1. Na cava eda kaya kina ni kaukaua na Vosa ni Kalou? (Raica na imatai ni iyaloyalo.)

EDA vakabauta na dauveiqaravi i Jiova ni ‘bula qai kaukaua’ na nona itukutuku na Kalou ena iVolatabu. (Iper. 4:12) Levu era vakadinadinataka ni rawa ni veisautaka na bula na kaukaua ni Vosa ni Kalou. Eso na tacida era daubutako e liu, bobula ina waigaga ni veivakamatenitaki se veiyacovi tawadodonu. So tale era rawaka ena vuravura qo, ia era liaca nira sega ni marau. (Dauv. 2:3-11) So tale era rairai veilecayaki qai sega tu nodra inuinui, ia na kaukaua ni Vosa ni Kalou e vukei ira mera muria na sala ni bula. De dua o sa dau wilika qai marautaka e levu na italanoa ena Vale ni Vakatawa ena ulutaga “E Veisautaka na Bula na iVolatabu.” O na raica ni gauna era ciqoma kina na ka dina e levu, era na vakavinakataka tiko ga na nodra bula vakayalo ena veivuke ni iVolatabu.

2. E kaukaua vakacava na Vosa ni Kalou ena imatai ni senitiuri?

² Vakacava meda kurabuitaka nodra cakava na veisau e levu nikua nira vulica na iVolatabu? Sega! Eda lai nanumi ira kina na tacida ena imatai ni senitiuri e nodra inuinui na bula i lomalagi. (Wilika 1 Korinica 6:9-11.) Ni cavuta o Paula na  mataqali tamata era na sega ni rawata na Matanitu ni Kalou, e kaya tale: “Eso sara ga vei kemuni oni a va tu ya.” Era veisau ena veiuqeti ni Vosa ni Kalou kei na yalo tabu. Nira sa ciqoma tale ga na ka dina, ena vinakati mera valuta eso na ka ena vakaleqa nodra bula vakayalo. E cavuti ena iVolatabu e dua na lotu vaKarisito lumuti ena imatai ni senitiuri a vakasivoi, e muri e qai vakalesui tale ina ivavakoso. (1 Kor. 5:1-5; 2 Kor. 2:5-8) E veiuqeti dina noda raica na duidui ituvaki era sotava na tacida ra qai valuta ena kaukaua ni Vosa ni Kalou.

3. Na cava ena veivosakitaki ena ulutaga qo?

³ Ni iyaragi kaukaua na Vosa ni Kalou qai tu vakarawarawa, e bibi gona meda vakayagataka sara vakavinaka. (2 Tim. 2:15) Ena veivosakitaki ena ulutaga qo na sala meda vakayagataka vinaka kina na kaukaua ni Vosa ni Kalou (1) ena noda bula, (2) ena noda cakacaka vakaitalatala, kei na (3) nida vunau ena buturara. Ena uqeti keda qori meda lomana na Tamada vakalomalagi da qai vakavinavinakataki koya, ni vakavulici keda meda vinaka kina.—Aisea 48:17.

4. (a) Na cava meda cakava me uqeti keda kina na Vosa ni Kalou? (b) Gauna cava o dau wili iVolatabu kina?

⁴ Me rawa ni uqeti keda na Vosa ni Kalou, ena vinakati meda wilika wasoma e veisiga ke rawa. (Josua 1:8) Macala ga nida dau osooso. Ia eda sega ni vinakata me vakaleqa noda ituvatuva ni wili iVolatabu eso na ka, se itavi bibi mada ga. (Wilika Efeso 5:15, 16.) Levu era veisautaka nodra ituvatuva me rawa nira wili iVolatabu kina e veisiga, eso ena mataka, so tale ena sigalevu se yakavi. Era duavata kei na ka e vola na daunisame: “Dua na ka noqu taleitaka na nomuni lawa! Au vakasamataka vakabibi ena siga taucoko.”—Same 119:97.

5, 6. (a) Na cava e bibi kina na vakasama vakatitobu? (b) Cava meda cakava me yaga kina na vakasama vakatitobu? (c) E yaga vakacava vei iko na wili iVolatabu kei na vakasama vakatitobu?

⁵ Me ikuri ni wili iVolatabu, e bibi tale ga meda vakasamataka vakatitobu na ka eda wilika. (Same 1:1-3) Eda na rawa ni vakasamataka na duidui ituvaki meda muria kina na kena ivakasala vuku. Se da mani wilika na Vosa ni Kalou ena kena e tabaki se iyaya vakalivaliva, me noda isausau me tara na lomada.

⁶ Na cava meda cakava me yaga kina noda vakasama vakatitobu? Levu era raica ni yaga nodra cegu nira wilika oti e dua na tikinivolatabu ra qai taroga eso  na taro va qo: ‘Na cava au vulica eke me baleti Jiova? Au sa muria tiko vakacava nikua na ivakavuvuli vakaivolatabu qo? Cava au rawa ni vakavinakataka?’ Nida masu qai vakasamataka vakatitobu na Vosa ni Kalou, ena gu na lomada meda muria vinaka na kena ivakasala. Io, sa rawa nida vakayagataka vinaka na kaukaua ni Vosa ni Kalou ena noda bula.—2 Kor. 10:4, 5.

7. Eda na vakayagataka vinaka vakacava na Vosa ni Kalou ena cakacaka vakaitalatala?

⁷ Eda na vakayagataka vinaka vakacava na Vosa ni Kalou ena cakacaka vakaitalatala? Meda vakayagataka sara ga nida vunau qai veivakavulici. E tukuna e dua na tacida tagane me baleta na tikina qori, “Ke drau cakacaka vata kei Jiova ena vunau e veivale, vakacava o na vosa tu ga se vosa tale ga o koya?” Qo na tikina bibi: Nida wilika na Vosa ni Kalou ena cakacaka vakaitalatala, sa vosa sara tiko ga o Jiova vei itaukeinivale. Na tikinivolatabu e digitaki vinaka ena kaukaua sara ni vakatauvatani kei na ka eda tukuna. (1 Ces. 2:13) Mo taroga, ‘Au dau wilika e dua na tikinivolatabu vei ira kece au vunau kina?’

8. Na cava eda na sega ni wilika wale ga kina na tikinivolatabu?

⁸ E macala nida na sega ni wilika wale ga na tikinivolatabu vei ira eda veivosaki. Na vuna? Levu e lailai na ka era kila se sega sara ga nira kila na iVolatabu. E dina qori nikua me vaka ga ena imatai ni senitiuri. (Roma 10:2) Meda kua ni nanuma ni sa rawa ni kilai na tikina bibi ena gauna ga e wiliki kina. Ena vinakati meda vakavotuya na tikina bibi, de dua me wiliki tale na matavosa bibi da qai vakamacalataka na kena ibalebale. Nida cakava qori, ena tara na lomana kei na  nona vakasama na Vosa ni Kalou.—Wilika Luke 24:32.

9. Eda na uqeta vakacava me dokai na iVolatabu? Tukuna e dua na kena ivakaraitaki.

⁹ Eda na vakamacalataka tale ga na iVolatabu ena sala mera doka kina na vakarorogo. Kena ivakaraitaki, eda rawa ni kaya, “Meda raica mada na ka e tukuna na Dauveibuli ena tikina qo.” Nida veivosaki tiko kei na dua e sega ni lotu vaKarisito, eda rawa ni kaya, “Rogoca mada na ka e tukuna na iVolatabu.” Se nida vunau vua e dua e sega ni lotu, eda rawa ni kaya, “O sa bau rogoca na vosa vakaibalebale qo e volai ena gauna makawa?” E bibi meda vakasamataki ira yadudua na vakarorogo da qai veisautaka noda ivakamacala me ganiti ira.—1 Kor. 9:22, 23.

10. (a) Tukuna na ka e cakava e dua na tacida. (b) O vakadinata vakacava ni kaukaua na Vosa ni Kalou ena nomu cakacaka vakaitalatala?

¹⁰ Levu era vakadinata ni yaga vakalevu na nodra vakayagataka na Vosa ni Kalou ena cakacaka vakaitalatala. Kena ivakaraitaki. Dua na tacida tagane e sikova e dua na turaga itabaqase, sa vica na yabaki nona dau wilika na noda mekesini. A sega ni solia na tacida qo na itabataba vou ni Vale ni Vakatawa, e nanuma me wilika mada ga na tikinivolatabu e tiko kina. E wilika na 2 Korinica 1:3, 4, e tukuni kina: “Na Tama ni yalololoma, na Kalou e dau vakacegui keda ena ka kece, e vakacegui keda ena veika dredre kece eda sotava.” E tarai koya sara ga na itaukeinivale, mani kerea me wilika tale na tacida na tikinivolatabu ya. E tukuna ni rau vinakata vakaveiwatini me rau vakacegui, e taleitaka na itukutuku vakaivolatabu. Vakacava o vakabauta ni Vosa ni Kalou e kaukaua ena noda cakacaka vakaitalatala?—Caka. 19:20.

11. Na cava mera vakadeitaka na tacida tagane era veivakavulici ena buturara?

¹¹ Eda dau marautaka na soqoni vaKarisito, soqo ni tabacakacaka kei na soqo ni veiwasewase. Na inaki bibi ni noda tiko ena soqo va qori meda sokaloutaki Jiova. E yaga tale ga vakalevu na veidusimaki vakayalo eda rogoca kina. E ka dokai dina vei ira na tacida tagane mera vakaitavi ena buturara. Era kila tale ga ni bibi nodra itavi. (Jeme. 3:1) Mera vakadeitaka ni ka era vakavulica e yavutaki ena Vosa ni Kalou. Ke o lesi mo veivakavulici ena buturara, o na vakayagataka vakacava na kaukaua ni Vosa ni Kalou?

12. Ena vakadeitaka vakacava o koya e vunau ni yavutaki ena iVolatabu nona veivakavulici?

¹² Mo vakadeitaka me yavu ni nomu veivakavulici na iVolatabu. (Joni 7:16) Cava e okati kina? Mo qarauna na irogo, vosa vakatautauvata, se ivakarau ni nomu veivakavulici me kua ni buawa kina se sega ni vakaibalebale na tikinivolatabu o wilika. Nanuma tale ga na vinaka ni nomu veivakavulici e sega ni vakatau ena levu ni tikinivolatabu o wilika. Ena sega ni kasa ena nodra vakasama na vakarorogo ke levu wale tu ga na tikinivolatabu e wiliki. Mo digia vinaka na tikinivolatabu veiganiti, wilika, vakamacalataka, vakayagataka na vosa vakatautauvata qai tukuna na sala me vakayagataki kina. (Niem. 8:8) Ke yavutaki nomu itavi ena suinivunau e vakarautaka na isoqosoqo, mo vulica vinaka, wilika tale ga na kena tikinivolatabu. Mo vakadeitaka se veisemati vakacava na suinivunau kei na tikinivolatabu era sega ni lavetaki. Oti mo digia vinaka na tikinivolatabu o na vakayagataka mo vakabibitaka kina na tikina mai na suinivunau.  (Me ikuri ni ivakamacala, raica na ivola Me Yaga Nomu Curu ena Koronivuli ni Vuli Vunau ena lesoni 21 ina 23.) Koya e bibi sara, kerea na veivuke i Jiova mo wasea kina na itukutuku talei qo mai na nona Vosa.—Wilika Esera 7:10; Vosa Vakaibalebale 3:13, 14.

13. (a) E yaga vakacava vua e dua na tacida yalewa na tikinivolatabu e vakayagataki ena soqoni? (b) E bau yaga vei iko e dua na tikinivolatabu e vakayagataki ena noda soqoni?

¹³ E uqeta sara ga e dua na tacida yalewa mai Ositerelia na vakayagataki ni tikinivolatabu ena soqoni vaKarisito. E dau vakalolomataki ni se gone, ia e ciqoma na ka dina mai na Vosa ni Kalou qai yalataka nona bula vei Jiova. E dredre tiko ga me vakabauta ni lomani koya o Jiova. Toso na gauna e qai vakadeitaka ni lomani koya dina na Kalou. Na cava e vakabauta kina qori? Dua na gauna, a vakasamataka vakatitobu na tikinivolatabu e vakayagataki ena soqoni qai sema kei na vo ni tikinivolatabu. * Vakacava o vakadinata tale ga na kaukaua ni Vosa ni Kalou ena soqoni, soqo ni tabacakacaka kei na soqo ni veiwasewase?—Niem. 8:12.

14. Eda na vakavinavinakataka vakacava na Vosa i Jiova?

¹⁴ Eda vakavinavinakataki Jiova ena vuku ni nona Vosa na iVolatabu. E vakarautaka vakayalololoma qai dina ena nona yalayala ni na dei tu ga. (1 Pita 1:24, 25) Koya gona, ena yaga meda wilika wasoma na Vosa ni Kalou, vakayagataka ena noda bula, da qai vukea kina eso tale. Nida cakava qori, eda vakaraitaka tiko nida doka na iyau talei vakalou, da qai vakavinavinakataki Jiova o koya e vakavuna.