1. Nida yalodina, na veiwekani cava eda rawa ni marautaka kei Jiova?

E OKATI ena vuvale i Jiova o Jisu “na ulumatua ni kabuli kece,” kei ira na milioni vakamilioni na agilosi. (Kolo. 1:15; Same 103:20) Ni se tiko e vuravura o Jisu, e vakaraitaka ni rawa vei keda na tamata yalodina meda okati Jiova me Tamada. Ni vosa tiko vei ratou nona tisaipeli e tukuna o Jisu ni o Jiova e “Tamaqu, na Tamamudou tale ga.” (Joni 20:17) Nida yalataki keda vei Jiova qai papitaiso, eda sa mai lewena na vuvale dauloloma.—Mari. 10:29, 30.

2. Na cava eda na veivosakitaka ena ulutaga qo?

² Eso e dau dredre mera raici Jiova me tamadra dauloloma. Eso tale era na rairai sega ni kila na sala mera lomani ira kina na mataveitacini. Eda na veivosakitaka ena ulutaga qo na sala e vukei keda kina o Jisu meda raici Jiova me Tamada dauloloma, eda rawa ni toro voleka vua. Eda na veivosakitaka tale ga na sala meda vakatotomuri Jiova kina nida veimaliwai kei ira na tacida.

3. E vukei keda vakacava na masu ni turaga meda toro voleka vei Jiova?

³ E Tama dauloloma o Jiova. E vinakata o Jisu me tiko vei keda na nona rai me baleti Jiova, ni itubutubu dauloloma, e yalovinaka, e rawarawa meda vosa vua, e sega ni yaloca me tukuna tu ga vei keda na ka meda cakava. E laurai qori ena ka e vakavulica o Jisu vei ratou nona tisaipeli me ratou masulaka. E tekivuna na masu ni turaga ena matavosa: “Tamai keimami.” (Maciu 6:9) A rawa ni tukuna o Jisu meda kacivi Jiova “Koya sa Kaukaua Duadua,” “na Dauveibuli,” se “Tui ni veitabagauna,” na ikacivi veiganiti e yavutaki vakaivolatabu. (Vkte 49:25; Aisea 45:18; 1 Tim. 1:17)  Ia e tukuna ga o Jisu meda kacivi Jiova “Tamai keimami.”

4. Eda kila vakacava ni vinakata o Jiova meda toro voleka vua?

⁴ E dau dredre mo raici Jiova me Tama dauloloma? Eso e dau va qori nodra rai. Ena rairai dredre meda vakabauta qori baleta ni sega ni lomani keda na tamada. E veivakacegui meda kila ni o Jiova e kila vinaka na lomada! E vinakata meda volekati koya. Ya na vuna e uqeti keda kina nona Vosa: “Toro voleka vua na Kalou ena qai toro voleka mai vei kemuni o koya.” (Jeme. 4:8) E lomani keda o Jiova, e kaya ni Tamada vinaka duadua.

5. Me vaka e tukuni ena Luke 10:22, e vukei keda vakacava o Jisu meda volekati Jiova?

⁵ E vukei keda o Jisu meda volekati Jiova. E kilai Jiova vinaka o Jisu, e vakaraitaka vakavinaka na nona itovo, e tukuna: “O koya sa raici au sa raici Tamaqu tale ga. “ (Joni 14:9) O Jisu e vaka na tuakada, e vakavulici keda meda doka na Tamada, meda talairawarawa vua, meda kua ni vakararawataki koya, me vakadonui keda tale ga. Na nona ivakarau ni bula e vuravura e vakaraitaka vinaka na yalovinaka kei na dauloloma i Jiova. (Wilika Luke 10:22.) Meda raica mada e vica na ivakaraitaki.

6. Tukuna eso na ivakaraitaki ni rogoci Jisu o Jiova.

⁶ E dau rogoci ira na luvena o Jiova. Vakasamataka mada na sala e rogoca kina na Luvena ulumatua. E rogoca o Jiova e levu nona masu o Luvena ni se bula voli e vuravura. (Luke 5:16) E rogoca nona masulaka o Jisu na nona vakatulewa bibi, me vaka nona digitaki ratou na 12 nona yapositolo. (Luke 6:12, 13) E rogoca tale ga o Jiova nona masu o Jisu ena gauna e rarawa tu kina vakalevu. Ni bera ni soli koya yani o Jutasa, e masu vagumatua o Jisu vei Tamana me baleta na ituvaki dredre sa vakarau sotava. E rogoca o Jiova nona masu, e tala tale ga e dua na agilosi me vakaukauataki Luvena lomani.—Luke 22:41-44.

7. Na cava nomu rai ni o kila ni dau rogoca o Jiova na nodra masu na nona dauveiqaravi?

 ⁷ Nikua, e dau rogoca tale ga o Jiova nodra masu na nona dauveiqaravi, e sauma ena gauna donu kei na sala vinaka duadua. (Same 116:1, 2) E vakadinadinataka qori e dua na tacida yalewa mai Idia. E dau nuiqawaqawa qai dau masulaka vagumatua vei Jiova na kena ituvaki. E vola: “Na porokaramu ni JW Broadcasting^® ni Me 2019 e veivosakitaki kina na lomaocaoca kei na nuiqawaqawa, e yaco donu sara ga mai. E sauma na noqu masu.”

8. Na sala cava e dau vakaraitaka kina o Jiova ni lomani Jisu?

⁸ E lomani keda o Jiova qai karoni keda, me vaka ga ni lomani Jisu qai karoni koya ena gauna e qarava kina na nona itavi e vuravura. (Joni 5:20) E vukei koya me dei tiko ga nona vakabauta, e vakayaloqaqataki koya ena gauna e rarawa kina, e vakadeitaka tale ga me tiko na ka kece me bula kina. E sega tale ga ni tu suka o Jiova me vakaraitaka na nona lomani Luvena kei na nona vakadonui koya. (Maciu 3:16, 17) E kila o Jisu ni na tokoni koya tiko ga na Tamana vakalomalagi dauloloma, ena vukei koya tale ga, e kila ni sega ni tiko taudua.—Joni 8:16.

9. Eda kila vakacava ni lomani keda o Jiova?

⁹ Me vakataki Jisu, eda vakadinadinataka kece na levu ni nona lomani keda o Jiova. Vakasamataka mada: E vagolei keda vua o Jiova, e vakarautaka na vuvale dauloloma e duavata me vakamarautaki keda qai vukei keda ena gauna eda rarawa kina. (Joni 6:44) E vakarautaka tale ga o Jiova na kakana vakayalo veiuqeti e sega ni oti rawa. E vakarautaka mada ga na ka ni bula e veisiga. (Maciu 6:31, 32) Nida vakasamataka vakatitobu na nona lomani keda o Jiova, eda na qai lomani koya ga vakalevu.

10. Na cava eda vulica ena nona lomani ira na mataveitacini o Jiova?

¹⁰ E lomani ira na mataveitacini o Jiova. Ia ena rairai sega ni rawarawa meda lomani ira na lewe ni noda vuvale vakayalo da qai vakaraitaka nida lomani ira. Na vuna? Ni duidui na noda itovo kei na isususu. Kena ikuri eda dau cala kece, eda na cakava eso na ka ena rawa ni vakararawataki ira eso tale. Ia eda rawa ni uqeta tiko ga na veilomani ena noda vuvale vakayalo. Ena sala cava? Nida vakatotomuria na Tamada meda lomani ira na mataveitacini. (Efeso 5:1, 2; 1 Joni 4:19) Meda raica mada qo na ka eda vulica mai na ivakaraitaki i Jiova.

11. E vakaraitaka vakacava o Jisu na “loloma levu” i Jiova?

¹¹ E dau vakaraitaka o Jiova na “loloma levu.” (Luke 1:78) O koya e dau loloma ena kauai ni raica nodra rarawa eso, ena qara na sala me veivuke qai veivakacegui kina. Na ka e cakava o Jisu vei ira na lewenivanua e vakaraitaka vinaka nona kauaitaki ira o Jiova. (Joni 5:19) Ni raica o Jisu e dua na ilala levu ena dua na gauna, “e lomani ira nira suivotu qai biu wale tu me vaka na sipi e sega na kena ivakatawa.” (Maciu 9:36) E dau vakaraitaka sara ga o Jisu na nona loloma levu. E vakabulai ira na tauvimate, e vakacegui ira tale ga na ‘oca qai bikai voli ena icolacola bibi.’—Maciu 11:28-30; 14:14.

12. Eda na vakaraitaka vakacava noda lomani ira na tacida?

¹² Ni bera nida vakaraitaka noda lomani ira na tacida, e bibi meda kila na ituvaki dredre era sotava tiko. Kena ivakaraitaki, e rairai tauvimate bibi e dua na tacida yalewa, ena sega ni tukuna, ia ena rairai  marautaka eso na veivuke. E qarava tiko vakacava na nodratou bula vakayago na nona vuvale? O rawa ni veivuke ena vakasaqa se sasamaki? Ena rairai vakacegui mai na nona cakacaka e dua na tacida tagane. Vakacava me kua ni kila ni o lolomataka vua eso na ilavo me vukei koya me yacova ni kunea tale e dua na cakacaka.

13-14. Eda na lomasavu vakacava me vakataki Jiova?

¹³ E dau lomasavu o Jiova. (Maciu 5:45) Meda kua ni waraka sara mera kere veivuke na mataveitacini. Me vakataki Jiova, eda na vakaliuliu. E dau vakacabea e veisiga na matanisiga vei keda nida sega mada ga ni kerea! E yaga vei keda kece na katakata ni matanisiga, sega ni yaga wale ga vei ira na dau vakavinavinaka. Ni vakarautaka o Jiova na ka eda gadreva, e vakaraitaka ni lomani keda. Eda lomani Jiova vakalevu ni sa rui yalovinaka, e lomasavu tale ga!

¹⁴ E levu na tacida era vakatotomuria na Tamada vakalomalagi nira vakaliuliu mera lomasavu. Me kena ivakaraitaki, ena 2013 e vakacaca vakalevu ena Yatu Filipaini na cagilaba kaukaua o Haiyan. E levu na tacida e vakacacani na nodra vale kei na ka era taukena. Sega ni bera nodra veitokoni na lewe ni matavuvale vakayalo ena veiyasa i vuravura. Levu era cau se ra veivuke ena tarataravaki, e mani vakavinakataki kina se tara tale e rauta ni 750 na vale ena loma ga ni dua na yabaki! Ena gauna ni matedewa na COVID-19 era cakacaka vakaukaua na mataveitacini mera tokona na tacidra. Ni totolo noda tokoni ira na lewe ni noda vuvale vakayalo eda vakaraitaka nida lomani ira.

15-16. Na cava e tukuni ena Luke 6:36 meda cakava meda vakatotomuria kina na Tamada vakalomalagi?

¹⁵ E dauloloma o Jiova, e dauveivosoti tale ga. (Wilika Luke 6:36.) Eda vakila e veisiga nona loloma na Tamada vakalomalagi. (Same 103:10-14) Eratou sega ni uasivi na imuri i Jisu, ia e dau lomani ratou qai vosoti ratou. E tu vakarau mada ga me solia na nona bula me  vosoti kina na noda ivalavala ca. (1 Joni 2:1, 2) Na nodrau veivosoti kei na loloma o Jiova kei Jisu e uqeti keda meda volekati rau.

¹⁶ Eda na veilomani tiko ga vakalevu nida ‘yalorawarawa ni veivosoti.’ (Efeso 4:32) Ia ena rairai dredre ena so na gauna meda veivosoti. Ena vinakati meda cakacaka kina. E vakadinadinataka qori e dua na tacida yalewa ni vulica na ulutaga ena Vale ni Vakatawa “Mo Dau Veivosoti Vakarawarawa.” * E vola: “E vukei au na ulutaga qo meu kila ni yaga vei au noqu vosoti ira eso tale. E tukuni kina ni noda vosoti ira vakarawarawa eso tale, e sega ni kena ibalebale meda vakadonuya na cala era cakava se raica vakamamada na kena revurevu. Ia na veivosoti e kena ibalebale meda kua tale ni rarawataka tiko na leqa ya qai tiko ga vei keda na vakacegu.” Nida yalorawarawa meda vosoti ira na tacida, eda vakaraitaka nida lomani ira da qai vakatotomuria na Tamada o Jiova.

17. Me vaka e tukuni ena Maciu 5:16, eda na rokova vakacava na Tamada vakalomalagi?

¹⁷ Eda vakavinavinaka nida lewe ni dua na vuvale dau loloma era tu e veiyasa i vuravura na lewena. Eda vinakata me levu tale era tomani keda ena noda sokaloutaka na noda Kalou. Nida vakasamataka tiko qo, eda na qarauna meda kua ni cakava e dua na ka era na vakarogorogocataki kina na tamata i Jiova se na Tamada vakalomalagi. Eda na qarauna me vinaka na noda itovo, me uqeti ira na lewenivanua mera taleitaka na itukutuku vinaka.—Wilika Maciu 5:16.

18. Na cava ena vukei keda meda vunau ena doudou?

¹⁸ Ena so na gauna era na rairai vakalewai keda eso se tusaqati keda nida talairawarawa vua na Tamada vakalomalagi. Na cava meda cakava ke da rere ni tukuna noda vakabauta? Eda nuidei ni na vukei keda o Jiova kei na Luvena. E tukuna o Jisu vei ratou na nona tisaipeli me ratou  kua ni leqataka na ka me ratou kaya se na kena itukutukuni. Na vuna? E vakamacalataka o Jisu “ni na qai vakatakilai vei kemudou ena kena gauna, ni dou na sega ni vosa tiko ga o kemudou, ena vosa ena vukumudou na yalo i Tamamudou.”—Maciu 10:19, 20.

19. Tukuna na ivakaraitaki ni dua e vunau ena doudou.

¹⁹ Dikeva na ivakaraitaki i Robert. Dua na gauna sa oti, ni tekivu vulica na iVolatabu e sega ni kila e levu na ka ena iVolatabu, e gole ina mataveilewai e Sauca Aferika me vakamacalataka vua na turaganilewa na vuna ena sega ni curu kina ena mataivalu. Ia e vakamacalataka ena doudou ni na tawaveitovaki ni lomani ira na tacina lotu vaKarisito. E vakavinavinakataka ni lewena noda vuvale vakayalo! E taroga na turaganilewa: “O cei o ira na tacimu?” Sega ni namaka qori o Robert, ia e vakasamataka sara na tikinivolatabu ena siga qori na Maciu 12:50: “O koya ga e cakava na loma i Tamaqu e tiko mai lomalagi, o koya ga ya e taciqu, e ganequ, e tinaqu.” Se qai tekivu vulica na iVolatabu o Robert, ia e vukei koya na yalo tabu i Jiova me sauma na taro ya kei na so tale e sega ni namaka. Sa na marau mada ga o Jiova ena ka e cakava o Robert! E marau tale ga nida nuitaki koya meda vunau ena doudou ena ituvaki kece.

20. Na cava eda nakita dei meda cakava? (Joni 17:11, 15)

²⁰ Meda vakavinavinakataka tiko ga nida lewena e dua na vuvale vakayalo dau loloma. E tiko na Tamada vinaka duadua vaka kina o ira na tacida yalodina. Meda kua ni raica vakamamada qo. Ena saga o Setani kei ira na nona imuri yalo ca meda kua ni vakabauta ni lomani keda na Tamada vakalomalagi, era saga tale ga meda kua ni duavata. Ia sa masulaki keda oti o Jisu, e kerei Tamada me taqomaki keda, me rawa ni duavata tiko ga noda vuvale. (Wilika Joni 17:11, 15.) Sa sauma na masu qori o Jiova. Me vakataki Jisu, meda kua ni lomalomaruataka mada ga nona loloma kei na veitokoni na Tamada vakalomalagi. Meda nakita dei meda volekata tiko ga nona vuvale vakayalo.