E tukuna o Paula ena 1 Korinica 15:8: “Kena iotioti, e qai rairai vei au me vaka ga au sucudole.” Ena gauna sa oti, eda dau vakamacalataka ni a rairai tukuna tiko o Paula na ka ga e sotava ni raivotutaki Jisu ena nona itutu lagilagi mai lomalagi. E vaka ga se qai sucu, se vakaturi ina bula vakayalo se bera mai, ni vo tu e vica vata na senitiuri me yaco na veivakaturi qori. Ia ni dikevi vinaka tale na tikinivolatabu qo e vinakati me veisautaki na kena ivakamacala.

E vakamacalataka dina tiko o Paula na ka e yaco ena nona veisau. Ia na cava ga e vakaibalebaletaka ni tukuna ni “sucudole”? Qo e rawa ni vica na vuna.

E yaco vakasauri nona veisau, e kidacalataki. E sega ni namaki nona sucudole e dua. Ni lako tiko o Saula (e qai kilai me o Paula) i Tamasiko me vakacacani ira na lotu vaKarisito e kea, e sega ni namaka me raivotutaki Jisu e sa vakaturi oti. E sega ni namaka o Paula nona veisau, era sega tale ga ni namaka qori na lotu vaKarisito e nanuma tiko me lai vakacacana ena koro qori. Kena ikuri, dua na ka nona kidacalataka na ka e yaco ya, e vakavuna me sega ni raica tu e dua na ka ena dua na gauna lekaleka.—Caka. 9:1-9, 17-19.

E veisau ena “gauna cala.” Na vosa taumada vaKirisi e vakadewataki “sucudole” e rawa tale ga ni vakadewataki “sucu ena gauna cala.” E vakadewataka va qo na Jerusalem Bible: “E vaka sara ga e sega ni namaki noqu sucu.” Ena gauna e veisau kina o Paula, sa lesu makawa i lomalagi o Jisu. O Paula e sega ni vakataki ira e cavuta ena tikinivolatabu e liu, ni a sega ni raici Jisu sa vakaturi oti ni bera ni lesu i lomalagi. (1 Kor. 15:4-8) Nona rairai mai vakasauri vua o Jisu e rawa kina ni raici koya, ia e vaka ga e yaco ena “gauna cala.”

E sega ni via vakalevulevui koya. Era kaya eso na dauvakadidike ni vosa e vakayagataka ena tikinivolatabu qo o Paula e rawa ni veibeci na kena irogorogo. Ke vakasamataka tiko qori o Paula, e vakaibalebaletaka tiko ga ni sega ni ganiti koya na ilesilesi qori. Oya na vuna e kaya kina: “O yau na imurimuri sara ni yapositolo, e sega mada ga ni ganita meu vakatokai meu yapositolo niu dau vakacacana na ivavakoso ni Kalou. Ia ena loloma soli wale ga ni Kalou, au mai yacova kina na vanua au sa tu kina qo.”—1 Kor. 15:9, 10.

Koya gona e rairai vakamacalataka tiko o Paula na kena sega ni namaki kei na vakasauri ni nona rairai vua o Jisu, na gauna cala e veisau kina, se nona nanuma ni sega ni ganiti koya na nona raica na raivotu totoka ya. E macala ni mareqeta o Paula na ka e yaco qori. E vakadinata kina ni sa vakaturi mai na mate o Jisu. Sa rauta me dau wewenigusuna na ka e yaco qori ni vunautaka na vakaturi i Jisu.—Caka. 22:6-11; 26:13-18.