1-2. Na cava eda marau kina na dauveiqaravi i Jiova? (Jemesa 1:​22-25)

 E VINAKATA o Jiova kei na Luvena lomani meda marau. E kaya o koya e vola na Same 119:2: “Era marau o ira na muria na nona veivakadreti, era vaqarai koya ena lomadra taucoko.” E yalataka o Jisu: “Era marau o ira na rogoca na vosa ni Kalou ra qai muria tiko ga!”​—Luke 11:28.

² E levu tu na vuna eda marau kina na dauveiqaravi i Jiova. O koya e bibi duadua nida dau wilika wasoma na Vosa ni Kalou qai saga ena noda vinaka taucoko meda muria na ka eda vulica.​—Wilika Jemesa 1:​22-25.

3. Ena yaga vakacava vei keda nida muria na ka eda vulica ena Vosa ni Kalou?

³ E levu na sala e yaga kina noda “muria na vosa” ni Kalou. Dua, eda vakamarautaki Jiova, eda marau tale ga. (Dauv. 12:13) Nida muria na kena ivakasala e vinaka kina noda bula vakavuvale, e dei tale ga noda veitokani ena ivavakoso. De dua qori sara ga na ka o vakadinadinataka. Kena ikuri, eda taqomaki mai na leqa era sotava o ira na sega ni muria na ivakaro i Jiova. Io, eda duavata kei na ka e tukuna o Tui Tevita. Ni cavuta oti na lawa, ivakaro, kei na lewa i Jiova ena nona sere, sa qai tinia: ‘Ke muri, ena dua na icovi levu.’​—Same 19:​7-11.

4. Na cava e ka ni sasaga kina meda muria na Vosa ni Kalou?

⁴ E ka ni sasaga meda muria na Vosa ni Kalou. Nida osooso kece, e bibi meda tuvanaka na gauna meda wilika  kina qai vulica na iVolatabu me rawa nida kila na ka e vinakata o Jiova meda cakava. Meda veivosakitaka mada eso na vakatutu me rawa nida wilika wasoma na iVolatabu. Eda na dikeva tale ga na ka meda cakava meda vakasamataka kina na ka eda wilika qai raica na sala meda muria kina.

TUVANAKA NA GAUNA

5. Na cava eso na itavi eda qarava?

⁵ Eda osooso vakalevu na tamata i Jiova. Eda vakayagataka e levu na gauna meda qarava kina noda itavi vaKarisito. Kena ivakaraitaki, levu era cakacaka mera qaravi ira kei na nodra vuvale. (1 Tim. 5:8) Levu na tacida era qaravi tauvimate, era qarava tale ga na wekadra itabaqase. O keda kece meda kauaitaka noda bula yadua, qori e vinakati kina na gauna. Kena ikuri, e tiko na noda itavi ena ivavakoso. E dua na noda itavi bibi meda gumatua ena cakacaka vakavunau. Ni levu tu na itavi mo qarava, o na tuvanaka vakacava na gauna mo wilika wasoma kina na iVolatabu, vakasamataka vakatitobu qai muria sara?

6. Na cava mo cakava mo wilika wasoma kina na iVolatabu? (Raica tale ga na iyaloyalo.)

⁶ E “bibi sara” vei keda na lotu vaKarisito na wili iVolatabu, e vinakati gona meda wilika. (Fpai. 1:10) E kaya na imatai ni same me baleta na tamata mamarau: “E marautaka na lawa i Jiova, qai wilika e ra na nona lawa ena siga kei na bogi.” (Same 1:​1, 2) Kena ibalebale ni bibi me tuvanaki na gauna meda wili iVolatabu kina. Na gauna veiganiti cava meda wiliwili kina? Ena rairai duidui na gauna eda digia. Ia e bibi ga meda digia na gauna meda wilika wasoma kina na iVolatabu. E kaya e dua na tacida o Victor: “E vinaka meu wili iVolatabu ena matakalailai. Au sega ni taleitaka na yadra vakamataka, ia e veiganiti qori  ni sega ni levu kina na sosa. E bulabula noqu vakasama, au nanuma vinaka tale ga na ka au wilika.” De dua o va tale ga qori. Mo taroga, ‘Na gauna veiganiti cava meu wili iVolatabu kina?’

VAKASAMA VAKATITOBU

7-8. Na cava e rawa ni vakavuna me sega ni yaga noda wili iVolatabu? Vakatauvatana.

⁷ Levu na gauna eda wiliwili tu ga, eda sega ni vakasamataka vakatitobu na ka eda wilika. Vakacava o bau wilika e dua na ka, oti o sa guilecava tale? O keda kece eda dau va qori. Ka ni rarawa, ni va tale ga qori noda wili iVolatabu ena so na gauna. De dua eda biuta noda isausau meda wilika e vica na wase ena dua na siga. Totoka qori. Ia e bibi meda biuta noda isausau qai saga meda dei kina. (1 Kor. 9:26) Nida wili iVolatabu, meda kua ni wiliwili wale tu ga. Eso tale na ka meda cakava me rawa ni yaga noda wiliwili.

⁸ Vakasamataka mada na vakatautauvata qo: E yaga na uca me bula kina na kau. Ia ke tau vakalevu na uca ena dua na gauna lekaleka, e rawa ni suasua vakalevu na qele. Ke tau tale, ena sega ni bulabula na kau. E taura na gauna me curuma na qele na wai ni uca me bulabula kina na kau. E va tale ga qori noda wili iVolatabu. Meda kua ni wiliwili vakatotolo nida na sega ni nanuma na ka eda wilika, ena dredre tale ga meda muria.​—Jeme. 1:24.

9. Na cava meda cakava ke noda ivakarau meda wilika vakatotolo na iVolatabu?

⁹ Vakacava o dau wilika vakatotolo na iVolatabu ena so na gauna? Na cava e dodonu mo cakava? Wiliwili vakamalua. Saga mo vakasamataka na ka o sa wilika oti, se wilika tiko. E sega soti ni dredre qori. O rawa ni vakabalavutaka nomu gauna ni vuli me okati kina nomu gauna ni vakasama vakatitobu. Se o rawa ni wilika ga e vica na tikina qai vakayagataka na vo ni gauna mo vakasama kina vakatitobu. E kaya o Victor, sa tukuni  oti mai: “E dau lekaleka ga noqu wili iVolatabu, rawa ni dua ga na wase. Niu dau wiliwili ena matakalailai, au rawa ni vakasamataka tiko ena siga taucoko na ka au wilika.” Se iwalewale cava o muria, e bibi mo wiliwili vakamalua mo rawa ni vakasamataka na ka o wilika.​—⁠Same 119:97; raica na kato “ Taro Mo Vakasamataka.”

10. Tukuna e dua na ivakaraitaki mo vakasamataka na sala mo muria kina na ka o vulica. (1 Cesalonaika 5:​17, 18)

¹⁰ Ni o wili iVolatabu, vakasamataka na sala mo muria kina. Ni o wilika e dua na wase, mo taroga, ‘Au na muria vakacava qo nikua se na gauna sa tu qo e liu?’ Kena ivakaraitaki, kaya mada ni o wilika na 1 Cesalonaika 5:​17, 18. (Wilika.) Ni o wilika oti, o rawa ni cegu vakalekaleka, vakasamataka se vakacava na levu ni nomu dau masu kei na ka o masulaka. O rawa tale ga ni vakasamataka eso na ka mo vakavinavinakataka. De dua o via vakavinavinakataka e tolu na ka e vakarautaka o Jiova. Ke vica mada ga na miniti o vakasamataka kina na ka o vulica ena iVolatabu, o na rawa sara ga ni kila vinaka na kena ibalebale, o na muria tale ga. Vakasamataka na kena yaga ke o cakava tiko qori e veisiga ni o wilika eso na wase! Io, toso na gauna o sa na dauveiqaravi matua i Jiova. Ia na cava mo cakava ke levu na ka mo vakavinakataka?

ISAUSAU VEIGANITI

11. Na cava o na rairai yalolailai kina ena so na gauna? Tukuna e dua na kena ivakaraitaki.

¹¹ Ni o wili iVolatabu qai vakasamataka na sala mo muria kina na kena ivakasala, de dua o na yalolailai ena so na gauna. Kena ivakaraitaki: Nomu wili iVolatabu nikua e okati kina nomu sega ni veivakaduiduitaki. (Jeme. 2:​1-8) O kila ni o rawa ni vakavinakataka nomu ivakarau vei ira eso tale, o mani vakatulewataka mo cakava eso na veisau. Totoka sara qori! Ia nimataka o wilika e dua na tikina me baleta na bibi ni nomu qarauna nomu vosa. (Jeme. 3:​1-12) O liaca ni so na gauna o dau tukuna eso na ka e sega ni veiuqeti. O mani vakatulewataka mo tukuna ga na ka e veiuqeti. Nomu wili iVolatabu ena siga e tarava e baleta nomu qarauna na veitokani kei vuravura. (Jeme. 4:​4-12) O raica ni bibi mo digia vinaka na ka ni veivakamarautaki. Ia ena siga tarava, o yalolailai sara ga ena levu ni ka mo cakacaka kina.

12. Na cava mo kua ni yalolailai kina ke vinakati mo cakava eso na veisau? (Raica tale ga na ivakamacala e ra.)

 ¹² Ke vinakati mo cakava eso na veisau, kua ni yalolailai. Qori e vakaraitaka ni o yalomalumalumu, e vinaka tale ga nomu inaki. O koya e yalomalumalumu, ena wilika na iVolatabu qai raica na ka me veisautaka. a Mo nanuma tale ga ni vinakati mo vakaitovotaka tiko ga “na itovo vou.” (Kolo. 3:10; vakatauvatana study note “is being made new.”) Na cava mo cakava mo muria tiko ga kina na Vosa ni Kalou?

13. Na cava e dua na sala o na muria kina na ka o vulica? (Raica tale ga na iyaloyalo.)

¹³ Kua ni saga mo muria na ka kece o wilika ena dua vata ga na gauna, mo biuta eso nomu isausau veiganiti. (Vkai. 11:2) De dua o na via muria qo: Vola eso na ka mo vakavinakataka, digia e dua se rua mo cakacaka kina, na kena vo qai cakacaka kina ni toso na gauna. Mo tekivu e vei?

14. Na isausau cava mo tekivu kina?

¹⁴ De dua o na vinakata mo tekivu ena dua na isausau o rawa ni rawata. Se o digia mo cakacaka ena dua na ka e vinakati sara ga mo veisautaka. Ni o sa kila na nomu isausau, vakekeli sara ena noda ivola vakaivolatabu, o rawa ni vakayagataka na Watch Tower Publications Index se na iDusidusi ni Vakadidike ni iVakadinadina i Jiova. Masulaka nomu isausau, kerei Jiova mo “kua . . . ni vinakata wale ga” ia mo “cakava sara ga.” (Fpai. 2:13) Oti muria sara na ka o vulica. Ni o raica  ni o sa cakava rawa na veisau ena imatai ni nomu isausau, ena rawa ni uqeti iko mo cakava e dua tale na veisau. Ni o sa veisautaka rawa e dua na ivakarau ni nomu bula se itovo, sa na rawarawa mo cakava eso tale na veisau.

ME ‘CAKACAKA VEI KEMUNI’ NA VOSA NI KALOU

15. Eda duatani vakacava na dauveiqaravi i Jiova vei ira e levu era wilika na iVolatabu? (1 Cesalonaika 2:13)

¹⁵ Era tukuna eso nira sa wilika vakalevu na iVolatabu. Ia vakacava era vakabauta dina na ka e vakavulica? Vakacava era muria na ka e tukuni kina me veisautaka na nodra bula? Sega. Levu era sega ni muria na kena ivakasala. Ia eda duatani na dauveiqaravi i Jiova! Me vakataki ira na lotu vaKarisito ena imatai ni senitiuri, eda vakabauta na iVolatabu me “vosa dina ni Kalou.” Eda saga tale ga me laurai na kena yaga ena noda bula.​—Wilika 1 Cesalonaika 2:13.

16. Na cava meda cakava meda muria kina na Vosa ni Kalou?

¹⁶ E ka ni sasaga meda wilika na Vosa ni Kalou qai muria na ka eda vulica. De dua ena sega ni rawarawa noda lokuca na gauna meda wilika kina. Se da rairai wiliwili ga vakatotolo qai sega ni vakasamataka na ka eda wilika. Se rawa nida yalolailai ena levu ni ka meda veisautaka. O na rawa ni cakava se mani vakacava na kena dredre. Ena veivuke i Jiova o rawa ni wilika na iVolatabu. Meda ciqoma mada ga nona veivuke meda kua kina ni dau rogoca wale ga na vosa, ia meda muria tale ga. E macala na levu ga ni noda wilika na Vosa ni Kalou qai muria, eda na marau vakalevu.​—Jeme. 1:25.