1. Na cava era rairai vakila o ira e vakasivoi na wekadra?

SA BAU vakasivoi mai na ivavakoso e dua o lomana? E mosimosi dina qori! E kaya e dua na tacida o Litia: “Ni mate na watiqu yalodina ni oti e 41 na yabaki neirau veiwatini, au nanuma ni dua na ituvaki ca duadua meu bau vakila qori. * Ia ni biuta na ivavakoso o luvequ tagane, e biuti watina kei rau na luvena, sa qai mosimosi ga vei au.”

2-3. Me vaka e tukuni ena Same 78:40, 41, na cava e vakila o Jiova nira biuti koya na nona dauveiqaravi?

² Vakasamataka mada na kena mositi Jiova nira biuta nona vuvale eso na agilosi! (Juta 6) Vakasamataka tale ga na levu ni nona rarawa nira talaidredre wasoma vua o ira na Isireli. (Wilika Same 78:40, 41.) Mo nuidei ni dau rarawa tale ga na Tamada vakalomalagi dauloloma ni biuti koya e dua o lomana. E kila vinaka na levu ni nomu rarawa. Ena nona yalololoma, ena vakayaloqaqataki iko, ena tokoni iko tale ga.

³ Eda na veivosakitaka ena ulutaga qo na ka meda cakava me vukei keda kina o Jiova ena ituvaki rarawataki qori. Eda na veivosakitaka tale ga na sala meda vukea kina eso ena ivavakoso e vakasivoi e dua na wekadra. Ia meda veivosakitaka mada qo na rai meda qarauna.

4. Na cava era vakila e levu na itubutubu e biuti Jiova e dua na luvedra?

⁴ Ni biuti Jiova e dua na cauravou se goneyalewa mareqeti, era dau nanuma na itubutubu ni a dodonu mera vukei luvedra vakalevu mera dei tiko ga ena dina. Kena ivakaraitaki, e dua na tacida tagane o Luke a vakasivoi o luvena tagane. E kaya: “Au beitaki au tu ga. E dau vakarerevaki na ka au tadra. Eso na gauna au dau tagi, e  mosimosi sara ga vei au.” E dua tale na tacida o Ilisapeci, a vakasivoi tale ga o luvena tagane, e dau vakasamataka tu ga: “Na cava noqu cala? Au nanuma ni sega ni veirauti na ka au cakava meu vakavulici luvequ ena ka dina.”

5. E bale vei cei nona biuti Jiova e dua?

⁵ E bibi meda nanuma tiko ni o Jiova e solia vei keda yadua na galala ni vakatulewa. Kena ibalebale qo ni rawa nida digia meda talairawarawa vua, se sega. Eso na gone era sega ni ivakaraitaki vinaka na nodra itubutubu. Ia era vakatulewataka mera qaravi Jiova ra qai yalodina tiko ga vua. Eso tale na gone era gumatua na nodra itubutubu me tuberi ira ena ivakavuvuli vakaivolatabu, ia nira qase mai era qai biuta na dina. Eda vulica ni bibi meda vakatulewataka yadua meda na qaravi Jiova. (Josua 24:15) Koya gona, vei kemuni na itubutubu oni rarawa tiko, ni kua ni nanuma ni bale vei kemuni nodra biuti Jiova na luvemuni!

6. Na cava ena rairai vakila na gone e biuti Jiova e dua vei rau na nona itubutubu?

⁶ Eso na gauna, ena biuta na dina e dua vei rau na itubutubu, ena biuta tale ga na nona vuvale. (Same 27:10) Qo ena vakararawataki ira sara ga na gone, nira dau dokai ira, era rokovi ira tale ga. Kena ivakaraitaki o Siteri, a vakasivoi o tamana. E kaya: “Au dau tagi vakalevu niu kila ni sega ni malumu ga vakayalo o tamaqu. E vakatulewataka sara ga me biuti Jiova. Au lomani tamaqu, ni sa vakasivoi au dau lomaleqataka na nona bula. Dua na ka na noqu nuiqawaqawa.”

7. E vakacava na ivakarau ni loma i Jiova me baleta na gone e vakasivoi na nona itubutubu?

⁷ Kemuni na gone, ke dua vei rau na nomu itubutubu e vakasivoi, keimami rarawa tale ga! Mo nuidei ni kila vinaka tale ga o Jiova na nomu rarawa. E lomani iko, e marautaka nomu yalodina vua. Keimami marautaka tale ga qori na mataveitacini ena ivavakoso. Mo nanuma tiko ni sega ni bale vei iko nona vakatulewa na nomu itubutubu. Me vaka sa cavuti oti mai, o Jiova e solia vei keda yadua na galala ni vakatulewa. Ena “colata ga na [nona] icolacola” o koya e yalayala vei Jiova qai papitaiso.—Kala. 6:5.

8. Na cava me ratou cakava na lewenivuvale yalodina ni ratou waraka nona lesu mai o koya e biuti Jiova? (Raica tale ga na kato “ Mo Lesu Vei Jiova.”)

⁸ Ni biuti Jiova e dua o lomana, e macala ni o na nuitaka tiko me lesu mai vua ena dua na siga. Ia na cava mo cakava tiko ena gauna qo? Mo kauaitaka na nomu bula vakayalo. Ni o cakava qori, o na ivakaraitaki vinaka vei ratou na vo ni lewenivuvale, de dua vei koya tale ga e vakasivoi. O na vakayaloqaqataki mo vosota na nomu rarawa. Meda veivosakitaka mada eso na ka mo cakava.

9. Sala cava e vakayaloqaqataki iko kina o Jiova? (Raica tale ga na kato “ Tikinivolatabu Veivakacegui ni Biuti Jiova e Dua o Lomana.”)

⁹ Me dua na nomu ituvatuva vinaka vakayalo. E bibi me dei tiko na nomu vakabauta, vaka kina o ratou na lewe ni nomu  vuvale. O na cakava vakacava qori? Me vakayaloqaqataki iko o Jiova ni tiko na ituvatuva ni nomu wilika na Vosa ni Kalou qai vakasamataka vakatitobu, vaka kina nomu tiko ena soqoni vaKarisito. Kena ivakaraitaki o Joana, a biuta na dina o tamana kei tuakana. E kaya: “Au dau lomavakacegu ni wilika na ivakaraitaki vakaivolatabu me vakataki Apikali, Esiteri, Jope, Josefa, kei Jisu. E uqeti au na nodratou ivakaraitaki, e vukei au sara ga me donu tiko ga noqu rai. E vakayaloqaqataki au tale ga na noda sere ni JW Broadcasting.”

10. E uqeti keda vakacava na Same 32:6-8 meda vosota na ituvaki rarawataki?

¹⁰ Mo tukuna vei Jiova na ka kece o lomaleqataka. Ni o rarawa vakalevu, me kua ni cegu nomu masu vua. Vakamasuti koya na noda Kalou dauloloma me vukei iko mo raica na ituvaki qori mai na nona rai, me “vakayalomatuataki iko qai vakavulici iko ena sala mo muria.” (Wilika Same 32:6-8.) E macala ni rawa ni mosimosi vakalevu mo tukuna vei Jiova na ka o vakila tiko. Ia e kila vinaka o Jiova na levu ni nomu rarawa. E lomani iko vakalevu, e uqeti iko tale ga mo sova yani vua na lomamu.—Lako 34:6; Same 62:7, 8.

11. Me vaka e tukuni ena Iperiu 12:11, na cava meda nuitaka kina na veivakadodonutaki i Jiova? (Raica tale ga na kato “ Veivakasivoi—iVakaraitaki ni Loloma i Jiova.”)

¹¹ Meda tokona nodratou vakatulewa na qase ni ivavakoso. Na veivakasivoi e ituvatuva i Jiova. Na nona veivakadodonutaki ena yaga vei koya e vakasivoi, vaka kina vei keda kece na kena vo. (Wilika Iperiu 12:11.) De dua era na vakalewa eso na nodratou vakatulewa na qase me baleti koya e vakasivoi, ia era na sega ni dau cavuta na ka ca e cakava o koya e  vakasivoi. Eda sega ni kila na dina kece ni ka e yaco. E ka vakayalomatua gona meda nuitaka na nodratou vakatulewa na qase ratou qarava na kisi ni ratou saga ena nodratou vinaka kece me ratou muria na ivakavuvuli vakaivolatabu, me ratou vakatulewa tale ga “ena vuku i Jiova.”—2 Vei. 19:6.

12. Na ka vinaka cava era vakila eso nira tokona na ituvatuva ni veivakavulici i Jiova?

¹² Ni o tokona nodratou vakatulewa na qase me ratou vakasivoi koya o lomana, ena vakarawarawataka nona lesu vei Jiova. E tukuna o Ilisapeci, sa cavuti oti mai: “E dredre sara ga me keirau kua ni veimaliwai kei na luvei keirau cauravou. Ia ni sa lesu mai vei Jiova, e tukuna ni donu vinaka na kena vakatulewataki me vakasivoi. Toso na gauna, e marautaka ni levu na ka e vulica kina. Na ka au vulica ya ni dau donu tu ga na veivakavulici i Jiova.” E tukuna tale ga o Marika, na watina: “Dua na gauna e muri, e tukuna vei au o neirau cauravou ni dua na vuna e vinakata kina me lesu mai, ni keirau a sega sara ga ni veimaliwai kei koya. Au marau ni vukei keirau o Jiova me keirau talairawarawa.”

13. Na cava mo cakava mo vosota kina nomu rarawa?

¹³ Mo talaucaka na lomamu vei ira na itokani era na kila vinaka na kemu ituvaki. Mo dau veimaliwai kei ira na lotu vaKarisito matua era na vukei iko me donu tiko ga nomu rai. (Vkai. 12:25; 17:17) E tukuna o Joana, sa cavuti oti mai: “Au dau galili sara ga. Ia niu veivosaki kei ira na itokani nuitaki, era vukei au meu vosota.” Vakacava ke ra tukuna eso ena ivavakoso na ka o na yalolailai kina?

14. Na cava meda “dau yalorawarawa” kina qai “veivosoti tale ga vakarawarawa”?

¹⁴ Meda yalovosovoso tiko ga vei ira na tacida. Meda kua ni namaka ni na donu tu ga na ka era tukuna. (Jeme. 3:2) Eda dau cala kece, meda kua gona ni kurabui nira sega ni kila eso na ka mera tukuna, se vakararawataki keda na nodra vosa. Meda nanuma tiko na ivakasala ni yapositolo o Paula: “Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale.” (Kolo. 3:13) E vakamacalataka e dua na tacida yalewa a vakasivoi e dua na wekana: “E vukei au o Jiova meu vosoti ira na taciqu era saga mera vakayaloqaqataki au, ia au rarawa tale kina.” Na cava era na cakava na lewe ni ivavakoso mera vukei ira kina na lewenivuvale era yalodina tiko?

15. Eda na vukei ira vakacava na lewenivuvale se qai vakasivoi wale ga e dua na wekadra?

¹⁵ Meda yalovinaka vei ira na lewenivuvale era yalodina tiko. E tukuna e dua na tacida o Miriama ni a lomaleqa me lako ina soqoni ni se qai vakasivoi oti ga na ganena. E kaya: “Au lomaleqataka na ka era na tukuna eso. Ia e levu na mataveitacini era rarawataka na ka e yaco era sega  ni cudru, era sega tale ga ni tukuna na ka ca me baleti ganequ. Au sega gona ni yalolailai.” E tukuna e dua tale na tacida yalewa: “Ni vakasivoi oti o luvei keirau tagane, era gole mai na mataveitacini mera vakayaloqaqataki keirau. Era tukuna eso nira sega ni kila na ka mera kaya. Era mai tagi vata kei au, era vakauta tale ga mai eso na nodra ivola veivakauqeti. Na ka era cakava qori e vukei au sara ga vakalevu!”

16. Era na veitokoni tiko ga vakacava na lewe ni ivavakoso?

¹⁶ Meda tokoni ratou tiko ga na lewenivuvale eratou yalodina. E vinakati mera lomani vakalevu, mera vakayaloqaqataki tale ga ena gauna qo. (Iper. 10:24, 25) Eso na gauna, era raica na lewenivuvale e vakasivoi na wekadra ni so ena ivavakoso era sega ni vosa vei ira. Meda kua sara ni cakava qori! E vinakati tale ga mera vakavinavinakataki ra qai vakayaloqaqataki na gone e biuta na dina na nodra itubutubu. E tukuna o Maria, e vakasivoi o watina, e biuta tale ga na nona vuvale: “Era lako mai eso na noqu itokani mera mai vakasaqa, era vukei au tale ga ena neitou vuli vakavuvale. Era vakila na noqu rarawa, era mai tagi vata kei au. Era dau vosa ena vukuqu ni tukuni eso na itukutuku lasu me baleti au. Era vakayaloqaqataki au sara ga!”—Roma 12:13, 15.

17. Era na vakacegui ira vakacava na rarawa na qase ni ivavakoso?

¹⁷ Kemuni na qase ni ivavakoso, moni vakayagataka na gauna veiganiti kece moni vakayaloqaqataki ira na lewenivuvale era yalodina tiko. E nomuni itavi bibi moni vakacegui ira na tacimuni era biuti Jiova na lewe ni nodra vuvale. (1 Ces. 5:14) Moni vakaliuliu ni uqeti ira ni bera na soqoni, vaka kina ni sa suka. Moni sikovi ira ena nodra vale, moni masu vata. Ni vunau vata, se sureti ratou ena nomudou sokalou vakavuvale. E vinakati vei kemuni na qase ni ivavakoso moni karoni ira na sipi i Jiova era rarawa tiko, lomani ira, kauaitaki ira tale ga.—1 Ces. 2:7, 8.

18. Me vaka e tukuni ena 2 Pita 3:9, na cava e vinakata o Jiova vei ira na biuti koya?

¹⁸ E “sega ni vinakata [o Jiova] me rusa e dua, e vinakata ga moni veivutuni  kece.” (Wilika 2 Pita 3:9.) Ena rairai valavala ca bibi e dua, ia se talei tiko ga vua na Kalou na nona bula. Vakasamataka na ka talei e vakarautaka o Jiova, na isoro ni veivoli i Luvena lomani ena vukuda yadua na tamata ivalavala ca. Ni yalololoma o Jiova, e saga me vukei ira na biuti koya mera lesu vua. E vakanuinui tu nira na cakava qori, me vaka eda raica ena vosa vakatautauvata i Jisu me baleta na gone cidroi. (Luke 15:11-32) Ni toso na gauna era lesu vua na Tamadra vakalomalagi dauloloma e levu era biuta na dina. Era marau tale ga na lewe ni ivavakoso mera ciqomi ira tale. Kena ivakaraitaki o Ilisapeci sa tukuni oti mai, dua na ka nona marau ni sa vakalesui mai o luvedrau tagane. Ni vakasamataka lesu, e kaya, “Keirau vakavinavinakataki ira vakalevu era uqeti keirau me keirau kua ni soro.”

19. Na cava meda nuitaki Jiova tiko ga kina?

¹⁹ Meda nuitaki Jiova tiko ga. E dau yaga tu ga vei keda na nona ivakasala. E dau lomasavu, e Tama dauveinanumi, e lomani ira vakalevu na qaravi koya ra qai lomani koya. Mo nuidei ni na sega ni biuti iko o Jiova ena gauna o rarawa kina vakalevu. (Iper. 13:5, 6) E tukuna o Marika sa cavuti oti mai: “O Jiova ena sega ni biuti keda. Ena sega ni yawa vei keda ena gauna dredre mada ga.” O Jiova ena solia tiko ga vei iko “na kaukaua e uasivia na kaukaua ni tamata.” (2 Kor. 4:7) Io, o rawa ni yalodina tiko ga qai vakanuinui tiko ni biuti Jiova mada ga e dua o lomana.