1. Na ka marautaki cava ena yaco ena Duanaudolu na Yabaki ni Veiliutaki i Karisito?

 ENA siga marautaki mada ga ni sa na tekivu na veivakaturi e vuravura ena loma ni Duanaudolu na Yabaki ni Veiliutaki i Karisito! Era vinakata sara ga o ira kece e takali na wekadra lomani mera sota tale. Qori tale ga na ka e vinakata o Jiova. (Jope 14:15) Raitayaloyalotaka mada na nodra marau e veiyasa i vuravura nira sa vakaturi na wekadra. Me vaka eda vulica ena ulutaga sa oti, o ira na “yalododonu” e volai na yacadra ena ivola ni bula era na “vakaturi mera bula.” (Caka. 24:15; Joni 5:29) De dua era na vakaturi e vuravura e levu na wekada lomani ni oti ga na Amaketoni. * Kena ikuri, o “ira na sega ni yalododonu,” me vakataki ira na sega ni kilai Jiova se ra bau qaravi koya ena yalodina ni bera nira mate, era na “vakaturi mera lewai.”

2-3. (a) Na cava na porokaramu levu duadua ni veivakavulici e tukuni ena Aisea 11:9, 10? (b) Cava eda na veivosakitaka ena ulutaga qo?

² E vinakati mera vakavulici o ira kece na vakaturi. (Aisea 26:9; 61:11) E vinakati gona me tekivutaki na porokaramu levu duadua ni veivakavulici ena ivolatukutuku  ni kawatamata. (Wilika Aisea 11:9, 10.) Na vuna? O ira na sega ni yalododonu era vakaturi ena vinakati mera vulica na veika me baleti Jisu Karisito, na ka ena cakava na Matanitu ni Kalou, na ivoli, vaka kina na bibi ni yaca i Jiova kei na nona veiliutaki. O ira mada ga na yalododonu ena vinakati mera vulica na ka e vakatakila vakalalai o Jiova ena nona inaki me baleta na vuravura. Eso vei ira na yalodina qori era sa mate makawa sara ni bera ni volai oti na Vosa i Jiova na iVolatabu. E levu gona na ka mera vulica o ira na sega ni yalododonu kei ira na yalododonu.

³ Eda na veivosakitaka ena ulutaga qo e vica na taro: Ena vakayacori vakacava na porokaramu levu ni veivakavulici qo? Ena yaga vakacava na porokaramu qo ena kena volai se boko na yaca ena ivola ni bula? E bibi meda kila na isaunitaro qori ena gauna qo. Eda na veivosakitaka eso na parofisai veiuqeti ena ivola i Taniela kei na Vakatakila me matata kina na ka ena yaco nira vakaturi na mate. Meda veivosakitaka mada qo na ka e tukuni ena parofisai i Taniela 12:1, 2.

4-5. Na cava e kaya na Taniela 12:1 me baleta na gauna ni icavacava?

⁴ Wilika Taniela 12:1. E vakaraitaka na ivola i Taniela na veika vakasakiti ena yaco ena gauna ni icavacava. Kena ivakaraitaki, e tukuna na Taniela 12:1 ni o Maikeli ya o Jisu Karisito, ena “tucake” me “totaki ira tiko na [tamata ni Kalou].” E tekivu vakayacori na parofisai qori ena 1914 ni lesi o Jisu me Tui ni Matanitu ni Kalou mai lomalagi.

⁵ E tukuni tale ga vei Taniela ni na “tucake” o Jisu ena “gauna ni rarawa se sega ni bau vakilai ena gauna e tauyavu kina na matanitu me yacova na gauna oya.” Na “gauna ni rarawa” qo e dusia na “veivakararawataki levu” e cavuti ena Maciu 24:21. Ena tucake o Jisu me vala ena vukudra na tamata ni Kalou ni cava na gauna ni rarawa qori, ya na Amaketoni. E kaya na ivola na Vakatakila me baleta na ilawalawa qo me “isoqosoqo levu” e “bula sivia na veivakararawataki levu.”—Vkta. 7:9, 14.

6. Na cava ena yaco ni bula sivia na isoqosoqo levu na veivakararawataki levu? Vakamacalataka. (Raica tale ga ena itabataba qo na “Taro na Dauwiliwili” me baleta na veivakaturi e vuravura.)

⁶ Wilika Taniela 12:2. Na cava ena yaco ni bula sivia na isoqosoqo levu na gauna ni rarawa qo? E sega ni dusia na parofisai qo na veivakaturi vakayalo, se nodra vakabulabulataki vakayalo na tamata i Jiova ena iotioti ni veisiga me vaka eda dau kila tu. * E dusia ga na veivakaturi ena yaco ena vuravura vou sa voleka. Na cava eda tukuna kina qori? Na vosa “kuvuniqele” e cavuti tale ga ena Jope 17:16 e tautauvata na kena ibalebale kei na “iBulubulu.” E dusia qori ni tukuna tiko ga na Taniela 12:2 na veivakaturi ena yaco ni cava na iotioti ni veisiga, ni oti tale ga na ivalu na Amaketoni.

7. (a) Na cava na kena ibalebale nira na vakaturi eso mera “bula tawamudu”? (b) Cava e “vinaka cake” kina “na veivakaturi” qori?

⁷ Na cava na kena ibalebale ni tukuni ena Taniela 12:2 nira na “bula  tawamudu” eso era vakaturi? Kena ibalebale ni o ira na vakaturi mera vukei mera kila, se vulica tiko ga na veika me baleti Jiova kei Jisu qai talairawarawa vei rau ena loma ni 1,000 na yabaki, era na rawata na bula tawamudu. (Joni 17:3) Qo “na veivakaturi e vinaka cake” ni vakatauvatani kei na nodra vakaturi eso ena veigauna sa oti. (Iper. 11:35) Na vuna? Ni o ira na tamata ivalavala ca qori era a mate tale.

8. Na cava na kena ibalebale ni tukuni “mera beci se cati tawamudu” eso?

⁸ Sega ni o ira kece na vakaturi mai era na vinakata me vakavulici ira o Jiova. E kaya na parofisai ena Taniela nira na vakaturi eso “mera beci se cati tawamudu.” Nira vakaraitaka na yalo ni talaidredre, ena sega kina ni volai na yacadra ena ivola ni bula, era na sega tale ga ni bula tawamudu. Ia era na totogitaki ga mera “cati tawamudu,” se vakarusai. Koya gona na ka e tukuni ena Taniela 12:2 e dusia na ka ena yacovi ira na vakaturi mai e yavutaki ena ka era cakava nira sa vakaturi oti. * (Vkta. 20:12) Eso era na rawata na bula tawamudu, eso tale ena sega.

9-10. Na cava tale ena yaco ni oti na veivakararawataki levu? O cei “era na serau me vaka na rarama ni maliwalala”?

⁹ Wilika Taniela 12:3. Na cava tale ena yaco ni oti na “gauna ni rarawa” sa voleka mai? Me ikuri ni Taniela 12:2, na tikina e 3 e dusia e dua na ka ena yaco ni oti na veivakararawataki levu.

¹⁰ O cei “era na serau me vaka na rarama ni maliwalala”? Eda raica e dua na kena ivakamacala ena ka e tukuna o Jisu ena Maciu 13:43: “Ena gauna ya era na ramase na ivalavala dodonu me vaka na matanisiga ena Matanitu nei Tamadra.” Ena tikina wavolita, o Jisu e tukuni ira tiko “na luve ni Matanitu,” ya o ira na tacina lumuti era na veiqaravi vata kei koya ena Matanitu vakalomalagi. (Maciu 13:38) Koya gona na Taniela 12:3 e dusi ira tiko na lumuti kei na ka era na cakava ena Duanaudolu na Yabaki.

11-12. Na itavi cava era na qarava na le 144,000 ena loma ni 1,000 na yabaki?

¹¹ Era na veivuke vakacava na lumuti mera vakavulici “e levu mera yalododonu”? Era na cakacaka veivolekati kei Jisu Karisito mera dusimaka na porokaramu ni veivakavulici e vuravura ena loma ni 1,000 na yabaki. Era na veiliutaki vakatui na le 144,000, era na veiqaravi tale ga vakabete. (Vkta. 1:6; 5:10; 20:6) Era na veivuke gona ena nodra “vakabulai . . . na veimatanitu,” ya mera vukea vakamalua na kawatamata me uasivi. (Vkta. 22:1, 2; Isik. 47:12) Ena gauna marautaki mada ga qori vei ira na lumuti!

¹² O cei o ira na lewe “levu” era na vukei mera yalododonu? Qo era wili kina o ira na vakaturi, o ira tale ga na bula sivia na Amaketoni, vaka kina o ira na gone era na rairai sucu ena vuravura vou. Ni cava na 1,000 na yabaki, era na uasivi kece o ira na bula tiko e vuravura. Na gauna cava ena vakadeitaki kina me  volai na yacadra ena ivola ni bula ena peni iqi, sega ni penikau?

13-14. Na cava mera na vakaraitaka kece na tamata uasivi e vuravura ni bera nira rawata na bula tawamudu?

¹³ Meda nanuma tiko ke dua e uasivi, e sega ni kena ibalebale me sa rawata sara na bula tawamudu. Vakasamataki Atama kei Ivi. Erau uasivi ia e vinakati me rau vakaraitaka nodrau talairawarawa vua na Kalou o Jiova ni bera ni rau bula tawamudu. Ka ni rarawa ni rau talaidredre vua.—Roma 5:12.

¹⁴ Ena vakacava na ituvaki vei ira e vuravura ni cava na 1,000 na yabaki? Era sa na bula uasivi. Vakacava era na tokona na veiliutaki i Jiova me tawamudu? Se ra na vakaraitaka eso nira vakataki Atama kei Ivi, rau uasivi ia erau talaidredre? E vinakati me saumi na taro qori, ia ena kilai vakacava?

15-16. (a) Na gauna cava ena vakaraitaka kina na kawatamata nira yalodina vei Jiova? (b) Cava ena yaco ena iotioti ni veivakatovolei?

¹⁵ Ena vesu o Setani me 1,000 na yabaki. Ena gauna qori sa na sega ni rawa ni vakacala e dua. Ia ni cava na 1,000 na yabaki ena sere o Setani mai na vanua e vesu tu kina. Ena saga me vakacalai ira na tamata uasivi. Ena gauna  ni veivakatovolei qori, era na vakaraitaka na tamata uasivi kece e vuravura ke ra tokoni Jiova kei na nona veiliutaki. (Vkta. 20:7-10) Na ka era cakava yadudua ena gauna qori ena vakatau kina na kena volai tiko ga na yacadra ena ivola ni bula.

¹⁶ Era na vakaraitaka eso nira vakataki Atama kei Ivi nira cata na veiliutaki i Jiova, ia ena sega ni kilai na kedra iwiliwili. Na cava ena yacovi ira? E kaya na Vakatakila 20:15: “Era kolotaki ina drano bukawaqa o ira kece era sega ni volai ena ivola ni bula.” Io, era na vakarusai vakadua na talaidredre. Ia dua na iwase levu ni kawatamata uasivi era na yalodina ena iotioti ni veivakatovolei qo. Ena volai tiko ga na yacadra ena ivola ni bula, oya ni volai ena peni iqi.

17. Na cava e tukuni vei Taniela ena yaco ena noda gauna? (Taniela 12:4, 8-10)

¹⁷ E vakavu marau dina nida vakasamataka na veika sa vakarau yaco. Ia e tukuna tale ga na agilosi vei Taniela eso na itukutuku bibi me baleta noda gauna, na “gauna ni icavacava.” (Wilika Taniela 12:4, 8-10; 2 Tim. 3:1-5) E kaya na agilosi vei Taniela: “Ena vakalevutaki . . . na  kilaka dodonu.” Io, era na kila vinaka na tamata ni Kalou na ibalebale ni parofisai ena nona ivola. E kaya tale na agilosi me baleta na gauna qo, “era na caka ca na tamata ca, ena sega ni dua na tamata ca ena kila rawa.”

18. Na cava sa vakarau yacovi ira na tamata ca?

¹⁸ Nikua era na rairai sega ni totogitaki na daucaka ca ena vuku ni nodra itovo ca. (Mala. 3:14, 15) Ia o Jisu sa vakarau lewai ira na tamata ca era vaka na me qai tawasei ira mai vei ira na vaka na sipi. (Maciu 25:31-33) O ira na tamata ca qo era na sega ni bula sivia na veivakararawataki levu, era na sega tale ga ni vakaturi mera bula ena vuravura vou. Ena sega ni volai na yacadra ena “ivola ni ivakananumi” e cavuti ena Malakai 3:16.

19. Na cava meda cakava ena gauna qo? Na vuna? (Malakai 3:16-18)

¹⁹ Qo na gauna meda vakaraitaka ena noda ivalavala nida sega ni vakataki ira na daucaka ca. (Wilika Malakai 3:16-18.) O Jiova e sa kumuni ira tiko e okata mera “iyau talei,” se ivotavota vakamareqeti. Eda vinakata sara ga meda maliwai ira qori.

20. Na iotioti ni vosa ni yalayala cava e tukuni vei Taniela? Cava o vakanamata kina ena kena vakayacori na vosa ni yalayala qori?

²⁰ Eda sa bula dina tiko ena gauna vakairogorogo. Ia e levu tale na ka vakasakiti sa vakarau yaco. Sa voleka meda na raica na kena vakarusai na ka ca kece. Oti qori, eda na raica na kena vakayacori na vosa ni yalayala i Jiova vei Taniela: “O na tu ena nomu ivotavota ena icavacava ni gauna.” (Tani. 12:13) Vakacava o vakanamata tu ena siga me ‘tucake’ tale kina o Taniela kei ira na wekamu lomani? Ke vaka kina, mo gumatua sara mo yalodina, o na vakadeitaka tale ga ni na volai tu ga na yacamu ena ivola ni bula i Jiova.