Dikeva mada na kena isau vakaivolatabu.

E tukuni ena Cakacaka 24:15 “nira na vakaturi mai na yalododonu kei ira na sega ni yalododonu.” O ira na yalododonu era talairawarawa vua na Kalou ni bera nira mate, e volai kina na yacadra ena ivola ni bula. (Mala. 3:16) O ira na sega ni yalododonu era sa mate ia era se bera ni vulica na veika me baleti Jiova, e sega gona ni volai tu na yacadra ena ivola ni bula.

Na rua na ilawalawa e tukuni ena Joni 5:28, 29 e tautauvata ga kei na ilawalawa e cavuti ena Cakacaka 24:15. E kaya o Jisu ni “o ira na cakava na ka vinaka” era na “vakaturi mera bula, kei ira na cakava na ka ca era na vakaturi mera lewai.” O ira na yalododonu era cakava na ka vinaka ni bera nira mate. Era na vakaturi mera bula ni se volai tiko ga na yacadra ena ivola ni bula. Ia o ira na sega ni yalododonu era cakava na ka ca ni bera nira mate. Era na vakaturi mera lewai. Se bera tiko ni volai na yacadra ena ivola ni bula, e tiko na gauna mera lewai kina se vakadikevi. Na gauna qori e rawa nira vulica kina na veika me baleti Jiova qai volai na yacadra ena ivola ni bula.

E vakamacalataki ena Vakatakila 20:12, 13 ni o ira kece na vakaturi e vinakati mera na talairawarawa ena “veika e volai tu ena ivolavivigi,” ya na lawa vou ena vakayagataki ena vuravura vou. O ira na sega ni talairawarawa kina era na vakarusai.—Aisea 65:20.

E parofisaitaki ena Taniela 12:2 ni so vei ira na moce tu nira sa mate era na vakayadrati “mera bula tawamudu, eso mera beci se cati tawamudu.” E tukuni ena tikinivolatabu qo na itinitini ni nodra vakaturi, ya mera “bula tawamudu” se “cati tawamudu.” Ni cava gona na 1,000 na yabaki, eso era na bula tawamudu, eso tale era na vakarusai vakadua.—Vkta. 20:15; 21:3, 4.

Dikeva mada na ivakatautauvata qo. E rawa ni vakatauvatani na rua na ilawalawa qori kei ira na vulagi era via lai vakaitikotiko ena dua tale na vanua. O ira na yalododonu, e vakataki ira e soli na nodra ivolatara ni cakacaka se mera tiko ena vanua qori, e kilai na nodra tiko, e soli tale ga vei ira na galala mera cakava eso na ka. Ia o ira na sega ni yalododonu, era vakataki ira na vulagi e rairai soli nodra ivolatara mera tiko ga vakalekaleka se ivolatara ni gade. Ena vinakati mera vakaraitaka ni rawa nira bula ena vanua vou qo. E vaka kina o ira na sega ni yalododonu era vakaturi mai, ena vinakati mera muria na lawa i Jiova ra qai vakaraitaka nira yalododonu me rawa nira tiko ga e Parataisi. Se mani ivolatara cava e soli vei ira na vulagi mera curuvanua kina, eso e rawa nira lewenivanua tudei, eso tale era na rairai vakatalai lesu ina nodra vanua. Ena vakatau qori ena nodra ivalavala kei na itovo ena vanua vou era sa lai tiko kina. Ena va tale ga qori na kedra itinitini kece o ira na vakaturi mai, ena vakatau tiko ena nodra yalodina kei na itovo ena vuravura vou.

E dau loloma na Kalou o Jiova, e dau lewadodonu, e sega tale ga ni veivakaduiduitaki. (Vkru. 32:4; Same 33:5) Ena vakaraitaka na nona loloma ni vakaturi ira na yalododonu kei ira na sega ni yalododonu. Ena dei tale ga ena nona ivakatagedegede cecere ni ka e dodonu kei na ka e sega ni dodonu. O ira ga na lomani koya ra qai muria na nona ivakatagedegede era na bula tiko ga ena vuravura vou.