1-2. Na cava na sala vinaka duadua mo wilika se vulica kina na iVolatabu? Tukuna na kena ivakaraitaki.

 VAKASAMATAKA mada ni o via voli vale. Na cava o vinakata mo raica ni bera ni o vakatulewa? Mo raica ga na itaba ni mata ni vale? E macala ni o vinakata sara ga mo lai raica na vale qori, mo lako wavokita, oti mo curu e loma mo raica na kena rumu kece, kei na yasana kece. De dua o na via taroga e dua e kila na kena tara. Macala ga ni o na via kila na veika matailalai me baleta na vale qori ni bera ni o volia.

² Eda rawa tale ga ni cakava qori nida wilika se vulica na iVolatabu. E kaya e dua na ivakamacala ni ivola ni itukutuku e tu ena iVolatabu e vaka tiko “e dua na vale levu balavu, e titobu na kena yavu.” Koya gona, na cava meda cakava me matata vinaka vei keda na ka e tu ena iVolatabu? Ke o wiliwili ga vakatotolo o na rawa ni vulica ga eso na ka, qori na “ivakavuvuli rawarawa wale me baleta na veika vuni ni vosa ni Kalou.” (Iper. 5:12) Ia ke vinakati mo ‘curu i loma’ me vaka ga na vale, o na dikeva na veika matailalai e tu kina. Dua na iwalewale vinaka mo vulica kina na iVolatabu, ya nomu raica na sala e veisemati kina na kena itukutuku. Saga sara mo kila na ka dina o sa mai vakabauta kei na vuna o vakabauta kina.

3. Na cava e uqeta na yapositolo o Paula mera cakava na tacina vakayalo? Na vuna? (Efeso 3:​14-19)

³ Meda kila vinaka na ka kece ena Vosa ni Kalou, e tiko eso na ka e bibi meda vulica vakatitobu. E uqeti ira na tacina  vakayalo na yapositolo o Paula mera gumatua ni vulica na Vosa ni Kalou “me matata kina . . . na raba, na balavu, na cere, kei na titobu ni ka dina. Nira cakava qori ena “ti sara na [wakadra] qai dei na . . . yavu” ni nodra vakabauta. (Wilika Efeso 3:14-19.) E bibi meda cakava talega qori. Meda raica mada na sala meda dikeva kina na Vosa ni Kalou me rawa ni matata vinaka vei keda na kena ibalebale.

4. Na cava meda cakava meda toro volekati Jiova? Tukuna eso na ivakaraitaki.

⁴ Nida lotu vaKarisito, eda na sega ni lomavakacegu tu ga ena ivakavuvuli rawarawa ena iVolatabu. Ena veitokoni ni yalo tabu, eda vinakata meda vulica na “veika titobu . . . ni Kalou.” (1 Kor. 2:9, 10) O rawa ni vulica vakataki iko e dua na ulutaga mo toro voleka kina vei Jiova. Kena ivakaraitaki, o rawa ni vulica na sala e vakaraitaka kina o Jiova nona lomani ira nona dauveiqaravi ena gauna makawa kei na sala e laurai kina nona lomani iko. O rawa ni vulica tale ga na ituvatuva i Jiova me baleta na sokalou e Isireli qai vakatauvatana kei na ituvatuva ni noda sokaloutaki koya na lotu vaKarisito ena gauna qo. Se o rawa ni vulica vakatitobu na veiparofisai e vakayacora o Jisu ni bula e vuravura kei na nona cakacaka vakaitalatala.

5. E dua na ulutaga o vinakata mo vakekeli kina mo vulica vakataki iko?

⁵ Era tarogi eso na gonevuli gugumatua ni iVolatabu ena ka titobu era vinakata mera vulica ena Vosa ni Kalou. Eso na ka era tukuna e tiko ena kato “ Ulutaga me Vulici Vakatitobu.” O na marau vakalevu ni o vulica eso tale na ulutaga ni o vakekeli ena Watch Tower Publications Index se na iDusidusi ni Vakadidike ni iVakadinadina i Jiova. Ni o vulica vakatitobu na iVolatabu ena dei kina nomu vakabauta, o na rawa tale ga ni “kila na ka e baleta na Kalou.” (Vkai. 2:4, 5) Meda veivosakitaka mada qo eso na ka titobu ena iVolatabu meda vulica vakavinaka.

6. (a) Na cava na duidui ni lalawa kei na inaki? (b) Cava e tukuni kina ni “tawamudu” na inaki i Jiova me baleta na tamata kei na vuravura? (Efeso 3:⁠11)

⁶ Me kena ivakaraitaki dikeva na ka e kaya na iVolatabu me baleta na inaki ni Kalou. E duidui na lalawa kei na inaki. Na lalawa e vaka na gaunisala eda muria meda yacova yani na vanua eda lako tiko kina. Ia ke so na ka e vakalatilati ena gaunisala qori, eda na sega ni yacova na vanua qori. Na inaki, ya na vanua eda lako tiko kina. Eda kila vinaka na vanua eda lako tiko kina, ia e sega ni dua tu ga na kena gaunisala. E rawa ni veisau ke vinakati. Ka ni marau ni vakaraitaka vakalalai o Jiova na nona “inaki tawamudu” ena iVolatabu. (Efeso 3:11, raica tale ga na study note.) Se cava ga e yaco, o Jiova e rawa ni “cakava . . . na ka kece me rawa kina na nona inaki.” (Vkai. 16:4) Na itinitini ni ka e cakava ena tu ga me tawamudu. Na cava na inaki i Jiova? Na veiveisau cava e cakava me rawati kina qori?

7. Ni rau talaidredre na imatai ni tamata, e veisautaka vakacava o Jiova na sala me rawati kina na nona inaki? (Maciu 25:⁠34)

⁷ E tukuna na Kalou vei rau na imatai ni tamata na nona inaki me baleti rau. Oya me “[rau] vakawa, mera le levu mai,” rau “vakasinaiti vuravura,” rau “vakamalumalumutaka,” rau “lewa tale ga . . . na kabula kece” e vuravura. (Vkte. 1:28) Ni rau talaidredre o Atama kei Ivi, rau vakavuna me dewa na ivalavala ca ina vuvale ni kawatamata. E sega ni veisau na inaki i Jiova. E veisautaka ga na sala me rawati kina. E totolo nona tuvanaka me tauyavu e dua na Matanitu mai lomalagi me vakayacora nona inaki taumada me baleta na kawatamata kei na vuravura. (Wilika Maciu 25:34.) Ena nona gauna lokuci, e tala mai vuravura na Luvena ulumatua me vakavulici ira na lewenivanua me baleta na Matanitu ni Kalou, me solia tale ga nona bula me vakabulai keda mai na ivalavala ca kei na mate. Oti, e vakaturi o Jisu, e lesu tale i lomalagi me veiliutaki me Tui ni Matanitu ni Kalou. Ia e levu tale na ka meda vulica me baleta na inaki ni Kalou.

8. (a) Na cava na usutu ni iVolatabu? (b) Me vaka e tukuni ena Efeso 1:​8-11, cava na nona inaki levu o Jiova? (Raica na iyaloyalo ena waqana.)

⁸ Na usutu levu ni iVolatabu, me vakarokorokotaki na yaca i Jiova ni sa na vakayacori nona inaki me baleta na vuravura ni vakayagataka nona Matanitu e liutaka o Karisito. E sega ni veisau na inaki i Jiova. E yalataka ni na vakayacora na ka kece e tukuna. (Aisea 46:10, 11; Iper. 6:17, 18) Toso na gauna, ena veisautaki na vuravura me parataisi, era na tiko kina na kawa nei Atama kei Ivi era uasivi, era yalododonu tale ga, mera na “marautaka . . . na bula me tawamudu.” (Same 22:26) Ia e levu tale na ka ena vakayacora o Jiova. Na nona inaki levu mera duavata nona ibulibuli vuku mai lomalagi kei vuravura. Oti qori, o ira kece na bula tiko era na talairawarawa vua me nodra iLiuliu Cecere. (Wilika Efeso 1:8-11.) Eda qoroqoro ga ena sala e vakayacora kina o Jiova na nona inaki.

9. Ni o wilika na iVolatabu, cava o raica me baleta na veigauna se bera mai?

⁹ Vakasamataka mada na parofisai e cavuta o Jiova ena were o Iteni e volai ena Vakatekivu 3:15. b E dusia na veika ena yaco me vakayacori kina na nona inaki, ia  ena qai yaco ni oti tale e vica na udolu na yabaki. Qo e okati kina na yatukawa nei Eparama ena basika kina na Karisito. (Vkte. 22:15-18) Oti ya ena 33 G.V., e mokuti na bukubukuniyava i Jisu me vaka e parofisaitaki. (Caka. 3:13-15) Na iotioti ni ka me vakayacori ena parofisai qori, ya me qaqi na ulu i Setani. Ena qai vakayacori ni oti tale e sivia ni 1,000 na yabaki. (Vkta. 20:7-10) E levu tale na ka e vakaraitaka na iVolatabu me baleta na itinitini ni nodrau veimecaki na vuravura i Setani kei na isoqosoqo i Jiova.

10. (a) Na veika lelevu cava sa vakarau yaco? (b) Eda na vakarautaka vakacava na lomada kei na noda vakasama? (Raica na ivakamacala e ra.)

¹⁰ Vakasamataka na veika lelevu sa vakarau yaco e parofisaitaka na iVolatabu. Kena imatai, era na kacivaka na veimatanitu “na vakacegu kei na sautu!” (1 Ces. 5:2, 3) Ena qai “yaco vakidacala” na veivakararawataki levu nira ravuta na lotu lasu kece na veimatanitu. (Vkta. 17:16) Oti qori, ena laurai “na Luve ni tamata ni lako mai ena o kei lomalagi ena lewa kei na lagilagi e sega ni tukuni rawa.” (Maciu 24:30) Ena vakataulewa o Jisu vua na kawatamata, ena tawasea na sipi mai vei ira na me. (Maciu 25:31-33, 46) Ia ena soli isele tiko ga o Setani. Ena levu ni nona cudru ena bukani ira na veimatanitu, e vakatoka na iVolatabu me o Koki ena vanua o Mekoki me ravuti ira na tamata i Jiova. (Isik. 38:2, 10, 11) Ena loma ni dua na gauna qori, era na kumuni na ivovo ni lumuti i lomalagi mera tomani Karisito kei na nona mataivalu vakalomalagi mera vakaitavi ena ivalu na Amaketoni, na itinitini ni veivakararawataki levu. c (Maciu 24:31; Vkta. 16:14, 16) Oti, sa na qai tekivu na Duanaudolu na Yabaki ni Veiliutaki i Karisito.—Vkta. 20:6.

11. Na cava nomu rai me baleta na inuinui ni bula tawamudu? (Raica tale ga na iyaloyalo.)

¹¹ Ia qo vakasamataka mada ni sa oti na duanaudolu na yabaki qori. E kaya na iVolatabu ni Dauveibuli e ‘biuta e lomada na gauna e sega ni mudu.’ (Dauv. 3:11)  Vakasamataka tale ga na kena ibalebale ya vei iko kei na nomu veiwekani kei Jiova. E kaya na ivola Toro Voleka Vei Jiova, tabana e 319: “Nida sa na bula me vica na drau na yabaki, vica na udolu, vica na milioni, se vica sara na bilioni, sa na qai levu sara na ka eda kila me baleti Jiova ni vakatauvatani kei na ka eda kila ena gauna oqo. Ia se levu ga na ka se vo meda vulica. . . . E levu na veimataqali ka e tu meda na cakava ena noda bula nida sa na bula tawamudu, ia na tikina totoka duadua oya na noda na saga meda toro voleka tiko ga vei Jiova.” Ena gauna qo nida vulica tiko ga na Vosa ni Kalou, cava tale meda dikeva?

12. Eda na sarava vakacava na lomalagi? Tukuna e dua na kena ivakaraitaki.

¹² E vakaraitaka sara vakalailai na Vosa ni Kalou na veika me baleta nona tiko “mai cake” o Jiova. (Aisea 33:5) E vakatakila tale ga na iVolatabu na veika vakatubuqoroqoro me baleti Jiova kei na nona isoqosoqo vakalomalagi. (Aisea 6:1-4; Tani. 7:9, 10; Vkta. 4:1-6) Kena ivakaraitaki, eda wilika na veika totoka e raica o Isikeli ni “tadola na lomalagi [qai] raica sara na raivotu ni Kalou.”—Isik. 1:1.

13. Na cava o taleitaka me baleta na itavi i Jisu mai lomalagi e tukuni ena Iperiu 4:​14-16?

¹³ Vakasamataka tale ga na itavi i Jisu mai lomalagi ni sa veiliutaki tiko me noda Tui, me noda Bete Levu dauveinanumi tale ga. Ena vukuna eda rawa kina ni torova na “idabedabe vakaturaga ni loloma soli wale” ni Kalou ena masu qai kerea me lomani keda, me vukei keda tale ga “ena gauna eda gadreva kina.” (Wilika Iperiu 4:14-16.) Meda dau vakasamataka mada ga e veisiga na veika rau cakava tiko me baleti keda mai lomalagi o Jiova kei Jisu. Me uqeti keda mada ga  vakalevu na nodrau loloma meda gumatua kina ena noda veiqaravi kei na noda sokalou.—2 Kor. 5:14, 15.

14. Na cava e dua na sala vinaka duadua meda vakaraitaka kina na noda lomani Jiova kei Jisu? (Raica tale ga na iyaloyalo.)

¹⁴ Dua na sala vinaka duadua meda vakaraitaka kina na levu ni noda vakavinavinaka vua na Kalou kei na Luvena ya noda saga meda vukea eso tale mera iVakadinadina i Jiova, mera tisaipeli tale ga i Jisu. (Maciu 28:19, 20) Qori sara ga na ka e cakava na yapositolo o Paula me vakaraitaka kina na nona vakavinavinaka vua na Kalou kei Karisito. E kila tiko ni loma i Jiova “me bula na tamata kece ga, mera mai kila vinaka na ka dina.” (1 Tim. 2:3, 4) E gumatua ena nona cakacaka vakaitalatala me vukea e levu, me “bau vakabula kina eso.”—1 Kor. 9:22, 23.

15. Me vaka e tukuni ena Same 1:​2, cava eda na marau kina?

¹⁵ E vakamacalataka na daunisame ni dau mamarau o koya e “marautaka na lawa i Jiova qai wilika e ra na nona lawa ena siga kei na bogi,” ena vuavuaivinaka tale ga na ka e cakava. (Same 1:1-3; vmr.) E tukuna o Joseph Rotherham, e dua na dauvakadewa iVolatabu ena nona ivola Studies in the Psalms, ni o koya e “taleitaka vakalevu na veidusimaki vakayalo, ena vaqara, vulica, ena vakasamataka tale ga vakatitobu.” E tukuna tale ga me baleti koya e dau wili iVolatabu, “ni cava e dua na siga qai sega ni wili iVolatabu, sa na maumau sara ga na siga qori.” O na marautaka mo vulica na iVolatabu ni o raica e levu na veika bibi e tu kina kei na kena veisemati. O na marau sara ga mo vulica na ka kece me baleta na Vosa ni Kalou!

16. Na cava eda na veivosakitaka ena ulutaga tarava?

¹⁶ E sega ni dredre meda kila na ka dina totoka e vakavulici keda kina o Jiova. Eda na veivosakitaka ena ulutaga tarava e dua na ka titobu vakaivolatabu, na valenisoro levu vakayalo i Jiova, e vakamacalataka o Paula ena nona ivola vei ira na Iperiu lotu vaKarisito. Mo marautaka mada ga nomu vulica na ulutaga qori.