1, 2. (a) Erau veiwekani vakacava na loloma kei na vakabauta? (b) Na taro cava eda na veivosakitaka?

EDA lomani Jiova “ni a liu sara ga na nona lomani keda.” (1 Joni 4:19) Dua na ivakaraitaki ni nona dau lomani keda kece, oya na nona vakaliuliu ni vakalougatataki ira nona tamata yalodina. Na levu ga ni noda lomani koya na dei vinaka ni noda vakabauta. E sega ni yavutaki qo ena noda kila ni bula dina tiko, ia e baleta sara tiko ga na nona dau vakaicovitaki ira tu ga e lomana.​—Wilika Iperiu 11:6.

² O Jiova e dau vakaicovitaki ira eso, qori sara ga na ka e kilaitani kina. Ena sega ni taucoko na noda vakabauta, vakavo ke da vakadeitaka ni na vakaicovitaki ira na vakasaqarai koya tiko, ni “vakabauta oya noda vakadeitaka e lomada ni na yaco dina na ka eda nuitaka.” (Iper. 11:1) Io na noda vakabauta e okati kina na noda nuitaka na veika e yalataka tu na Kalou meda na vakalougatataki kina. Ia ena yaga vakacava na noda nuitaka na icovi? E vakaicovitaki ira vakacava na nona dauveiqaravi o Jiova, ena gauna makawa vaka kina nikua? Meda raica mada.

3. Na cava e yalataka tu na Kalou ena Malakai 3:10?

³ E raica o Jiova me nona itavi sara ga me vakaicovitaki ira nona tamata yalodina, e sureti keda gona meda qara na nona veivakalougatataki.  Eda wilika: “‘Vakatovolei au mada . . . ’ e kaya o Jiova ni lewe vuqa, ‘moni raica niu na dolava vei kemuni se sega na matamata ni lomalagi, meu sova vei kemuni na veivakalougatataki me kua ni dua e leqa ena dua na ka.’” (Mala. 3:10) Eda vakaraitaka gona noda vakavinavinaka nida ciqoma na veisureti vakayalololoma qori i Jiova.

4. Na cava eda rawa ni nuitaka kina na vosa i Jisu ena Maciu 6:33?

⁴ E vakadeitaka o Jisu vei ira na nona tisaipeli ni na tokoni ira na Kalou ke ra vakaliuca na nona Matanitu. (Wilika Maciu 6:33.) E veivakadeitaki na vosa ni yalayala i Jisu qori ni yavutaki ena nona dau nuitaki tu ga o Jiova. E kila o Jisu ni dau yaco ga na ka kece e yalataka na Kalou. (Aisea 55:11) Eda rawa gona ni nuidei ke da vakabauti Jiova mai vu ni lomada, ena dina o koya ena nona vosa ni yalayala: “Au na sega sara ni laivi iko, au na sega tale ga ni biuti iko.” (Iper. 13:5) Eda rawa ni sema vata na vosa uqeti vakalou qori ina ka e kaya o Jisu me baleta na vakasaqarai taumada ni Matanitu ni Kalou kei na nona yalododonu.

5. E vaqaqacotaka vakacava noda vakabauta na vosa i Jisu vei Pita?

⁵ Dua na gauna a tarogi Jisu na yapositolo o Pita: “Keitou sa biuta na ka kece me keitou muri kemuni, na cava ena qai neitou?” (Maciu 19:27) E sega ni cudruvi Pita o Jisu, e tukuna ga vei ratou nona tisaipeli ni ratou na vakaicovitaki ena nodratou dau vakuai ratou. Era na veiliutaki mai lomalagi na nona yapositolo yalodina kei ira eso tale. Ia na gauna mada ga qo era vakaicovitaki tiko. E kaya o Jisu: “O koya e biuta na vale se tacina se ganena se tamana se tinana se luvena se tikiniqele ena yacaqu, ena rawata  tale e yadrau, ena bula tawamudu tale ga.” (Maciu 19:29) Ena sega ni vakatauvatani rawa nodratou vakalougatataki na nona tisaipeli ena vuku ni veika eratou rairai vakuai ratou kina. Era talei cake sara na tama, tina, ganeda kei na tacida vakayalo nida vakasamataka kei na veika eda vakuai keda kina ena vuku ni Matanitu ni Kalou.

6. Na cava e yalataka kina o Jiova vei ira na nona dauveiqaravi nira na vakaicovitaki?

⁶ Ni yalataka o Jiova na icovi vei ira na nona dauveiqaravi, sa vukei ira sara tiko ga mera vosota ni vakatovolei nodra vakabauta. Qo mada ga era sa marautaka tiko na dauveiqaravi ni Kalou na veivakalougatataki vakayalo, ia era rai vakanamata tale tu ga ina veivakalougatataki levu se bera tiko mai. (1 Tim. 4:8) Io na noda vakadeitaka ni na “vakaicovitaki ira tale ga era vakasaqarai koya ena yalogu” o Jiova, ena vukei keda qori meda tudei ena vakabauta.—Iper. 11:6.

7. Sala cava e vaka kina na ikelekele na noda inuinui?

⁷ E kaya o Jisu ena nona Vunau ena Ulunivanua: “Ni marau, io moni marau vakalevu, ni na levu na kemuni isau mai lomalagi, nira vakacacani tale ga va qori na parofita era liu vei kemuni.” (Maciu 5:12) E talei dina nodra na rawata eso na icovi ni bula e lomalagi, ia e vu ni ‘marau kei na marau levu’ na noda rawa ni bula tawamudu ena parataisi e vuravura. (Same 37:11; Luke 18:30) Se mani noda inuinui na bula e lomalagi se vuravura, na noda inuinui e rawa ni “ikelekele ni noda bula, e dei qai kaukaua.” (Iper. 6:17-20) Me vaka ga na kena dau yaga na ikelekele me toka dei kina na waqa ni voravora na wasawasa, na noda nuitaka na icovi ena vukei keda me dei na lomada, noda vakasama kei na noda bula vakayalo. Ena rawa tale ga ni vakayaloqaqataki keda meda vosota na veika rarawa.

8. Ena vakalailaitaka vakacava na noda lomaleqa na inuinui?

⁸ Ena vakalailaitaka na noda dau lomaleqa nikua na noda inuinui e yavutaki vakaivolatabu. Na yalayala ni Kalou e vaka na ilumu vakayalo e vakamalumutaka na nuiqawaqawa ni lomada. E veivakacegui dina meda ‘biuta vei Jiova na noda icolacola,’ nida kila ni na ‘tokoni keda o koya’! (Same 55:22) Eda nuidei ni “rawa ni cakava vei keda” na Kalou “na ka e uasivia sara na ka eda kerea se bau vakasamataka.” (Efeso 3:20) Vakasamataka mada qori—e sega ni uasivi ga, ia e “uasivia sara”!

9. Eda vakadeitaka vakacava ni na vakalougatataki keda o Jiova?

⁹ Meda vakaicovitaki, e dodonu me taucoko noda vakabauti Jiova, da qai talairawarawa ina nona veidusimaki. E kaya o Mosese ina matanitu o Isireli: “Ni na vakalougatataki iko dina o Jiova ena vanua e solia tiko vei iko o Jiova na nomu Kalou mo taukena me ivotavota, kevaka wale ga o vakarorogo vinaka ena domo i Jiova na nomu Kalou, ni o qarauna mo muria na ivakaro kece au vakarota tiko vei iko nikua. Ni na vakalougatataki iko o Jiova na nomu Kalou me vaka e yalataka vei iko.” (Vkru. 15:4-6) Vakacava o nuidei ni na vakalougatataki iko o Jiova ke o qaravi koya tiko ga ena yalodina? E tiko na vuna vinaka mo nuidei kina.

10, 11. E vakaicovitaki Josefa vakacava o Jiova?

¹⁰ E volai na iVolatabu me yaga vei keda. E volaitukutukutaki sara tu ga kina nona vakaicovitaki ira na nona tamata yalodina na Kalou. (Roma 15:4) E vakasakiti kina na ivakaraitaki i Josefa. Ratou a nakicataki koya mada ga na tacina, lawakitaki koya tale ga na wati nona turaga, lai tini curu kina e valeniveivesu e Ijipita. Vakacava sa guilecavi koya na nona Kalou? Sega sara ga! “E tiko ga kei Josefa o Jiova, e dei tu ga na  nona lomani koya . . . o Jiova e tiko vata kei Josefa, e qai vakavuna o Jiova me tini vinaka na ka kece e cakava.” (Vkte. 39:21-23) Na gauna kece e vakatovolei tiko kina qori, e waraka tiko ga nona Kalou ena vosota.

¹¹ Sa oti e vica na yabaki, sa qai sereki Josefa o Fero, e lesia na dauveiqaravi yalomalumalumu qo me ikarua ga vua ena veiliutaki. (Vkte. 41:1, 37-43) Ni vakasucuma o watina e rua na luvena tagane, e “vakayacana o Josefa na nona ulumatua me o Manasa, ni tukuna o koya, ‘Sa vakavuna na Kalou meu guilecava na noqu leqa kece.’ E vakayacana na kena ikarua me o Ifireimi ni tukuna o koya: ‘Sa cakava na Kalou meu vuavuaivinaka ena vanua au bula vakaloloma kina.’” (Vkte. 41:51, 52) Ni yalodina tiko ga vua na Kalou o Josefa, e vakaicovitaki ena nodra vakabulai na Isireli kei ira na Ijipita. E matata ga e ke ni kila o Josefa ni o Jiova ga e vakaicovitaki koya, e vakalougatataki koya tale ga.—Vkte. 45:5-9.

12. E yalodina tiko ga vakacava o Jisu ni vakatovolei?

¹² O Jisu Karisito tale ga a talairawarawa tiko ga vua na Kalou ena gauna e dau vakatovolei kina na nona vakabauta, e qai vakaicovitaki. Cava e vukei koya me vosota? E vakamacalataki ena Vosa ni Kalou: “Ena vuku ni marau e tu e matana, e vosota kina na kaunirarawa qai sega ni dua na ka vua me vakamaduataki.” (Iper. 12:2) E marautaka vakalevu o Jisu nona vakaitavi ena vakalagilagi ni yaca ni Kalou. E vakaicovitaki tale ga ni vakadonui koya o Tamana, qai soli vua e levu na itavi dokai. E volaitukutukutaki ena iVolatabu ni “sa dabe tale ga ena ligaimatau ni itikotiko vakaturaga ni Kalou.” Tukuni ena dua tale na tikinivolatabu: “E vakacerecerei koya kina na Kalou ena dua na itutu cecere qai solia vakayalololoma vua na yaca e uasivia na vo tale ni yaca.”—Fpai. 2:9.

13, 14. Na cava nona rai o Jiova ena veika eda cakava ena vukuna?

¹³ Eda rawa ni vakadeitaka ni o Jiova e taleitaka na noda sasaga kece meda qaravi koya. E kila vinaka na gauna eda sega ni lomadei kina se nida vakatitiqataka e dua na ka. E lomani keda nida yalolailai ena vuku ni leqa vakailavo se ni yalani noda veiqaravi tabu nida tauvimate se da lomaleqataka e dua na ka. Eda nuidei gona na tamata i Jiova ni na kauaitaki keda vakayalololoma ena vuku ni ka eda cakava meda yalodina tiko ga kina vua.—Wilika Iperiu 6:10, 11.

¹⁴ Meda nanuma tiko ni gauna eda torovi koya kina na “Daurogo masu” eda na nuidei ni na kauaitaka tale ga na veika eda leqataka tu. (Same 65:2) Ena sega tale ni lomalomarua tiko “na Tama ni yalololoma, na Kalou e dau vakacegui keda” me vakarautaka na sala me vakacegui kina na lomada kei na veika eda gadreva vakayalo, de dua ena vakayagataki ira sara ga eda vakabauta vata. (2 Kor. 1:3) E dau tara na loma i Jiova noda yalololoma. “O koya e lomana na dravudravua e soli ka tiko vei Jiova, ena saumi vua na ka e cakava.” (Vkai. 19:17; Maciu 6:3, 4) Koya gona, noda vukei ira na vakaloloma, da qai sega ni nanumi keda ga, e raica na Kalou me vaka eda soli ka tiko vua. Ena sauma lesu na noda yalololoma ni vakaicovitaki keda.

15. Na icocovi cava o rai vakanamata kina? (Raica na imatai ni iyaloyalo.)

¹⁵ E vakayaloqaqataki ira na lumuti lotu vaKarisito na nodra nuitaka ‘na isala vakatui ni yalododonu ena solia na Turaga, na turaganilewa yalododonu me icovi ena siga ya.’ (2 Tim. 4:7, 8) Sega ni kena ibalebale  qori ni o lawakitaki ke duatani tale na inuinui e vakarautaka vei iko na Kalou. Vica vata na milioni na ‘so tale na sipi’ era rai vakanamata tu ena nodra icovi ni gauna se bera mai, oya na bula tawamudu ena parataisi e vuravura. “Era na kunea na marau vakasakiti ena levu ni vakacegu.”—Joni 10:16; Same 37:11.

16. E uqeti keda vakacava na 1 Joni 3:19, 20?

¹⁶ So na gauna eda nanuma ni lailai na ka eda cakava tiko, se da sega ni vakadeitaka ni marautaka o Jiova na noda sasaga. De dua eda na vakatitiqataka ni ganiti keda na ka eda vakaicovitaki kina. Ia meda kua sara ni guilecava “ni uasivia na lomada na Kalou, e kila tale ga na ka kece.” (Wilika 1 Joni 3:19, 20.) Ke da nanuma mada ga ni lailai na ka eda vakayacora, ena vakaicovitaki keda ga o koya ena noda veiqaravi tabu kece e vu mai lomada, e yavutaki ena noda vakabauta kei na loloma.—Mari. 12:41-44.

17. Na icovi cava eda marautaka tiko ena gauna qo?

¹⁷ Na gauna butobuto mada ga eda bula tiko kina qo ena iotioti ni veisiga i Setani, e se vakalougatataki ira tiko ga nona tamata o Jiova. E raica mera bulabula vinaka vakayalo na nona dauveiqaravi ena levu ni ka vakayalo e vakarautaki vei ira. (Aisea 54:13) Me vaka e yalataka o Jisu, e vakaicovitaki keda ena gauna qo o Jiova meda lewena e dua na vuvale dauloloma e vuravura raraba era tiko kina na tacida vakayalo. (Mari. 10:29, 30) O ira tale ga na yalogu na vakasaqara tiko na Kalou era vakaicovitaki ena vakacegu ni vakasama kei na marau e sega ni vakatauvatani rawa.—Fpai. 4:4-7.

18, 19. Na cava nodra rai na dauveiqaravi i Jiova me baleta na nodra vakaicovitaki?

¹⁸ Era vakadinadinataka na dauveiqaravi i Jiova e vuravura raraba na icovi talei e vakalougatataki ira kina o koya. Kena ivakaraitaki e kaya o Bianca mai Jamani: “Au vakavinavinakataki Jiova vakalevu nona vukei au ena ka au dau lomaleqataka, kei na nona veitokoni e veisiga. E veilecayaki qai velavela na vuravura eda bula tiko kina nikua. Ia niu cakacaka voleka kei Jiova, au nuidei sara ga. Niu vakuai au ena vukuna, e dau vakalougatataki au tale vakalevu.”

¹⁹ Vakasamataki Paula tale ga, e yabaki 70 mai Kenada, qai vakaleqai tu nona suitu, yalani kina nona veitosoyaki. E kaya: “Ni yalani noqu veitosoyaki, sega ni kena ibalebale me yalani tale ga na noqu cakacaka vakaitalatala. Au dau vakayagataka vinaka eso tale na iwalewale ni vunau me vaka na vunau ena talevoni, se vunau tawalokuci. E tiko na noqu ivola lailai, au dau lavetaka kina eso na tikinivolatabu, qai dau vakayaloqaqataki au sara ga na noqu railesuva ena so na gauna. Au vakatoka na noqu ivolalailai qori me ‘iVola ni Noqu Bula.’ Eda na sega ni yalolailai vakalevu ke da rai vakanamata tiko ga ina vosa ni yalayala i Jiova.” De dua e duidui na kemu ituvaki kei na ka erau sotava tiko o Bianca kei Paula. Ia o se rawa tiko ga ni vakasamataka eso na sala e vakaicovitaki iko kina o Jiova kei ira eso tale. Ena vinaka sara ke o vakasamataka nona vakalougatataki iko sara tiko ga nikua o Jiova, kei na sala ena cakava kina qori ena gauna se bera mai!

20. Na cava eda rawa ni rai vakanamata kina nida qaravi Jiova mai vu ni lomada?

²⁰ Kua vakadua ni guilecava ni na ‘saumi vakalevu’ se na vakaicovitaki na nomu masu mai vu ni lomamu kei na nomu dau sega ni tu suka na torovi Jiova. Ni o ‘cakava na loma ni Kalou’ o rawa ni nuidei ni na ‘nomu na ka e yalataki.’ (Iper. 10:35, 36) Meda vaqaqacotaka tiko mada ga na noda vakabauta, me vu tale ga mai lomada noda qaravi Jiova. Eda rawa ni cakava qori nida kila ni na vakaicovitaki keda ga kina o koya ena kena gauna donu.—Wilika Kolosa 3:23, 24.