaipeli i Karisito, e vakamalumalumutaka tale ga na nodra vakabauta. (Iper. 2:1; 3:12, 14) Eso mada ga era nanuma mera lesu tale ina lotu vakaJiu.

⁴ Kena ikarua, e tukuna o Paula vei ira na lotu vaKarisito nira sega ni sasagataka mera kila na veika vovou kei na ivakavuvuli titobu vakayalo, qori na “kakana dina” e tiko ena Vosa ni Kalou. (Iper. 5:11-14) Macala ga ni so vei ira se muria tiko ga na Lawa e soli vei Mosese. Ia e vakamacalataka o Paula ni isoro e tukuni ena Lawa ena sega ni bokoca vakadua na nodra ivalavala ca. Qori na vuna e sa mai “bokoci” kina na Lawa. Oti e vakavulica sara o Paula eso na ka dina titobu. E tukuna vei ira nona itokani lotu vaKarisito mera nanuma tiko “na inuinui e vinaka cake,” e yavutaki ena isoro i Jisu era na “volekata sara [kina] na Kalou.”—Iper. 7:18, 19.

5. Na cava e bibi meda kila ena ivola na Iperiu? Na vuna?

⁵ E vakamacalataka o Paula vei ira na tacina Iperiu na vuna e vinaka cake kina na nodra sokalou na lotu vaKarisito ni vakatauvatani kei na nodra sokalou ena gauna makawa. Na nodra sokalou na Jiu e “iyaloyalo ga ni ka me na yaco mai, ia na ka dina e nei Karisito.” (Kolo. 2:17) Na iyaloyalo e ivakatakarakara ga ni dua na ka e dina. Na ivakarau gona ni nodra sokalou na Jiu ena gauna makawa, e iyaloyalo ga ni ka me na yaco mai. E bibi meda kila na ituvatuva e vakarautaka vei keda o Jiova me vosoti kina na noda ivalavala ca, me rawa ni vakadonui na noda sokalou. Meda vakatauvatana mada na “iyaloyalo” (se na nodra sokalou na Jiu ena gauna makawa) kei na “ka dina” (se na nodra sokalou na lotu vaKarisito), me vaka e vakamacalataki ena Iperiu. Nida cakava qori eda na kila vinaka kina na valenisoro vakayalo kei na sala eda okati tiko kina.

6. Na cava e dau caka ena valeniveitavaki?

⁶ Nodra sokalou na Jiu. E yavutaka o Paula na nona ivakamacala ena valeniveitavaki e tara o Mosese ena 1512 B.G.V.  (Raica na kato “Nodra Sokalou na Jiu—Nodra Sokalou na Lotu vaKarisito.”) Na valeniveitavaki e valelaca ga era dau kauta na Isireli nira veitokiyaki. Era vakayagataka tiko qori me voleka ni 500 na yabaki me yacova ni tara na valenisoro tudei e Jerusalemi. (Lako 25:8, 9; Tiko 9:22) Na “valelaca ni veitavaki” era dau sokalou kina na Isireli mera torovi Jiova, mera vakacaboisoro, ra sokalou tale ga. (Lako 29:43-46) Ia na valeniveitavaki e vakaibalebaletaka tiko e dua na ka levu cake ena yaco mai vei ira na lotu vaKarisito.

7. Na gauna cava sa tiko kina na valenisoro vakayalo?

⁷ Nodra sokalou na lotu vaKarisito. Na valeniveitavaki ena gauna makawa e “vakatayaloyalotaka na veika vakalomalagi,” e dusia na valenisoro levu vakayalo i Jiova. E kaya o Paula ni “valelaca qo [se, valeniveitavaki] e ivakatakarakara ena gauna qo.” (Iper. 8:5; 9:9) Koya gona, na gauna e volavola tiko kina vei ira na Iperiu, sa tiko na valenisoro vakayalo. E tekivu qori ena 29 G.V. ni papitaiso o Jisu, e lumuti ena yalo tabu, e tekivu veiqaravi tale ga me “bete levu cecere” i Jiova ena valenisoro vakayalo. c—Iper. 4:14; Caka. 10:​37, 38.

8-9. Me vaka e tukuni ena Iperiu 7:23-27, na cava era duidui kina na bete levu e Isireli kei na Bete Levu cecere o Jisu Karisito?

⁸ Nodra sokalou na Jiu. Na bete levu duadua ga e vakadonui me matataki ira na lewenivanua vua na Kalou. O Eroni na imatai ni bete levu e Isireli e digitaka o Jiova ena gauna e vakatabui kina na valeniveitavaki. Ia e vakamacalataka o Paula, ni “levu na bete era veisosomitaki ni tagutuva koso o mate na nodra veiqaravi.” d (Wilika Iperiu 7:23-27.) Nira sega ni uasivi na bete levu qori, era vakacaboisoro tale ga me baleta na nodra ivalavala ca. Qori na duidui me baleti ira na bete levu e Isireli kei na Bete Levu cecere, o Jisu Karisito.

⁹ Nodra sokalou na lotu vaKarisito. Na noda Bete Levu o Jisu Karisito e “dauveiqaravi . . . ena valelaca dina e tara o Jiova, sega ni tamata.” (Iper. 8:1, 2) E vakamacalataka o Paula ni “bula tu ga o [Jisu] me tawamudu, e sega kina ni sosomitaki na nona itutu vakabete.” E kuria o Paula ni “savasava, e tawasei koya mai vei ira na ivalavala ca.” O Jisu e sega ni vakataki ira na bete levu e Isireli, ni “sega ni . . . vakacaboisoro e veisiga” me baleta nona ivalavala ca. Meda dikeva mada qo na duidui ni icabocabonisoro kei na veimataqali isoro ena nodra sokalou na Jiu kei na nodra sokalou na lotu vaKarisito.

10. Na cava e dusia na isoro ena icabocabonisoro kopa?

¹⁰ Nodra sokalou na Jiu. Ni bera na icurucuru ni valeniveitavaki, e tiko kina e dua na icabocabonisoro kopa e dau cabori kina vei Jiova na isoro manumanu. (Lako 27:1, 2; 40:29) Ia na isoro qori e sega ni bokoca vakadua na nodra ivalavala ca na Isireli. (Iper. 10:1-4) Na kena cabori tiko ga na isoro manumanu ena valeniveitavaki, e vakaibalebaletaka tiko  na dua ga na isoro ena bokoca vakadua na ivalavala ca ni kawatamata.

11. Na icabocabonisoro cava e cabora kina o Jisu na nona bula? (Iperiu 10:5-7, 10)

¹¹ Nodra sokalou na lotu vaKarisito. E kila o Jisu ni talai koya mai vuravura o Jiova me cabora nona bula me volia lesu na kawatamata. (Maciu 20:28) Na nona papitaiso gona o Jisu e soli koya kina me cakava na ka e vinakata o Jiova. (Joni 6:38; Kala. 1:4) E cabora na nona bula ena icabocabonisoro e sega ni tara na liga ni tamata, e dusia tiko na ‘loma’ ni Kalou vei Luvena, ya me cabora nona bula uasivi. O Jisu e cabora “vakadua ga” nona bula me sorovaka, se bokoca vakadua na nodra ivalavala ca o ira kece na vakaraitaka nodra vakabauta na Karisito. (Wilika Iperiu 10:5-7, 10.) Ia meda dikeva sara mada na ibalebale ni ka e tu ena loma ni valeniveitavaki.

12. O cei e vakadonui me curu ena Loqi Tabu kei na Loqi Tabu Sara ni valeniveitavaki?

¹² Nodra sokalou na Jiu. E tautauvata vinaka na ka e tu ena loma ni valeniveitavaki kei na valenisoro e qai tara e Jerusalemi. E tiko kina e rua na rumu, na “Loqi Tabu” kei na “Loqi Tabu Sara.” E wasea tiko ga e dua na ilatilati e cula vakaiukuuku. (Iper. 9:2-5; Lako 26:31-33) E tiko ena Loqi Tabu na itutu ni cina koula, na icabocabo me kama kina na ka boivinaka, kei na teveli ni madrai dauraici. Era vakadonui ga na “bete lumuti” mera curu ena Loqi Tabu mera cakava na nodra  itavi. (Tiko 3:3, 7, 10) Na Loqi Tabu Sara e tiko kina na kato ni veiyalayalati koula e dusia nona tiko o Jiova. (Lako 25:21, 22) Na bete levu duadua ga e vakadonui me curu ena ilati ni Loqi Tabu Sara ena Siga ni Veibuluti. (Vunau 16:2, 17) Ena curu kina e veiyabaki ni kauta na dra ni manumanu me sorovaka nona ivalavala ca kei na nodra ivalavala ca na lewe ni matanitu taucoko. Toso na gauna, e vakayagataka o Jiova nona yalo tabu me vakamatatataka na ibalebale dina ni ka e tu ena loma ni valeniveitavaki.—Iper. 9:6-8. e

13. Na cava e dusia na Loqi Tabu kei na Loqi Tabu Sara ena nodra sokalou na lotu vaKarisito?

¹³ Nodra sokalou na lotu vaKarisito. E dua ga na iwiliwili lailai ni tisaipeli i Karisito era lumuti ena yalo tabu qai veivolekati sara nodra veiwekani kei Jiova. Qo o ira na le 144,000 era na veiqaravi vakabete mai lomalagi kei Jisu. (Vkta. 1:6; 14:1) Na Loqi Tabu ni valeniveitavaki e vakaibalebaletaka nona digitaki ira na Kalou mera luvena vakayalo nira se bula tiko e vuravura. (Roma 8:15-17) Na Loqi Tabu Sara ni valeniveitavaki e dusia na lomalagi, e tiko kina o Jiova. “Na ilatilati” e wasea tiko na Loqi Tabu kei na Loqi Tabu Sara, e dusia na yago i Jisu vakatamata e sega kina ni rawa ni curuma na lomalagi me Bete Levu cecere ni valenisoro vakayalo. Ni cabora na yagona vakatamata ena vukuda, e dolava kina na sala vei ira kece na lotu vaKarisito lumuti mera lai bula i lomalagi. E vinakati mera biuta tale ga na yagodra vakatamata mera rawata kina na nodra icovi mai lomalagi. (Iper. 10:19, 20; 1 Kor. 15:50) Ni sa vakaturi o Jisu, e curu ina Loqi Tabu Sara ni valenisoro vakayalo, na vanua era na tomani koya kina na lumuti kece.

14. Me vaka e tukuni ena Iperiu 9:12, 24-26, na cava e uasivi kina na ituvatuva ni valenisoro vakayalo i Jiova?

¹⁴ Eda raica eke na vuna e uasivi kina na ituvatuva i Jiova me baleta na sokalou dina e yavutaki ena isoro ni veivoli kei na itavi vakabete i Jisu Karisito. Na bete levu e kauta na dra ni manumanu ina Loqi Tabu Sara e tara na tamata, ia o Jisu e curu i “lomalagi” na vanua savasava duadua me rairai vei Jiova. E cabora kina na yaga ni nona bula uasivi vakatamata ena vukuda, “me kauta tani na ivalavala ca ni cabora nona bula.” (Wilika Iperiu 9:12, 24-26.) Na isoro sara ga i Jisu e vosoti kina noda ivalavala ca, e bokoci tale ga kina vakadua. Me vaka eda na vulica tarava, ke noda inuinui na bula i lomalagi se vuravura, eda rawa kece ni sokaloutaki Jiova ena nona valenisoro vakayalo.

15. O cei era veiqaravi ena rara ni valeniveitavaki?

¹⁵ Nodra sokalou na Jiu. E tiko e dua na raranivale ena valeniveitavaki, e vanua levu qai vakabai wavoki, era dau qarava e kea na bete na nodra itavi. E tiko ena raranivale qori e dua na icabocabonisoro kopa levu e dau cabori kina na isoro kama, kei na dua na beseni kopa e tawa tu kina na wai mera sasavui kina na bete ni bera nira qarava nodra itavi. (Lako 30:17-20; 40:6-8) Ia na valenisoro e qai tara e muri, e tiko tale ga kina na raranivale e tuba mera sokalou kina o ira na sega ni bete.

16. O cei era veiqaravi ena raranivale e loma kei na raranivale e tuba ena valenisoro vakayalo?

¹⁶ Nodra sokalou na lotu vaKarisito. Ni bera nira lako i lomalagi na vo ni lumuti  mera veiqaravi vakabete kei Jisu, era na veiqaravi mada ena yalodina ena raranivale e loma ni valenisoro vakayalo. Na kena tiko na beseni levu e tawa tu kina na wai era nanuma tiko ni bibi mera savasava vakayago, vakayalo tale ga, wili kina o ira kece na lotu vaKarisito. Ia e vei era na qai sokaloutaki Jiova kina “na isoqosoqo levu” era tokoni ira tiko na taci Karisito lumuti? E raica na yapositolo o Joni nira “tucake tu ena mata ni idabedabe vakaturaga.” Qori e tautauvata kei na raranivale e tuba e tiko e vuravura, na vanua era “cabora” tiko kina “vua [na Kalou] na veiqaravi tabu ena siga kei na bogi ena nona valenisoro.” (Vkta. 7:9, 13-15) Eda marautaka dina ni tiko e dua na vanua ena ituvatuva i Jiova meda sokaloutaki koya kina!

17. Na isoro cava meda cabora vei Jiova?

¹⁷ Nikua e ka dokai vei keda kece na lotu vaKarisito meda vakacaboisoro vei Jiova nida vakayagataka noda gauna, kaukaua kei na iyau meda vakaitavi vakalevu ena kena vunautaki na Matanitu ni Kalou. Me vaka e tukuna na yapositolo o Paula vei ira na Iperiu lotu vaKarisito, ni rawa nira ‘cabora tiko ga vua na Kalou na isoro ni veivakacaucautaki, ya na vua ni tebenigusudra nira tukuna raraba na yacana.’ (Iper. 13:15) Meda vakaraitaka mada ga nida mareqeta na noda itavi dokai meda sokalou vei Jiova nida cabora vua na noda isoro vinaka duadua.

18. Me vaka e tukuni ena Iperiu 10:22-25, na cava meda kua ni vakawalena kei na cava meda kua ni guilecava?

¹⁸ Wilika Iperiu 10:22-25. Ni tinia o Paula na nona ivola vei ira na Iperiu, e tukuna eso na ivakarau ni noda sokalou meda kua ni vakawalena. E okati kina noda torovi Jiova ena masu, noda vunautaka noda inuinui, noda soqoni ena ivavakoso, kei na noda veivakayaloqaqataki “vakalevu nida raica ni sa voleka mai na siga [i Jiova].” Ni voleka ni cava na ivola na Vakatakila, e vakabibitaka vakarua na agilosi i Jiova: “Qarava na Kalou.” (Vkta. 19:10; 22:9) Meda kua mada ga ni guilecava na ka dina titobu vakayalo qo me baleta na valenisoro levu vakayalo i Jiova kei na itavi dokai meda sokaloutaka na noda Kalou cecere!