Na varada e icurucuru ina Loqi Tabu ni valenisoro. E tukuni ena so na itabataba ni New World Translation of the Holy Scriptures e tabaki ni bera na 2023, “Na balavu ni varada e tiko e liu e 20 na kiupiti, e tautauvata kei na raba ni vale, na kena cere e 120.” (2 Vei. 3:4) E kaya tale ga eso na vakadewa, ni “120 na kiupiti” na kena cere se 53 na mita.

Ia e kaya na itabataba ni New World Translation ni 2023 me baleta na varada ni valenisoro i Solomoni: “Na kena cere e 20 na kiupiti,” se 9 na mita. a Dikeva mada eso na vuna e veisau kina qo.

E sega ni tukuni ena 1 Tui 6:3 na cere ni varada. E tukuna o Jeremaia ena tikinivolatabu qori na kena balavu kei na kena raba, e sega ni tukuna na kena cere. Ena wase tarava e vakamacalataka vakamatailalai eso tale na ka me baleta na valenisoro, wili kina na Wasawasa e buli ena kaukamea, na tini na qiqi, kei na rua na duru kopa ena varada. (1 Tui 7:​15-37) Kevaka e sivia ni 50 na mita na cere ni varada mai na valenisoro, cava e sega ni tukuna kina qori o Jeremaia? Ni oti e vica vata na senitiuri, era vola na Jiu ni sega ni sivita na valenisoro i Solomoni na varada.

Era lomatarotarotaka na daunivakadidike ke rawa ni taura na bi ni valenisoro na varada e 120 na kiupiti na kena cere. Ena gauna makawa, na vale cecere e tara ena vatu kei na biriki, me vaka na matamata ni valenisoro e Ijipita, e raba na kena yavu qai lailai ni toso cake tiko. Ia e duatani na valenisoro i Solomoni. Era vakabauta na daunivakadidike ni sega ni sivia na 6 na kiupiti se 2.7 na mita na vavaku ni lalaga. E kaya e dua na daunitukutuku makawa ni taravale o Theodor Busink: “Ni yavutaki ena vavaku ni lalaga na [icurucuru ni valenisoro], e sega ni rawa ni 120 na kiupiti na [cere] ni varada.”

E rairai cala na kena lavetaki na ka e tukuni ena 2 Veigauna 3:4. E tukuni ena so na ivolavivigi makawa ena tikinivolatabu qo ni “120.” Ia e kaya eso tale na ivolavivigi nuitaki me vaka na Codex Alexandrinus ni ikalima ni senitiuri kei na Codex Ambrosianus ni ikaono ni senitiuri ni “20 na kiupiti.” Na cava e rairai cala kina nona lavetaka e dua na vunivola me “120”? Baleta ni tautauvata na irairai ni vosa “drau” kei na “kiupiti” ena vosa vakaIperiu. Koya gona, e rairai cala nona vola na vunivola na vosa “drau,” sega ni “kiupiti.”

Nida saga meda kila na veika matailailai me baleta na valenisoro i Solomoni, e bibi meda kauaitaka ga na ka e dusia na valenisoro vakayalo. Eda vakavinavinaka ni o Jiova e sureti keda kece na nona dauveiqaravi meda sokaloutaki koya ena valenisoro qori!​—Iper. 9:​11-14; Vkta. 3:12; 7:​9-17.