1. Ni bera ni mate na yapositolo o Pita, na cava e uqeti kina vakalou me cakava?

 E KILA na yapositolo o Pita ni sa vakarau mate. Na gauna balavu e veiqaravi voli kina ena yalodina, rau a cakacaka vakavunau vata kei Jisu, e vunau tale ga vei ira na sega ni Jiu, oti e veiqaravi sara me lewe ni ilawalawa dauvakatulewa. Ia e sega ni cava e keri na nona veiqaravi o Pita. Ena rauta na 62-64 G.V., e uqeti vakalou me vola e rua na ivola, na imatai kei na ikarua ni Pita. E nuitaka ni na yaga na rua na ivola qo vei ira na lotu vaKarisito ena gauna sa na mate kina.​—2 Pita 1:​12-15.

2. Na cava e veiganiti kina na ivola i Pita?

² E vola nona ivola uqeti vakalou o Pita ena gauna sara ga era “vakararawataki” tu kina na tacina vakayalo ena “veimataqali veivakatovolei.” (1 Pita 1:6) Era saga na tamata ca mera kauta yani na ivakavuvuli lasu kei na itovo ca ena ivavakoso. (2 Pita 2:​1, 2, 14) Era sa volekata yani na lotu vaKarisito era tiko e Jerusalemi na “icavacava ni ka kece,” qo na nodra vakarusa na korolevu qori kei na ivakarau vakaJiu ni gauna ya na sotia ni Roma. (1 Pita 4:7) Macala ga ni yaga na ivola i Pita vei ira na lotu vaKarisito, mera kila na ka mera cakava mera vosota kina na ituvaki dredre ena gauna ya kei na kena era na qai sotava. b

3. Na cava meda dikeva kina na ivola uqeti vakalou i Pita?

³ A volavola o Pita vei ira na lotu vaKarisito ena imatai ni senitiuri, ia e raica o Jiova me okati tale ga ena nona Vosa na iVolatabu. Ena yaga gona vei keda na rua na ivola qori. (Roma 15:4) Eda bula tiko qo ena dua na vuravura e levu kina na itovo ca, ena vakadredretaka na noda qaravi Jiova. Kena ikuri, eda na sotava na veika rarawa e levu sara mai na kena e tini rusa kina na nodra ivakarau na Jiu ena gauna ya. E veiuqeti kina eso na veivakadreti bibi ena rua na ivola i Pita. Ena uqeti keda meda namaka tiko na siga i Jiova, meda kua ni rerevaki ira na tamata, meda dau veilomani tale ga vakalevu. Na veivakadreti va qo era dusimaki tale ga kina na qase ni ivavakoso ena sala mera qarava vinaka kina na qelenisipi.

4. Me vaka e tukuni ena 2 Pita 3:​3, 4, cava e rawa ni yavalata noda vakabauta?

⁴ Eda bula maliwai ira na sega ni vakabauta na parofisai vakaivolatabu. Era na rairai vakalialiai keda na dau veitusaqati ni sa dede sara noda waraka tiko na icavacava ni vuravura qo. Era kaya eso ni na sega sara ga ni yaco. (Wilika 2 Pita 3:​3, 4.) Ke da rogoca qori vei ira na itaukeinivale, ira eda cakacaka vata, se lewe ni noda vuvale, e rawa sara ga ni yavalata noda vakabauta. Ia e vakamacalataka o Pita na ka meda cakava.

5. Na cava ena uqeti keda me donu tiko ga noda rai me baleta na kena vakarusai na ituvaki ca qo? (2 Pita 3:​8, 9)

⁵ Era na rairai nanuma eso ni sa rui berabera o Jiova me vakarusa na veika ca ena vuravura qo. E uqeti keda na vosa i Pita me donu tiko ga na noda rai, meda nanuma tiko ni duidui sara noda rai kei na rai nei Jiova me baleta na gauna. (Wilika 2 Pita 3:​8, 9.) Vei Jiova, na duanaudolu na yabaki e tautauvata kei na dua na siga. E dau vosovoso o Jiova, e sega ni vinakata me dua e rusa. Ni yaco mai na nona siga, ena vakarusa na ituvaki ca qo. E noda itavi dokai gona meda vakayagataka na gauna sa vo meda vunau kina vei ira kece mai na veimatanitu.

6. Na cava meda cakava meda “namaka tiko” kina na siga i Jiova? (2 Pita 3:​11, 12)

⁶ E uqeti keda o Pita meda “namaka tiko” na siga i Jiova. (Wilika 2 Pita 3:​11, 12.) Ena sala cava? Ena vinaka meda dau vakasamataka vakatitobu na veivakalougatataki ena vuravura vou. Ke rawa, meda cakava qori e veisiga. Raitayaloyalotaka ni o ceguva na cagi savasava, kania na kakana bulabula, o marau mo kidavaki ira na wekamu kei na itokani nira vakaturi, o vakavulici ira tale ga era bula makawa sara ena parofisai vakaivolatabu sa vakayacori. Nomu vakasama vakatitobu va qori ena uqeti iko mo waraka na siga i Jiova, o vakadeitaka tale ga ni sa voleka sara na icavacava. Nida “kila rawa qo” na veika se bera mai, era na ‘sega ni vakacalai’ keda na vakavuvulitaka na ka lasu.​—2 Pita 3:17.

7. Na cava e dau yaco nida rerevaka na tamata?

⁷ Nida waraka tiko na siga i Jiova, ena uqeti keda meda tukuna na itukutuku vinaka vei ira e levu. Ia ena so na ituvaki eda na lomalomarua na vosa. Na vuna? De dua eda dau rerevaki ira na tamata. Qori sara ga na ka e yacovi Pita. Ena bogi e veilewai kina o Jisu, e rere ni tukuna o Pita ni tisaipeli i Jisu, e cakitaki koya tale ga vakavica. (Maciu 26:​69-75) Ia e qai kaya ena nuidei na yapositolo qo ena dua na gauna e muri: “Ni kua ni rerevaka na ka era rerevaka eso tale, ni kua tale ga ni lomaleqa kina.” (1 Pita 3:14) E vakadeitaki keda na vosa i Pita meda kua ni rerevaka na tamata.

8. Na cava mo cakava mo kua kina ni rerevaka na tamata? (1 Pita 3:15)

⁸ Na cava meda cakava meda kua ni rerevaka na tamata? E kaya o Pita: “Moni dokai Karisito ga e lomamuni.” (Wilika 1 Pita 3:15.) Qo e okati kina noda vakasamataka vakatitobu na nona itutu kei na kaukaua ni noda Turaga kei na noda Tui o Karisito Jisu. Ke o rere mo tukuna na itukutuku vinaka vua e dua, dau vakasamataka na noda Tui. Raitayaloyalotaki koya ni sa veiliutaki tiko mai lomalagi ra qai wavokiti koya tu e milioni vakamilioni na agilosi. Mo nanuma tiko ni sa soli vua “na lewa kece mai lomalagi kei vuravura,” ena tiko “vata kei [keda] ena veisiga kece me yacova na ivakataotioti ni veika vakavuravura.” (Maciu 28:​18-20) E uqeti keda o Pita meda “vakarau tu ena gauna kece” meda vakamacalataka na noda vakabauta. Vakacava o na via vunau e vanua ni cakacaka, koronivuli, se dua tale na vanua? Mo vakasamataka rawa toka na gauna o via cakava kina qori, oti mo vakarautaka vinaka na ka o na tukuna. Masu mo rawa ni yaloqaqa qai nuitaki Jiova me vukei iko mo kua ni rerevaka na tamata.​—Caka. 4:29.

9. Sala cava e sega ni vakaraitaka kina o Pita na loloma ena dua na gauna? (Raica tale ga na iyaloyalo.)

⁹ E vulica o Pita na sala me vakaraitaka kina na loloma. A tiko ena gauna e kaya kina o Jisu: “Au solia vei kemudou e dua na ivunau vou, mo dou veilomani, mo dou veilomani me vaka ga na noqu lomani kemudou.” (Joni 13:34) Ia dua na gauna e qai rere tale o Pita, e sega ni via kana vata kei ira na mataveitacini era lewe ni Veimatanitu. E kaya na yapositolo o Paula ni ka e cakava qori o Pita e “veivakaisini.” (Kala. 2:​11-14) E vuli o Pita ena nona vakadodonutaki. Ena rua na nona ivola, e vakabibitaka kina meda kua ni tukuna wale ga nida lomani ira na tacida, ia meda vakaraitaka sara ga.

10. E rawati vakacava na ivakaro me kua ni “veivakaisini na [noda] veilomani vakaveitacini”? Vakamacalataka. (1 Pita 1:22)

¹⁰ E kaya o Pita me kua ni “veivakaisini na [noda] veilomani vakaveitacini.” (Wilika 1 Pita 1:22.) Na noda veilomani va qori e rawati ga ena noda “talairawarawa ina ivakavuvuli dina.” Na ka dina qori e okati kina nona “sega ni dau veivakaduiduitaki na Kalou.” (Caka. 10:​34, 35) Eda sega ni talairawarawa ena ivakaro i Jisu me baleta na loloma ke da lomana ga eso ena ivavakoso, eso tale e sega. Me vakataki Jisu, e macala nida dau veivolekati kei ira eso, eso tale e sega. (Joni 13:23; 20:2) Ia e veivakadreti o Pita meda dau ‘veilomani vakaveitacini,’ nida lewe ga ni dua na vuvale.​—1 Pita 2:17.

11. Na cava e okati ni tukuni me ‘vu mai lomada noda veilomani’?

¹¹ E uqeta o Pita me ‘vu sara ga mai lomada na noda veilomani.’ Ni ‘vu mai lomada’ noda veilomani, e kena ibalebale meda lomana e dua ke dredre mada ga nida cakava qori. Kena ivakaraitaki, vakacava ke vakararawataki keda e dua na tacida? Ena totolo ga meda via sauma lesu, sega nida vakaraitaka na loloma. Ia e vuli vei Jisu o Pita ni sega ni taleitaka na Kalou meda sauma na ca. (Joni 18:​10, 11) E vola o Pita: “Ni kua ni sauma na ca ena ca se na veivakasewasewani ena veivakasewasewani.” (1 Pita 3:9) Ni o dau loloma o na yalovinaka, o na kauaitaki ira mada ga era vakararawataki iko.  

12. (a) Na cava tale meda cakava meda veilomani kina vakalevu? (b) Cava o na saga mo cakava me vaka e laurai ena vidio Taqomaka na iSolisoli Talei ni Duavata?

¹² Ena imatai ni ivola i Pita, e vakayagataka e dua na matavosa va qori, “veilomani vakalevu.” Na loloma qori e ubia e “levu na ivalavala ca,” sega ni vica ga. (1 Pita 4:8) De dua e nanuma lesu nona vulica na veivosoti a vakavulici koya kina o Jisu ena vica na yabaki yani e liu. Ena gauna qori, e rairai nanuma o Pita ni sa tamata vinaka ni kaya ni na vosoti tacina “vakavitu.” Ia e vakavulici koya o Jisu, vaka kina o keda meda dau veivosoti “vaka77,” kena ibalebale me kua ni vakaiyalayala. (Maciu 18:​21, 22) Ke dredre nomu muria na ivakasala qori, kua ni yalolailai! O ira kece na dauveiqaravi i Jiova era sega ni uasivi e ka ni sasaga mera veivosoti ena so na gauna. Ia e bibi ga ena gauna qo mo cakava na ka e veiganiti mo vosoti ira kina na tacimu, moni dau veiyaloni tale ga. c

13. Na cava ena ka ni sasaga kina vei ira na qase mera vakatawani ira na mataveitacini?

¹³ E sega vakadua ni guilecava o Pita na ka e tukuna vua o Jisu ni sa vakaturi: “Vakatawani ira na noqu sipi lalai.” (Joni 21:16) Ke o qase ni ivavakoso, e baleti iko tale ga na ivakasala qo. Ia e ka ni sasaga mera raica na gauna mera qarava kina na itavi bibi qori. Era na qarava mada na qase na ka me ratou bula kina nona vuvale, me ratou vakila ni ratou lomani, me ratou vakani tale ga vakayalo. Era liutaka na qase ni ivavakoso na cakacaka vakavunau, mera vakavakarau tale ga ena nodra itavi ena soqoni, soqo ni tabacakacaka, kei na soqo ni veiwasewase. Eso tale ga na qase era lewe ni Komiti Veitaratara kei na Valenibula se ra vakaitavi ena Tarataravaki e Qarava na Valenivolavola ni Tabana. Io, era osooso sara ga na qase ni ivavakoso!

14. Na cava ena uqeti ira na qase ni ivavakoso mera vakatawa na qelenisipi? (1 Pita 5:​1-4)

¹⁴ E uqeti ira nona itokani qase ni ivavakoso o Pita: “Moni vakatawa na qelenisipi ni Kalou.” (Wilika 1 Pita 5:​1-4.) Ke o qase ni ivavakoso, keimami kila ni o lomani ira na mataveitacini, o vinakata tale ga mo vakatawai ira. Ia o na rairai nanuma ena so na gauna ni o osooso se wawale, o na sega kina ni rawa ni vakayacora na ilesilesi qori. Na cava mo cakava? Talaucaka na lomamu vei Jiova. E vola o Pita: “Ke dua e veiqaravi me vakararavi ga ena kaukaua e solia na Kalou.” (1 Pita 4:11) Era na rairai sotava tiko na mataveitacini na leqa ena sega ni wali rawa ena gauna qo. Ia nanuma tiko ni kila vinaka o Jisu Karisito “na ivakatawa levu,” na sala mera vukei kina. Ena rawa ni cakava qori ena gauna qo, vaka kina ena vuravura vou. Na ka ga e vinakata na Kalou vei ira na qase ni ivavakoso, ya mera lomani ira na qelenisipi, vakatawani ira, mera “ivakaraitaki” tale ga.

15. Na cava e cakava e dua na qase me vakatawa na qelenisipi? (Raica tale ga na iyaloyalo.)

¹⁵ E kila vinaka o William, sa dede nona veiqaravi vaqase na bibi ni veivakatawani. Ni tekivu ga na matedewa na COVID-19, e saga kei ratou na vo ni qase me ratou veivosaki tiko ga e veimacawa kei ira na lewe ni nodratou iwasewase. E vakamacalataka na vuna: “Levu na tacida sa ra tu ga e vale, e rawarawa gona ni totolo na nodra rai cala.” Ni sotava na leqa e dua na tacida, ena vakarorogo vinaka o William me kila na ka e lomaleqataka se gadreva. Oti ena raica eso na ivola se vidio mai na noda website me vukei koya kina. E kaya: “Sa qai bibi sara na veivakatawani ena gauna qo. Eda gumatua meda vakavulica e levu era sega ni tacida mera kilai Jiova, e vinakati me caka tale ga qori vei ira na qelenisipi, ya mera vukei na sipi i Jiova mera dei ena dina.”

16. Sala cava eda na muria kina na ka eda vulica ena ivola i Pita?

¹⁶ Eda sa veivosakitaka mai e vica na tikina bibi ena rua na ivola i Pita. De dua o sa raica na ka mo vakavinakataka. Kena ivakaraitaki, o na via vakasamataka vakatitobu na veivakalougatataki ena vuravura vou? O vinakata me nomu isausau mo vunau e vanua ni cakacaka, koronivuli se dua tale na vanua? O raica na sala mo vakaraitaka kina nomu lomani ira na mataveitacini mai vu ni lomamu? Kemuni na qase ni ivavakoso, vakacava e vu mai lomamu nomu gumatua mo vakatawani ira na sipi i Jiova? Ni o dikevi iko, o na raica eso na vanua o malumalumu kina, ia mo kua ni yalolailai. E ‘yalovinaka na Turaga,’ ena vukei iko mo vakavinakataka nomu sasaga. (1 Pita 2:3) E veivakadeitaki o Pita: “Ena qai vakacavara na Kalou na nona vakarautaki kemuni. . . . Ena vakataudeitaki kemuni, ena vakaukauataki kemuni, ena vakadeitaka na nomuni yavu.”​—1 Pita 5:10.

17. Na cava na yaga ni noda gumatua kei na noda vinakata me vakavulici keda o Jiova?

¹⁷ Dua na gauna a nanuma o Pita ni sega ni ganiti koya me veimaliwai kei na Luve ni Kalou. (Luke 5:8) Ia ena nona veitokoni ena yalololoma o Jiova kei Jisu, e gumatua kina o Pita me muri Karisito ena yalodina. E vakadonui kina o Pita me “curu ina Matanitu tawamudu ni noda Turaga kei na iVakabula o Jisu Karisito.” (2 Pita 1:11) Dua dina na veivakalougatataki totoka qori! Ke o gumatua tale ga me vakataki Pita o qai vinakata me vakavulici iko o Jiova, o na rawata na veivakalougatataki ni bula tawamudu. O na “taura na isau ni [nomu] vakabauta, oya na [nomu] vakabulai.”​—1 Pita 1:9.