Era sega ni tiko na 70 na tisaipeli ena gauna e tauyavutaka kina o Jisu na iVakayakavi ni Turaga, meda kua ni nanuma nira sega ni vakadonui, se ra sa biuti koya. A vinakata o Jisu me tiko vata kei ratou na nona yapositolo ena gauna qori.

Era tisaipeli kece na le 12 kei ira na le 70. Vei ira kece na tisaipeli i Jisu, e digitaka e liu e 12 na tagane qai vakatoka me ratou yapositolo. (Luke 6:​12-16) A tiko e Kalili o Jisu ni “kacivi ratou na le Tinikarua” qai “talai ratou yani me ratou vunautaka na Matanitu ni Kalou, me ratou veivakabulai tale ga.” (Luke 9:​1-6) Toso na gauna ni lako sobu i Jutia, e “lesia . . . e le 70 qai talai ira mera lako yarua.” (Luke 9:51; 10:1) Koya gona, era tiko na imuri i Jisu ena veivanua e kacivaki kina na itukutuku vinaka.

E veiyabaki era dau soqova na Lakosivia na Jiu era tisaipeli i Jisu, kena irairai nira dau soqova vata vakavuvale. (Lako 12:​6-11, 17-20) Ni sa voleka na gauna me mate kina o Jisu, e lako vata kei ratou na yapositolo i Jerusalemi. Ia e sega ni kacivi ira kece na nona tisaipeli e Jutia, Kalili, kei Perea mera lako yani ena soqo ni Lakosivia. E macala ni vinakata sara ga o Jisu me tiko vata kei ratou na yapositolo ena gauna qori. E tukuna vei ratou: “Au gadreva vakalevu me datou kania vata na kakana ni Lakosivia qo ni bera niu vakararawataki.”​—Luke 22:15.

E tiko e dua na vuna vinaka e cakava kina qori o Jisu. Sa vakarau mate me vaka “na Lami ni Kalou ena kauta tani na nodra ivalavala ca na kai vuravura.” (Joni 1:29) Ena lai mate e Jerusalemi, na vanua e dau vakacabori kina na isoro vua na Kalou. Na lami ni Lakosivia era na nanuma kina na Isireli nona vakabulai ira mai Ijipita o Jiova. Ia e uasivia qori na isoro e cabora o Jisu. Ena sereki keda kece mai na ivalavala ca kei na mate! (1 Kor. 5:​7, 8) Na ka e cakava o Jisu e rawa kina vei ratou na le Tinikarua me ratou yavu ni ivavakoso lotu vaKarisito. (Efeso 2:​20-22) Na koro tabu mada ga o Jerusalemi “e 12 tale ga na vatu ni kena yavu,” e volai kina “na yacadratou na 12 na yapositolo ni Lami.” (Vkta. 21:​10-14) Io, e dua na itavi bibi eratou na vakaitavi kina na yapositolo yalodina ena vakayacori ni inaki ni Kalou. Sa rauta me vinakata o Jisu me tiko vata kei ratou ena iotioti ni Lakosivia kei na soqo e qai tauyavutaka ni oti qori, na iVakayakavi ni Turaga.

Era sega ni tiko vata kei Jisu ena ivakayakavi qori o ira na le 70 kei ira na vo ni tisaipeli. Ia ena yaga tiko ga na iVakayakavi ni Turaga vei ira kece na tisaipeli era vakaraitaka nira yalodina. Toso na gauna o ira kece na tisaipeli era lumuti, era na okati tale ga ena veiyalayalati me baleta e dua na matanitu e tukuna o Jisu vei ratou na yapositolo ena bogi qori.​—Luke 22:​29, 30.