1. Na ulutaga bibi cava e veivosakitaka o Jisu ena iotioti ni nona bogi kei ratou na tisaipeli?

ENA iotioti ni nona bogi o Jisu kei ratou na nona tisaipeli, e voleka ni cavuta vaka30 na loloma. E dusia qori ni bibi me ratou dau “veilomani” na nona tisaipeli. (Joni 15:12, 17) Na itovo qori eratou na kilai kina ni ratou imuri dina i Jisu. (Joni 13:34, 35) Na loloma qo e sega ni kena ibalebale me ratou lomalomani ratou kina. A vakamacalataka tiko o Jisu na itovo talei na loloma vosota. E kaya: “E sega ni dua na loloma e sivia na loloma qo, me dua e solia nona bula ena vukudra na nona itokani. Dou noqu itokani ga ke dou cakava na ka au vakarota vei kemudou.”—Joni 15:13, 14.

2. (a) Na cava era kilai kina na tamata ni Kalou? (b) Na taro cava eda na veivosakitaka ena ulutaga qo?

² Na nodra loloma vosota kei na duavata na dauveiqaravi i Jiova nikua, era kilai kina nira tamata ni Kalou. (1 Joni 3:10, 11) Eda marau nida vakaraitaka na loloma vaKarisito se da matatamata cava, yavusa, vosa se noda isususu! De dua eda na vaqaqa: ‘Na cava sa qai bibi ga kina nikua na loloma?  Sala cava erau uqeti keda kina ena loloma o Jiova kei Jisu? Eda na dui vakaraitaka vakacava na loloma vaKarisito e “veiuqeti”?’—1 Kor. 8:1.

3. Na cava era sotava e levu ena ‘gauna dredre’ qo?

³ Ni ‘sinai’ ena noda bula na “leqa kei na rarawa,” e levu era lomabibi ena ‘gauna dredre’ qo. (Same 90:10; 2 Tim. 3:1-5) Levu era sa via soro. E tukuni ena dua na vakadidike ni sivia ni 800,000 era mate e veiyabaki nira vakamatei ira ga, ya e dua na mate ena veiya40 na sekodi. E ka ni rarawa ni so mada ga na lotu vaKarisito era rawai ena ituvaki qori ra qai vakamatei ira ga.

4. O cei e tukuni ena iVolatabu nira via mate?

⁴ Ena gauna vakaivolatabu, eso na tamata yalodina ni Kalou era rarawataka na kedra ituvaki ra qai vinakata mera mate. Kena ivakaraitaki o Jope, e kaya ena levu ni nona rarawa: “Au sa cata noqu bula, au sega ni via bula tiko.” (Jope 7:16; 14:13) A rarawataka o Jona na veika e yaco ena nona ilesilesi, e kaya: “Ia qo kemuni Jiova, yalovinaka moni kauta tani na noqu bula, e vinaka meu mate e ca meu bula.” (Jona 4:3) A rarawataka tale ga na parofita yalodina o Ilaija na kena ituvaki qai kerea me mate. E kaya: “Sa rauti au! Kemuni Jiova, moni kauta tani na noqu bula.” (1 Tui 19:4) Ia o Jiova e mareqeti ira na dauveiqaravi gugumatua qori qai vinakata mera bula. A sega ni cudruvi ira, e lomani ira ga qai uqeti ira mera vosota na kedra ituvaki mera qaravi koya tiko ga ena yalodina.

5. Na cava era vinakata kina nikua na tacida na noda loloma?

⁵ Ke ra sega mada ga ni via soro na tacida, e levu era sotava tiko na ituvaki rarawataki ra qai vinakata mera uqeti ena loloma. Eso era tusaqati se vakalialiai. Eso tale era vakalewai se kaseti e vanua ni cakacaka, se ra oca nira ovataimi, se tiko na gauna lokuci me vakaoti kina na nodra itavi. Eso tale era vosota na ituvaki e vale, de dua era vakalewai vei watidra e sega ni tiko ena dina. Qori na vuna era yalolailai kina e levu. O cei ena vukei ira mera toso tiko ga?

6. E dau uqeti ira vakacava nona dauveiqaravi o Jiova ena loloma?

⁶ E dau uqeti ira vakacava nona dauveiqaravi o Jiova? E vakadeitaka vei ira ni dei tu ga na nona lomani ira. Sa dua mada ga na ka na nodra vakayaloqaqataki na Isireli yalodina mera rogoca na vosa i Jiova: “O talei e mataqu, o rokovi, au lomani iko. . . . Mo kua ni rere niu tokoni iko”! (Aisea 43:4, 5) Ni o dauveiqaravi i Jiova, mo vakadeitaka ni lomani iko, e mareqeti iko tale ga. * E yalataka na Vosa ni Kalou me baleti ira na vakaliuca na sokalou savasava: “Ena veivakabulai ni kaukaua duadua. Ena rekitaki iko ena marau levu.”—Sefa. 3:16, 17.

7. Ena sala cava e vaka kina e dua na tina na loloma i Jiova? (Raica na imatai ni iyaloyalo.)

⁷ Se mani dredre vakacava na veika eda sotava, e yalataka o Jiova ni na vakacegui keda. “Oni na sucu, oni na keve e dibina, oni na tene e duruna. Me vaka e dua na gonetagane e  vakaceguya o tinana, au na vakacegui kemuni tiko ga.” (Aisea 66:12, 13) Dua na ka marautaki me keveti luvena toka o tinana se tenei koya tiko! Qori na sala e vakaraitaka kina o Jiova na levu ni nona lomani ira na nona tamata kei na nona mareqeti ira. Mo kua ni vakatitiqataka ni o talei qai mareqeti iko o Jiova.—Jere. 31:3.

8, 9. Ena vakaukauataki keda vakacava na loloma i Jisu?

⁸ Qo e dua tale na vuna me uqeti keda kina na lotu vaKarisito na loloma i Jiova: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” (Joni 3:16) E lomani keda tale ga vakalevu o Jisu ni solia na nona bula ena vukuda! E dodonu me uqeti keda na loloma qori! E yalataka na Vosa ni Kalou ni na sega ni “tawasei keda mai na loloma i Karisito” na “veika rarawa” kei na “veika dredre.”—Roma 8:35, 38, 39.

⁹ Nida vosota tiko na veika dredre e veivakayalolailaitaki, na veiuqeti ni loloma i Karisito ena vakaukauataki keda meda vosota. (Wilika 2 Korinica 5:14, 15.) Na loloma i Jisu e veivakacegui, e uqeti keda tale ga meda kua ni soro ena ituvaki dredre me vaka na leqa tubukoso, veitusaqati, rarawataka eso na ka, se nuiqawaqawa.

10, 11. O cei e nona itavi me uqeti ira na tacida era yalolailai? Vakamacalataka.

¹⁰ Dua na sala e uqeti keda kina o Jiova ena loloma, ya ena ivavakoso vaKarisito. Eda na vakavinavinakataka yadudua na nona loloma nida lomani ira na tacida qai uqeti ira vakayalo, vakayago tale ga. (1 Joni 4:19-21) E uqeti keda na lotu vaKarisito na yapositolo o Paula: “Moni veivakayaloqaqataki tiko, moni veivakauqeti, me vaka ga oni sa cakava tiko mai.” (1 Ces. 5:11) Io, meda vakatotomuri Jiova mada ga kei Jisu na lewe kece ni ivavakoso nida veivakacegui qai veivakayaloqaqataki, sega ni nodra itavi ga na qase.—Wilika Roma 15:1, 2.

 ¹¹ Kena irairai nira vinakata eso era lomabibi ena ivavakoso na veiqaravi vakavuniwai. (Luke 5:31) Era vakadinata ena yalomalumalumu na qase ni ivavakoso kei keda kece nida sega ni vuniwai ni vakasama. Ia e tiko na noda itavi bibi ena ivavakoso, oya meda “vosa vakayalovinaka vei ira na yalolailai, vukei ira na malumalumu, vosoti ira na tamata kece.” (1 Ces. 5:14) E vinakati vei keda kece na lotu vaKarisito meda dau veikauaitaki, yalololoma, meda vosa tale ga vakayalovinaka vei ira na yalolailai. Vakacava o dau vu ni veivakacegui se veivakayaloqaqataki? Ena vuavuaivinaka na noda sasaga nida kila na sala meda veivuke kina.

12. Tukuna nona ivakaraitaki e dua na tacida a uqeti koya na nodra loloma na nona ivavakoso.

¹² Ena uqeti ira vakacava na lomabibi na noda loloma? E kaya e dua na tacida yalewa mai Urope, “Au vakasamataka ena so na gauna meu vakamatei au ga, ia e levu era kauaitaki au. Era vukei au na lewe ni noqu ivavakoso. Era dau loloma ra qai veivakayaloqaqataki na mataveitacini. E vica ga era kila tiko niu lomabibi, ia era dau vukei au tu ga na lewe ni ivavakoso. Dua na veiwatini erau vaka ga na tamaqu kei na tinaqu vakayalo. Erau qaravi au vinaka, rau dau tu ga e yasaqu e veigauna.” Io, de dua ena sega ni tautauvata sara na ivakarau ni noda veivuke. Na noda veikauaitaki ga mai vu ni lomada ena vakacegui ira na lomabibi. *

13. Na cava e vinakati ke da via vakayaloqaqataka eso?

¹³ Dau vakarorogo vinaka. (Jeme. 1:19) E ivakaraitaki ni loloma na noda vakarorogo ena kauai. O na rawa ni taro vakayalovinaka kei na veinanumi mo kila kina na loma i koya e rarawa tiko. Ni o cakava qori, o na rawa kina ni vakaraitaka nomu kauai mo uqeta na tacimu. Me laurai ena irairai ni matamu ni o kauaitaki koya ena yalololoma. Ke via talaucaka na lomana, mo vosovoso, kua ni vosa ni se vakamacala tiko. Ni o vosovoso ni vakarorogo, o na kila vinaka kina na ivakarau ni lomana. Qori ena uqeti koya me nuitaki iko, ena yalorawarawa tale ga ni rogoca na ka o tukuna mo vakayaloqaqataki koya kina. Nomu veikauaitaki dina ena yalololoma, ena vakacegui koya.

14. Na cava meda kua ni dau veivakalewai kina?

¹⁴ Kua ni veivakalewai. Nida vakalewai ira na lomabibi, ena kuria ga na nodra rarawa, ena vakaleqa tale ga na noda sasaga meda uqeti ira ena loloma. “Na vosa vakalialia e vaka na isua ni iseleiwau, ia na yamedra na vuku e veivakabulai.” (Vkai. 12:18) Eda na sega ni via nakita meda ‘suaki’ ira na rarawa tu ena vosa mosi. Ia ke sega ni nakiti mada ga, sa na bau mosimosi toka. Nida uqeta eso ena loloma nida vakayaloqaqataki ira, e vinakati kina na noda kauai da qai biuti keda sara ga ena kedra ituvaki.—Maciu 7:12.

15. Na ivukevuke cava eda rawa ni uqeta kina e dua ena loloma?

¹⁵ Veivakacegui ena Vosa ni Kalou. (Wilika Roma 15:4, 5.) E tu ena Vosa ni Kalou e levu na iyau talei  meda veivakacegui kina. Na iVolatabu e vakavuna “na Kalou e vu ni vosota kei na vakacegu.” Me ikuri ni tikinivolatabu veivakacegui, e levu tale tu na ivukevuke ni vuli iVolatabu. Eda rawa ni vakayagataka na Watch Tower Publications Index kei na iDusidusi ni Vakadidike ni iVakadinadina i Jiova. Eda na raica kina na ulutaga vakaivolatabu veiuqeti meda vosota na veimataqali leqa. Ena vakarautaki keda gona na ivukevuke qori me vuavuaivinaka kina na noda sasaga meda veikauaitaki ena yalololoma.

16. Na itovo cava meda vakaraitaka nida vakayaloqaqataka e dua na tacida e yalolailai?

¹⁶ Meda yalololoma qai yalovinaka. Rua na itovo qo e veisemati kei na loloma eda vakaraitaka ena veikauaitaki nida veivakayaloqaqataki se veivakauqeti. O Jiova sara ga e “Tama ni yalololoma, na Kalou e dau vakacegui keda ena ka kece,” e ‘lomani ira tale ga vakalevu’ na nona dauveiqaravi. (Wilika 2 Korinica 1:3-6; Luke 1:78; Roma 15:13) E ivakaraitaki vinaka kina o Paula, e vola: “Keitou yalovinaka ena kemuni maliwa me vaka na tina se qai vakasucu vou e karona vakayalololoma na luvena. O koya gona, ena levu ni neitou lomani kemuni, keitou vakadeitaka me keitou vunautaka vei kemuni na itukutuku vinaka me baleta na Kalou, me keitou solibula tale ga ena vukumuni, ni oni sa rui talei vei keitou.” (1 Ces. 2:7, 8) Nida vakaraitaka na itovo ni Kalou na yalololoma, e rawa ni saumi kina na nona masu e dua e yalolailai.

17. Eda na veiuqeti vakacava ena loloma ni donu noda rai me baleti ira na tacida?

¹⁷ Kua ni namaka mera uasivi na tacida. Me donu noda rai me baleti ira na tacida. E sega ni vinaka meda namaka nira uasivi, ena vakavu rarawa ga. (Dauv. 7:21, 22) Meda nanuma tiko ni o Jiova e sega ni dau namaka vakasivia na ka vei ira na nona dauveiqaravi. Ke da vakatotomuria na nona ivakaraitaki, eda na yalorawarawa ni vosota nodra cala. (Efeso 4:2, 32) Raica e dua na tikina mo vakacaucautaka kina na nodra toso, kua ni tukuna na ka e veivakayalolailaitaki. Qori ena uqeti ira. Na veivakacaucautaki e vu mai lomada ena uqeti ira na tacida ena loloma, era na ‘marautaka vakalevu’ na nodra veiqaravi tabu. Ena veivakacegui nida cakava qori da qai kua ni veivakatauvatani.—Kala. 6:4.

18. Na cava e bibi kina meda dau veiuqeti ena loloma?

¹⁸ Era talei kece vei Jiova na nona sipi, vaka kina vei Jisu ni a solia na nona bula ena vukuda. (Kala. 2:20) Eda lomani ira vakalevu na tacida vakayalo. Eda vinakata gona meda karoni ira ena yalovinaka kei na yalololoma. Me rawa nida vu ni veivakacegui, “meda guta mada ga na bula veiyaloni kei na ka ena vakauqeti keda yadua.” (Roma 14:19) Eda vakanamata kece ena Parataisi sa voleka, nida na sega tale kina ni yalolailai! Sa na sega na tauvimate, ivalu, mate, veitusaqati, veivala e vale kei na rarawa. Eda sa na uasivi ni sa cava na Duanaudolu na Yabaki. O ira na yalodina ena iotioti ni veivakatovolei, era na okati mera luve ni Kalou e vuravura ra qai vakila na “galala lagilagi era vakila tu na luve ni Kalou.” (Roma 8:21) Meda vakaraitaka tiko ga na loloma e veiuqeti da qai veivukei meda rawata na icovi marautaki qori.