ERA maliwai ira na dauveiqaravi ni Kalou e vuravura raraba na qase ni ivavakoso, ra qai mareqeta na nodra ilesilesi. Era vu ni veivakalougatataki vei keda kece! Dua na gauna tiko ga qo, e vakayacori e dua na veisau me baleti ira. Era uqeti na qase ni ivavakoso itabaqase mera lesia eso na itavi bibi era qarava voli vei ira na qase ni ivavakoso gone. Cava eso na kena ivakaraitaki?

Ena ituvatuva vou qo, sa ra na cegu mai na nodra itavi na ivakatawa ni tabacakacaka kei ira na dauveivakavulici ena vuli vakalou nira sa yabaki 70. Era uqeti tale ga na qase ni ivavakoso era sa yabaki 80, mera lesia vei ira na qase ni ivavakoso gone na itavi era qarava voli me vaka na kodineita ni Komiti ni Tabana se kodineita ni ilawalawa qase ena ivavakoso era lewena. Cava nodra rai na tacida itabaqase qori me baleta na veisau? E laurai nira yalodina tiko ga vei Jiova kei na nona isoqosoqo!

E kaya o Ken, sa voleka ni 49 na yabaki na nona lewe tu ni Komiti ni Tabana: “Au duavata sara ga kei na vakatulewa qori. Na mataka ni siga e tukuni kina vei au, au se qai masulaka sara tiko ga vei Jiova me lesi e dua na tacida tagane gone me kodineita.” Qori tale ga na ka era dau tukuna na qase ni ivavakoso itabaqase era veiqaravi tu ena yalodina e vuravura  raraba. Era taleitaka na itabaqase qo mera qaravi ira na tacidra, e sega gona ni rawarawa ni tukuni vei ira mera cegu.

E kaya o Esperandio, e kodineita tu ni ivavakoso: “Au rarawa vakalailai.” Ia e qai kaya, “E vinakati meu qarava vinaka mada noqu bula niu tautauvimate tiko.” Me vaka ga eda namaka, e qaravi Jiova tiko ga ena yalodina o Esperandio, e vu ni veivakalougatataki tale ga ena nona ivavakoso.

Vakacava ni veisau na nodra ilesilesi na ivakatawa dauveilakoyaki sa dede nodra veiqaravi? E kaya o Allan, sa 38 na yabaki nona veiqaravi tu vakaivakatawa dauveilakoyaki, “Gauna au kila kina, au kurabui dina.” Ia e raica rawa na yaga ni nodra vakavulici na qase ni ivavakoso gone. E yalodina tiko ga ena nona veiqaravi.

O Russel sa 40 na yabaki nona veiqaravi voli vakaivakatawa dauveilakoyaki, e dau veivakavulici tale ga ena vuli vakalou. E kaya ni rau a sega tale ga ni marautaka na veisau qori. “Keirau taleitaka vakalevu na neirau ilesilesi, keirau nanuma ni keirau se kaukaua, se rawa ni tomani na qaravi itavi.” Nikua rau sa vakayagataka tiko na ka rau vulica o Russell kei watina me rau vukei ira kina na lewe ni nodrau ivavakoso. Erau vu ni marau vei ira na vo ni dautukutuku.

Kevaka mada ga e sega ni tautauvata na kemu ituvaki kei ira na vakamacalataki tiko qo, ena vukei iko na 2 Samuela mo taura rawa na ka era vakila.

Vakasamataka mada na nona saqati Tui Tevita o Apisalome na luvena. E dro o Tevita mai Jerusalemi i Meneimi, ena tokalau ni uciwai na Joritani. Ni tiko e kea kei ira nona ilala, era vinakata eso na ka lalai mera bula kina. Vakacava se nanuma tiko na ka e qai yaco?

Eratou cautaka e tolu na turaga dau lomasoli ena itikotiko qori na imocemoce, veimataqali kakana, kei na iyaya ni kana. Dua vei ratou o Pasilai. (2 Sam. 17:27-29) Na gauna ga e mudu kina nona veitusaqati o Apisalomi, sa rawa ni lesu i Jerusalemi o Tevita, mani kauti koya lesu o Pasilai me yaco sara ina Joritani. E qai uqeti koya o Tevita me lako yani Jerusalemi. E tu vakarau na tui me solia vua na kakana, ia o Pasilai e “turaga vutuniyau sara,” ena sega ni gadreva na kakana qori. (2 Sam. 19:31-33) E taleitaka o Tevita na itovo i Pasilai, ena marautaka tale ga me rogoca nona vakatutu. Ena dua dina na itavi dokai me vakaitikotiko qai cakacaka ena valenitui!

Ni yalomalumalumu qai donu nona rai, e tukuna vakadodonu o Pasilai ni sa yabaki 80. E tomana: “Vakacava, au se rawa ni vakaduiduitaka na ka vinaka kei na ka ca?” Na cava na ibalebale ni ka e kaya? E vuku o Pasilai ni sa dede sara nona bula. E se rawa tale ga ni yaga na nona ivakasala, me vaka ga era qai cakava na “qase” ena dua na gauna e muri vei Tui Riopoami. (1 Tui 12:6, 7; Same 92:12-14; Vkai. 16:31) Ni taroga gona o Pasilai ke rawa ni vakaduiduitaka na ka vinaka kei na ka  ca, e rairai vakaibalebaletaka tiko ni sa sega ni cakava rawa eso na ka, se sa yalani nona kaukaua ena vuku ni bula vaqase. E kaya tale ga ni sa sega ni vakila na ikanakana ni kakana, se me rogoca vinaka na ka. (Dauv. 12:4, 5) E uqeti Tevita gona o Pasilai me kauti Kimami i Jerusalemi ni se gone, qo e rairai luvei Pasilai.—2 Sam. 19:35-40.

Ni vakasamataki na veisau e vakayacori ena vuku ni bula vakaitabaqase, e tautauvata sara ga kei na rai a tiko vei Pasilai. Oya na vuna ena vinakati kina nikua me kua ni vakasamataki ga na kena ituvaki e dua se ka e rawa ni cakava, me vaka e yaco vei Pasilai. A vinakati me dikevi se itavi cava era rawa ni qarava na qase ni ivavakoso yalodina e vuravura raraba.

O ira na lotu vaKarisito itabaqase yalomalumalumu qo era kila ni na vakaukauataki na isoqosoqo i Jiova qai tubu tiko ga, ke lesi na itavi era qarava voli mai vakadede vei ira na tacida tagane gone. Levu na gauna o ira sara ga na tacida itabaqase qo era na vakavulici ira me vaka ga nona a rairai vakavulici luvena o Pasilai, vaka kina na yapositolo o Paula vei Timoci. (1 Kor. 4:17; Fpai. 2:20-22) Nikua, era sa vakadinadinataka na tacida tagane gone qori nira “isolisoli tamata” era rawa ni veivuke me “buli cake kina na yago i Karisito.”—Efeso 4:8-12; vakatauvatana kei na Tiko Voli Mai na Lekutu 11:16, 17, 29.

E levu na dauveiqaravi ni Kalou ena ivavakoso e vuravura raraba era kerea mera cegu ena so na itavi, era vakarabailevutaka nodra veiqaravi ena so tale na sala.

E kaya o Marco, sa 19 na yabaki nona veiqaravi tu vakaivakatawa dauveilakoyaki: “Eso na tacida yalewa ena ivavakoso e sega ni tiko ena dina o kedra isa, na veiveisau vou gona qo au rawa kina ni dau sikovi ira na watidra.

E kaya o Geraldo, sa 28 na yabaki nona veiqaravi vakaivakatawa dauveilakoyaki: “Dua tale ga neirau isausau vou nodra vukei na malumalumu tu vakayalo, me levu tale ga na vuli iVolatabu.” E vola mai ni sa 15 tiko na nodrau vuli iVolatabu vakaveiwatini, era sa dau mai soqoni tale ga e vica era malumu tu vakayalo.

E kaya o Allan, a tukuni taumada: “Qo sa vakatabakidua sara ga neirau vakaitavi ena cakacaka vakavunau. Keirau marautaka tiko na vunau e matanalevu, ena yalava ni bisinisi, vaka kina o ira na tiko voleka. E rua gona rau sa lako sara mai ena noda Vale ni Soqoni.”

Ke o tacida tagane dau nuitaki, o yalodina tale ga, o qai lesi ena dua na itavi vou ni o maliwai ira tiko na dauveiqaravi ni Kalou, e tiko e dua tale na sala o rawa ni vakaitavi kina. O rawa ni tokona na cakacaka i Jiova ni o vakavulici ira na tagane gone ena ivavakoso ena levu ni ka o kila tu. Kaya o Russel, sa cavuti oti mai: “E vakavulici ira qai vakayagataki ira na tamata gone gugumatua o Jiova. E yaga dina vei ira na mataveitacini na bulabula ni nodra veivakavulici kei na veivakatawani!”—Raica na kato “ Vukei Ira na Tacida Tagane Gone Mera Toso Vakayalo.”

Ke veisau na nomu ilesilesi, me tiko mada ga vei iko na rai donu. E uqeti ira e dua na iwiliwili levu nomu dau veiqaravi mai vu ni lomamu, vinakati gona mo tomana tiko ga. Era lomani iko, ena sega tale ga ni seavu nodra loloma qori.

Koya e bibi sara ni o vakamarautaki Jiova. Ena “sega ni guilecava na nomuni cakacaka kei na loloma oni vakaraitaka ena vuku ni yacana, ena nomuni qaravi ira na yalosavasava, qai sega ni cegu na nomuni veiqaravi.” (Iper. 6:10) Na veiuqeti vakalou qori e vakadeitaka vei keda kece ni ka e yalataka na Kalou, e vauci tale tiko ga kina na noda cakacaka ena veigauna sa sivi. Oni sa rui mareqeti ena mata i Jiova, e sega tale ga ni guilecava na  itavi oni sa cakava qai sega ni cegu nomuni vakamarautaki koya nikua!

Ia vakacava ke sega ni veisau na kemu ituvaki me vakataki ira na tukuni toka mai cake? E tiko tale ga na nomu itavi. Ena sala cava?

Ke o veimaliwai tiko kei na dua na tacida tagane itabaqase e veisau nona ilesilesi, e rawa ni yaga vei iko na nona kilaka ena vica vata na yabaki kei na nona sa matua tu ena itavi. Taro ivakasala vua, me dusimaki iko. Dikeva se qarava vakacava na nona itavi ena gauna qo ni vakayagataka nona kila.

Se o mani tacida itabaqase e dua nomu ilesilesi vou, se o dua ga vei ira na mataveitacini e yaga vei iko nodra veivakavulici na itabaqase, mo nanuma tiko ni o Jiova e mareqeta nodra yalodina na qaravi koya tiko mai vakadede ra qai tomana tiko ga nodra veiqaravi.