“AU PAPITAISO niu se yabaki 15, ni oti e ono na vula au painia veivuke sara. Ni oti e dua na yabaki, au vakalewe fomu meu painia tudei. Niu tauri ivola oti ga ena sekeneri, au kerea meu veiqaravi ena vanua e vinakati kina vakalevu na dautukutuku ni Matanitu. Au via biubiu mai na taoni au susu kina, meu yawaki bu tale ga ni keirau vakaitikotiko vata, e sega ni iVakadinadina i Jiova. Dua na ka noqu rarawa ni tukuna na ivakatawa ni tabacakacaka niu sa na veivuke ga ena taoni au susu kina! Au sega ni via tukuna vua na lomaqu. Au gole cuvacuva niu vakasamataka na ka e tukuna. Au tukuna vei koya keirau painia vata tiko: “Au sa vakataki Jona. E muri e qai gole ga i Ninive o Jona. Koya gona, au na veiqaravi ga ena vanua au lesi kina.”

“Sa va na yabaki noqu painia voli ena taoni au susu kina. Au vakadinata na yaga ni kena muri na veidusimaki. Noqu leqa sara ga na rai cala e tu vei au. Dua na ka noqu marau nikua. Ena dua na vula, au tauyavutaka e 24 na vuli iVolatabu. Au via vakavinavinakataki Jiova niu rawa ni vuli iVolatabu kei bu, ni a dau tusaqati au e liu.”

A vinakati vua e dua na gonevuli iVolatabu e Viti me digia me tiko ena soqo ni veiwasewase se gole kei watina ena siganisucu. A vakatara o watina me tiko ena soqo ni veiwasewase. A tukuna o yalewa ni na qai tomani koya ena siganisucu ni oti na soqo. Ni lesu mai ena soqo, a nanuma de vinaka me kua ni cakava na ka ena vakaleqa tale kina nona bula vakayalo, a mani sega ni lako.

Tukuna sara vei ira na weka o tagane ni na qai muri mai o watina ni oti na soqo ni iVakadinadina i Jiova. Era sauma sara: “Ena sega tu ga ni lako mai; era sega ni dau caka siganisucu na iVakadinadina i Jiova!” *

Dua na ka nona sakitaki yalewa o tagane ni dei tiko ga ena nona vakabauta kei na nona lewaeloma. Na nona yalodina a rawa kina ni vunau vei tagane kei ira na weka. Cava e qai yaco? A vakadonuya o tagane me vuli iVolatabu qai gole vata kei watina ena soqoni.