O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

Na valavala ca cava a vakaibalebaletaka tiko o Jisu ena Maciu 18:15-17?

A dusia tiko o Jisu na valavala a rawa nira walia ga o ira era veileqaleqati kina. Na bibi tale ga ni cala qori e ganita na veivakasivoi ke sega ni wali. Kena ivakaraitaki, na vakaucaca se veidabui.​—w16.05, t. 7.

Na cava mo cakava me yaga nomu wili iVolatabu?

O rawa ni muria qo: Me kua ni qiqo nomu rai ni o wiliwili, ni o qara tiko na ulutaga o na via muria; taroga eso na taro va qo: ‘Au na vakayagataka vakacava qo meu vukei ira kina eso tale?’; vakayagataka tale ga na iyaya sa tu nikua mo vakekeli kina ena ulutaga o wilika.​—w16.05, t. 24-26.

E cala meda lolosi na lotu vaKarisito nida vakabauta na veivakaturi?

Noda vakabauta na veivakaturi e sega ni kauta laivi na rarawa eda na rairai vakila. A lolositaka mada ga o Eparama na mate i Sera. (Vkte. 23:2) Ni toso na gauna, eda na sega ni rarawa vakalevu.​—wp16.3, t. 4.

O cei e vakatayaloyalotaka na tagane e taura na ileu ni iqi nei vunivola kei na ono na tagane eratou taura na iyaragi e vakamacalataki ena Isikeli wase 9?

Qori na mataivalu vakalomalagi a vakaitavi ena kena vakarusai o Jerusalemi, ena vakaitavi tale ga ena veivakarusai ena Amaketoni. Ena noda gauna, na parofisai qori e vakatayaloyalotaki Jisu Karisito, ni na vakatakilakilataki ira na bula.​—w16.06, t. 16-17.

Na ituvaki cava a rawa ni kawaboko kina na iVolatabu?

A sega ni kawaboko (1) ni nanumi ni rawa ni vuca na iyaya ni volavola me vaka na kuta kei na kulinimanumanu; (2) nira saga mada ga na dauveitusaqati, qo o ira na daunipolitiki kei na iliuliu ni lotu mera vakawabokotaka; (3) nira saga eso mera vakatanitaka na kena itukutuku.​—wp16.4, t. 4-7.

Na cava meda cakava me rawarawa kina noda bula?

Kila na ka o gadreva dina, kua ni vakayagataki ilavo vakaveitalia. Me dua na ituvatuva ni vakayagataki ilavo. Biuta laivi na ka o na sega ni vakayagataka. Sauma na dinau. Vakalailaitaka nomu gauna ni cakacaka, tuvanaka mo vakalevutaka nomu cakacaka vakaitalatala.​—w16.07, t. 10.

E vakamacalataka vakacava na iVolatabu na ka e vinaka cake mai na koula se siliva?

E tukuni ena Jope 28:12, 15 ni vuku vakalou e vinaka cake mai na koula se siliva. Ni o qara na vuku vakalou, saga mo yalomalumalumu tiko ga, me kaukaua tale ga nomu vakabauta.​—w16.08, t. 18-19.

E veiganiti nikua mera vakumi na tacida tagane?

Ena rairai veiganiti qori ena so na ivakarau vakavanua, vakabibi ke qarauni me savasava qai sega ni cati kina na itukutuku vinaka. Ia eso na tacida era na rairai sega ni via vakumi. (1 Kor. 8:9) Ena so tale na vanua, e sega ni kena ivakarau vei ira na italatala ni lotu vaKarisito mera vakumi.​—w16.09, t. 21.

Na cava meda nuitaka kina na ka e tukuna na iVolatabu me baleta nodrau vakasota o Tevita kei Koliaci?

E tukuni ni 2.9 ga na mita na balavu kei Koliaci, e lailai tale na tamata balavu duadua e volatukutukutaki ni bula ena noda gauna. A bula dina o Tevita me vaka e vakadinadinataki ena ka e ceuti mai na gauna makawa, cavuti kina na mataqali i Tevita vaka kina na ka e tukuna o Jisu. E sota donu na ka e tukuni me baleta na gauna makawa kei na ka e kilai nikua.​—wp16.5, t. 13.

E duidui vakacava na kilaka, raiyawa, kei na vuku?

O koya e kilaka e kila na itukutuku, se na kena dina. O koya e raiyawa e raica rawa na veisemati ni rua na ka. Ia o koya e vuku e rawa ni vakayagataka vinaka nona kilaka kei na raiyawa.​—w16.10, t. 18.