1-2. (a) E vakacava tu na kedra ituvaki e Jutia ni yaco yani na nona ivola na yapositolo o Paula? (b) Sala cava e yaco donu yani kina na ivola qori?

 NI SA mate o Jisu, e dredre sara na veika era sotava na lotu vaKarisito Iperiu e Jerusalemi kei Jutia. Se qai tauyavu oti ga na ivavakoso lotu vaKarisito, era vakacacani sara vakalevu. (Caka. 8:1) Ni oti e rauta ni 20 na yabaki era leqa vakailavo, rairai vu qori mai na dausiga e tara na vanua. (Caka. 11:​27-30) Ia ena rauta na 61 G.V., era vakila vakalekaleka e dua na gauna ni vakacegu ni vakatauvatani kei na ka era na qai sotava malua. Ena gauna qori, era taura kina e dua nona ivola uqeti vakalou na yapositolo o Paula, e yaco yani ena kena gauna donu.

² E yaco donu yani na ivola qori baleta ni na lekaleka ga na vakacegu era marautaka tiko na lotu vaKarisito ena gauna ya. Na ivakasala e vola yani o Paula ena uqeti ira na lotu vaKarisito mera vosota na veika rarawa era na vakarau sotava. Sa voleka sara na kena vakarusai na veika vakaJiu a parofisaitaka o Jisu. (Luke 21:20) E macala ni sega ni kila o Paula se o ira na lotu vaKarisito e Jutia na gauna ni veivakarusai. Ia e rawa nira vakayagataka na lotu vaKarisito qori na gauna lekaleka ya mera vakarautaki ira nira vaqaqacotaka nodra vakabauta, mera vakaraitaka tale ga na vosota.​—Iper. 10:25; 12:​1, 2.

3. Na cava meda vulica kina na lotu vaKarisito nikua na ivola na Iperiu?

³ Sa voleka qo meda sotava e levu sara na veika rarawa  ni vakatauvatani kei na kena era sotava na lotu vaKarisito Iperiu. (Maciu 24:21; Vkta. 16:​14, 16) Meda veivosakitaka mada eso na ivakasala e vakarautaka o Jiova vei ira na lotu vaKarisito qori ena yaga vei keda.

“SAGA SARA MEDA MATUA”

4. Na veika dredre cava era sotava na Jiu lotu vaKarisito? (Raica tale ga na iyaloyalo.)

⁴ E sega ni rawarawa na veika era sotava na Jiu lotu vaKarisito. Dua na gauna o Jiova e digitaki ira ga na Jiu mera nona tamata. E tiko e Jerusalemi na itikotiko ni veiliutaki e matataka na Matanitu ni Kalou, e vakayacori tale ga ena valenisoro na sokalou savasava. Era muria kece na Jiu yalodina na Lawa e soli vei Mosese kei na so tale na ka era vakavulica na nodra iliuliu ni lotu. E okati kina na ka era kania, nodra rai me baleta na cili, kei na nodra veimaliwai kei ira na lewe ni Veimatanitu. Ia ni sa mate o Jisu, sa sega ni vakadonuya o Jiova na vakacaboisoro ena valenisoro. Qori e sega ni rawarawa vei ira na Jiu lotu vaKarisito era dau muria na Lawa. (Iper. 10:​1, 4, 10) E sega ni rawarawa tale ga vei ira na lotu vaKarisito matua mera muria na veisau vou, me vaka na yapositolo o Pita. (Caka. 10:​9-14; Kala. 2:​11-14) Ena vuku ni nodra vakabauta vou, era tusaqati kina vei ira na iliuliu ni lotu Jiu.

5. Na cava mera qarauna na lotu vaKarisito?

⁵ E rua na ilawalawa era tusaqati ira na lotu vaKarisito Iperiu. Kena imatai, o ira na iliuliu ni lotu vakaJiu era okati ira na Jiu lotu vaKarisito mera vaka na vukitani. Kena ikarua, era tukuna eso era kaya nira lotu vaKarisito ni dodonu me muri tiko ga na Lawa, de dua mera kua kina ni tusaqati. (Kala. 6:12) Na cava mera cakava na lotu vaKarisito yalodina mera dei tiko ga ena ka dina?

6. Na cava e tukuna o Paula mera cakava na tacina vakayalo? (Iperiu 5:14–6:1)

⁶ Ni volavola o Paula vei ira na Iperiu, e uqeti ira mera vakekeli vakatitobu  ena Vosa ni Kalou. (Wilika Iperiu 5:14–6:1.) E vakayagataka na iVolatabu vakaIperiu me vakamacalataka vei ira na vuna e vinaka cake kina na ivakarau ni nodra sokalou na lotu vaKarisito ni vakatauvatani kei ira na lotu vakaJiu. a E kila o Paula ke ra vakalevutaka na nodra kilaka na lotu vaKarisito, ena qai matata vinaka vei ira na ka dina. E rawa tale ga nira vakaduiduitaka na ivakavuvuli lasu mera kua ni rawai kina.

7. Na ka dredre cava eda sotava nikua?

⁷ Me vakataki ira na lotu vaKarisito Iperiu, levu nikua era vakatetea na itukutuku e sega ni salavata kei na ivakatagedegede i Jiova. Era cata na dauveitusaqati na ivakavuvuli vakaivolatabu eda muria me baleta na itovo savasava, era tukuna nida dau veivakaduiduitaki, eda sega tale ga ni dau loloma. Na vakasama kei na rai ni vuravura e veicalati sara ga kei na rai uasivi ni Kalou. (Vkai. 17:15) E bibi gona meda kila qai cata na rai cala era na rairai vakayagataka na dauveitusaqati me vakayalolailaitaki keda, se vakacalai keda.​—Iper. 13:9.

8. Na cava meda cakava meda matua vakayalo?

⁸ E bibi tale ga meda muria na ivakasala i Paula vei ira na Iperiu lotu vaKarisito, ya meda saga sara meda matua vakayalo. Na cava e okati kina? E vinakati meda vulica vakatitobu na iVolatabu meda kilai Jiova vinaka kei na nona rai. Eda na cakava tiko ga qori nida sa yalayala oti qai papitaiso mada ga. Ke da sa dede mada ga ena dina, e bibi vei keda kece meda wilika wasoma na Vosa ni Kalou, meda vulica tale ga. (Same 1:2) Nida dei ena noda ituvatuva ni vuli vakataki keda, ena vaqaqacotaka na noda vakabauta, na itovo e vakabibitaka na yapositolo o Paula vei ira na Iperiu.​—Iper. 11:​1, 6.

“EDA VAKABAUTA GA MEDA VAKABULAI KINA”

9. Na cava e vinakati kina me dei na nodra vakabauta na Iperiu lotu vaKarisito?

⁹ E vinakati me dei tiko na nodra vakabauta na Iperiu lotu vaKarisito mera bula kina ena gauna rarawataki sa vakarau yaco e Jutia. (Iper. 10:​37-39) E vakasalataki ira na nona imuri o Jisu mera dro ina ulunivanua nira raica ni sa wavokiti Jerusalemi na mataivalu. E bibi mera muria na ivakasala qori na lotu vaKarisito kece era tiko ena korolevu o Jerusalemi kei ira na tiko ena taudaku ni koro. (Luke 21:​20-24) Ni vakarau kaba yani na mataivalu, era na lai vakaruru o ira na tiko e taudaku ena lomanikoro e vakabai vinaka tu me vakataki Jerusalemi. E vaka me sega ni vakasama vinaka mera dro ina veiulunivanua, e vinakati kina me dei tiko na nodra vakabauta.

10. Na cava era na cakava na lotu vaKarisito ke dei na nodra vakabauta? (Iperiu 13:17)

¹⁰ E vinakati tale ga vei ira na Iperiu lotu vaKarisito mera nuitaki ira e lesia o Jisu mera veidusimaki ena ivavakoso. Era na rairai tukuna na tacida qori na veidusimaki matata mera muria kina na ivakaro i Jisu na lewe ni ivavakoso ena kena gauna donu, me matau tale ga. (Wilika Iperiu 13:17.) Na vosa vaKirisi  ni “talairawarawa” ena Iperiu 13:​17, e kena ibalebale ni o koya e talairawarawa, ena muria na veidusimaki ni nuitaki koya e veidusimaki tiko. Ena sega ni talairawarawa baleta ni dodonu ga me cakava. E bibi gona vei ira na Iperiu lotu vaKarisito mera vakaraitaka nira nuitaki ira na tacidra era veidusimaki tiko ni bera na veika rarawa. Ke ra talairawarawa ena veidusimaki ena gauna ni vakacegu, ena rawarawa sara mera cakava qori ena gauna dredre.

11. Na cava e bibi kina me dei na noda vakabauta na lotu vaKarisito ena gauna qo?

¹¹ E vinakati tale ga vei keda nikua na vakabauta me vakataki ira na Iperiu lotu vaKarisito. Eda bula tiko ena dua na gauna era sega ni vakabauta kina e levu ni sa na vakarau vakarusai na ituvaki ca qo. Era vakalialiai keda mada ga nida vakabauta qori. (2 Pita 3:​3, 4) Kena ikuri, e tukuni ena iVolatabu eso na itukutuku me baleta na ka ena yaco ena veivakararawataki levu, ia e levu tale na ka eda sega ni kila. E vinakati gona meda vakabauta dei ni na vakarusai na ituvaki ca qo ena kena gauna, eda nuidei tale ga ni na karoni keda o Jiova.​—Apak. 2:3.

12. Na cava meda cakava meda bula kina ena veivakararawataki levu?

¹² E vinakati tale ga meda vakabauta dei ni vakayagataka tiko o Jiova “na dauveiqaravi yalodina e vuku” me dusimaki keda ena gauna qo. (Maciu 24:45) Ni tekivu na veivakararawataki levu de dua ena tukuni vei keda na idusidusi matata meda bula kina, me vakataki ira na Iperiu lotu vaKarisito nira viribaiti Jerusalemi na sotia ni Roma. Qo sara ga na gauna meda vakaraitaka kina nida nuitaka na nodra veidusimaki o ira na lesi ena isoqosoqo i Jiova. Ke dredre meda muria na nodra veidusimaki ena gauna qo, ena dredre tale ga meda muria nodra veidusimaki ena veivakararawataki levu.

13. Na cava e bibi kina na ivakasala ena Iperiu 13:5?

¹³ Nira waraka tiko na Iperiu lotu vaKarisito na veidusimaki mera dro, e vinakati mera bula rawarawa, mera kua ni “lomana na ilavo.” (Wilika Iperiu 13:5.) Eso vei ira era vosota na dausiga kei na bula dravudravua. (Iper. 10:​32-34) Era tu vakarau mera vosota na veika dredre ena vuku ni itukutuku vinaka, eso tale era rairai vakasamataka mera rawa ilavo vakalevu me itataqomaki. Ia ena sega ni taqomaki ira na ilavo ena siga ni veivakarusai. (Jeme. 5:3) E macala ni o koya e lomana na iyau ena rairai dredre sara ga vua me dro qai biuta tu mai na nona vale kei na ka e taukena.

14. E yaga vakacava na dei ni noda vakabauta ena gauna qo nida vakatulewataka na ka e vauca na iyau?

¹⁴ Eda na sega ni domodomoiyau ke da vakabauta dei ni sa voleka sara ni vakarusai na ituvaki ca qo. E kaya na iVolatabu ni levu era na “kolotaka e gaunisala na nodra siliva” nira liaca ni na “sega ni vakabulai ira na nodra siliva se na nodra koula ena siga ni cudru waqawaqa i Jiova.” (Isik. 7:19) E vinakati meda vakatulewataka na ka meda cakava meda bula rawarawa me rawa nida qaravi Jiova tiko ga. Ia meda kua ni vakabibitaka na rawa ilavo. Qori e okati kina noda temaki meda dinau vakaveitalia se vakayagataka vakalevu noda gauna ena kena vakavinakataki na ka eda taukena.  Eda na qarauna tale ga meda kua ni vakaliuca na noda iyau. (Maciu 6:​19, 24) Nida waraka tiko me vakarusai na ituvaki ca qo, ena vakatovolei na noda vakabauta ena ka e vauca na noda iyau kei na so tale na ka.

“ME TIKO VEI KEMUNI NA VOSOTA”

15. Na cava e vinakati kina vei ira na Iperiu lotu vaKarisito mera vosota?

¹⁵ E vinakati vei ira na Iperiu lotu vaKarisito mera vosota ni sa qai ca tiko ga na ituvaki e Jutia. (Iper. 10:36) Eso vei ira era sa tusaqati oti mai, ia e levu tale era qai mai lotu vaKarisito ni sa oti na gauna ni veivakacacani. E vakadreti ira gona o Paula mera vakarautaki ira ena levu tale na veika dredre sa voleka, me rawa nira yalodina me yacova na mate me vakataki Jisu ga. (Iper. 12:4) Ia ni tete na lotu vaKarisito, era cudru kina e levu na Jiu dauveitusaqati, era voravora. Ena vica na yabaki e liu, era mokulaki Paula e dua na ilala ni vunau tiko e Jerusalemi. E sivia ni 40 na Jiu era “bubuluitaka mera cudruvi ke ra kana se gunu ni bera nira vakamatei Paula.” (Caka. 22:22; 23:​12-14) Nira cati mada ga na lotu vaKarisito ra qai tusaqati, e bibi tiko ga mera soqoni vata, mera vunautaka na itukutuku vinaka, mera vaqaqacotaka tale ga na nodra vakabauta.

16. E yaga vakacava na ivola na Iperiu me donu tiko ga na noda rai ena veitusaqati? (Iperiu 12:7)

¹⁶ Na cava mera cakava na Iperiu lotu vaKarisito mera vosota na veitusaqati? E kila o Paula ni vinakati me donu tiko nodra rai nira sotava na veika rarawa. E vakamacalataka gona ni rairai vakatara na Kalou mera sotava na veivakatovolei mera vuli kina. (Wilika Iperiu 12:7.) E rawa nira bucina eso na itovo vaKarisito se vakavinakataka. Nira vakasamataka na yaga ni nodra vakatovolei, ena rawarawa kina mera vosota.​—Iper. 12:11.

17. Na cava e vulica o Paula me vosota na veitusaqati?

 ¹⁷ E uqeti ira na Iperiu lotu vaKarisito o Paula mera yaloqaqa nira sotava na ituvaki dredre, mera kua tale ga ni soro. E veiganiti sara ga nona vola na ivola qo. Ni bera ni lotu vaKarisito e dau tusaqati ira mada ga, e kila vinaka na ka era sotava tiko. E kila tale ga na sala me vosota kina na veivakacacani. Ni sa mai lotu vaKarisito, e vosota e levu na mataqali veitusaqati. (2 Kor. 11:​23-25) Kena ibalebale ni kila vinaka o Paula na ka e vinakati me rawa nira vosota. E vakadreti ira na lotu vaKarisito ni vinakati mera nuitaki Jiova mera vosota na ituvaki dredre, mera kua ni nuitaki ira ga. A rawa ni tukuna o Paula ena yaloqaqa: “E dau vukei au o Jiova, au na sega ni rere.”​—Iper. 13:6.

18. Na cava eda na sotava ena gauna se bera mai? Cava meda cakava ena gauna qo?

¹⁸ Levu na tacida era vosota tiko na veitusaqati ena gauna qo. Meda yalodina ni tokoni ira ena noda masu, ena so tale na gauna meda vukei ira ena ka era gadreva. (Iper. 10:33) E vakamatatataka na iVolatabu ni “o ira kece era via qarava na Kalou ena vuku i Karisito Jisu era na vakacacani tale ga.” (2 Tim. 3:12) Oya na vuna meda vakarautaki keda rawa ena gauna dredre se bera mai. Meda vakadeitaka meda nuitaki Jiova tiko ga ena gauna qo, ni na vukei keda ena ka dredre cava ga eda na sotava. Ena vakacegui ira nona dausokalou yalodina ena gauna lokuci.​—2 Ces. 1:​7, 8.

19. Eda na vakarautaki keda vakacava ena veivakararawataki levu? (Raica tale ga na iyaloyalo.)

¹⁹ E yaga sara ga na ivola i Paula me vakarautaki ira kina na lotu vaKarisito ena imatai ni senitiuri ena veika rarawa era na vakarau sotava. E uqeti ira o Paula mera vulica vagumatua na Vosa ni Kalou, mera kila vinaka tale ga. Nira cakava qori era na cata kina na ivakavuvuli ena vakaleqa na nodra vakabauta. E uqeti ira mera vaqaqacotaka nodra vakabauta me rawa nira muria totolo na veidusimaki i Jisu kei ira na liutaka tiko na cakacaka ena ivavakoso. E vukei ira mera vakaraitaka na vosota ni donu nodra rai me baleta na veika rarawa, mera raica tale ga ni qori e veivakavulici i Jiova. Meda muria mada ga na ivakasala uqeti vakalou qori, me rawa nida vosota kina ena yalodina me yacova na icavacava.​—Iper. 3:14.