E BIBI na sere e Isireli makawa. E laurai ena iVolatabu ni vakayagataki na ivakatagi, era dau lagasere tale ga. E dua na iwase levu ni iVolatabu e okati kina na Sere. Kena ivakaraitaki, na ivola na Same, Sere i Solomoni, kei na Lele i Jeremaia. E kaya e dua na ivola me baleta na bula ena gauna vakaivolatabu (Music in Biblical Life), ni laurai ena iVolatabu nira vakayagataka vakalevu na Isireli na sere ena nodra bula ni veisiga.

Sere ena veisiga. Era dau vakayagataka na ivakatagi kei na sere na Isireli mera vakaraitaka na lomadra. (Aisea 30:29) Era qiria na tibereli na yalewa, era lagasere ena marau, era meke tale ga ni buli e dua na tui, nira qaqa ena ivalu, kei na so tale na soqo vakayalo. (Dvei. 11:34; 1 Sam. 18:​6, 7; 1 Tui 1:​39, 40) Era dau lagata tale ga na sere ni lolosi nira rarawataka nona mate e dua. (2 Vei. 35:25) E kaya na ivola na McClintock and Strong’s Cyclopedia, e macala “nira taleitaka na lagasere na Iperiu.”

Sere ena valenitui. Era dau taleitaka na sere na Tui Isireli. E kacivi Tevita o Tui Saula ina valenitui me dau qiria na api. (1 Sam. 16:​18, 23) Toso na gauna ni sa tui o Tevita, e bulia eso na iyaya ni ivakatagi, eso na sere totoka, e tuvanaki ira tale ga na daulagasere kei na daunivakatagi ena valenisoro i Jiova. (2 Vei. 7:6; Emosi 6:5) Era tiko tale ga na tagane kei na yalewa dau lagasere ena valenitui nei Tui Solomoni.​—Dauv. 2:8.

Sere ni sokalou. Koya e bibi duadua, nira vakayagataka na Isireli na ivakatagi mera sokaloutaki Jiova kina. Era le 4,000 na daunivakatagi ena valenisoro e Jerusalemi. (1 Vei. 23:5) Era qiria na sibali, ivakatagi vakawa, na api, era uvu biukila tale ga. (2 Vei. 5:12) Ia sega ni o ira ga na daunivakatagi era sokaloutaki Jiova. E levu tale ga na Isireli era lagata na Sere ni Cabe ena nodra ilakolako e veiyabaki i Jerusalemi mera tiko ena soqo. (Same 120-134) E kaya na nodra ivola na Jiu, nira dau lagata na Isireli eso na sere mai na Same a ena nodra kanavata ni Lakosivia.

Nikua se bibi tiko ga na sere vei keda na tamata ni Kalou. (Jeme. 5:13) E okati ena noda sokalou na lagasere. (Efeso 5:19) E vakaduavatataki keda kei ira na mataveitacini. (Kolo. 3:16) E vakaukauataki keda nida sotava na veika dredre. (Caka. 16:25) Na sere e dua na sala vinaka meda vakaraitaka kina vei Jiova nida vakabauti koya, eda lomani koya tale ga.